ನೆಲಮಂಗಲ: ಹಾಡುಹಗಲೆ ಪಿಸ್ತೂಲ್ ತೋರಿಸಿ ಚಿನ್ನಾಭರಣ ದೋಚಲು ಯತ್ನಿಸಿದ ದುಷ್ಕರ್ಮಿಗಳು

ನೆಲಮಂಗಲ, ಫೆಬ್ರವರಿ 10: ನಾಲ್ವರು ದುಷ್ಕರ್ಮಿಗಳು ಹಾಡುಹಗಲೆ ಪಿಸ್ತೂಲ್ ತೋರಿಸಿ ಚಿನ್ನಭರಣ (Gold) ದೋಚಲು ಯತ್ನಿಸಿರುವ ಘಟನೆ ಬೆಂಗಳೂರು (Bengaluru) ಉತ್ತರ ತಾಲೂಕಿನ ತೋಟದಗುಡ್ಡದಹಳ್ಳಿಯಲ್ಲಿ ನಡೆದಿದೆ. ಫೆಬ್ರವರಿ 7 ರಂದು ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಮಾದನಾಯಕನಹಳ್ಳಿ ಪೊಲೀಸ್ (Police) ಠಾಣೆಯಲ್ಲಿ IPC 393 ಕಲಂ 27(1) ಆರ್ಮ್ಸ್ ಆಕ್ಟ್ 1959ರ ಅಡಿ ಪ್ರಕರಣ ದಾಖಲಾಗಿದೆ.

ಫೆಬ್ರವರಿ 7 ರಂದು ಬೆಳಿಗ್ಗೆ 8:45ರ ಸುಮಾರಿಗೆ ಇಬ್ಬರು ಅಪರಿಚಿತರು ಹರಿಹಂತ್ ಜ್ಯುವೆಲರ್ಸ್ ಅಂಗಡಿಗೆ ಬಂದಿದ್ದಾರೆ. ಇದೆ ಅಂಗಡಿಯಲ್ಲಿ ಕೆಲಸ ಮಾಡುತ್ತಿದ್ದ ವಿಷ್ಣು ಅಲಿಯಾಸ್​ ಮಾಣಕ್ ರಾಮ್ (22 ವರ್ಷ) ಎಂಬ ಯುವಕನಿಗೆ ಮಾರ್ವಾಡಿ ಭಾಷೆಯಲ್ಲಿ ಯಾವ ಊರು ಎಂದು ಕೇಳಿದ್ದಾರೆ. ಅದಕ್ಕೆ ವಿಷ್ಣು ರಾಜಸ್ಥಾನದ ಅಸ್ಸಾವರಿಯವ ಎಂದು ಹೇಳಿದ್ದಾರೆ. ಬಳಿಕ ಆರೋಪಿಗಳು ವಿಷ್ಣುಗೆ ಬೆಳ್ಳಿಯ ಬ್ರೇಸ್​ ಲೆಟ್​ ತೋರಿಸು ಎಂದು ಹೇಳಿದ್ದಾರೆ. ಸರಿ ಎಂದು, ವಿಷ್ಣು ಬ್ರೇಸ್ ಲೇಟ್ ತೋರಿಸಲು ಷೋ ಕೇಸ್​ನಿಂದ ತೆಗೆಯುವ ಸಮಯದಲ್ಲಿ ಇನ್ನಿಬ್ಬರು ಅಂಗಡಿಯೊಳಗೆ ನುಗ್ಗಿದ್ದಾರೆ.

ಇದನ್ನೂ ಓದಿ: ನೀವು ಮನೆಯಲ್ಲಿ ಒಂಟಿಯಾಗಿ ಇರುತ್ತೀರಾ? ಹಾಗಿದ್ರೆ ಎಚ್ಚರ! ಹಾಡಹಗಲೇ ಮನೆಗೆ ನುಗ್ಗಿ ದರೋಡೆ, ಓರ್ವ ಅರೆಸ್ಟ್

ಇವರೊಲ್ಲಬ್ಬ ಏಕಾಏಕಿ ಪ್ಯಾಂಟ್​ನ ಸೊಂಟದ ಪಟ್ಟಿಯ ಹೊಟ್ಟೆಯ ಬಳಿ ಸಿಕ್ಕಿಸಿಕೊಂಡಿದ್ದ ಪಿಸ್ತೂಲ್ ಅನ್ನು ತೆಗೆದು ಕಿರುಚಿಕೊಳ್ಳಬೇಡ ಎಂದು ಹೇಳುತ್ತಾ ವಿಷ್ಣು ಅವರನ್ನು ಹಿಡಿದುಕೊಳ್ಳಲು ಮುಂದಾದ. ಆಗ ವಿಷ್ಣು ಲಾಕ‌ರ್ ಇರುವ ಸೇವಿ ರೂಂನೊಳಗೆ ಹೋಗಿ ಬಾಗಿಲು ಹಾಕಿಕೊಂಡರು. 2-3 ನಿಮಿಷ ಏನೂ ಶಬ್ದ ಬರದ ಕಾರಣ ವಿಷ್ಣು ಹೊರಗೆ ಬಂದು ನೋಡಿದ್ದು, ನಾಲ್ವರು ಅಪರಿಚಿತರು ಇರಲಿಲ್ಲ. ಬಳಿಕ ಅಂಗಡಿಯಲ್ಲಿನ ವಸ್ತುಗಳನ್ನು ನೋಡಿದಾಗ, ಯಾವ ವಸ್ತುಗಳು ಕಳವಾಗಿರುವುದಿಲ್ಲ. ಬಳಿಕ ವಿಷ್ಣ ಪೊಲೀಸ್​ ಠಾಣೆಗೆ ತೆರಳಿ ದೂರು ನೀಡಿದ್ದು, ನಾಲ್ವರನ್ನು ಪತ್ತೆ ಮಾಡಿ ಕಾನೂನು ರೀತಿ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ