Rahul Vaidya: ಹಾಡಿನಲ್ಲಿ ದೇವಿಗೆ ಅಪಮಾನದ ಆರೋಪ; ಖ್ಯಾತ ಗಾಯಕನಿಗೆ ಜೀವ ಬೆದರಿಕೆ
Garbe Ki Raat: ಖ್ಯಾತ ಗಾಯಕ ರಾಹುಲ್ ವೈದ್ಯ ತಮ್ಮ ನೂತನ ಹಾಡಿನಲ್ಲಿ ದೇವಿಗೆ ಅಪಮಾನ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ. ಈ ಕುರಿತು ಎಫ್ಐಆರ್ ದಾಖಲಾಗಿದೆ.
Updated on: Oct 15, 2021 | 11:52 AM
ಖ್ಯಾತ ಗಾಯಕ ಹಾಗೂ ಮಾಜಿ ಬಿಗ್ ಬಾಸ್ 14 ಸ್ಪರ್ಧಿ ರಾಹುಲ್ ವೈದ್ಯಗೆ (Rahul Vaidya) ಜೀವ ಬೆದರಿಕೆ ಎದುರಾಗಿದೆ. ಅವರ ಹೊಸ ಹಾಡು ‘ಗಾರ್ಬೆ ಕಿ ರಾತ್’ನಲ್ಲಿ (Gaarbe Ki Raat) ‘ಶ್ರೀ ಮೊಗಲ್ ಮಾ’ ದೇವಿಗೆ ಅಪಮಾನ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಈ ಕಾರಣದಿಂದ ದೇವಿಯ ಆರಾಧಕರು ತಿರುಗಿಬಿದ್ದಿದ್ದು, ರಾಹುಲ್ಗೆ ಜೀವ ಬೆದರಿಕೆ ಎದುರಾಗಿದೆ. ಈ ಹಾಡನ್ನು ನವರಾತ್ರಿಯ ಎರಡನೇ ದಿನದಂದು ಬಿಡುಗಡೆ ಮಾಡಲಾಗಿತ್ತು. ಯೂಟ್ಯೂಬ್ನಲ್ಲಿ ಸುಮಾರು 5 ಮಿಲಿಯನ್ ವೀಕ್ಷಣೆಯನ್ನು ಈ ಹಾಡು ಕಂಡಿದೆ.
‘ಗಾರ್ಬೆ ಕೀ ರಾತ್’ ಹಾಡಿನಲ್ಲಿ ರಾಹುಲ್ ವೈದ್ಯ ಅವರೊಂದಿಗೆ, ಖ್ಯಾತ ಕಿರುತೆರೆ ನಿರೂಪಕಿ ನಿಯಾ ಶರ್ಮಾ(Nia Sharma) ಕೂಡ ಕಾಣಿಸಿಕೊಂಡಿದ್ದಾರೆ. ಈ ಹಾಡು ಗುಜರಾತಿ ಹಿನ್ನೆಲೆಯನ್ನು ಹೊಂದಿದ್ದು, ಅಲ್ಲಿನ ಭಕ್ತಾದಿಗಳ ಧಾರ್ಮಿಕ ಭಾವನೆಗಳಿಗೆ ನೋವುಂಟು ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಈ ಆರೋಪದ ನಂತರ ಇದೇ ವಿಷಯಕ್ಕೆ ಕುರಿತಂತೆ ರಾಹುಲ್ ವೈದ್ಯ ಜೀವ ಬೆದರಿಕೆಯನ್ನು ಎದುರಿಸುತ್ತಿದ್ದಾರೆ.
ಈ ಕುರಿತು ಭಕ್ತರು ರಾಹುಲ್ ವೈದ್ಯರಿಗೆ, ದೇವಿಯ ಹೆಸರನ್ನು ತೆಗೆಯುವಂತೆ ತಿಳಿಸಿದ್ದು, ಒಂದು ವೇಳೆ ತೆಗೆಯದಿದ್ದರೆ ಗಂಭೀರ ಕ್ರಮ ಎದುರಿಸಲು ಸಿದ್ಧರಾಗಿ ಎಂದು ತಿಳಿಸಿದ್ದಾರೆ. ಮತ್ತಷ್ಟು ಜನ ಆ ಹಾಡನ್ನೇ ಎಲ್ಲಾ ಮಾಧ್ಯಮಗಳಿಂದ ತೆಗೆಯಬೇಕು ಎಂದು ಬೇಡಿಕೆ ಇಟ್ಟಿದ್ದಾರೆ. ಹಾಡಿನಲ್ಲಿ ನಿಯಾ ಶರ್ಮಾ ಅವರು ದೇವಿಯ ಕುರಿತು ಅವಹೇಳನಕಾರಿಯಾಗಿ ಪದ ಬಳಸಿದ್ದಾರೆ ಎಂಬುದು ಜನರ ಆರೋಪವಾಗಿದೆ.
ಈ ಕುರಿತು ರಾಹುಲ್ ವೈದ್ಯರ ವಕ್ತಾರ ಮಾಹಿತಿ ನೀಡಿದ್ದು, ಅವರಿಗೆ ಜೀವ ಬೆದರಿಕೆ ಬರುತ್ತಿರುವುದು ನಿಜ ಎಂದು ತಿಳಿಸಿದ್ದಾರೆ. ಸದ್ಯದಲ್ಲಿಯೇ ಹಾಡನ್ನು ಸರಿಪಡಿಸಲಾಗುವುದು ಎಂದೂ ಅವರು ತಿಳಿಸಿದ್ಧಾರೆ. ಹಾಡಿನಲ್ಲಿ ದೇವಿಯನ್ನು ಅಪಮಾನಿಸುವ ಯಾವ ಉದ್ದೇಶಗಳೂ ತಂಡಕ್ಕಿರಲಿಲ್ಲ ಎಂದು ಇದೇ ವೇಳೆ ಸ್ಪಷ್ಟನೆಯನ್ನೂ ನೀಡಲಾಗಿದೆ. ಈ ಪ್ರಕರಣಕ್ಕೆ ಸಂಬಂಧ ಪಟ್ಟಂತೆ ರಾಹುಲ್ ವೈದ್ಯ ವಿರುದ್ಧ ಎಫ್ಐಆರ್ ಕೂಡ ದಾಖಲಾಗಿದೆ. ಈಗ ಆಗಿರುವ ಸಮಸ್ಯೆಯನ್ನು ಸರಿಪಡಿಸಲು ಕೆಲವು ಸಮಯ ಬೇಕು. ಅದಕ್ಕಾಗಿ ಈಗ ಕೆಲಸವನ್ನು ಆರಂಭಿಸಿದ್ದೇವೆ ಎಂದು ರಾಹುಲ್ ವಕ್ತಾರ ಮಾಹಿತಿ ನೀಡಿದ್ದಾರೆ. ಸದ್ಯ ‘ಗಾರ್ಬೆ ಕೀ ರಾತ್’ ಹಾಡನ್ನು ಯೂಟ್ಯೂಬ್ನಲ್ಲಿ ಅಧಿಕೃತವಾಗಿ ಲಭ್ಯವಿಲ್ಲ.
ಇದನ್ನೂ ಓದಿ:
G. K. Govind Rao : ‘ಪ್ರೊಫೆಸರ್, ಇನ್ನ್ಯಾರೊಂದಿಗೆ ನಾನು ಜಗಳವಾಡಲಿ’ ನಿರ್ದೇಶಕ ಟಿ.ಎನ್. ಸೀತಾರಾಮ್
ತಾಲಿಬಾನ್ ಬದಲಾದರೂ ಪಾಕಿಸ್ತಾನ ಬದಲಾಗಲ್ಲ; ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್
