ಇರ್ಫಾನ್​ ಖಾನ್​ ಜನ್ಮದಿನ: ಅಪ್ರತಿಮ ಕಲಾವಿದನ 5 ಅತಿ ಮುಖ್ಯ ಸಿನಿಮಾಗಳು

ನಟ ಇರ್ಫಾನ್​ ಖಾನ್​ (Irrfan Khan) ಅವರು ಚಿತ್ರರಂಗದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದರು. ಬಾಲಿವುಡ್​ ಮಾತ್ರವಲ್ಲದೇ ಹಾಲಿವುಡ್​ ಸಿನಿಮಾಗಳಲ್ಲೂ ನಟಿಸುವ ಮೂಲಕ ಅವರು ಸ್ಟಾರ್​ ಕಲಾವಿದ ಎನಿಸಿಕೊಂಡಿದ್ದರು. ಒಂದು ವೇಳೆ ಅವರು ಬದುಕಿದ್ದರೆ ಇಂದು (ಜ.7) 55ನೇ ವರ್ಷದ ಬರ್ತ್​ಡೇ ಆಚರಿಸಿಕೊಳ್ಳಬೇಕಿತ್ತು. ಜನ್ಮದಿನದ (Irrfan Khan Birthday) ಪ್ರಯುಕ್ತ ಅವರ ಅತಿ ಮುಖ್ಯ ಸಿನಿಮಾಗಳನ್ನು ಅಭಿಮಾನಿಗಳು ನೆನಪಿಸಿಕೊಳ್ಳುತ್ತಿದ್ದಾರೆ. 2020ರ ಏಪ್ರಿಲ್​ 20ರಂದು ಇರ್ಫಾನ್​ ಖಾನ್​ ಅವರು ಕ್ಯಾನ್ಸರ್​ನಿಂದ ಮೃತಪಟ್ಟಿದ್ದು ಚಿತ್ರರಂಗದ ಪಾಲಿನ ದೊಡ್ಡ ನಷ್ಟ. ಇನ್ನೂ ಅನೇಕ ಸಿನಿಮಾಗಳಲ್ಲಿ ಅವರು ನಟಿಸಬೇಕಿತ್ತು. ಮೂರು ದಶಕಗಳ ಸಿನಿಮಾ ಜರ್ನಿಯಲ್ಲಿ ಅಭಿಮಾನಿಗಳು ಸದಾ ನೆನಪಿನಲ್ಲಿ ಇಟ್ಟುಕೊಳ್ಳವಂತಹ ಸಿನಿಮಾಗಳನ್ನು ಕೊಟ್ಟು ಹೋಗಿದ್ದಾರೆ ಇರ್ಫಾನ್​ ಖಾನ್​.

ಮಕ್ಬೂಲ್​ (2003)

ಖ್ಯಾತ ನಿರ್ದೇಶಕ ವಿಶಾಲ್​ ಭಾರದ್ವಜ್​ ಅವರು ‘ಮಕ್ಬೂಲ್​’ ಚಿತ್ರಕ್ಕೆ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ಈ ಚಿತ್ರದ ಪ್ರಮುಖ ಪಾತ್ರದಲ್ಲಿ ಇರ್ಫಾನ್​ ಖಾನ್​ ನಟಿಸಿದ್ದರು. ಶೇಕ್ಸ್​ಪಿಯರ್​ ಬರೆದ ‘ಮ್ಯಾಕ್​ಬತ್​’ ನಾಟಕವನ್ನು ಆಧರಿಸಿ ಈ ಸಿನಿಮಾ ತಯಾರಾಗಿತ್ತು. ಈ ಸಿನಿಮಾದಿಂದ ಇರ್ಫಾನ್​ ಖಾನ್​ ಅವರಿಗೆ ದೊಡ್ಡ ಮಟ್ಟದ ಖ್ಯಾತಿ ಸಿಕ್ಕಿತ್ತು.

ಪಾನ್​ ಸಿಂಗ್​ ತೋಮರ್​ (2012)

ತಿಗ್ಮಾನ್ಶು ಧುಲಿಯಾ ನಿರ್ದೇಶನ ಮಾಡಿದ ‘ಪಾನ್​ ಸಿಂಗ್​ ತೋಮರ್​’ ಸಿನಿಮಾದಲ್ಲಿ ಇರ್ಫಾನ್​ ಖಾನ್​ ಅವರ ಅಭಿನಯ ಗಮನ ಸೆಳೆಯುತ್ತದೆ. ಈ ಚಿತ್ರದ ನಟನೆಗಾಗಿ ಅವರಿಗೆ ರಾಷ್ಟ್ರ ಪ್ರಶಸ್ತಿ ಸಿಕ್ಕಿತು. 60ನೇ ರಾಷ್ಟ್ರ ಪ್ರಶಸ್ತಿ ಪಟ್ಟಿಯಲ್ಲಿ ‘ಅತ್ಯುತ್ತಮ ಚಿತ್ರ’ ಪ್ರಶಸ್ತಿ ಪಡೆಯುವಲ್ಲಿ ಈ ಸಿನಿಮಾ ಯಶಸ್ವಿ ಆಯಿತು.

ತಲ್ವಾರ್​ (2015)

2008ರಲ್ಲಿ ದೇಶಾದ್ಯಂತ ಸುದ್ದಿ ಮಾಡಿದ್ದ ಡಬಲ್​ ಮರ್ಡರ್​ ಕೇಸ್​ ಆಧರಿಸಿ ‘ತಲ್ವಾರ್​’ ಸಿನಿಮಾ ಮೂಡಿಬಂದಿತ್ತು. ಈ ಚಿತ್ರದಲ್ಲಿ ಇರ್ಫಾನ್​ ಖಾನ್ ಅವರು ಸಿಐಡಿ ಅಧಿಕಾರಿ ಪಾತ್ರ ಮಾಡಿದ್ದರು. ಈ ಸಿನಿಮಾಗೆ ಮೇಘನಾ ಗುಲ್ಜಾರ್​ ನಿರ್ದೇಶನ ಮಾಡಿದ್ದಾರೆ.

ಹೈದರ್​ (2014)

2014ರಲ್ಲಿ ತೆರೆಕಂಡ ಹೈದರ್​ ಚಿತ್ರಕ್ಕೆ ವಿಶಾಲ್​ ಭಾರದ್ವಜ್​ ನಿರ್ದೇಶನ ಮಾಡಿದ್ದಾರೆ. ಈ ಸಿನಿಮಾದಲ್ಲಿ ಇರ್ಫಾನ್​ ಖಾನ್​ ಅವರದ್ದು ಅತಿಥಿ ಪಾತ್ರ. ಹಾಗಿದ್ದರೂ ಕೂಡ ಅವರು ತಮ್ಮ ನಟನೆಯಿಂದ ಗಮನ ಸೆಳೆದರು. ವಿಲಿಯಮ್​ ಶೇಕ್ಸ್​ಪಿಯರ್​ ಬರೆದ ‘ಹ್ಯಾಮ್ಲೆಟ್​’ ನಾಟಕ ಆಧರಿಸಿ ಈ ಸಿನಿಮಾ ತಯಾರಾಗಿತ್ತು.

ಲೈಫ್​ ಆಫ್​ ಪೈ (2012)

ಇರ್ಫಾನ್​ ಖಾನ್​ ನಟಿಸಿದ ಹಲವು ಇಂಗ್ಲಿಷ್​ ಸಿನಿಮಾಗಳಲ್ಲಿ ‘ಲೈಫ್​ ಆಫ್​ ಪೈ’ ಕೂಡ ಪ್ರಮುಖವಾದದ್ದು. ಇದರಲ್ಲಿ ಇರ್ಫಾನ್​ ಖಾನ್​ ಮಹತ್ವದ ಪಾತ್ರ ನಿಭಾಯಿಸಿದ್ದರು. ಇಂಥ ಹಲವಾರು ಸಿನಿಮಾಗಳನ್ನು ನೀಡಿದ ಅವರು ಇಂದು ನಮ್ಮೊಂದಿಗೆ ಇಲ್ಲ ಎಂಬುದು ನೋವಿನ ಸಂಗತಿ.

ಇದನ್ನೂ ಓದಿ:

ನಟ ಇರ್ಫಾನ್​ ಖಾನ್​ ಮತ್ತು ರಂಗಕರ್ಮಿ ಪ್ರಸನ್ನ ಒಡನಾಟದ ಇಣುಕು ನೋಟ..!

ತಂದೆಯ ಬಟ್ಟೆಯನ್ನೇ ತೊಟ್ಟು ಫಿಲ್ಮ್​ ಫೇರ್​ ಸ್ವೀಕರಿಸಿದ ಇರ್ಫಾನ್​ ಖಾನ್​ ಪುತ್ರ