ರೇಪ್​ ಸೀನ್​ ವಿಚಾರಕ್ಕೆ ಇಡೀ ಚಿತ್ರತಂಡದ ವಿರೋಧ ಕಟ್ಟಿಕೊಂಡಿದ್ದ ಜಯಾ ಬಚ್ಚನ್; ನಂತರ ಏನಾಯ್ತು?

​ಭಾರತೀಯ ಚಿತ್ರರಂಗದ ಖ್ಯಾತ ನಟಿ ಜಯಾ ಬಚ್ಚನ್ (Jaya Bachchan)​ ಅವರಿಗೆ ಏಪ್ರಿಲ್​ 9ರಂದು ಜನ್ಮದಿನದ ಸಂಭ್ರಮ. ಆ ಪ್ರಯುಕ್ತ ಅಭಿಮಾನಿಗಳು ನಟಿಯ ಹಳೇ ದಿನಗಳನ್ನು ಮೆಲುಕು ಹಾಕಿದ್ದಾರೆ. ಮದುವೆಗೂ ಮುನ್ನ ಅಮಿತಾಭ್​ ಬಚ್ಚನ್​ (Amitabh Bachchan) ಮತ್ತು ಜಯಾ ಅವರು ‘ಏಕ್​ ನಝರ್​’ (Ek Nazar) ಸಿನಿಮಾದಲ್ಲಿ ಜೊತೆಯಾಗಿ ನಟಿಸಿದ್ದರು. ಆ ಸಿನಿಮಾದ ಕಥೆಯಲ್ಲಿ ಖಳನಾಯಕನು ಜಯಾ ಅವರ ಬಟ್ಟೆ ಹರಿದು, ಅತ್ಯಾಚ್ಯಾರ ಮಾಡುವಂತಹ ಸನ್ನಿವೇಶ ಇತ್ತು. ಆದರೆ ಬಟ್ಟೆ ಹರಿದುಕೊಂಡು ನಟಿಸಲು ಜಯಾ ಒಪ್ಪಲೇ ಇಲ್ಲ. ಈ ಘಟನೆಯಿಂದಾಗಿ ಅವರು ಇಡೀ ಚಿತ್ರತಂಡದ ವಿರೋಧ ಕಟ್ಟಿಕೊಳ್ಳಬೇಕಾಯಿತು. ಅಮಿತಾಭ್​ ಬಚ್ಚನ್​ ಅವರು ಸಂಧಾನಕ್ಕೆ ನಿಂತರೂ ಕೂಡ ಜಯಾ ಅದಕ್ಕೆಲ್ಲ ಒಪ್ಪಲೇ ಇಲ್ಲ. ಆ ಘಟನೆಯನ್ನು ಈ ಹಿಂದಿನ ಸಂದರ್ಶನವೊಂದರಲ್ಲಿ ಜಯಾ ಬಚ್ಚನ್​ ಅವರು ಹೇಳಿಕೊಂಡಿದ್ದರು.

ಜಯಾ ಬಚ್ಚನ್​ ಅವರದ್ದು ನೇರ ಮತ್ತು ನಿಷ್ಠುರವಾದ ವ್ಯಕ್ತಿತ್ವ. ತಮ್ಮ ನಿಲುವುಗಳ ವಿಚಾರದಲ್ಲಿ ಅವರು ಎಂದಿಗೂ ರಾಜಿ ಆಗುವವರಲ್ಲ. ಅದು 1972 ಸಮಯ. ‘ಏಕ್​ ನಜರ್​’ ಶೂಟಿಂಗ್​ ನಡೆಯುತ್ತಿದ್ದಾಗ ಅತ್ಯಾಚಾರದ ಸನ್ನಿವೇಶದಲ್ಲಿ ಬಟ್ಟೆ ಹರಿದುಕೊಂಡು ನಟಿಸಲು ಜಯಾ ನಿರಾಕರಿಸಿದರು. ಅದು ನಿರ್ದೇಶಕರ ಮತ್ತು ನಿರ್ಮಾಪಕರ ಕೋಪಕ್ಕೆ ಕಾರಣ ಆಯಿತು. ಜಯಾ ವಿರುದ್ಧ ಕಲಾವಿದರ ಸಂಘಕ್ಕೆ ದೂರು ನೀಡುವುದಾಗಿಯೂ ನಿರ್ಮಾಪಕರು ಪಟ್ಟು ಹಿಡಿದಿದ್ದರು. ಆಗಲೂ ಜಯಾ ಬಚ್ಚನ್​ ಅವರು ರಾಜಿ ಆಗಲೇ ಇಲ್ಲ.

ಇದನ್ನೂ ಓದಿ: ‘ಕೌನ್ ಬನೇಗಾ ಕರೋಡ್​ಪತಿ’ ಕಾರ್ಯಕ್ರಮಕ್ಕೆ ಜಯಾ ಬಚ್ಚನ್ ಎಂಟ್ರಿ; ಕಣ್ಣೀರು ಹಾಕಿದ ಅಮಿತಾಭ್  

ಈ ಜಟಾಪಟಿಯಿಂದಾಗಿ ಎರಡು ದಿನಗಳ ಕಾಲ ಶೂಟಿಂಗ್​ ನಿಂತಿತು. ಚಿತ್ರದ ನಾಯಕ ಅಮಿತಾಭ ಬಚ್ಚನ್​ ಅವರು ಆಗ ಮಾತುಕತೆಗೆ ಮುಂದಾದರು. ‘ಸ್ಕ್ರಿಪ್ಟ್​ನಲ್ಲಿ ಸನ್ನಿವೇಶ ಮತ್ತು ಪಾತ್ರವನ್ನು ಆ ರೀತಿ ಬರೆಯಲಾಗಿದೆ ಎಂದಮೇಲೆ ನೀವು ಹಾಗೆ ನಟಿಸಲೇಬೇಕಲ್ಲವೇ’ ಎಂದು ಅಮಿತಾಭ್​ ಬಚ್ಚನ್​ ಅವರು ಪ್ರಶ್ನಿಸಿದರು. ಆದರೂ ಕೂಡ ಜಯಾ ಒಪ್ಪಲೇ ಇಲ್ಲ.

ಇದನ್ನೂ ಓದಿ: ಮಾಸ್ಕ್​ ತೆಗೆಯಬೇಕು ಎಂದು ಜಯಾ ಬಚ್ಚನ್​ಗೆ ಒತ್ತಾಯ ಮಾಡಿದ ಕಾಜೋಲ್​; ನೆಟ್ಟಿಗರ​ ಪ್ರತಿಕ್ರಿಯೆ ಏನು?

ಎಕ್ಸ್​ಪೋಸ್​ ಮಾಡುವಂತಹ ಸನ್ನಿವೇಶಗಳಿಗೂ ಜಯಾ ಅವರು ನೋ ಎನ್ನುತ್ತಿದ್ದರು. ತಾವು ಮಧ್ಯಮ ವರ್ಗದಿಂದ ಬಂದಿದ್ದರಿಂದಲೇ ಈ ಮನಸ್ಥಿತಿ ರೂಢಿ ಆಗಿರಬಹುದು ಎಂದು ಅವರು ಸಂದರ್ಶನದಲ್ಲಿ ಹೇಳಿಕೊಂಡಿದ್ದರು. ‘ಏಕ್​ ನಝರ್​’ ಸಿನಿಮಾ ಬಳಿಕ 1973ರಲ್ಲಿ ಜಯಾ ಮತ್ತು ಅಮಿತಾಭ್​ ಬಚ್ಚನ್​ ಅವರು ‘ಝಂಜೀರ್​’ ಸಿನಿಮಾದಲ್ಲಿ ಜೊತೆಯಾಗಿ ನಟಿಸಿದರು. ಅದೇ ವರ್ಷ ಜೂನ್​ 3ರಂದು ಅವರಿಬ್ಬರು ಹಸೆಮಣೆ ಏರಿದರು. 50ಕ್ಕೂ ಅಧಿಕ ಸಿನಿಮಾಗಳಲ್ಲಿ ಜಯಾ ಬಚ್ಚನ್​ ಅವರು ನಟಿಸಿದ್ದಾರೆ. ಅವರಿಗೆ ದೊಡ್ಡ ಅಭಿಮಾನಿ ಬಳಗ ಇದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.