ಆಲಿಯಾ ಭಟ್ ನಟನೆಯ ‘ಆಲ್ಫಾ’ ಚಿತ್ರದ ಹಿಂಸಾತ್ಮಕ ದೃಶ್ಯಗಳಿಗೆ ಸೆನ್ಸಾರ್ ಕತ್ತರಿ
ನಟಿ ಆಲಿಯಾ ಭಟ್ ಅವರು ಸಂಪೂರ್ಣ ಆ್ಯಕ್ಷನ್ ಅವತಾರ ತಾಳಿರುವ ‘ಆಲ್ಫಾ’ ಸಿನಿಮಾ ಜುಲೈ 3ರಂದು ರಿಲೀಸ್ ಆಗಲಿದೆ. ಈ ಸಿನಿಮಾಗೆ ಸೆನ್ಸಾರ್ ಪಕ್ರಿಯೆ ಮುಗಿದಿದ್ದು, ಒಂದಷ್ಟು ಬದಲಾವಣೆಗಳನ್ನು ಸೂಚಿಸಲಾಗಿದೆ. ಹಿಂಸಾತ್ಮಕ ದೃಶ್ಯಗಳ ತೀವ್ರತೆಯನ್ನು ಕಡಿಮೆ ಮಾಡಲು ‘ಆಲ್ಫಾ’ ಚಿತ್ರತಂಡಕ್ಕೆ ಸೂಚನೆ ನೀಡಲಾಗಿದೆ.
ಮುಖ್ಯಾಂಶಗಳು
- ಬಹುನಿರೀಕ್ಷಿತ ‘ಆಲ್ಫಾ’ ಸಿನಿಮಾಗೆ ಸೆನ್ಸಾರ್ ಮಂಡಳಿಯಿಂದ ಸಿಕ್ತು ‘ಯು/ಎ’.
- ದೃಶ್ಯಗಳಿಗೆ ಕತ್ತರಿ ಹಾಕಲಾಗಿದೆ, ಆದರೆ ಯಾವುದೇ ದೃಶ್ಯ ಪೂರ್ತಿ ಡಿಲೀಟ್ ಆಗಿಲ್ಲ.
- ಆಲಿಯಾ ಭಟ್ ಅಭಿಮಾನಿಗಳಲ್ಲಿ ಭಾರಿ ನಿರೀಕ್ಷೆ ಮೂಡಿಸಿರುವ ಸಿನಿಮಾ ಇದು.
ಬಾಲಿವುಡ್ ನಟಿ ಆಲಿಯಾ ಭಟ್ (Alia Bhatt) ಮತ್ತು ಶರ್ವರಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ, ಭಾರಿ ನಿರೀಕ್ಷೆ ಮೂಡಿಸಿರುವ ಸ್ಪೈ ಥ್ರಿಲ್ಲರ್ ಕಥಾಹಂದರದ ‘ಆಲ್ಫಾ’ (Alpha) ಸಿನಿಮಾದ ಪ್ರದರ್ಶನಕ್ಕೆ ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಗ್ರೀನ್ ಸಿಗ್ನಲ್ ನೀಡಿದೆ. ಆದರೆ, ಚಿತ್ರದಲ್ಲಿನ ಕೆಲವು ತೀವ್ರ ಹಿಂಸಾತ್ಮಕ ದೃಶ್ಯಗಳು ಮತ್ತು ಸಂಭಾಷಣೆಗಳಿಗೆ ಸೆನ್ಸಾರ್ ಮಂಡಳಿ ಕತ್ತರಿ ಹಾಕಿದ್ದು, ಅಂತಿಮವಾಗಿ ‘U/A 16+’ ಪ್ರಮಾಣಪತ್ರವನ್ನು ನೀಡಿದೆ. ಜೂನ್ 29ರಂದು ನೀಡಿರುವ ಪ್ರಮಾಣೀಕರಣದ ಪ್ರಕಾರ, ಇಂಗ್ಲಿಷ್ ಉಪಶೀರ್ಷಿಕೆಗಳನ್ನು ಹೊಂದಿರುವ ಚಿತ್ರದ ಹಿಂದಿ ಆವೃತ್ತಿಗೆ ಈ ಸರ್ಟಿಫಿಕೇಟ್ ಸಿಕ್ಕಿದೆ. ಮಂಡಳಿ ಸೂಚಿಸಿದ ಹಲವು ಬದಲಾವಣೆಗಳನ್ನು ಚಿತ್ರತಂಡ ಅಳವಡಿಸಿಕೊಂಡ ನಂತರವೇ ಈ ಅನುಮತಿ ನೀಡಲಾಗಿದೆ.
ಸೆನ್ಸಾರ್ ಮಂಡಳಿಯ ದಾಖಲೆಗಳ ಪ್ರಕಾರ, ‘ಆಲ್ಫಾ’ ಚಿತ್ರದಲ್ಲಿನ ಹಿಂಸಾತ್ಮಕ ದೃಶ್ಯಗಳು ಮತ್ತು ಭಾಷೆಯ ಬಳಕೆಗೆ ಪ್ರಮುಖವಾಗಿ ಆಕ್ಷೇಪ ವ್ಯಕ್ತವಾಗಿತ್ತು. ಆದರೆ ಚಿತ್ರದ ಯಾವುದೇ ದೃಶ್ಯವನ್ನು ಸಂಪೂರ್ಣವಾಗಿ ಡಿಲೀಟ್ ಮಾಡಲಾಗಿಲ್ಲ. ಬದಲಾಗಿ, ಪರ್ಯಾಯ ದೃಶ್ಯಗಳನ್ನು ಬಳಸಲು ಮಂಡಳಿ ಅನುಮತಿ ನೀಡಿದೆ. ಚಿತ್ರದ 1 ಗಂಟೆ 36 ನಿಮಿಷ 41 ಸೆಕೆಂಡ್ಗಳಲ್ಲಿ ಬರುವ ಸರಣಿ ಚಾಕು ಇರಿತದ ಭೀಕರ ದೃಶ್ಯವನ್ನು ಪರ್ಯಾಯ ಶಾಟ್ಗಳನ್ನು ಬಳಸಿ ಅದರ ತೀವ್ರತೆ ಕಡಿಮೆ ಮಾಡಲಾಗಿದೆ.
ದೃಶ್ಯ ಮತ್ತು ಪದಗಳ ಬದಲಾವಣೆಗಳೂ ಸೂಚಿಸಲಾಗಿದೆ. ಚಿತ್ರದ 25ನೇ ನಿಮಿಷ ಹಾಗೂ 38ನೇ ನಿಮಿಷದಲ್ಲಿ ಬರುವ ಕೆಲವು ದೃಶ್ಯಗಳನ್ನು ಮಾರ್ಪಡಿಸಲಾಗಿದೆ. ಇನ್ನು 35ನೇ ನಿಮಿಷದಲ್ಲಿ ಬರುವ ಆಕ್ಷೇಪಾರ್ಹ ನಿಂದನಾತ್ಮಕ ಪದವೊಂದನ್ನು ಸಂಪೂರ್ಣವಾಗಿ ತೆಗೆದುಹಾಕಲಾಗಿದೆ. ಜುಲೈ 3ರಂದು ಈ ಸಿನಿಮಾ ಬಿಡುಗಡೆ ಆಗಲಿದ್ದು, ಅಭಿಮಾನಿಗಳಲ್ಲಿ ನಿರೀಕ್ಷೆ ಮೂಡಿಸಿದೆ.
ಕೇವಲ ದೃಶ್ಯಗಳಲ್ಲದೆ, ಚಿತ್ರದ ಆರಂಭದ ಡಿಸ್ಕ್ಲೈಮರ್ ಪರಿಷ್ಕರಿಸಲು ಮತ್ತು ಎಲ್ಲಾ ಹಾಡುಗಳಿಗೆ ಇಂಗ್ಲಿಷ್ ಸಬ್ಟೈಟಲ್ಗಳನ್ನು ಕಡ್ಡಾಯವಾಗಿ ಸೇರಿಸಲು ಸಿಬಿಎಫ್ಸಿ ಸೂಚಿಸಿದೆ. ಮದ್ಯಪಾನ ವಿರೋಧಿ ಶಾಸನಬದ್ಧ ಎಚ್ಚರಿಕೆಗಳನ್ನು ಪ್ರದರ್ಶಿಸುವುದು, ಬಾಲ ಕಲಾವಿದರ ಪೋಷಕರ ಒಪ್ಪಿಗೆ ಪತ್ರವನ್ನು ಸಲ್ಲಿಸುವುದು ಸೇರಿದಂತೆ ಕಾನೂನು ನಿಯಮಗಳನ್ನು ಪಾಲಿಸಲು ಚಿತ್ರತಂಡಕ್ಕೆ ನಿರ್ದೇಶನ ನೀಡಲಾಗಿದೆ.
ಇದನ್ನೂ ಓದಿ: ‘ಆಲ್ಫಾ’ ಟ್ರೇಲರ್ ರಿಲೀಸ್: ಲಂಕೆ ಸುಡಲು ಬಂದ ಆಧುನಿಕ ಸೀತೆ ಆಲಿಯಾ ಭಟ್
ಈ ಎಲ್ಲಾ ಬದಲಾವಣೆಗಳ ನಂತರ ‘ಆಲ್ಫಾ’ ಚಿತ್ರದ ಒಟ್ಟು ಅವಧಿ 140 ನಿಮಿಷ 48 ಸೆಕೆಂಡ್ಗಳು ಎಂದು ನಿಗದಿಪಡಿಸಲಾಗಿದೆ. ಅಂದರೆ ಈ ಸಿನಿಮಾ ಸುಮಾರು 2 ಗಂಟೆ 21 ನಿಮಿಷಗಳಷ್ಟು ಅವಧಿಯನ್ನು ಹೊಂದಿರಲಿದೆ. ಯಶ್ ರಾಜ್ ಫಿಲ್ಮ್ಸ್ ನಿರ್ಮಿಸಿರುವ ಈ ಚಿತ್ರವು ಯಶ್ ರಾಜ್ ಸ್ಪೈ ಯೂನಿವರ್ಸ್ನ ಅತ್ಯಂತ ಪ್ರಮುಖ ಸಿನಿಮಾವಾಗಿದ್ದು, ಸೆನ್ಸಾರ್ ಪ್ರಕ್ರಿಯೆ ಮುಗಿಯುವುದರೊಂದಿಗೆ ಚಿತ್ರಮಂದಿರಗಳಲ್ಲಿ ಅಬ್ಬರಿಸಲು ಸಜ್ಜಾಗಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.