Vijay Deverakonda: ‘ಲೈಗರ್’ ಚಿತ್ರಕ್ಕೆ ಸಂಬಂಧಿಸಿದಂತೆ ಇಡಿ ವಿಚಾರಣೆಗೆ ಹಾಜರಾದ ನಟ ವಿಜಯ್ ದೇವರಕೊಂಡ

ಟಾಲಿವುಡ್​ ನಟ ವಿಜಯ್​ ದೇವರಕೊಂಡ (Vijay Deverakonda) ಇತ್ತೀಚೆಗೆ ‘ಲೈಗರ್’ (Liger)​ ಸಿನಿಮಾದ ಮೂಲಕ ತೆರೆಗೆ ಎಂಟ್ರಿ ನೀಡಿದ್ದರು. ನಿರ್ದೇಶಕ ಪುರಿ ಜಗನ್ನಾಥ್ ‘ಲೈಗರ್’ ಚಿತ್ರವನ್ನು ಅದ್ದೂರಿ ಮತ್ತು ಬಹುಕೋಟಿ ರೂಪಾಯಿ ವೆಚ್ಚದಲ್ಲಿ ತಯಾರಿಸಿದ್ದರು. ಪುರಿ ಜಗನ್ನಾಥ್​, ನಟಿ ಮತ್ತು ನಿರ್ಮಾಪಕಿಯಾದ ಚಾರ್ಮಿ ಕೌರ್​ ಮತ್ತು ಕರಣ್​ ಜೋಹರ್​ ಅವರು ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದರು. ಆದರೂ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ನಿರೀಕ್ಷಿತ ಮಟ್ಟದ ಯಶಸ್ಸು ಕಾಣುವಲ್ಲಿ ವಿಫಲವಾಯಿತು. ‘ಲೈಗರ್’ ಸಿನಿಮಾಗೆ ಇಷ್ಟೊಂದು ಹಣ ಹೂಡಲು ಹೇಗೆ ಸಾಧ್ಯವಾಯ್ತು ಎಂಬ ಹಲವು ಅನುಮಾನಗಳು ಈ ಹಿಂದೆ ಮೂಡಿದ್ದವು. ಹಲವು ಕಂಪನಿಗಳು ‘ಲೈಗರ್​’ (Liger) ಮೇಲೆ ಹಣ ಹೂಡಿದ್ದವು ಹಾಗೂ ವಿದೇಶಿ ಮೂಲದಿಂದಲೂ ಹಣ ಬಂದಿರುವ ಸಾಧ್ಯತೆ ಇದೆ ಎಂಬ ಅನುಮಾನ ವ್ಯಕ್ತವಾಗಿತ್ತು. ಇದರ ಬೆನ್ನಲೇ ಪುರಿ ಜಗನ್ನಾಥ್​ ಮತ್ತು ಚಾರ್ಮಿ ಕೌರ್ ಇಡಿ ವಿಚಾರಣೆಯನ್ನು ಎದುರಿಸಿದ್ದರು. ಈಗ ನಟ ವಿಜಯ್​ ದೇವರಕೊಂಡ ಸರದಿಯಿದ್ದು, ಜಾರಿ ನಿರ್ದೇಶನಾಲಯ (ಇಡಿ) ಮುಂದೆ ಬುಧವಾರ (ನ.30) ಹಾಜರಾಗಿದ್ದಾರೆ.

‘ಲೈಗರ್’​ ಚಿತ್ರಕ್ಕೆ ಭಾರಿ ಬಂಡವಾಳ ಹೂಡಿಕೆ ಮತ್ತು ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆ (ಎಫ್ಇಎಂಎ) ಉಲ್ಲಂಘನೆಗೆ ಸಂಬಂಧಿಸಿದಂತೆ ಹೈದರಾಬಾದ್​ನಲ್ಲಿರುವ ಜಾರಿ ನಿರ್ದೇಶನಾಲಯ ಕಚೇರಿಗೆ ನಟ ವಿಜಯ್​ ದೇವರಕೊಂಡ ವಿಚಾರಣೆಗೆ ಹಾಜರಾಗಿದ್ದಾರೆ. ಮೂಲಗಳ ಪ್ರಕಾರ ಜಾರಿ ನಿರ್ದೇಶನಾಲಯವು ಚಿತ್ರಕ್ಕೆ ಹೂಡಿಕೆ ಮಾಡಿದ ಕಂಪನಿಗಳ, ವಿಜಯ್​ ದೇವರಕೊಂಡ ಪಡೆದ ಸಂಭಾವನೆ ಮತ್ತು ವಿಶ್ವ ವಿಖ್ಯಾತ ಬಾಕ್ಸರ್​​ ಮೈಕ್​ ಟೈಸನ್​ ಸೇರಿದಂತೆ ಇತರೆ ನಟ, ನಟಿಯರಿಗೆ ನೀಡಲಾದ ಸಂಭಾವನೆ ಬಗ್ಗೆ ಪ್ರಶ್ನಿಸಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ: ED ವಿಚಾರಣೆ ಎದುರಿಸಿದ ಪುರಿ ಜಗನ್ನಾಥ್​, ಚಾರ್ಮಿ ಕೌರ್​; ‘ಲೈಗರ್​’ ಬಂಡವಾಳದ ಮೇಲೆ ಅನುಮಾನ

ಆಗಸ್ಟ್​ 25ರಂದು ‘ಲೈಗರ್​’ ಸಿನಿಮಾ ತೆರೆ ಕಂಡಿತ್ತು. ಇದು ವಿಜಯ್​ ದೇವರಕೊಂಡ ಅವರ ಮೊದಲ ಹಿಂದಿ ಸಿನಿಮಾ ಕೂಡ ಆಗಿದೆ. ಅವರಿಗೆ ಜೋಡಿಯಾಗಿ ಬಾಲಿವುಡ್​ ನಟಿ ಅನನ್ಯಾ ಪಾಂಡೆ ನಟಿಸಿದ್ದರು. ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ರಿಲೀಸ್​ ಆದ ಈ ಚಿತ್ರದ ಮೇಲೆ ಸಿಕ್ಕಾಪಟ್ಟೆ ನಿರೀಕ್ಷೆ ಇತ್ತು. ಆದರೆ ಆ ನಿರೀಕ್ಷೆಯ ಮಟ್ಟವನ್ನು ತಲುಪುವಲ್ಲಿ ‘ಲೈಗರ್​’ ಎಡವಿತು. ಪರಿಣಾಮವಾಗಿ ಬಾಕ್ಸ್​ ಆಫೀಸ್​ನಲ್ಲೂ ಮುಗ್ಗರಿಸಿತು.

ಇದನ್ನೂ ಓದಿ: Liger: ‘ಲೈಗರ್ ಸಿನಿಮಾ ಬ್ಲಾಕ್​ ಬಸ್ಟರ್​’: ರಿಲೀಸ್​ಗೂ ಮುನ್ನ ಘೋಷಿಸಿದ ವಿಜಯ್​ ದೇವರಕೊಂಡ

‘ಲೈಗರ್​’ ಸಿನಿಮಾದ ಹಣಕಾಸು ವ್ಯವಹಾರದಿಂದಾಗಿ ಪುರಿ ಜಗನ್ನಾಥ್​ ಅವರು ಸಾಕಷ್ಟು ತೊಂದರೆ ಅನುಭವಿಸಿದ್ದಾರೆ. ಈ ಚಿತ್ರದ ವಿತರಕರ ಜೊತೆಗೆ ಪುರಿ ಕಿರಿಕ್​ ಮಾಡಿಕೊಂಡಿದ್ದರು. ಸಿನಿಮಾ ಸೋತ ಬಳಿಕ ತಮಗೆ ಹಣ ವಾಪಸ್​ ನೀಡಬೇಕು ಎಂದು ಕೆಲವು ವಿತರಕರು ಧಮ್ಕಿ ಹಾಕಿದ್ದರು. ಅಂಥವರಿಗೆ ಪುರಿ ಜಗನ್ನಾಥ್​ ಖಡಕ್​ ಆಗಿ ಉತ್ತರ ನೀಡಿದ ಆಡಿಯೋ ಕ್ಲಿಪ್​ ಕೂಡ ವೈರಲ್​ ಆಗಿತ್ತು.

ಮತ್ತಷ್ಟು ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.