Oppenheimer: ಬಿಡುಗಡೆಗೂ ಮುನ್ನ ‘ಆಪನ್ಹೈಮರ್’ ಸಿನಿಮಾ ಬಗ್ಗೆ ಹೆಚ್ಚಿದ ಕ್ರೇಜ್; ಇಲ್ಲಿವೆ ಪ್ರಮುಖ ಕಾರಣಗಳು
Christopher Nolan: ಪ್ಯಾರಿಸ್ನಲ್ಲಿ ‘ಆಪರ್ಹೈಮರ್’ ಸಿನಿಮಾದ ಪ್ರೀಮಿಯರ್ ಶೋ ಮಾಡಲಾಗಿದೆ. ಅನೇಕ ಸೆಲೆಬ್ರಿಟಿಗಳು ಈ ಸಿನಿಮಾ ನೋಡಿ ಮೆಚ್ಚುಗೆ ಸೂಚಿಸಿದ್ದಾರೆ. ವಿಮರ್ಶಕರು ಕೂಡ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.
ಕಿಲಿಯನ್ ಮರ್ಫಿ
ಹಾಲಿವುಡ್ (Hollywood) ಸಿನಿಮಾಗಳಿಗೆ ವಿಶ್ವಾದ್ಯಂತ ಮಾರುಕಟ್ಟೆ ಇದೆ. ಕಂಟೆಂಟ್ ಚೆನ್ನಾಗಿದ್ದರೆ ಖಂಡಿತವಾಗಿತೂ ಈ ಸಿನಿಮಾಗಳು ಭಾರತದಲ್ಲಿ ಭರ್ಜರಿ ಕಲೆಕ್ಷನ್ ಮಾಡುತ್ತವೆ. ಈಗ ‘ಆಪನ್ಹೈಮರ್’ ಸಿನಿಮಾ (Oppenheimer Movie) ಕೂಡ ಸಖತ್ ಲಾಭ ಮಾಡುವ ಸೂಚನೆ ಸಿಕ್ಕಿದೆ. ಜುಲೈ 21ರಂದು ಈ ಸಿನಿಮಾ ಸಾವಿರಾರು ಪರದೆಗಳಲ್ಲಿ ರಿಲೀಸ್ ಆಗಲಿದೆ. ಕ್ರಿಸ್ಟೋಫರ್ ನೋಲನ್ (Christopher Nolan) ಅವರು ನಿರ್ದೇಶನ ಮಾಡಿದ್ದು, ಈಗಾಗಲೇ ಟ್ರೇಲರ್ ಧೂಳೆಬ್ಬಿಸಿದೆ. ನೈಜ ಘಟನೆ ಆಧಾರಿತ ಈ ಸಿನಿಮಾವನ್ನು ನೋಡಲು ಪ್ರೇಕ್ಷಕರು ತುದಿಗಾಲಿನಲ್ಲಿ ನಿಂತಿದ್ದಾರೆ. ಭಾರತದಲ್ಲಿ ಸಿನಿಪ್ರಿಯರು ಮುಗಿಬಿದ್ದು ಟಿಕೆಟ್ ಬುಕ್ ಮಾಡುತ್ತಿದ್ದಾರೆ. ‘ಆಪನ್ಹೈಮರ್’ ಚಿತ್ರದ ಮೇಲೆ ಜನರಿಗೆ ಈ ಪರಿ ಕ್ರೇಜ್ ಹೆಚ್ಚಲು ಒಂದಷ್ಟು ಕಾರಣಗಳಿವೆ. ಆ ಬಗ್ಗೆ ಇಲ್ಲಿದೆ ಮಾಹಿತಿ..
- ನಿರ್ದೇಶಕ ಕ್ರಿಸ್ಟೋಫರ್ ನೋಲನ್: ಹಾಲಿವುಡ್ನಲ್ಲಿ ಕ್ರಿಸ್ಟೋಫರ್ ನೋಲನ್ ಅವರು ತಮ್ಮದೇ ಛಾಪು ಮೂಡಿಸಿದ್ದಾರೆ. ಅವರ ಸಿನಿಮಾಗಳಲ್ಲಿ ಏನಾದರೂ ವಿಶೇಷತೆ ಇದ್ದೇ ಇರುತ್ತದೆ ಎಂಬ ನಂಬಿಕೆ ಜನರಿಗೆ ಇದೆ. ಆ ಕಾರಣದಿಂದ ‘ಆಪನ್ಹೈಮರ್’ ಸಿನಿಮಾ ಕೌತುಕ ಮೂಡಿದೆ.
- ಜೆ. ರಾಬರ್ಟ್ ಆಪನ್ಹೈಮರ್ ಜೀವನದ ಕಥೆ: ಆಟಂ ಬಾಂಬ್ ಕಂಡು ಹಿಡಿದ ಜೆ. ರಾಬರ್ಟ್ ಆಪನ್ಹೈಮರ್ ಅವರ ಜೀವನವನ್ನು ಆಧರಿಸಿ ಈ ಸಿನಿಮಾ ಸಿದ್ಧವಾಗಿದೆ. ಆಪನ್ಹೈಮರ್ ಪಾತ್ರಕ್ಕೆ ಕಿಲಿಯನ್ ಮರ್ಫಿ ಬಣ್ಣ ಹಚ್ಚಿದ್ದಾರೆ. ಅವರ ಲುಕ್ ಗಮನ ಸೆಳೆಯುತ್ತಿದೆ.
- ಅದ್ದೂರಿ ಮೇಕಿಂಗ್: ಕ್ರಿಸ್ಟೋಫರ್ ನೋಲನ್ ಅವರು ಕಂಟೆಂಟ್ ಜೊತೆಗೆ ಮೇಕಿಂಗ್ಗೆ ಹೆಚ್ಚು ಮಹತ್ವ ನೀಡುತ್ತಾರೆ. ಅದ್ದೂರಿ ಬಜೆಟ್ನಲ್ಲಿ ಈ ಚಿತ್ರ ನಿರ್ಮಾಣ ಆಗಿದೆ. ಈಗಾಗಲೇ ಟ್ರೇಲರ್ನಲ್ಲಿ ಅದರ ಝಲಕ್ ಕಾಣಿಸಿದೆ. ಅದರಿಂದ ಸಿನಿಮಾ ಮೇಲಿನ ಕೌತುಕ ಹೆಚ್ಚಿದೆ.
- ಪಾತ್ರವರ್ಗದಲ್ಲಿ ಸ್ಟಾರ್ ಕಲಾವಿದರು: ಹಾಲಿವುಡ್ನ ಜನಪ್ರಿಯ ಕಲಾವಿದರಾದ ಕಿಲಿಯನ್ ಮರ್ಫಿ, ರಾಬರ್ಟ್ ಡೌನಿ ಜೂನಿಯರ್, ಮ್ಯಾಟ್ ಡೇಮನ್, ಎಮಿಲಿ ಬ್ಲಂಟ್ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ರಿಯಲ್ ಲೈಫ್ ಪಾತ್ರಗಳನ್ನು ಅವರು ನಿಭಾಯಿಸಿದ್ದಾರೆ.
- ನೈಜತೆಗೆ ಹೆಚ್ಚು ಮಹತ್ವ: 1940ರ ಕಾಲಘಟ್ಟದ ಕಥೆಯನ್ನು ಈ ಸಿನಿಮಾ ಒಳಗೊಂಡಿದೆ. ಎಲ್ಲ ದೃಶ್ಯಗಳನ್ನು ನೈಜವಾಗಿ ಕಟ್ಟಿಕೊಡಬೇಕು ಎಂಬುದು ನಿರ್ದೇಶಕರ ಆಶಯ. ಅದಕ್ಕಾಗಿ ಅವರು ‘ಕಂಪ್ಯೂಟರ್ ಜೆನರೇಟೆಡ್ ಇಮೇಜ್’ ಬಳಸಿಲ್ಲ. ಅದರ ಬದಲಿಗೆ ನೈಜವಾಗಿ ಚಿತ್ರಿಸುವುದಕ್ಕೆ ಹೆಚ್ಚು ಮಹತ್ವ ನೀಡಿದ್ದಾರೆ.
- ಈಗಾಗಲೇ ಸಿಕ್ಕಿದೆ ಮೆಚ್ಚುಗೆ: ಪ್ಯಾರಿಸ್ನಲ್ಲಿ ‘ಆಪರ್ಹೈಮರ್’ ಸಿನಿಮಾದ ಪ್ರೀಮಿಯರ್ ಶೋ ಮಾಡಲಾಗಿದೆ. ಅನೇಕ ಸೆಲೆಬ್ರಿಟಿಗಳು ಈ ಸಿನಿಮಾ ನೋಡಿ ಮೆಚ್ಚುಗೆ ಸೂಚಿಸಿದ್ದಾರೆ. ವಿಮರ್ಶಕರು ಕೂಡ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಆ ಕಾರಣದಿಂದಲೂ ಚಿತ್ರದ ಮೇಲೆ ನಿರೀಕ್ಷೆ ಜಾಸ್ತಿ ಆಗಿದೆ.
- 2ನೇ ಮಹಾಯುದ್ಧದ ಚಿತ್ರಣ: ಮನುಕುಲವನ್ನೇ ಬೆಚ್ಚಿ ಬೀಳಿಸಿದ ಎರಡನೇ ಮಹಾಯುದ್ಧದ ಘಟನೆಗಳ ಸುತ್ತ ‘ಆಪನ್ಹೈಮರ್’ ಸಿನಿಮಾ ಸಾಗುತ್ತದೆ. ಜಪಾನ್ ಮೇಲೆ ಅಣು ಬಾಂಬ್ ಹಾಕಿದ ಘಟನೆಯ ಹಿಂದೆ ಏನೆಲ್ಲ ನಡೆಯಿತು ಎಂಬುದನ್ನು ಈ ಚಿತ್ರ ವಿವರಿಸುತ್ತದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.