ದಾನಿಶ್ ಸೇಠ್ ಸಹೋದರಿ ಕುಬ್ರಾ ಸೇಠ್ಗೆ ‘ಫೌಂಡೇಶನ್’ ಅವಕಾಶ; ಹಾಲಿವುಡ್ ಕಲಾವಿದರ ಜತೆ ನಟನೆ
‘ಫೌಂಡೇಶನ್’ ವೆಬ್ ಸರಣಿಯ ಈ ಪಾತ್ರಕ್ಕಾಗಿ ಬಹಳ ಹಿಂದೆಯೇ ಕುಬ್ರಾ ಸೇಠ್ ಆಡಿಷನ್ ನೀಡಿದ್ದರು. ಆದರೆ ಆ ವಿಚಾರವನ್ನು ಗುಟ್ಟಾಗಿ ಇರಿಸಲಾಗಿತ್ತು. ಅವರು ಆಯ್ಕೆಯಾಗಿದ್ದ ಸುದ್ದಿಯೂ ಕೂಡ ಗೌಪ್ಯವಾಗಿ ಉಳಿದಿತ್ತು.
ನಟನಾಗಿ, ನಿರೂಪಕನಾಗಿ, ಆರ್ಸಿಬಿ ಇನ್ಸೈಡರ್ ಆಗಿ ದಾನಿಶ್ ಸೇಠ್ ಅವರು ಸಿಕ್ಕಾಪಟ್ಟೆ ಫೇಮಸ್. ಅದೇ ರೀತಿ ಅವರ ಅಕ್ಕ ಕುಬ್ರಾ ಸೇಠ್ ಕೂಡ ಬಣ್ಣದ ಲೋಕದಲ್ಲಿ ಸಕ್ರಿಯರಾಗಿದ್ದಾರೆ. ಹಲವು ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. ವೆಬ್ ಸಿರೀಸ್ ಲೋಕದಲ್ಲಿ ಅವರಿಗೆ ಸಖತ್ ಡಿಮ್ಯಾಂಡ್ ಇದೆ. ನಿರೂಪಕಿಯಾಗಿ, ರೂಪದರ್ಶಿಯಾಗಿಯೂ ಕುಬ್ರಾ ಸೇಠ್ ಕೆಲಸ ಮಾಡುತ್ತಾರೆ. ಇಷ್ಟೆಲ್ಲ ಬ್ಯುಸಿ ಆಗಿರುವ ಅವರು ಈಗ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಿಂಚುತ್ತಿದ್ದಾರೆ. ಅದು ಸಾಧ್ಯವಾಗಿರುವುದು ‘ಫೌಂಡೇಶನ್’ ವೆಬ್ ಸಿರೀಸ್ ಮೂಲಕ. ‘ಆ್ಯಪಲ್ ಟಿವಿ ಪ್ಲಸ್’ ಮೂಲಕ ಈ ವೆಬ್ ಸರಣಿ ಪ್ರಸಾರ ಆಗುತ್ತಿದೆ. ಅದು ಕುಬ್ರಾಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ತಂದುಕೊಟ್ಟಿದೆ.
ಈ ಮೊದಲು ‘ಸೇಕ್ರೆಡ್ ಗೇಮ್ಸ್’ ವೆಬ್ ಸರಣಿಯಲ್ಲಿ ಕುಬ್ರಾ ಸೇಠ್ ಮಾಡಿದ್ದ ಕುಕೂ ಎಂಬ ಪಾತ್ರ ಗಮನ ಸೆಳೆದಿತ್ತು. ಅದಲ್ಲದೇ ‘ದಿ ವರ್ಡಿಕ್ಟ್’, ‘ಇಲ್ಲೀಗಲ್’ ಮುಂತಾದ ವೆಬ್ ಸರಣಿಗಳಲ್ಲಿ ಅವರು ಬಣ್ಣ ಹಚ್ಚಿದ್ದರು. ಅದೆಲ್ಲವನ್ನೂ ಮೀರಿಸುವಂತಹ ಅವಕಾಶ ಸಿಕ್ಕಿದ್ದು ‘ಫೌಂಡೇಶನ್’ ವೆಬ್ ಸಿರೀಸ್ ಮೂಲಕ. ಸೈನ್ಸ್ ಫಿಕ್ಷನ್ ಪ್ರಕಾರದ ಕಥೆಯುಳ್ಳ ಈ ವೆಬ್ ಸರಣಿಯ ಮೂರನೇ ಎಪಿಸೋಡ್ನ ಕೊನೆಯಲ್ಲಿ ಕುಬ್ರಾ ಸೇಠ್ ಎಂಟ್ರಿ ನೀಡುತ್ತಾರೆ. ನಾಲ್ಕನೇ ಎಪಿಸೋಡ್ನಲ್ಲಿ ಅವರ ಪಾತ್ರ ಗಮನ ಸೆಳೆಯಲಿದೆ.
ಬಹಳ ಹಿಂದೆಯೇ ಈ ಪಾತ್ರಕ್ಕಾಗಿ ಕುಬ್ರಾ ಸೇಠ್ ಆಡಿಷನ್ ನೀಡಿದ್ದರು. ಆದರೆ ಆ ವಿಚಾರವನ್ನು ಗುಟ್ಟಾಗಿ ಇರಿಸಲಾಗಿತ್ತು. ಅವರು ಆಯ್ಕೆಯಾಗಿದ್ದು ಕೂಡ ಗೌಪ್ಯವಾಗಿ ಉಳಿದಿತ್ತು. ‘ಫೌಂಡೇಶನ್’ನಲ್ಲಿ ಕುಬ್ರಾ ನಟಿಸಿದ್ದಾರೆ ಎಂಬ ಸುದ್ದಿ ನಂತರ ಹೊರಬಿತ್ತು. ಇತ್ತೀಚೆಗಷ್ಟೇ ಇದರ ಕೆಲವು ಫೋಟೋಗಳನ್ನು ಹಂಚಿಕೊಂಡಿರುವ ಕುಬ್ರಾ ಅವರು ಸಖತ್ ಹೆಮ್ಮೆ ಪಟ್ಟಿದ್ದಾರೆ.
‘ಫೌಂಡೇಶನ್’ ಮೂಲಕ ಹಾಲಿವುಡ್ನ ಕೆಲವು ಜನಪ್ರಿಯ ಕಲಾವಿದರ ಜೊತೆ ತೆರೆಹಂಚಿಕೊಳ್ಳುವ ಅವಕಾಶ ಕುಬ್ರಾ ಸೇಠ್ಗೆ ಸಿಕ್ಕಿದೆ. ಅಲ್ಲಿನ ಕೆಲಸದ ವೈಖರಿಗೂ ಅವರು ಫಿದಾ ಆಗಿದ್ದಾರೆ. ಈ ವೆಬ್ ಸರಣಿಯಲ್ಲಿ ಹೆಚ್ಚು ವಿಎಫ್ಎಕ್ಸ್ ದೃಶ್ಯಗಳಿದ್ದು, ಅಂಥ ಸೀನ್ಗಳಲ್ಲಿ ನಟಿಸಿದ್ದು ಅವರಿಗೆ ಹೊಸ ಅನುಭವ ನೀಡಿದೆ. ಸೆ.24ರಿಂದ ‘ಫೌಂಡೇಶನ್’ ಪ್ರಸಾರ ಆರಂಭಿಸಿದೆ. ಪ್ರತಿ ಶುಕ್ರವಾರ ಒಂದೊಂದು ಎಪಿಸೋಡ್ ಬಿಡುಗಡೆ ಆಗುತ್ತಿದೆ.
ಇದನ್ನೂ ಓದಿ:
ದಾನಿಶ್ ಸೇಠ್ಗೆ ಕರೆ ಮಾಡಿ ಹೊಗಳಿದ ರಣಬೀರ್ ಕಪೂರ್; ಈ ವಿಡಿಯೋ ಅಪ್ಲೋಡ್ ಮಾಡಿದ್ದಕ್ಕೆ ಬೈದ ಬಾಲಿವುಡ್ ನಟ
Danish Sait: ಅನ್ಯಾ ಜತೆ ರಿಜಿಸ್ಟರ್ ಮ್ಯಾರೇಜ್ ಆದ ದಾನಿಶ್ ಸೇಠ್; ಫೋಟೋ ವೈರಲ್