ಅಂತರಧರ್ಮೀಯ ಮದುವೆ ಬಗ್ಗೆ ಕೀರ್ತಿ ಸುರೇಶ್ ಮಾತು; ಸವಾಲುಗಳನ್ನು ಬಿಚ್ಚಿಟ್ಟ ನಟಿ

ರಾಷ್ಟ್ರ ಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್ ಹಾಗೂ ಆಂಟೋನಿ ತಟ್ಟಿಲ್ ಅವರ ಸುದೀರ್ಘ 15 ವರ್ಷಗಳ ಪ್ರೇಮಕಥೆ ಕೊನೆಗೂ ಸುಖಾಂತ್ಯ ಕಂಡಿದ್ದು ಗೊತ್ತೇ ಇದೆ. ಸುಮಾರು ಒಂದೂವರೆ ದಶಕಗಳ ಕಾಲ ಪರಸ್ಪರ ಪ್ರೀತಿಸುತ್ತಿದ್ದ ಈ ಜೋಡಿ 2024ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿತ್ತು. ಇದೀಗ ತಮ್ಮ ಇಂಟರ್-ಫೇತ್ ಮದುವೆ ಮತ್ತು ಸುದೀರ್ಘ ಪ್ರೇಮಪಯಣದ ಸವಾಲುಗಳ ಬಗ್ಗೆ ಕೀರ್ತಿ ಸುರೇಶ್ ಬಹಿರಂಗವಾಗಿ ಮಾತನಾಡಿದ್ದಾರೆ.

ತಮ್ಮ ಪ್ರೇಮಕಥೆ ಮನೆಯಲ್ಲಿ ಬಯಲಾದ ರೋಚಕ ಪ್ರಸಂಗವನ್ನು ಕೀರ್ತಿ ಹಂಚಿಕೊಂಡಿದ್ದಾರೆ. 12ನೇ ತರಗತಿ ಮುಗಿದ ತಕ್ಷಣವೇ ಅಂದರೆ ಅವರ 17ನೇ ವಯಸ್ಸಿನಲ್ಲಿ ಪ್ರೀತಿ ಶುರುವಾಗಿತ್ತು. ಕಾಲೇಜು ದಿನಗಳಲ್ಲಿ ಕೀರ್ತಿ ಬರೆಯುತ್ತಿದ್ದ ಡೈರಿಯನ್ನು ಅವರ ತಾಯಿ ಮೇನಕಾ ಓದಿದ್ದರು. ಅದರಲ್ಲಿ ಪ್ರೀತಿಯ ಪ್ರತಿಯೊಂದು ವಿಷಯವೂ ಇತ್ತು. ಈ ಘಟನೆಯ ನಂತರ ಅವರು ಡೈರಿ ಬರೆಯುವುದನ್ನೇ ಸಂಪೂರ್ಣವಾಗಿ ನಿಲ್ಲಿಸಿಬಿಟ್ಟರು.

ಇಬ್ಬರ ನಡುವಿನ ಪ್ರೀತಿಯನ್ನು ಸೀಕ್ರೆಟ್ ಆಗಿಡುವುದು ಕೀರ್ತಿಗೆ ಕಷ್ಟವೆನಿಸಲಿಲ್ಲ. ಅವರು ಎಂದಿಗೂ ಇಬ್ಬರೇ ಪ್ರವಾಸಕ್ಕೆ ಹೋಗುತ್ತಿರಲಿಲ್ಲ. ಸದಾ ಸ್ನೇಹಿತರ ಬಳಗ ಜೊತೆಗಿರುತ್ತಿತ್ತು. ಸೋಶಿಯಲ್ ಮೀಡಿಯಾದಲ್ಲಿ ಫೋಟೋ ಹಾಕಿದರೂ ಯಾರಿಗೂ ಅನುಮಾನ ಬರುತ್ತಿರಲಿಲ್ಲ. ಆದರೆ ಮದುವೆ ಘೋಷಣೆಯಾದ ಮೇಲೆ ಆಂಟೋನಿಗೆ ಪಾಪರಾಜಿಗಳ ಭಯ ಶುರುವಾಗಿತ್ತು.

ಕೀರ್ತಿ ಹಿಂದೂ ಮತ್ತು ಆಂಟೋನಿ ಕ್ರಿಶ್ಚಿಯನ್ ಆಗಿದ್ದರಿಂದ ಮನೆಯಲ್ಲಿ ಸಮಸ್ಯೆಗಳಾಗಿದ್ದವು. ಮನೆಯವರನ್ನು ಒಪ್ಪಿಸಲು ಕೀರ್ತಿ ಸಾಕಷ್ಟು ಕಷ್ಟಪಡಬೇಕಾಯಿತು. 2009ರ ಡಿಸೆಂಬರ್‌ನಲ್ಲಿ ಇವರ ಮೊದಲ ಭೇಟಿಯಾಗಿತ್ತು. 2010ರ ಜನವರಿಯಲ್ಲಿ ಪ್ರೀತಿ ಆರಂಭವಾಗಿತ್ತು. ಚಿತ್ರರಂಗಕ್ಕೆ ಬರುವ ಮೊದಲೇ ಆಂಟೋನಿಗೆ ಕೀರ್ತಿ ಪರಿಚಯವಿದ್ದರು.

ಇದನ್ನೂ ಓದಿ: ‘ಅಕ್ಕ’ ವೆಬ್ ಸರಣಿಯಲ್ಲಿ ಬೋಲ್ಡ್​ ಅವತಾರದಲ್ಲಿ ಮಿಂಚಿದ ಕೀರ್ತಿ ಸುರೇಶ್

15 ವರ್ಷಗಳ ಕಾಲ ಸಾಗಿದ ಈ ಪ್ರೀತಿ 2024 ಡಿಸೆಂಬರ್ 12ರಂದು ಮದುವೆಯಲ್ಲಿ ಅಂತ್ಯಗೊಂಡಿತು. ಗೋವಾದಲ್ಲಿ ತಮಿಳು ಬ್ರಾಹ್ಮಿಣ ಹಾಗೂ ಮಲಯಾಳಿ ಕ್ರಿಶ್ಚಿಯನ್ ಸಂಪ್ರದಾಯದಂತೆ ಮದುವೆ ನಡೆಯಿತು. ಓಡಿಹೋಗಿ ಮದುವೆಯಾಗುವ ಭಯದ ಕನಸುಗಳು ಅವರಿಗೆ ಬೀಳುತ್ತಿದ್ದವು. ಕೊನೆಗೂ ಇಬ್ಬರ ಕನಸಿನಂತೆ ಮದುವೆ ನಡೆದು ಪ್ರೀತಿ ಗೆದ್ದಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.