‘ಟಾಕ್ಸಿಕ್’ ನಿರ್ದೇಶಕಿಯನ್ನು ಅನ್​ಫಾಲೋ ಮಾಡಿದ್ದಕ್ಕೆ ನಟಿ ಪಾರ್ವತಿ ಪ್ರತಿಕ್ರಿಯೆ

‘ಟಾಕ್ಸಿಕ್’ ಸಿನಿಮಾದ ನಿರ್ದೇಶಕಿ ಗೀತು ಮೋಹನ್‌ದಾಸ್ ಅವರನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಅನ್‌ಫಾಲೋ ಮಾಡಿದ ವಿಚಾರಕ್ಕೆ ಸಂಬಂಧಿಸಿದಂತೆ ಮಲಯಾಳಂನ ಪ್ರಖ್ಯಾತ ನಟಿ ಪಾರ್ವತಿ ತಿರುವತ್ತು ಅವರು ಕೊನೆಗೂ ಮೌನ ಮುರಿದಿದ್ದಾರೆ. ಯಶ್ ನಟನೆಯ, ಗೀತು ಮೋಹನ್‌ದಾಸ್ ನಿರ್ದೇಶನದ ‘ಟಾಕ್ಸಿಕ್’ ಸಿನಿಮಾ ತೆರೆಕಂಡ ಬೆನ್ನಲ್ಲೇ ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಪಾರ್ವತಿ, ಹಲವು ವಿಷಯಗಳನ್ನು ಹಂಚಿಕೊಂಡಿದ್ದಾರೆ.

2016ರಲ್ಲಿ ‘ಕಸಬಾ’ ಸಿನಿಮಾ ವಿವಾದ ಎದುರಾಗಿದ್ದ ಸಮಯದಿಂದಲೂ ಪಾರ್ವತಿ ಮತ್ತು ಗೀತು ಮೋಹನ್‌ದಾಸ್ ಉತ್ತಮ ಸ್ನೇಹಿತರಾಗಿದ್ದರು. ಆದರೆ ‘ಟಾಕ್ಸಿಕ್’ ಸಿನಿಮಾ ಬಿಡುಗಡೆಗೂ ಮುನ್ನ ಪಾರ್ವತಿ ಅವರು ಇನ್‌ಸ್ಟಾಗ್ರಾಮ್‌ನಲ್ಲಿ ಗೀತು ಅವರನ್ನು ಅನ್‌ಫಾಲೋ ಮಾಡಿದ್ದರು. ಇದರಿಂದ ಇಬ್ಬರ ನಡುವೆ ಎಲ್ಲವೂ ಸರಿಯಿಲ್ಲ ಎನ್ನುವ ವದಂತಿಗಳು ಹಬ್ಬಿದ್ದವು.

ಮೌನ ಮುರಿದ ಪಾರ್ವತಿ:

ಈ ಕುರಿತು ಇತ್ತೀಚೆಗೆ ‘ಗಲಾಟಾ ಪ್ಲಸ್’ಗೆ ನೀಡಿದ ಸಂದರ್ಶನದಲ್ಲಿ ಸ್ಪಷ್ಟನೆ ನೀಡಿದ ಪಾರ್ವತಿ ಅವರು, ‘ಅಲ್ಲಿ ಯಾವುದೇ ಗಂಭೀರ ವಿಚಾರ ನಡೆದಿಲ್ಲ. ಇದನ್ನೊಂದು ಸುದ್ದಿ ಮಾಡುವ ಅಗತ್ಯವೂ ಇಲ್ಲ. ಮಹಿಳೆಯರನ್ನು ಪರಸ್ಪರ ಎತ್ತಿಕಟ್ಟುವ ಪ್ರಯತ್ನಗಳು ನಡೆಯುತ್ತಿವೆ. ಆದರೆ ನಾನು ಅಂತಹ ವಿಷಯಗಳಿಗೆ ಬಲಿಯಾಗುವುದಿಲ್ಲ’ ಎಂದು ಖಡಕ್ ಆಗಿ ಹೇಳಿದ್ದಾರೆ.

ಮಲಯಾಳಂ ಚಿತ್ರರಂಗದ ಮಹಿಳೆಯರ ಸಂಘಟನೆಯಾದ ‘ಡಬ್ಲ್ಯುಸಿಸಿ’ (ವುಮೆನ್ ಇನ್ ಸಿನಿಮಾ ಕಲೆಕ್ಟಿವ್) ಕುರಿತು ಮಾತನಾಡುತ್ತಾ, ‘ನಮ್ಮ ನಡುವೆ ಉತ್ತಮ ತಿಳುವಳಿಕೆ ಇದೆ. ಸಿನಿಮಾ ತನ್ನದೇ ಆದ ರೀತಿಯಲ್ಲಿ ಪ್ರೇಕ್ಷಕರನ್ನು ತಲುಪಬೇಕು. ಯಾವುದೇ ವೈಯಕ್ತಿಕ ಇಷ್ಟ-ಕಷ್ಟಗಳು ಸಿನಿಮಾದ ಮೇಲೆ ಪ್ರಭಾವ ಬೀರಬಾರದು’ ಎಂದು ಪಾರ್ವತಿ ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ: ‘ಟಾಕ್ಸಿಕ್’ ನಿರ್ದೇಶಕಿ ಗೀತು ಮೋಹನ್​ದಾಸ್ ಹಿನ್ನೆಲೆ ಏನು? ಈ ವಿಡಿಯೋದಲ್ಲಿದೆ ಪೂರ್ತಿ ವಿವರ

‘ಟೇಕ್ ಆಫ್’, ‘ಚಾರ್ಲಿ’, ‘ಬೆಂಗಳೂರು ಡೇಸ್’ ಮುಂತಾದ ಸೂಪರ್ ಹಿಟ್ ಸಿನಿಮಾಗಳಲ್ಲಿ ನಟಿಸಿರುವ ಪಾರ್ವತಿ ಅವರು ಶೀಘ್ರದಲ್ಲೇ ಮಲಯಾಳಂನ ‘ಪ್ರಥಮ ದೃಷ್ಟ್ಯಾ ಕುಟ್ಟಕ್ಕಾರ್’ ಹಾಗೂ ಹೃತಿಕ್ ರೋಷನ್ ನಿರ್ಮಾಣದ ‘ದಿ ಸ್ಟಾರ್ಮ್’ ವೆಬ್ ಸರಣಿಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ‘ಮಿಲನ’ ಸಿನಿಮಾ ಮೂಲಕ ಪಾರ್ವತಿ ಅವರು ಕನ್ನಡದ ಸಿನಿಪ್ರಿಯರನ್ನು ರಂಜಿಸಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.