Sidney Poitier: ಅತ್ಯುತ್ತಮ ನಟನೆಗಾಗಿ ಆಸ್ಕರ್​ ಪಡೆದ ಮೊದಲ ಕಪ್ಪು ವರ್ಣೀಯ ಕಲಾವಿದ ಸಿಡ್ನಿ ಪೊಯ್ಟಿಯರ್ ನಿಧನ

Sidney Poitier Passes Away: ಸಿಡ್ನಿ ಪೊಯ್ಟಿಯರ್ ತಮ್ಮ ಪಾತ್ರಪೋಷಣೆಗೆ ಹೆಸರಾಗಿದ್ದವರು. ಮುಖ್ಯವಾಹಿನಿಯ ಚಿತ್ರಗಳಲ್ಲಿ ಕಾಣಿಸಿಕೊಂಡ ಅವರು  ಪ್ರಮುಖ ಪಾತ್ರಗಳಲ್ಲಿ ನಟಿಸಿ ಆ ಕಾಲದಲ್ಲಿ ಎಲ್ಲರಿಂದ ಮೆಚ್ಚುಗೆ ಪಡೆದ ಕಪ್ಪು ವರ್ಣದ ಕೆಲವೇ ನಟರಲ್ಲಿ ಒಬ್ಬರಾಗಿದ್ದರು.

Sidney Poitier: ಅತ್ಯುತ್ತಮ ನಟನೆಗಾಗಿ ಆಸ್ಕರ್​ ಪಡೆದ ಮೊದಲ ಕಪ್ಪು ವರ್ಣೀಯ ಕಲಾವಿದ ಸಿಡ್ನಿ ಪೊಯ್ಟಿಯರ್ ನಿಧನ
ಸಿಡ್ನಿ ಪಾಯ್ಟಿಯರ್

‘ಲಿಲೀಸ್ ಆಫ್ ದಿ ಫೀಲ್ಡ್‌’ ಚಿತ್ರದ ಪಾತ್ರ ನಿರ್ವಹಣೆಗಾಗಿ ಅತ್ಯುತ್ತಮ ನಟ ಪ್ರಶಸ್ತಿ ಪಡೆದ ಸಿಡ್ನಿ ಪೊಯ್ಟಿಯರ್ ನಿಧನರಾಗಿದ್ದಾರೆ. ಜನಾಂಗೀಯ ಅಡೆತಡೆಗಳನ್ನು ಮೆಟ್ಟಿನಿಂತು ಆಸ್ಕರ್ ಪ್ರಶಸ್ತಿ ಪಡೆದ ಮೊದಲ ಕಪ್ಪು ವರ್ಣೀಯ ಕಲಾವಿದ ಸಿಡ್ನಿ ಪೊಯ್ಟಿಯರ್. ನಾಗರಿಕ ಹಕ್ಕುಗಳ ಚಳವಳಿಯ ಸಮಯದಲ್ಲಿ ಒಂದು ಪೀಳಿಗೆಗೆ ಸ್ಫೂರ್ತಿ ನೀಡಿದ ಕಲಾವಿದರೂ ಅವರಾಗಿದ್ದರು. ಅವರ ನಿಧನದ ಕುರಿತು ಬಹಮಿಯನ್ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಶುಕ್ರವಾರ ಮಾಹಿತಿ ನೀಡಿದೆ. ಪೊಯ್ಟಿಯರ್​ಗೆ 94 ವರ್ಷ ವಯಸ್ಸಾಗಿತ್ತು. ಅಮೇರಿಕಾದ ಹೆಚ್ಚಿನ ಭಾಗಗಳಲ್ಲಿ ಪ್ರತ್ಯೇಕತೆಯು ಚಾಲ್ತಿಯಲ್ಲಿದ್ದ ಸಮಯದಲ್ಲಿ ಪೊಯ್ಟಿಯರ್ ತಮ್ಮ ಮೂರು ಚಲನಚಿತ್ರಗಳೊಂದಿಗೆ ಒಂದೇ ವರ್ಷದಲ್ಲಿ ವಿಶಿಷ್ಟವಾದ ಸಿನಿಮಾ ಪರಂಪರೆಗೆ ನಾಂದಿಹಾಡಿದರು.

‘ಗೆಸ್ ಹು ಈಸ್ ಕಮಿಂಗ್ ಟು ಡಿನ್ನರ್‌’, ‘ಹೀಟ್ ಆಫ್ ದಿ ನೈಟ್‌’, ‘ಟು ಸರ್, ವಿತ್ ಲವ್’ ಚಿತ್ರಗಳು ಜನಾಂಗೀಯವಾದದ ಕುರಿತು ಬೆಳಕು ಚೆಲ್ಲಿದ್ದವು. 1963 ರಲ್ಲಿ ‘ಲಿಲೀಸ್ ಆಫ್ ದಿ ಫೀಲ್ಡ್’ ಚಿತ್ರದ ನಟನೆಗಾಗಿ ಪೊಯ್ಟಿಯರ್ ಆಸ್ಕರ್ ಪಡೆದು ಇತಿಹಾಸ ನಿರ್ಮಿಸಿದರು. ಆ ಚಿತ್ರದಲ್ಲಿ ಜರ್ಮನ್ ಸನ್ಯಾಸಿನಿಯರು ಮರುಭೂಮಿಯಲ್ಲಿ ಪ್ರಾರ್ಥನಾ ಮಂದಿರವನ್ನು ನಿರ್ಮಿಸಲು ಸಹಾಯ ಮಾಡುವ ಸಹಾಯಕನ ಪಾತ್ರದಲ್ಲಿ ಪೊಯ್ಟಿಯರ್ ನಟಿಸಿದ್ದರು.

ಸಿಡ್ನಿ ಪೊಯ್ಟಿಯರ್ ಮಿಯಾಮಿಯಲ್ಲಿ 1927ರ ಫೆಬ್ರವರಿ 20ರಂದು ಜನಿಸಿದರು. ಬಹಾಮಾಸ್​ನ ಟೊಮೆಟೊ ಫಾರ್ಮ್​ನಲ್ಲಿ ಬೆಳೆದರು. ಕೇವಲ ಒಂದು ವರ್ಷದ ಔಪಚಾರಿಕ ಶಾಲಾ ಶಿಕ್ಷಣವನ್ನು ಹೊಂದಿದ್ದ ಪೊಯ್ಟಿಯರ್, ನಂತರ ಬಡತನ, ಅನಕ್ಷರತೆ ಮತ್ತು ಪೂರ್ವಾಗ್ರಹದ ವಿರುದ್ಧ ಹೋರಾಡಿದರು. ನಂತರದಲ್ಲಿ ಮುಖ್ಯವಾಹಿನಿಯ ಚಿತ್ರಗಳಲ್ಲಿ ಕಾಣಿಸಿಕೊಂಡ ಅವರು  ಪ್ರಮುಖ ಪಾತ್ರಗಳಲ್ಲಿ ನಟಿಸಿ ಆ ಕಾಲದಲ್ಲಿ ಮೆಚ್ಚುಗೆ ಪಡೆದ ಕಪ್ಪು ವರ್ಣದ ಕೆಲವೇ ನಟರಲ್ಲಿ ಒಬ್ಬರಾಗಿದ್ದರು.

2009 ರಲ್ಲಿ ಅಮೇರಿಕಾ ಅಧ್ಯಕ್ಷ ಬರಾಕ್ ಒಬಾಮಾರಿಂದ ಪೊಯ್ಟಿಯರ್ ಅವರಿಗೆ ದೇಶದ ಅತ್ಯುನ್ನತ ನಾಗರಿಕ ಗೌರವ ‘ಪ್ರೆಸಿಡೆನ್ಶಿಯಲ್ ಮೆಡಲ್ ಆಫ್ ಫ್ರೀಡಮ್’ ಪ್ರದಾನ ಮಾಡಲಾಗಿತ್ತು. ಪೊಯ್ಟಿಯರ್ ನಿಧನಕ್ಕೆ ಚಿತ್ರರಂಗ ಕಂಬನಿ ಮಿಡಿದಿದೆ.

ಇದನ್ನೂ ಓದಿ:

Vaishaliyaana : ವೈಶಾಲಿಯಾನ : ಮೂರನೇ ಅಲೆಯ ಹೊತ್ತಿನಲ್ಲಿ ನೆನಪಾಗುತ್ತಿರುವ ಇಂಗ್ಲಿಷ್ ರೊಮ್ಯಾಂಟಿಕ್ ಕವಿಗಳು

Yash Birthday: ಯಶ್​ ಜನ್ಮದಿನಕ್ಕೆ ಆಯ್ರಾ, ಯಥರ್ವ್​ ಕೊಟ್ಟ ಗಿಫ್ಟ್​ ಏನು? ಫೋಟೋ ಹಂಚಿಕೊಂಡ ರಾಧಿಕಾ ಪಂಡಿತ್​

Published On - 11:06 am, Sat, 8 January 22

Click on your DTH Provider to Add TV9 Kannada