Chow Chow Bath Review: ಸಿಂಪಲ್​ ಆಗಿದ್ದರೂ ಸವಿ ಎನಿಸುವ ‘ಚೌ ಚೌ ಬಾತ್​’ ಸಿನಿಮಾ

ಸಿನಿಮಾ: ಚೌ ಚೌ ಬಾತ್​. ನಿರ್ಮಾಣ: ಹಾರೈಝೋನ್​ ಮೂವೀಸ್​. ನಿರ್ದೇಶನ: ಕೇಂಜ ಚೇತನ್​ ಕುಮಾರ್​. ಪಾತ್ರವರ್ಗ: ಸಾಗರ್​ ಗೌಡ, ಸಂಕಲ್ಪ್​ ಶರ್ಮಾ, ಸುಶ್ಮಿತಾ ಭಟ್​, ಅರುಣಾ ಬಾಲರಾಜ್​, ಧನುಷ್​ ಕೈಕಂಪಾಡಿ, ಗೀತಾ ಬಂಗೇರ, ಪ್ರಕರ್ಶಾ ಶಾಸ್ತ್ರಿ ಮುಂತಾದವರು. ಸ್ಟಾರ್​: 3/5

ನಿರ್ದೇಶಕ ಕೇಂಜ ಚೇತನ್​ ಕುಮಾರ್​ ಅವರು ಮೂರು ಕಥೆಗಳನ್ನು ಒಂದೇ ಸಿನಿಮಾದಲ್ಲಿ ಹೇಳಿದ್ದಾರೆ. ಇಲ್ಲಿ ಮೂರು ಪ್ರೇಮಕಥೆಗಳಿವೆ. ಮೇಲ್ನೋಟಕ್ಕೆ ಮೂರು ಪ್ರತ್ಯೇಕ ಕಥೆಗಳು ಎನಿಸಿದರೂ ಕೂಡ ಈ ಕಥೆಗಳಿಗೆ ಒಂದಕ್ಕೊಂದು ಸಂಬಂಧ ಇದೆ. ಆ ಕಾರಣಕ್ಕಾಗಿ ಚಿತ್ರತಂಡದವರು ಇದನ್ನು ಹೈಪರ್ ಲಿಂಕ್​ ಸಿನಿಮಾ ಎಂದು ಕರೆದಿದ್ದಾರೆ. ಹೊಸ ಕಲಾವಿದರೇ ತುಂಬಿಕೊಂಡಿರುವ ‘ಚೌ ಚೌ ಬಾತ್​’ ಸಿನಿಮಾ ಹೇಗಿದೆ ತಿಳಿಯಲು ಈ ವಿಮರ್ಶೆ ಓದಿ..

ಚೌ ಚೌ ಬಾತ್​ ಒಂದು ಸರಳವಾದ ತಿನಿಸು. ಇದರಲ್ಲಿ ತುಂಬ ಅದ್ದೂರಿಯಾಗಿ ಏನನ್ನೂ ಅಪೇಕ್ಷಿಸೋಕೆ ಆಗಲ್ಲ. ಆದರೂ ಕೂಡ ಅದನ್ನು ಇಷ್ಟಪಟ್ಟು ಸವಿಯುವ ಜನರಿಗೇನೂ ಕೊರತೆ ಇಲ್ಲ. ಅದೇ ಮಾತು ‘ಚೌ ಚೌ ಬಾತ್​’ ಸಿನಿಮಾಗೂ ಅನ್ವಯ. ಯಾಕೆಂದ್ರೆ, ಈ ಸಿನಿಮಾ ಕೂಡ ತುಂಬ ಸರಳವಾಗಿದೆ. ಪೂರ್ತಿ ನೋಡಿ ಮುಗಿಸಿದ ಬಳಿಕ ಒಂದು ಒಳ್ಳೆಯ ಫೀಲ್ ನೀಡುವಂತಹ ಪ್ರಯತ್ನವಾಗಿ ಈ ಸಿನಿಮಾ ಇಷ್ಟವಾಗುತ್ತದೆ.

ಈ ಸಿನಿಮಾ ವಿಶೇಷ ಎನಿಸುವುದು ಪಾತ್ರಗಳ ಕಾರಣದಿಂದ. ನಮ್ಮ-ನಿಮ್ಮಂತೆ ಇರುವ ಸಹಜವಾದ ಪಾತ್ರಗಳನ್ನೇ ಇಟ್ಟುಕೊಂಡು ನಿರ್ದೇಶಕರು ಈ ಕಥೆಯನ್ನು ಹೆಣೆದಿದ್ದಾರೆ. ಮದುವೆಯಾಗಲು ಮನೆಬಿಟ್ಟು ಓಡಿಬಂದ ದಿನವೇ ಪ್ರಿಯಕರನನ್ನು ಕಳೆದುಕೊಳ್ಳುವ ಹುಡುಗಿ ಈ ಸಿನಿಮಾದಲ್ಲಿ ಇದ್ದಾಳೆ. ಅವಳಿಗೆ ಸಹಾಯ ಮಾಡುತ್ತಲೇ ಪ್ರೀತಿಯಲ್ಲಿ ಬೀಳುವ ಇನ್ನೊಬ್ಬ ಹುಡುಗನೂ ಈ ಕಥೆಯಲ್ಲಿದ್ದಾನೆ. ತಾನು ಪ್ರೀತಿಸಿದ ಹುಡುಗಿಯನ್ನು ಮದುವೆ ಆಗುವುದಕ್ಕೂ ಮುನ್ನ ಆಕೆಯ ಅಕ್ಕನಿಗೆ ಗಂಡು ಹುಡುಕುವ ಜವಾಬ್ದಾರಿ ಹೊತ್ತುಕೊಳ್ಳುವ ವಿಶಾಲ ಹೃದಯದ ಯುವಕನೂ ‘ಚೌ ಚೌ ಬಾತ್​’ ಕಥೆಯಲ್ಲಿ ಜಾಗ ಪಡೆದುಕೊಂಡಿದ್ದಾನೆ. ಮೂಲ ನಕ್ಷತ್ರದಲ್ಲಿ ಹುಟ್ಟಿದ್ದಕ್ಕೆ ಗಂಡು ಸಿಗದೇ ಕಣ್ಣೀರು ಹಾಕುವ ಯುವತಿಯ ಕಥೆ ಕೂಡ ಈ ಸಿನಿಮಾದಲ್ಲಿದೆ. ಇಂಥ ಹಲವು ವಿಚಾರಗಳು ಒಂದೆಡೆ ಸೇರಿ ‘ಚೌ ಚೌ ಬಾತ್​’ ಆಗಿದೆ.

ಇದನ್ನೂ ಓದಿ:  Photo Movie Review: ಲಾಕ್​ಡೌನ್​ನಲ್ಲಿ ಬೆಂದ ಬಡವನ ನೋವಿನ ಸತ್ಯದರ್ಶನ

ಚಿನಕುರುಳಿ ರೀತಿಯ ಡೈಲಾಗ್​ಗಳು ‘ಚೌ ಚೌ ಬಾತ್​’ ಸಿನಿಮಾದಲ್ಲಿ ತುಂಬಿಕೊಂಡಿವೆ. ಮೇಲ್ನೋಟಕ್ಕೆ ಸಿಂಪಲ್​ ಎನಿಸಿದರೂ ಆ ಸಂಭಾಷಣೆಗಳ ಮೂಲಕ ಒಂದಷ್ಟು ವಿಷಯಗಳನ್ನು ಪ್ರೇಕ್ಷಕರಿಗೆ ದಾಟಿಸುವ ಪ್ರಯತ್ನ ಆಗಿದೆ. ಫೈಟಿಂಗ್​, ಅದ್ದೂರಿ ಸೆಟ್​ ಮುಂತಾದ ಅಂಶಗಳನ್ನು ಬಯಸುವ ಮಾಸ್​ ಪ್ರೇಕ್ಷಕರಿಗೆ ಈ ಸಿನಿಮಾದಲ್ಲಿ ಏನೂ ಧಕ್ಕುವುದಿಲ್ಲ. ಯಾಕೆಂದರೆ, ಇದು ಪಕ್ಕಾ ಕ್ಲಾಸ್​ ಸಿನಿಮಾ. ಸಾವಧಾನದಿಂದ ವೀಕ್ಷಿಸಿ, ಪ್ರತಿ ಪಾತ್ರದ ಜೊತೆ ಸಹಾನುಭೂತಿ ಹೊಂದುವ ಪ್ರೇಕ್ಷಕರಿಗೆ ‘ಚೌ ಚೌ ಬಾತ್​’ ಖುಷಿ ನೀಡುತ್ತದೆ.

ಇದನ್ನೂ ಓದಿ: Kerebete Review: ಕುತೂಹಲಭರಿತ ಕೆರೆಬೇಟೆಯಲ್ಲಿ ಊಹಿಸಲಾಗದ ಟ್ವಿಸ್ಟ್​

ಕಥೆ ಸರಳವಾಗಿದ್ದರೂ ಕೂಡ ಅದರಲ್ಲಿ ಒಂದು ಸಸ್ಪೆನ್ಸ್​ ಕಾಯ್ದುಕೊಳ್ಳುವಲ್ಲಿ ನಿರ್ದೇಶಕರು ಯಶಸ್ವಿ ಆಗಿದ್ದಾರೆ. ಯಾರ ಪ್ರೀತಿಯ ಹೂವು ಯಾರ ಮುಡಿ ಏರುತ್ತದೆ ಎಂಬುದನ್ನು ತಿಳಿಯಲು ಪೂರ್ತಿ ಸಿನಿಮಾ ನೋಡಬೇಕು. ನಿಜವಾದ ಪ್ರೀತಿ ಹೇಗಿರುತ್ತದೆ ಎಂಬುದನ್ನು ಅವರು ಈ ಚಿತ್ರದ ಮೂಲಕ ತೋರಿಸಿಕೊಟ್ಟಿದ್ದಾರೆ. ಆರಂಭದಿಂದ ಕೊನೆತನಕ ಲವಲವಿಕೆಯಿಂದಲೇ ಸಿನಿಮಾ ಸಾಗುತ್ತದೆ. ಕೆಲವೊಮ್ಮೆ ಸೀರಿಯಲ್​ ರೀತಿ ಅನಿಸುತ್ತದೆ. ಆ ಬಗ್ಗೆ ನಿರ್ದೇಶಕರು ಎಚ್ಚರಿಕೆ ವಹಿಸಿದ್ದರೆ ಈ ಸಿನಿಮಾ ಇನ್ನಷ್ಟು ಆಪ್ತವಾಗುತ್ತಿತ್ತು. ತಾಂತ್ರಿಕವಾಗಿ ‘ಚೌ ಚೌ ಬಾತ್​’ ಅಚ್ಚುಕಟ್ಟಾಗಿದೆ. ಹೊಸ ಕಲಾವಿದರ ಈ ಹೊಸ ಕಥೆಯನ್ನು ಒಮ್ಮೆ ನೋಡಬಹುದು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.