Mr Bachelor Movie Review:ಫಜೀತಿಗೆ ಸಿಲುಕುವ ವರ್ಜಿನ್ ‘ಬ್ಯಾಚುಲರ್’ನ ಕಥೆಯಲ್ಲಿ ಒಂದಷ್ಟು ಹಾಸ್ಯ, ಸ್ವಲ್ಪ ಸೆಂಟಿಮೆಂಟ್

ಸಿನಿಮಾ: ಮಿಸ್ಟರ್ ಬ್ಯಾಚುಲರ್

ನಿರ್ಮಾಣ: ಶ್ರೀನಿವಾಸ್ ಎಲ್​., ಹನುಮಂತ ರಾವ್ ಹಾಗೂ ಸ್ವರ್ಣಲತಾ

ನಿರ್ದೇಶನ: ನಾಯ್ಡು ಬಂಡಾರು

ಸಂಗೀತ: ಮಣಿಕಾಂತ್ ಕದ್ರಿ

ಪಾತ್ರವರ್ಗ: ಡಾರ್ಲಿಂಗ್​ ಕೃಷ್ಣ, ಮಿಲನಾ ನಾಗರಾಜ್, ನಿಮಿಕಾ ರತ್ನಾಕರ್, ಸಾಧು ಕೋಕಿಲ, ಚಿಕ್ಕಣ್ಣ, ಅಯ್ಯಪ್ಪ ಮೊದಲಾದವರು.

ಸ್ಟಾರ್: 3/5

ಚಿಕ್ಕ ವಯಸ್ಸಿನಲ್ಲಿ ಏನಾಗಬೇಕು ಎಂದು ಕೇಳಿದರೆ ಸಾಮಾನ್ಯವಾಗಿ ಎಲ್ಲರೂ ಇಂಜಿನಿಯರ್, ಡಾಕ್ಟರ್ ಆಗಬೇಕೆಂದು ಹೇಳುತ್ತಾರೆ. ಆದರೆ, ಈ ಚಿತ್ರದ ಕಥಾ ನಾಯಕ ಕಾರ್ತಿಕ್​ (ಡಾರ್ಲಿಂಗ್ ಕೃಷ್ಣ) ಕಂಡ ಕನಸು ಮದುವೆ ಆಗಬೇಕು ಎಂದು. ಮದುವೆ ಎಂದರೆ ಹಬ್ಬ, ವಿವಾಹ ಆದಮೇಲೆ ಹಾಯಾಗಿ ಇರಬಹುದು ಎಂಬ ಆಲೋಚನೆ ಆತನದ್ದು. ಇದನ್ನು ನನಸು ಮಾಡಿಕೊಳ್ಳಬೇಕು ಎಂದು ಹೊರಡುವ ಈ ಬ್ಯಾಚುಲರ್ ಫಜೀತಿಗೆ ಸಿಲುಕುತ್ತಾನೆ. ಕೆಲವೇ ದಿನಗಳ ಅಂತರದಲ್ಲಿ ಇಬ್ಬರು ನಾಯಕಿಯರ (ಮಿಲನಾ ನಾಗರಾಜ್​, ನಿಮಿಕಾ ರತ್ನಾಕರ್) ಭೇಟಿ ಆಗುತ್ತದೆ. ವರ್ಜಿನ್ ಎಂಬುದೇ ಆತನಿಗೆ ಮುಳುವಾಗುತ್ತದೆ. ಅಲ್ಲಿಂದ ಏರಿಳಿತ ಶುರು. ಈ ನಾಯಕಿಯರಲ್ಲಿ ಅಂತಿಮವಾಗಿ ಕಾರ್ತಿಕ್ ಯಾರನ್ನು ಮದುವೆ ಆಗುತ್ತಾನೆ? ವಿಲನ್​​ಗಳು ಈತನ ವಿರುದ್ಧ ದ್ವೇಷ ಕಾರೋದು ಯಾಕೆ ಎಂಬುದು ಸಿನಿಮಾದ ಕಥೆ.

ಮಾಸ್ ಆ್ಯಂಡ್ ಕ್ಲಾಸ್

ಡಾರ್ಲಿಂಗ್ ಕೃಷ್ಣ ಅವರು ‘ಲವ್ ಮಾಕ್ಟೇಲ್​’, ‘ಲವ್ ಮಾಕ್ಟೇಲ್ 2’ ಸಿನಿಮಾದಲ್ಲಿ ಲವರ್ ಬಾಯ್ ಆಗಿ ಕಾಣಿಸಿಕೊಂಡಿದ್ದರು. ಆ ಸಿನಿಮಾಗಳಲ್ಲಿ ಲವ್, ಮದುವೆ ವಿಚಾರ ಪ್ರಮುಖವಾಗಿ ಹೈಲೈಟ್ ಆಗಿತ್ತು. ಈ ಚಿತ್ರದಲ್ಲೂ ಮದುವೆ ವಿಚಾರ ಇದೆ. ಆದರೆ, ಕಥೆಯ ಸ್ವರೂಪ ಬೇರೆ. ಅದೇನು ಎಂಬುದನ್ನು ಸಿನಿಮಾದಲ್ಲೇ ಕಣ್ತುಂಬಿಕೊಳ್ಳಬೇಕು. ಡಾರ್ಲಿಂಗ್ ಕೃಷ್ಣ ಈ ಬಾರಿ ಮಾಸ್ ಅವತಾರ ತಾಳಿದ್ದಾರೆ. ಸಖತ್ ಆಗಿ ಅವರು ಫೈಟ್ ಮಾಡಿದ್ದಾರೆ. ಈ ರೀತಿಯಲ್ಲೂ ಅವರು ಇಷ್ಟವಾಗುತ್ತಾರೆ. ಮೊದಲಾರ್ಧದಲ್ಲಿ ನಗಿಸುವ ಅವರು, ಎರಡನೇ ಭಾಗದಲ್ಲಿ ಮಾಸ್ ಅವತಾರ ತಾಳುತ್ತಾರೆ.

ಭರಪೂರ ಹಾಸ್ಯ

ಡಾರ್ಲಿಂಗ್ ಕೃಷ್ಣ ಅವರ ಸಿನಿಮಾದಲ್ಲಿ ನಗು ಇದ್ದೇ ಇರುತ್ತದೆ. ಈ ಸಿನಿಮಾದಲ್ಲೂ ಅದು ಮುಂದುವರಿದಿದೆ. ಗಿರಿ, ಚಿಕ್ಕಣ್ಣ ಅವರು ಈ ಸಿನಿಮಾದಲ್ಲಿ ಸಖತ್ ನಗುವಿನ ಕಿಕ್ ನೀಡಿದ್ದಾರೆ. ಸಾಧು ಕೋಕಿಲ ಕೆಲವೇ ದೃಶ್ಯಗಳಿಗೆ ಸೀಮಿತವಾಗಿದ್ದಾರೆ. ಮಿಲನಾ ನಾಗರಾಜ್​ಗಿಂತ ನಿಮಿಕಾ ರತ್ನಾಕರ್ ಅವರ ಪಾತ್ರ ಹೆಚ್ಚು ಹೈಲೈಟ್ ಆಗಿದೆ. ಯಶ್ ಶೆಟ್ಟಿ ಅವರು ಕೆಲವೇ ನಿಮಿಷ ತೆರೆಮೇಲೆ ಬರುತ್ತಾರೆ. ಅಯ್ಯಪ್ಪ ಅವರು ವಿಲನ್ ಆಗಿ ಅಬ್ಬರಿಸಿದ್ದಾರೆ. ಪವಿತ್ರಾ ಲೋಕೇಶ್ ಅವರು ತಾಯಿ ಸೆಂಟಿಮೆಂಟ್​​ ಮೂಲಕ ಇಷ್ಟವಾಗುತ್ತಾರೆ.

ಸಿನಿಮಾ ಪರಿಪೂರ್ಣವೇ?

‘ಮಿಸ್ಟರ್ ಬ್ಯಾಚುಲರ್’ ಸಿನಿಮಾಗೆ ನಿರ್ದೇಶನ ಮಾಡಿರುವ ನಾಯ್ಡು ಬಂಡಾರು ಅವರು ಒಂದು ಹಂತಕ್ಕೆ ಗೆದ್ದಿದ್ದಾರೆ. ಆದರೆ, ಸಿನಿಮಾ ಪರಿಪೂರ್ಣ ಅಲ್ಲ. ಸಣ್ಣಪುಟ್ಟ ಲೋಪದೋಷಗಳಿವೆ. ವರ್ಜಿನಿಟಿ ವಿಚಾರ ಪದೇಪದೇ ಕಿವಿಮೇಲೆ ಬೀಳುವುದರಿಂದ ಫ್ಯಾಮಿಲಿ ಆಡಿಯನ್ಸ್​ಗೆ ಮುಜುಗರ ತರಬಹುದು. ಹಾಡುಗಳು ಪ್ರೇಕ್ಷಕರ ಕಿವಿಯಲ್ಲಿ ಗುನುಗುವುದಿಲ್ಲ. ಫೈಟ್ ನೋಡಿ ನಾಯಕನ ಮೇಲೆ ನಾಯಕಿಗೆ ಲವ್ ಆಗೋದು, ಓಪನ್​ ಸೀನ್​​ನಲ್ಲಿ ನಾಯಕ ಬಾರ್​ಗೆ ಬಂದು ಕೂತು ಕಂಟಪೂರ್ತಿ ಕುಡಿಯುವುದು ಸೇರಿ ಅನೇಕ ವಿಚಾರಗಳು ಈ ಮೊದಲಿನ ಸಿನಿಮಾಗಳಲ್ಲಿ ಬಂದು ಹೋದ ದೃಶ್ಯಗಳನ್ನು ನೆನಪಿಸುತ್ತವೆ.  ಕಥೆ ಹಾಗೂ ನಿರೂಪಣೆ ವಿಚಾರದಲ್ಲಿ ನಿರ್ದೇಶಕರು ಹೊಸತನ ಪ್ರಯತ್ನಿಸಬಹುದಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ