ಪ್ರಭಾಸ್ ಪ್ರಕಾರ ಯಾರು ಬೆಸ್ಟ್? ಅಲ್ಲು ಅರ್ಜುನ್, ಜೂ ಎನ್ಟಿಆರ್, ರಾಮ್ ಚರಣ್
ಪ್ರಭಾಸ್ ಮಾತನಾಡುವುದೇ ಕಡಿಮೆ, ಸಂದರ್ಶನಗಳಲ್ಲಿಯೂ ಅವರು ಮೌನವಾಗಿಯೇ ಇರುತ್ತಾರೆ. ವಿವಾದಗಳಿಂದ ಅಂತೂ ಕಿ.ಮೀಗಟ್ಟಲೆ ದೂರ. ಆದರೆ ಒಮ್ಮೆ ಮಾತ್ರ ಸಂದರ್ಶನವೊಂದರಲ್ಲಿ, ಮಹೇಶ್ ಬಾಬು, ಅಲ್ಲು ಅರ್ಜುನ್, ಜೂ ಎನ್ಟಿಆರ್, ರಾಮ್ ಚರಣ್ ಅವರುಗಳಲ್ಲಿ ಯಾರು ಒಳ್ಳೆಯ ನಟರು ಎಂದು ಹೇಳಿದ್ದರು.
Updated on: Oct 02, 2024 | 8:37 AM
ಅತಿ ಹೆಚ್ಚು ಸೂಪರ್ ಸ್ಟಾರ್ ನಟರನ್ನು ಹೊಂದಿರುವ ಚಿತ್ರರಂಗವೆಂದರೆ ಅದು ತೆಲುಗು ಚಿತ್ರರಂಗ. ಮೆಗಾಸ್ಟಾರ್ ಚಿರಂಜೀವಿ, ನಂದಮೂರಿ ಬಾಲಕೃಷ್ಣ, ನಾಗಾರ್ಜುನ, ವೆಂಕಟೇಶ್ ಅದಾದ ಬಳಿಕ ಪ್ರಭಾಸ್, ಜೂ ಎನ್ಟಿಆರ್, ರಾಮ್ ಚರಣ್, ಮಹೇಶ್ ಬಾಬು, ಅಲ್ಲು ಅರ್ಜುನ್, ರವಿತೇಜ ಅದಾದ ಬಳಿಕ ವಿಜಯ್ ದೇವರಕೊಂಡ, ನಾನಿ, ನಿತಿನ್, ವರುಣ್ ತೇಜ್, ಕಲ್ಯಾಣ್ ರಾಮ್ ಅದಾದ ಬಳಿಕ ಇನ್ನೂ ಕೆಲವು ಯುವನಟರು, ಹೀಗೆ ಒಂದು ಆರ್ಡರ್ನಲ್ಲಿ ಸ್ಟಾರ್ಗಳು, ಸೂಪರ್ ಸ್ಟಾರ್ಗಳು ತೆಲುಗು ಚಿತ್ರರಂಗದಲ್ಲಿ ಇದ್ದಾರೆ.
ಮೊದಲ ಸಾಲಿನಲ್ಲಿರುವ ಸ್ಟಾರ್ ನಟರುಗಳಿಗೆ ಭಾರಿ ಸಂಖ್ಯೆಯ ಅಭಿಮಾನಿಗಳಿದ್ದಾರೆ. ಪ್ರಭಾಸ್, ಅಲ್ಲು ಅರ್ಜುನ್, ಮಹೇಶ್ ಬಾಬು, ರಾಮ್ ಚರಣ್, ಜೂ ಎನ್ಟಿಆರ್ ಅವರುಗಳ ಮಧ್ಯೆ ಒಂದೊಳ್ಳೆ ಆರೋಗ್ಯಕರ ಸ್ಪರ್ಧೆಯೂ ನಡೆಯುತ್ತಿದೆ. ಎಲ್ಲ ನಟರು ಉತ್ತಮ ಸಿನಿಮಾ ನೀಡಲು, ಬ್ಲಾಕ್ ಬಸ್ಟರ್ ಸಿನಿಮಾಗಳನ್ನು ನೀಡಲು ಸತತವಾಗಿ ಯತ್ನಿಸುತ್ತಿದ್ದಾರೆ. ಆದರೆ ಈ ಟಾಪ್ ಸ್ಟಾರ್ ನಟರಲ್ಲಿ ಯಾರು ಉತ್ತಮ? ಸ್ವತಃ ಪ್ರಭಾಸ್ಗೆ ಈ ಪ್ರಶ್ನೆ ಎದುರಾದಾಗ ಧೈರ್ಯ ಮಾಡಿ ಉತ್ತರ ನೀಡಿಯೇ ಬಿಟ್ಟಿದ್ದರು ಪ್ರಭಾಸ್.
ಇದನ್ನೂ ಓದಿ:ಮತ್ತೆ ರಾಮಾಯಣ ಆಧರಿಸಿದ ಸಿನಿಮಾದಲ್ಲಿ ಪ್ರಭಾಸ್, ಆದರೆ ಈ ಬಾರಿ ರಾಮನಲ್ಲ
ಹೆಚ್ಚಾಗಿ ಮಾತನಾಡದ ನಟ ಪ್ರಭಾಸ್, ಸಂದರ್ಶನಗಳಿಂದ ತುಸು ದೂರ. ಆದರೆ ಈ ಹಿಂದೆ ಪ್ರಭಾಸ್, ಜನಪ್ರಿಯ ಹಿಂದಿ ಟಾಕ್ ಶೋ ‘ಕಾಫಿ ವಿತ್ ಕರಣ್’ನಲ್ಲಿ ಭಾಗವಹಿಸಿದ್ದರು. ಕರಣ್ ಜೋಹರ್ ನಿರೂಪಣೆ ಮಾಡುವ ಆ ಶೋ ವಿವಾದಾತ್ಮಕ ಪ್ರಶ್ನೆಗಳನ್ನು ಕೇಳಿ ಅತಿಥಿಗಳಿಂದ ಉತ್ತರ ಹೇಳಿಸಿ ವಿವಾದಗಳಿಗೆ ಈಡು ಮಾಡಿದ್ದೇ ಹೆಚ್ಚು. ಐವರು ನಟ ಅಥವಾ ನಟಿಯರ ಹೆಸರು ಹೇಳಿ ಇದರಲ್ಲಿ ಒಳ್ಳೆಯ ನಟರು ಯಾರು ಎಂದೆಲ್ಲ ಕೇಳಲಾಗುತ್ತಿತ್ತು. ಪ್ರಭಾಸ್ಗೂ ಸಹ ಇದೇ ಮಾದರಿಯ ಪ್ರಶ್ನೆ ಎದುರಾಗಿತ್ತು.
ಈ ನಾಲ್ಕು ನಟರನ್ನು ಅವರ ನಟನಾ ಪ್ರತಿಭೆ ಆಧರಿಸಿ ಅನುಕ್ರಮದಲ್ಲಿ ಹೆಸರಿಸಿ ಎಂದು ಹೇಳಿ ಮಹೇಶ್ ಬಾಬು, ಜೂ ಎನ್ಟಿಆರ್, ಅಲ್ಲು ಅರ್ಜುನ್, ರಾಮ್ ಚರಣ್ ಎಂದು ಆಯ್ಕೆಗಳನ್ನು ನೀಡಲಾಗಿತ್ತು. ಇಂಥಹಾ ವಿವಾದಾತ್ಮಕ ಪ್ರಶ್ನೆಗಳಿಂದ ದೂರವೇ ಇರುವ ಪ್ರಭಾಸ್, ಈ ಪ್ರಶ್ನೆಗೆ ಉತ್ತರ ನೀಡಿದ್ದರು. ಪ್ರಭಾಸ್ ನೀಡಿದ ಉತ್ತರದ ಪ್ರಕಾರ, ಮಹೇಶ್ ಬಾಬು, ಜೂ ಎನ್ಟಿಆರ್, ಅಲ್ಲು ಅರ್ಜುನ್, ರಾಮ್ ಚರಣ್ ಅವರುಗಳಲ್ಲಿ ಜೂ ಎನ್ಟಿಆರ್ ಅತ್ಯುತ್ತಮ ನಟರಂತೆ. ಅದರ ನಂತರದ ಸ್ಥಾನ ಮಹೇಶ್ ಬಾಬು, ಅವರ ಬಳಿಕ ಅಲ್ಲು ಅರ್ಜುನ್, ಕೊನೆಯ ಸ್ಥಾನವನ್ನು ರಾಮ್ ಚರಣ್ಗೆ ನೀಡಿದ್ದರು ಪ್ರಭಾಸ್.
ಅಸಲಿಗೆ ಪ್ರಭಾಸ್ ಹಾಗೂ ರಾಮ್ ಚರಣ್ ಆತ್ಮೀಯ ಗೆಳೆಯರು, ಜೂ ಎನ್ಟಿಆರ್ ಸಹ ಪ್ರಭಾಸ್ಗೆ ಉತ್ತಮ ಗೆಳೆಯರು. ಆದರೆ ಪ್ರಭಾಸ್ಗೆ ವೈಯಕ್ತಿಕವಾಗಿ ಜೂ ಎನ್ಟಿಆರ್ ನಟನೆ ಬಹಳ ಇಷ್ಟವಂತೆ. ಪ್ರಭಾಸ್ ಪ್ರಸ್ತುತ ಐದು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಹಾರರ್ ಸಿನಿಮಾ ‘ರಾಜಾಸಾಬ್’ ಸಿನಿಮಾದ ಚಿತ್ರೀಕರಣ ಬಹುತೇಕ ಮುಗಿಸಿದ್ದಾರೆ. ರಘು ಹನುಪುಡಿ ನಿರ್ದೇಶನದ ಸಿನಿಮಾದಲ್ಲಿ ಪ್ರಭಾಸ್ ನಟಿಸುತ್ತಿದ್ದಾರೆ. ಅದಾದ ಬಳಿಕ ‘ಸ್ಪಿರಿಟ್’ ಸಿನಿಮಾ ಪ್ರಾರಂಭವಾಗಲಿದೆ. ಅದರ ಬಳಿಕ ‘ಕಲ್ಕಿ 2’ ಹಾಗೂ ‘ಸಲಾರ್ 2’ ಸಿನಿಮಾಗಳ ಚಿತ್ರೀಕರಣ ಆರಂಭ ಆಗಲಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
