ಸೋಮವಾರದ ಪರೀಕ್ಷೆಯಲ್ಲಿ ಪಾಸ್​ ಆಯ್ತಾ ‘ಶೈತಾನ್​’? ಈವರೆಗಿನ ಕಲೆಕ್ಷನ್​ ಲೆಕ್ಕ ಇಲ್ಲಿದೆ..

ಜಾನಕಿ ಬೋಡಿಬಾಲಾ, ಅಜಯ್​ ದೇವಗನ್ (Ajay Devgn)​, ಜ್ಯೋತಿಕಾ, ಆರ್​. ಮಾಧವನ್​ ನಟನೆಯ ‘ಶೈತಾನ್​’ ಸಿನಿಮಾ ಹಿಟ್​ ಆಗಲಿದೆ ಎಂದು ರಿಲೀಸ್​ಗೂ ಮೊದಲೇ ಭವಿಷ್ಯ ನುಡಿಯಲಾಗಿತ್ತು. ಹಾರರ್​ ಕಹಾನಿ ಇರುವ ಈ ಸಿನಿಮಾಗೆ ಬಾಕ್ಸ್​ ಆಫೀಸ್​ನಲ್ಲಿ ಉತ್ತಮ ಕಲೆಕ್ಷನ್​ ಆಗಿದೆ. ಮೊದಲ ಮೂರು ದಿನ ‘ಶೈತಾನ್​’ (Shaitan) ಚಿತ್ರಕ್ಕೆ ಬಹುಕೋಟಿ ರೂಪಾಯಿ ಹಣ ಹರಿದು ಬಂತು. ಆದರೆ ಸೋಮವಾರದ ಪರೀಕ್ಷೆಯಲ್ಲಿ ಈ ಸಿನಿಮಾ ಸ್ವಲ್ಪ ಡಲ್​ ಆಗಿದೆ. ನಾಲ್ಕನೇ ದಿನಕ್ಕೆ ಈ ಸಿನಿಮಾದ ಕಲೆಕ್ಷನ್​ (Shaitan Collection) ಒಂದಂಕಿಗೆ ಕುಸಿದಿದೆ. ಇದರಿಂದ ಚಿತ್ರತಂಡಕ್ಕೆ ಸ್ವಲ್ಪ ಚಿಂತೆ ಆಗಿದೆ.

ಮಾರ್ಚ್​ 8ರಂದು ಬಿಡುಗಡೆಯಾದ ‘ಶೈತಾನ್​’ ಸಿನಿಮಾ ಮೊದಲ ದಿನ 15.21 ಕೋಟಿ ರೂ. ಕಲೆಕ್ಷನ್​ ಮಾಡಿತು. ಮೊದಲ ಶೋ ನೋಡಿದವರಿಂದ ಬಾಯಿ ಮಾತಿನ ಪ್ರಚಾರ ಚೆನ್ನಾಗಿ ಸಿಕ್ಕಿತು. ಅದರ ಪರಿಣಾಮವಾಗಿ ಎರಡನೇ ದಿನ ಕೂಡ ಕಲೆಕ್ಷನ್​ ಹೆಚ್ಚಾಯಿತು. ಮಾರ್ಚ್​ 9ರಂದು ‘ಶೈತಾನ್​’ ಗಳಿಸಿದ್ದು 19.18 ಕೋಟಿ ರೂಪಾಯಿ. 3ನೇ ದಿನ 20.74 ಕೋಟಿ ರೂಪಾಯಿ ಹರಿದು ಬಂತು. ಆದರೆ ನಾಲ್ಕನೇ ದಿನ 7.81 ಕೋಟಿ ರೂಪಾಯಿಗೆ ಕಲೆಕ್ಷನ್​ ಕುಸಿಯಿತು.

ಇದನ್ನೂ ಓದಿ: ‘ನನಗೂ ದೆವ್ವದ​ ಅನುಭವ ಆಗಿದೆ, ಆದರೆ ನಾನು ಮಾತಾಡಲ್ಲ’: ಅಜಯ್​ ದೇವಗನ್​

ಯಾವುದೇ ಸಿನಿಮಾಗೆ ಸೋಮವಾರದ ಬಿಸ್ನೆಸ್​ ತುಂಬ ಮುಖ್ಯವಾಗುತ್ತದೆ. ಮೊದಲ 3 ದಿನ ಹೌಸ್​ಫುಲ್​ ಪ್ರದರ್ಶನ ಆಗಿದ್ದರೂ 4ನೇ ದಿನವಾದ ಸೋಮವಾರ ಕಲೆಕ್ಷನ್​ ಕುಸಿಯುವ ಸಾಧ್ಯತೆ ಹೆಚ್ಚಿರುತ್ತದೆ. ‘ಶೈತಾನ್​’ ವಿಚಾರದಲ್ಲೂ ಹಾಗೆಯೇ ಆಗಿದೆ. ಈಗ ರಂಜಾನ್​ ಮಾಸ ಆರಂಭ ಆಗಿದೆ. ಚಿತ್ರಮಂದಿರಕ್ಕೆ ತೆರಳಿ ಸಿನಿಮಾ ನೋಡುವವರ ಸಂಖ್ಯೆ ಕೂಡ ಇಳಿಮುಖ ಆಗಲಿದೆ. ಅದರಿಂದ ‘ಶೈತಾನ್’ ಗಳಿಕೆ ಮೇಲೆ ಪರಿಣಾಮ ಬೀರಲಿದೆ.

‘ಶೈತಾನ್​’ ಸಿನಿಮಾದ ಕಲೆಕ್ಷನ್​ ಬಗ್ಗೆ ಟ್ರೇಡ್​ ಅನಲಿಸ್ಟ್​ ತರಣ್​ ಆದರ್ಶ್​ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ. 4 ದಿನಕ್ಕೆ ಈ ಸಿನಿಮಾದ ಒಟ್ಟು ಕಲೆಕ್ಷನ್​ 62.94 ಕೋಟಿ ರೂಪಾಯಿ ಆಗಿದೆ. ಒಂದು ವಾರ ಪೂರ್ಣಗೊಳ್ಳುವುದರೊಳಗೆ ಈ ಸಿನಿಮಾ 82 ಕೋಟಿ ರೂಪಾಯಿ ಗಳಿಸಬಹುದು ಎಂದು ಅವರು ಅಂದಾಜಿಸಿದ್ದಾರೆ. 2ನೇ ವೀಕೆಂಡ್​ ವೇಳೆಗೆ 100 ಕೋಟಿ ರೂಪಾಯಿ ಗಡಿ ಮುಟ್ಟಬಹುದು ಎಂಬ ನಿರೀಕ್ಷೆ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.