ಮಗಳ ತೊಟ್ಟಿಲ ಶಾಸ್ತ್ರದ ಸಂಭ್ರಮದಲ್ಲಿ ರಾಮ್ ಚರಣ್-ಉಪಾಸನಾ
Ram Charan-Upasana: ರಾಮ್ ಚರಣ್ ಹಾಗೂ ಉಪಾಸನಾ ಕಮ್ಮಿನೇನಿ ಕೋನಿಡೆಲಾರ ಮಗಳಿಗೆ ಇಂದು ತೊಟ್ಟಿಲ ಶಾಸ್ತ್ರ.
ರಾಮ್ ಚರಣ್ (Ram Charan) ಹಾಗೂ ಉಪಾಸನಾ (Upasana) 11 ವರ್ಷದ ಬಳಿಕ ಪೋಷಕರಾಗಿದ್ದಾರೆ. ಕೆಲವು ದಿನಗಳ ಹಿಂದಷ್ಟೆ ಉಪಾಸನಾ ಕಮ್ಮಿನೇನಿ ಕೋನಿಡೆಲಾ ಮುದ್ದಾದ ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ. ಅಭಿಮಾನಿಗಳು ಮೆಗಾ ಪ್ರಿನ್ಸೆಸ್ ಎಂದು ಮಗುವನ್ನು ಕರೆಯುತ್ತಿದ್ದಾರೆ. ಮಗುವಿನೊಟ್ಟಿಗೆ ಕೆಲವು ದಿನಗಳ ಹಿಂದಷ್ಟೆ ಆಸ್ಪತ್ರೆಯಿಂದ ಮನೆಗೆ ತೆರಳಿದ ರಾಮ್ ಚರಣ್ ಹಾಗೂ ಉಪಾಸನಾ ಇದೀಗ ಸಂಭ್ರಮದಿಂದ ಮಗುವಿನ ತೊಟ್ಟಿಲ ಶಾಸ್ತ್ರ ಮಾಡುತ್ತಿದ್ದಾರೆ.
ಇಂದು (ಜೂನ್ 30) ರಾಮ್ ಚರಣ್ ನಿವಾಸದಲ್ಲಿ ಶಾಸ್ತ್ರೋಪ್ತವಾಗಿ ತೊಟ್ಟಿಲ ಶಾಸ್ತ್ರ ನೆರವೇರಿಸಿದ್ದಾರೆ ರಾಮ್ ಚರಣ್ ಹಾಗೂ ಉಪಾಸನಾ ದಂಪತಿ. ಈ ಸಂಭ್ರಮದಲ್ಲಿ ಮೆಗಾಸ್ಟಾರ್ ಕುಟುಂಬದವರು ಹಾಗೂ ಉಪಾಸನಾ ಅವರ ಕಮ್ಮಿನೇನಿ ಕುಟುಂಬದವರು ಭಾಗಿಯಾಗಿದ್ದಾರೆ. ಇಂದೇ ನಾಮಕರಣವೂ ನಡೆಯಲಿದೆ ಎಂಬ ಮಾತುಗಳಿವೆಯಾದರೂ ಅದು ಖಾತ್ರಿ ಆಗಿಲ್ಲ.
ಹೈದರಾಬಾದ್ನ ಮನೆಯಲ್ಲಿಯೇ ತೊಟ್ಟಿಲ ಶಾಸ್ತ್ರ ನಡೆಯುತ್ತಿದ್ದು ಕಾರ್ಯಕ್ರಮದ ತಯಾರಿಯ ವಿಡಿಯೋವನ್ನು ಉಪಾಸನಾ ಕೋನಿಡೇಲ ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ. ಚಿರಂಜೀವಿ ಮನೆಯ ಮಧ್ಯದಲ್ಲಿರುವ ಮರಕ್ಕೆ ವಿಶೇಷ ಅಲಂಕಾರ ಮಾಡಲಾಗಿದ್ದು ಅದರ ಮುಂದೆಯೇ ತೊಟ್ಟಿಲು ತೂಗು ಹಾಕಲು ಕಂಬಗಳನ್ನು ನೆಟ್ಟು ಹೂವುಗಳಿಂದ ಅಲಂಕರಿಸಲಾಗಿದೆ. ಅತಿಥಿಗಳಿಗಾಗಿ ವಿಶೇಷ ಕುರ್ಚಿಗಳು ಹಾಗೂ ಭೋಜನ ವ್ಯವಸ್ಥೆಯನ್ನು ಮಾಡಿರುವ ದೃಶ್ಯಗಳು ಉಪಾಸನಾ ಹಂಚಿಕೊಂಡಿರುವ ವಿಡಿಯೋದಲ್ಲಿದೆ.
ಆಸ್ಪತ್ರೆಯಿಂದ ಮನೆಗೆ ಮಗುವನ್ನು ಕೊಂಡೊಯ್ಯುವಾಗ ಮಾಧ್ಯಮಗಳೊಟ್ಟಿಗೆ ಮಾತನಾಡಿದ್ದ ರಾಮ್ ಚರಣ್, ”ನಾನು ಹಾಗೂ ಉಪಾಸನಾ ಈಗಾಗಲೇ ಮಗುವಿಗೆ ಕೆಲವು ಹೆಸರುಗಳನ್ನು ಯೋಚಿಸಿದ್ದೇವೆ. ಹುಟ್ಟಿದ 13ನೇ ದಿನ ಅಥವಾ 15ನೇ ದಿನಕ್ಕೆ ನಾಮಕರಣ ಶಾಸ್ತ್ರ ಮಾಡುತ್ತಾರಂತೆ, ನನಗೆ ಆ ಬಗ್ಗೆ ಹೆಚ್ಚು ಮಾಹಿತಿ ಇಲ್ಲ. ಆದರೆ ಹೆಸರು ಇಟ್ಟ ಕೂಡಲೇ ನಾನೇ ಖುದ್ದಾಗಿ ಎಲ್ಲರಿಗೂ ವಿಷಯ ತಿಳಿಸುತ್ತೇನೆ” ಎಂದಿದ್ದರು. ರಾಮ್ ಚರಣ್ ಅಂದು ಹೇಳಿದ್ದಂತೆ ಮಗುವಿನ ಜನನವಾಗಿ ಇನ್ನೂ 13 ದಿನ ಆಗಿಲ್ಲ.
ರಾಮ್ ಚರಣ್ ಹಾಗೂ ಉಪಾಸನಾಗೆ ಜೂನ್ 20 ರಂದು ಮುಂಜಾವಿಗೆ ಮುನ್ನ 1:40ಕ್ಕೆ ಮಗು ಜನಿಸಿದೆ. ರಾಮ್ ಚರಣ್ ಹಾಗೂ ಉಪಾಸನಾ ಮದುವೆಯಾಗಿ 11 ವರ್ಷದ ಬಳಿಕ ಜನಿಸಿದ ಮಗು ಇದಾಗಿದ್ದು, ಮೆಗಾಸ್ಟಾರ್ ಕುಟುಂಬದ ಹಲವರು ಅಂದು ಆಸ್ಪತ್ರೆಗೆ ಭೇಟಿ ನೀಡಿ ಮಗುವನ್ನು ಕಂಡು ಶುಭಾಷಯಗಳನ್ನು ಕೋರಿದ್ದರು. ನಟ ಚಿರಂಜೀವಿ ಸಹ ಪೋಷಕರಾಗಿ, ರಾಮ್ ಹಾಗೂ ಉಪಾಸನಾ ಪೋಷಕರಾಗಬೇಕು ಎಂಬುದು ನಮ್ಮ ಬಹುವರ್ಷಗಳ ಆಸೆಯಾಗಿತ್ತು ಎಂದಿದ್ದರು. ಅಲ್ಲದೆ, ”ಮಗು ಬಹಳ ಒಳ್ಳೆಯ ಸಮಯದಲ್ಲಿ ಜನಿಸಿದೆ ಎನ್ನುತ್ತಿದ್ದಾರೆ ದೊಡ್ಡವರು. ಮಗು ಬಹಳ ಅದೃಷ್ಟ ತರಲಿದೆ. ಈಗಾಗಲೇ ರಾಮ್ ಚರಣ್ ವೃತ್ತಿಯಲ್ಲ ಬಹಳ ಔನ್ನತ್ಯ ಸಾಧಿಸಿದ್ದಾರೆ. ವರುಣ್ ತೇಜ್ ಮದುವೆ ನಿಶ್ಚಯವಾಗಿದೆ. ಇನ್ನೂ ಕೆಲವು ಒಳ್ಳೆಯ ಕಾರ್ಯಗಳು ಮನೆಯಲ್ಲಿ ಆಗುತ್ತಿವೆ. ಮಗುವಿನ ಆಗಮನದಿಂದ ಎಲ್ಲವೂ ಶುಭ ಆಗುತ್ತಿದೆ” ಎಂದಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ