ದಿ ಕೇರಳ ಸ್ಟೋರಿ ಸಿನಿಮಾ ನೋಡಿ, ಪ್ರಿಯಕರನ ವಿರುದ್ಧ ದೂರು ನೀಡಿದ ಮಾಡೆಲ್

ದಿ ಕೇರಳ ಸ್ಟೋರಿ (The Kerala Story), ಲವ್ ಜಿಹಾದ್ (Love Jihad) ವಿರುದ್ಧ ಜಾಗೃತಿ ಮೂಡಿಸುವ ಸಿನಿಮಾ ಎಂದೇ ಪ್ರಚಾರ ಪಡೆಯುತ್ತಿದೆ. ಕೇರಳದಲ್ಲಿ ನಡೆದಿದೆ ಎನ್ನಲಾದ ಮತಾಂತರದ ಕುರಿತಾದ ನಿಜ ಘಟನೆಯನ್ನು ಆಧರಿಸಿದ ಸಿನಿಮಾ ಇದೆಂದು ಚಿತ್ರತಂಡ ಹೇಳಿಕೊಂಡಿದೆ. ಇದೀಗ ಈ ಸಿನಿಮಾ ನೋಡಿದ ಮಾಡೆಲ್ (Model) ಒಬ್ಬಾಕೆ ಪ್ರಿಯಕರನ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಾರೆ. ತನ್ವೀರ್ ಅಖ್ತರ್ ಎಂಬಾತ ಮದುವೆಯಾಗುವಂತೆ ಪೀಡಿಸುತ್ತಿದ್ದು, ಮತಾಂತರಕ್ಕೆ ಒತ್ತಾಯಿಸಿದ್ದಾನೆ ಎಂದಿದ್ದಾರೆ.

ಮುಂಬೈನ ವರ್ಸೋವಾ ಪೊಲೀಸರಿಗೆ ದೂರು ನೀಡಿರುವ ಯುವತಿ, ಎಎನ್​ಐ ಮಾಧ್ಯಮ ಸಂಸ್ಥೆಗೆ ಘಟನೆಯನ್ನು ವಿವರಿಸಿದ್ದಾರೆ. 2020 ರಲ್ಲಿ ಮುಂಬೈನ ಯಶ್ ಮಾಡೆಲಿಂಗ್ ಏಜೆನ್ಸಿಗೆ ಬಿಹಾರ ಮೂಲದ ಯುವತಿ ಸೇರಿದ್ದಾರೆ. ಆ ಬಳಿಕ ಆ ಏಜೆನ್ಸಿಯ ಮಾಲೀಕ, ತರಬೇತುದಾರ ತಮ್ಮನ್ನು ಯಶ್ ಎಂದು ಪರಿಚಿಯಿಸಿಕೊಂಡಿದ್ದಾರೆ. ಆದರೆ ಅದಾದ ನಾಲ್ಕು ತಿಂಗಳಲ್ಲಿಯೇ ಆತನ ನಿಜವಾದ ಹೆಸರು ಯಶ್ ಅಲ್ಲ ತನ್ವೀರ್ ಅಖ್ತರ್ ಎಂಬುದು ಯುವತಿಗೆ ಗೊತ್ತಾಗಿದೆ.

ಇಬ್ಬರ ನಡುವೆ ಸ್ನೇಹ ಬೆಳೆದ ಬಳಿಕ ಹೋಳಿಯ ದಿನ ಮಾಡೆಲ್​ ಯುವತಿಯ ಕೆಲವು ಚಿತ್ರಗಳನ್ನು ತನ್ವೀರ್ ತೆಗೆದುಕೊಂಡಿದ್ದನಂತೆ. ಆ ಚಿತ್ರಗಳನ್ನು ತೋರಿಸಿ ಬ್ಲಾಕ್​ಮೇಲ್ ಮಾಡಲಾರಂಭಿಸಿದನಂತೆ. ಮದುವೆಯಾಗಿ ಪೀಡಿಸಿದ್ದನಂತೆ. ಆ ಚಿತ್ರಗಳನ್ನು ಕುಟುಂಬದವರಿಗೆ ಕಳಿಸುವುದಾಗಿ ಬೆದರಿಸಿದ್ದಾನೆ. ತನಗೆ ಹತ್ತಿರವಾಗಿರುವವರನ್ನೆಲ್ಲ ದೂರ ಮಾಡಿದ್ದಾನೆ. ಒಮ್ಮೆಯಂತೂ ಕೊಲ್ಲಲು ಸಹ ಪ್ರಯತ್ನಿಸಿದ್ದ ಎಂದು ಮಾಡೆಲ್ ಮಾಧ್ಯಮದ ಮುಂದೆ ಹೇಳಿಕೊಂಡಿದ್ದಾರೆ.

ದಿ ಕೇರಳ ಸ್ಟೋರಿ ಸಿನಿಮಾ ನೋಡಿದ ಬಳಿಕ ನನಗೆ ಇವರ ಕುತಂತ್ರದ ಅರಿವಾಯಿತು. ನಾನು ಮಾಡೆಲ್ ಆಗಲು ನಟಿಯಾಗಲು ಇಲ್ಲಿಗೆ ಬಂದಿದ್ದೇನೆ ಬೇರೆ ಉದ್ದೇಶದಿಂದಲ್ಲ. ಆ ಸಿನಿಮಾದಲ್ಲಿ ಆ ಯುವತಿರಿಗಾದ ಗತಿ ನನಗೆ ಆಗುವುದು ನನಗೆ ಬೇಕಿಲ್ಲ. ನಾನು ದೂರು ನೀಡುವ ಬಗ್ಗೆ ಹೇಳಿದಾಗ ರಾಂಚಿಯಲ್ಲಿ ನನಗೆ ಎಲ್ಲರೂ ಪರಿಚಿತರೇ, ಪೊಲೀಸರಿಗೆ ಹಣ ಕೊಟ್ಟು ನಾನು ನೋಡಿಕೊಳ್ಳುತ್ತೇನೆ ಎಂದ. ನಾನು ದೂರು ನೀಡಿದ ಬಳಿಕ ಆತ ವಿಡಿಯೋ ಮೂಲಕ ಕ್ಷಮೆ ಕೇಳಿದ, ಅಫಿಡವಿಟ್ ಮಾಡಿಕೊಟ್ಟ ಅದಾದ ಮೇಲೂ ಅವನ ಕಾಟ ಕಡಿಮೆ ಆಗಿಲ್ಲ.

ಯುವತಿ ನೀಡಿರುವ ದೂರಿನ ಬಗ್ಗೆ ಮಾತನಾಡಿರುವ ರಾಂಚಿಯ ಎಸ್​ಎಸ್​ಪಿ ಕಿಶೋರ್ ಕುಶಾಲ್, ಮೇ 29ರಂದು ಯುವತಿ ಮುಂಬೈನ ವರ್ಸೋವಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅದಾದ ಬಳಿಕ ಮೇ 30ರಂದು ಮುಂಬೈ ಪೊಲೀಸರು ರಾಂಚಿ ಪೊಲೀಸ್ ಠಾಣೆಗೆ ದೂರನ್ನು ವರ್ಗಾವಣೆ ಮಾಡಿದ್ದಾರೆ. ರಾಂಚಿ ಪೊಲೀಸರು ಎಫ್​ಐಆರ್ ದಾಖಲಿಸಿಕೊಂಡಿದ್ದು ತನಿಖೆ ಆರಂಭಿಸಿದ್ದೇವೆ, ಆರೋಪಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗುವುದು ಎಂದಿದ್ದಾರೆ.

ಕೇರಳದಲ್ಲಿ ನಡೆದಿದೆ ಎನ್ನಲಾಗುತ್ತಿರುವ ಮತಾಂತರ ಕುರಿತ ನಿಜ ಘಟನೆಗಳನ್ನು ಆಧರಿಸಿ ಸಿನಿಮಾ ನಿರ್ಮಾಣ ಮಾಡಿರುವುದಾಗಿ ನಿರ್ದೇಶಕ ಸುದಿಪ್ತೋ ಸೇನ್ ಹೇಳಿಕೊಂಡಿದ್ದಾರೆ. ಆದರೆ ಈ ಸಿನಿಮಾಕ್ಕೆ ಹಲವರು ವಿರೋಧವನ್ನೂ ವ್ಯಕ್ತಪಡಿಸಿದ್ದಾರೆ. ತಮಿಳುನಾಡು ಹಾಗೂ ಪಶ್ಚಿಮ ಬಂಗಾಳಗಳಲ್ಲಿ ಸಿನಿಮಾ ಪ್ರದರ್ಶನಕ್ಕೆ ಬಹಿಷ್ಕಾರ ಹಾಕಲಾಗಿದೆ. ಆದರೆ ಬಿಜೆಪಿ ಆಡಳಿತ ರಾಜ್ಯಗಳಾದ ಉತ್ತರ ಪ್ರದೇಶ ಹಾಗೂ ಮಧ್ಯ ಪ್ರದೇಶಗಳಲ್ಲಿ ಸಿನಿಮಾಕ್ಕೆ ತೆರಿಗೆ ವಿನಾಯಿತಿ ನೀಡಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ