‘ಪಠಾಣ್​ ಶೂಟಿಂಗ್ ಸೆಟ್​​ನಲ್ಲಿ ಎಲ್ಲರೂ ಕೋರಿಕೊಳ್ಳುತ್ತಿದ್ದುದು ಒಂದೇ’; ದೀಪಿಕಾ ಬಿಚ್ಚಿಟ್ರು ಕುತೂಹಲಕಾರಿ ವಿಚಾರ

ಶಾರುಖ್ ಖಾನ್​ (Shah Rukh Khan) ಹಾಗೂ ದೀಪಿಕಾ ಪಡುಕೋಣೆ ನಟನೆಯ ‘ಪಠಾಣ್​’ ಸಿನಿಮಾ ಬಾಕ್ಸ್ ಆಫೀಸ್​ನಲ್ಲಿ ದೊಡ್ಡ ಯಶಸ್ಸು ಕಂಡಿದೆ. ಈ ಚಿತ್ರದ ಕಲೆಕ್ಷನ್ 1000 ಕೋಟಿ ರೂಪಾಯಿ ದಾಟಿದೆ. ಇತ್ತೀಚಿನ ವರ್ಷಗಳಲ್ಲಿ ಬಾಲಿವುಡ್​ ಕಂಡ ಅತಿ ದೊಡ್ಡ ಹಿಟ್ ಚಿತ್ರ ಎಂಬ ಖ್ಯಾತಿ ಇದಕ್ಕೆ ಸಿಕ್ಕಿದೆ. ಸತತ ಸೋಲುಗಳಿಂದ ಕಂಗೆಟ್ಟಿದ್ದ ಶಾರುಖ್ ಖಾನ್​ಗೆ ಈ ಗೆಲುವಿನ ಅವಶ್ಯಕತೆ ಅತಿಯಾಗಿತ್ತು. ಶಾರುಖ್​ ಖಾನ್​ಗೆ ಆ ಗೆಲುವು ಸಿಕ್ಕಿದೆ. ಈ ಗೆಲುವಿನ ಬಗ್ಗೆ ‘ಪ್ರೀತಿ ಮತ್ತು ಆಶೀರ್ವಾದ ಮರಳಿ ಬರುತ್ತಿದೆ’ ಎಂದು ದೀಪಿಕಾ ಹೇಳಿದ್ದಾರೆ.

‘ಪಠಾಣ್​ ಸಿನಿಮಾ ಸೆಟ್​ನಲ್ಲಿ ಎಲ್ಲರೂ ‘ಈ ಸಿನಿಮಾ ಶಾರುಖ್ ಖಾನ್​ಗೆ ದೊಡ್ಡ ಗೆಲುವು ತಂದುಕೊಡಲಿ’ ಎಂದು ಕೋರುತ್ತಿದ್ದರಂತೆ. ‘ಈ ಸಿನಿಮಾ ಗೆಲ್ಲಬೇಕು ಎಂದು ಎಲ್ಲರೂ ಕೋರುತ್ತಿದ್ದೆವು. ನೀವು ಕೊಟ್ಟ ಪ್ರೀತಿ ಹಾಗೂ ಆಶೀರ್ವಾದ ಮರಳಿ ಬರುತ್ತಿದೆ ಎಂದು ನಾನು ಶಾರುಖ್ ಖಾನ್ ಹಾಗೂ ಗೌರಿ ಖಾನ್​ಗೆ (ಶಾರುಖ್ ಖಾನ್ ಪತ್ನಿ) ಹೇಳುತ್ತಿದ್ದೆ. ಇದರಲ್ಲಿ ಯಾವುದೇ ಲಾಜಿಕ್ ಇಲ್ಲ. ಇದು ನಮ್ಮ ನಂಬಿಕೆ’ ಎಂದಿದ್ದಾರೆ ದೀಪಿಕಾ.

ದೀಪಿಕಾ ಪಡುಕೋಣೆ ಅವರಿಗೂ ಈ ಸಿನಿಮಾ ಗೆಲುವು ತುಂಬಾನೇ ಮುಖ್ಯ ಆಗಿತ್ತು. 2018ರಲ್ಲಿ ರಿಲೀಸ್ ಆದ ‘ಪದ್ಮಾವತ್​’ ಚಿತ್ರ ಸೂಪರ್ ಹಿಟ್ ಆಯಿತು. ಅದಾದ ಬಳಿಕ ಅವರ ಯಾವುದೇ ಚಿತ್ರ ಯಶಸ್ಸು ಕಂಡಿಲ್ಲ. ‘ಚಪಾಕ್​’ ಸಿನಿಮಾ ಸೋತಿದೆ. ‘83’ ಕೂಡ ದೊಡ್ಡ ಗೆಲುವು ಕಾಣಬಹುದು ಎಂದುಕೊಳ್ಳಲಾಗಿತ್ತು. ಆದರೆ, ಹಾಗಾಗಿಲ್ಲ. ‘ಗೆಹರಾಯಿಯಾ’ ಚಿತ್ರ ಕೂಡ ಯಶಸ್ಸು ಕಂಡಿಲ್ಲ. ನಾಲ್ಕು ವರ್ಷಗಳ ಬಳಿಕ ಅವರು ದೊಡ್ಡ ಕಂಬ್ಯಾಕ್ ಮಾಡಿದ್ದಾರೆ. ಸದ್ಯ ಅವರು, ‘ಜವಾನ್​’, ‘ಪ್ರಾಜೆಕ್ಟ್​ ಕೆ’ ಹಾಗೂ ‘ಫೈಟರ್​’ ಚಿತ್ರದ ಕೆಲಸಗಳಲ್ಲಿ ಬ್ಯುಸಿ ಇದ್ದಾರೆ.

‘ಪಠಾಣ್​’ ಲಾಭ ಎಷ್ಟು?

ಜನವರಿ 25ರಂದು ‘ಪಠಾಣ್​’ ಸಿನಿಮಾ ರಿಲೀಸ್ ಆಯಿತು. ಈ ಚಿತ್ರ ಮೊದಲ ವೀಕೆಂಡ್​ನಲ್ಲಿ ಅಬ್ಬರದ ಕಲೆಕ್ಷನ್ ಮಾಡಿತು. ಈ ಚಿತ್ರ ಹಿಂದಿ ಬಾಕ್ಸ್ ಆಫೀಸ್​ನಲ್ಲಿ ಯಶ್ ನಟನೆಯ ‘ಕೆಜಿಎಫ್ 2’ ಮಾಡಿದ ದಾಖಲೆಗಳನ್ನು ಮುರಿದು ಹಾಕಿತು. ಭಾರತದಲ್ಲಿ ಈ ಚಿತ್ರ 500+ ಕೋಟಿ ರೂಪಾಯಿ ಕಮಾಯಿ ಮಾಡಿದೆ. ವಿಶ್ವ ಬಾಕ್ಸ್ ಆಫೀಸ್​ನಲ್ಲಿ ಚಿತ್ರದ ಗಳಿಕೆ 1000 ಕೋಟಿ ರೂಪಾಯಿ ದಾಟಿದೆ.

‘ಪಠಾಣ್​’ ಚಿತ್ರದಿಂದ ಆದಿತ್ಯ ಚೋಪ್ರಾಗೆ 662 ಕೋಟಿ ರೂಪಾಯಿ ಲಾಭ ಆಗಿದೆ ಎಂದು ವರದಿ ಆಗಿದೆ. ಬಾಲಿವುಡ್ ಇತಿಹಾಸದಲ್ಲಿ ಇಷ್ಟು ದೊಡ್ಡ ಮೊತ್ತದ ಲಾಭ ಕಂಡ ಏಕೈಕ ನಿರ್ಮಾಪಕ ಎಂಬ ಹೆಗ್ಗಳಿಕೆಗೆ ಆದಿತ್ಯ ಚೋಪ್ರಾ ಪಾತ್ರರಾಗಿದ್ದಾರೆ. ಈ ಮೊದಲು ‘ದಂಗಲ್​’ ಚಿತ್ರದಿಂದ ನಿರ್ಮಾಪಕ ಆಮಿರ್ ಖಾನ್​ಗೆ 600 ಕೋಟಿ ರೂಪಾಯಿ ಲಾಭ ಆಗಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ