‘ಟ್ರೋಲ್​ ಸಾಂಗ್​’ ಮಾತ್ರವಲ್ಲ, ಉಪೇಂದ್ರ ಮಾಡಿದ ಸಾಹಿತ್ಯದ ಪ್ರಯೋಗಗಳು ಹತ್ತು ಹಲವು..

ಬಹುನಿರೀಕ್ಷಿತ ‘ಯುಐ’ (UI Movie) ಸಿನಿಮಾದ ಹೊಸ ಹಾಡು ಬಿಡುಗಡೆಯಾಗಿ ಸಖತ್​ ಸದ್ದು ಮಾಡುತ್ತಿದೆ. ‘ಟ್ರೋಲ್​ ಸಾಂಗ್​’ (Troll Song) ಸಾಹಿತ್ಯ ಕೇಳಿದ ಎಲ್ಲರೂ ಭೇಷ್​ ಎನ್ನುತ್ತಿದ್ದಾರೆ. ಉಪೇಂದ್ರ ನಿರ್ದೇಶನದ ಈ ಸಿನಿಮಾದ ಮೇಲಿನ ಹೈಪ್​ ಹೆಚ್ಚಾಗಲು ಈ ಸಾಂಗ್​ ಕಾರಣ ಆಗಿದೆ. ನರೇಶ್​ ಕುಮಾರ್​ ಎಚ್​.ಎನ್​. ಅವರು ಇದರ ಸಾಹಿತ್ಯ ಬರೆದಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಟ್ರೋಲ್​ ಆದ ವಿಚಾರಗಳನ್ನೇ ಒಂದಕ್ಕೊಂದು ಪೋಣಿಸಿ ಈ ಗೀತೆಯನ್ನು ಬರೆಯಲಾಗಿದೆ. ಉಪೇಂದ್ರ ಅವರ ಸಿನಿಮಾಗಳಲ್ಲಿ ಇಂಥ ಪ್ರಯೋಗಗಳು ಹಲವು ಬಾರಿ ನಡೆದಿವೆ. ಈ ಹಿಂದೆ ಉಪೇಂದ್ರ (Upendra) ಅವರು ಮಾಡಿದ ಸಾಹಿತ್ಯದ ಪ್ರಯೋಗಗಳು ಒಂದೆರಡಲ್ಲ.

ಬಾಲೋ ಭಾಷಿ ಬೆಂಗಾಲಿಲಿ..

ಉಪೇಂದ್ರ ನಟನೆಯ ‘ಓಂಕಾರ’ ಸಿನಿಮಾದ ಹಾಡುಗಳು ಗುರುಕಿರಣ್​ ಅವರ ಸಂಗೀತದಲ್ಲಿ ಮೂಡಿಬಂದಿವೆ. ಈ ಸಿನಿಮಾ 2004ರಲ್ಲಿ ಬಿಡುಗಡೆ ಆಯಿತು. ಈ ಸಿನಿಮಾದಲ್ಲಿದ್ದ ‘ಬಾಲೋ ಭಾಷಿ ಬೆಂಗಾಲಿಲಿ..’ ಸಾಂಗ್​ ತುಂಬ ವಿಶೇಷವಾಗಿದೆ. ‘ಐ ಲವ್​ ಯೂ’ ಎಂಬ ವಾಕ್ಯವನ್ನು ಕನ್ನಡ, ಬೆಂಗಾಲಿ, ಹಿಂದಿ, ಇಂಗ್ಲಿಷ್​, ಸ್ಪಾನಿಶ್​, ಮಲಯಾಳಂ, ತಮಿಳು, ತೆಲುಗು, ಫ್ರೆಂಚ್​, ಲ್ಯಾಟಿನ್​, ಇಟಲಿಯಾನ್​, ಸಂಸ್ಕೃತ, ಚೈನೀಸ್​ ಮುಂತಾದ ಭಾಷೆಗಳಲ್ಲಿ ಹೇಗೆ ಹೇಳಲಾಗುತ್ತದೆ ಎಂಬುದನ್ನು ಈ ಹಾಡಿನಲ್ಲಿ ತಿಳಿಸಲಾಗಿದೆ. ಈ ಹಾಡು ಬರೆದಿದ್ದು ಉಪೇಂದ್ರ.

ಓಳು ಬರೀ ಓಳು..

ಉಪೇಂದ್ರ ಮತ್ತು ಗುರುಕಿರಣ್​ ಸೇರಿದರೆ ಅಲ್ಲಿ ಹೊಸತನ ಖಂಡಿತ ಇರುತ್ತದೆ. ಅದಕ್ಕೆ ಅನೇಕ ಸಾಕ್ಷಿಗಳಿವೆ. ‘ಉಪೇಂದ್ರ’ ಸಿನಿಮಾದಲ್ಲಿ ‘ಓಳು ಬರೀ ಓಳು’ ಹಾಡಿಗೆ ಸಾಹಿತ್ಯ ಬರೆದ ಉಪೇಂದ್ರ ಅವರು ಆಗಿನ ಕಾಲದಲ್ಲಿ ಹೆಚ್ಚು ಚಾಲ್ತಿಯಲ್ಲಿದ್ದ ಟಿವಿ ಚಾನೆಲ್​ಗಳ ಹೆಸರನ್ನೇ ಜೋಡಿಸಿ ಹಾಡು ಸೃಷ್ಟಿ ಮಾಡಿದ್ದರು. ‘ಎಂ ಟಿವಿ ಸುಬ್ಬುಲಕ್ಷ್ಮಿಗೆ ಬರಿ ಓಳು.. ಜೀ ಟಿವಿ ಮಾದೆ ಗೌಡ್ರುಗೆ ಬರೀ ಓಳು’ ಎಂಬ ಈ ಹಾಡಿನಲ್ಲಿ ಉದಯ ಟಿವಿ, ಸಿಟಿ ಚಾನೆಲ್​, ಸನ್​ ಟಿವಿ, ವಿ ಚಾನೆಲ್​ ಮುಂತಾದ ವಾಹಿನಿಗಳ ಹೆಸರನ್ನು ಬಳಸಿಕೊಂಡು ಈ ಸಾಂಗ್ ಬರೆಲಾಗಿದೆ.

ಇದು ಒನ್​ ಡೇ ಮ್ಯಾಚು ಕಾಣೋ..

ಉಪೇಂದ್ರ ಹೀರೋ ಆಗಿ ನಟಿಸಿದ್ದ ‘ಎ’ ಸಿನಿಮಾದಲ್ಲಿ ಹತ್ತು ಹಲವು ಪ್ರಯೋಗ ಮಾಡಲಾಗಿತ್ತು. ಆ ಸಿನಿಮಾದಲ್ಲಿದ್ದ ‘ಇದು ಒನ್​ ಡೇ ಮ್ಯಾಚು ಕಣೋ..’ ಹಾಡು ಇಂದಿಗೂ ಎವರ್​ಗ್ರೀನ್​ ಆಗಿದೆ. ಕ್ರಿಕೆಟ್​ ಕಾಮೆಂಟರಿಯ ರೀತಿಯಲ್ಲಿ ಉಪೇಂದ್ರ ಅವರು ಈ ಸಾಂಗ್​ ಬರೆದಿದ್ದಾರೆ. ಹೀರೋ-ಹೀರೋಯಿನ್​ ನಡುವೆ ಪ್ರೀತಿ ಹುಟ್ಟುವ ಆ ಕ್ಷಣವನ್ನು ಕ್ರಿಕೆಟ್​ ಮ್ಯಾಚ್​ಗೆ ಹೋಲಿಸಿ ಬರೆದ ಈ ಹಾಡು ಸೂಪರ್​ ಹಿಟ್​ ಆಯಿತು.

ಐ ವನಾ ಸೀ ಮೈ ಡಾರ್ಲಿಂಗ್​..

‘ಎಚ್​2ಒ’ ಸಿನಿಮಾದ ಎಲ್ಲ ಹಾಡುಗಳು ಸೂಪರ್​ ಹಿಟ್​. ಸಾಧು ಕೋಕಿಲ ಅವರು ಸಂಗೀತ ನೀಡಿದ ಈ ಸಿನಿಮಾದಲ್ಲಿ ‘ಐ ವನಾ ಸೀ ಮೈ ಡಾರ್ಲಿಂಗ್​..’ ಹಾಡಿನ ಸಾಹಿತ್ಯ ತುಂಬ ಡಿಫರೆಂಟ್​ ಆಗಿದೆ. ಇದನ್ನು ಕೂಡ ಉಪೇಂದ್ರ ಅವರೇ ಬರೆದಿದ್ದಾರೆ. ಹಲವು ದೇಶ ಮತ್ತು ಸ್ಥಳಗಳ ಹೆಸರುಗಳನ್ನು ಬಳಸಿಕೊಂಡು ಈ ಹಾಡನ್ನು ಬರೆಲಾಗಿದೆ. ಅನೇಕ ದೇಶಗಳ ಫೇಮಸ್​ ಅಂಶಗಳನ್ನು ಹೆಣ್ಣಿನ ಅಂದಕ್ಕೆ ಹೋಲಿಸಲಾಗಿದೆ.

ನ್ಯೂಸ್​ ಪೇಪರ್​ಗಳ ಸಾಂಗ್​..

ಉಪೇಂದ್ರ ನಟನೆಯ ‘ನ್ಯೂಸ್​’ ಸಿನಿಮಾ 2005ರಲ್ಲಿ ಬಿಡುಗಡೆ ಆಯಿತು. ಈ ಸಿನಿಮಾದಲ್ಲಿ ಕವಿರಾಜ್​ ಬರೆದ ‘ಗುಡ್​ ಮಾರ್ನಿಂಗ್​ ಇಂಡಿಯಾ ಟುಡೇ..’ ಹಾಡು ಕೂಡ ಭಿನ್ನವಾಗಿದೆ. ಇಂಡಿಯಾ ಟುಡೇ, ಈ ಸಂಜೆ, ಟೈಮ್ಸ್​ ಆಫ್​​ ಇಂಡಿಯಾ, ಸಿತಾರಾ, ಮಯೂರ, ತುಷಾರಾ, ಉದಯವಾಣಿ, ವಿಜಯ ಕರ್ನಾಟಕ, ಪ್ರಜಾವಾಣಿ, ಸಂಯುಕ್ತ ಕರ್ನಾಟಕ, ಔಟ್​ ಲುಕ್​, ಸಂಜೆ ವಾಣಿ, ಕನ್ನಡ ಪ್ರಭ, ರೂಪತಾರ, ಕರ್ಮವೀರ, ಗೃಹಶೋಭಾ, ಅರಗಿಣಿ, ಚಂದಮಾಮಾ ಮುಂತಾದ ಪತ್ರಿಕೆ ಹಾಗೂ ಮ್ಯಾಗಜಿನ್​ಗಳ ಹೆಸರನ್ನು ಪೋಣಿಸಿ ಕವಿರಾಜ್​ ಅರು ಈ ಹಾಡು ಬರೆದಿದ್ದಾರೆ. ‘ನ್ಯೂಸ್​’ ಚಿತ್ರಕ್ಕೆ ಗುರುಕಿರಣ್​ ಅವರ ಸಂಗೀತವಿದೆ.

ಜಗತ್ತಿನ ವಿದ್ಯಮಾನಗಳಿಗೆ ತಕ್ಕಂತೆ ಉಪೇಂದ್ರ ಹಾಡು ಬರೆಯುತ್ತಾರೆ. 2001ರ ಸೆಪ್ಟೆಂಬರ್​ 9ರಂದು ಅಲ್​-ಖೈದಾ ಉಗ್ರರು ಅಮೆರಿಕದ ಮೇಲೆ ಆತ್ಮಾಹುತಿ ದಾಳಿ ಮಾಡಿದ ಬಳಿಕ ತಾಲಿಬಾನ್​ ಹಾಗೂ ಒಸಾಮಾ ಬಿನ್​ ಲಾಡೆನ್​ ಹೆಸರುಗಳು ಪದೇಪದೇ ಸುದ್ದಿಯಾಗಲು ಆರಂಭಿಸಿದವು. 2002ರ ಏಪ್ರಿಲ್​ನಲ್ಲಿ ಬಂದ ‘ಅಪ್ಪು’ ಸಿನಿಮಾದಲ್ಲಿ ‘ತಾಲಿಬಾನ್​ ಅಲ್ಲ ಅಲ್ಲ, ಬಿನ್​ ಲಾಡೆನ್​ ಅಲ್ವೇ ಅಲ್ಲ..’ ಎಂದು ಹಾಡು ಬರೆಯುವ ಮೂಲಕ ಉಪೇಂದ್ರ ಅವರು ಎಲ್ಲರ ಗಮನ ಸೆಳೆದರು.

ಇದನ್ನೂ ಓದಿ: ಸಾಧುಗೆ ‘ಕೋಕಿಲ’ ಹೆಸರು ಕೊಟ್ಟಿದ್ದು ಉಪೇಂದ್ರ; ಇದರ ಹಿಂದಿದೆ ಇಂಟರೆಸ್ಟಿಂಗ್ ಕಥೆ

ಹೀಗೆ ಗೀತರಚನೆಯಲ್ಲಿ ಅವರು ಹಲವು ಪ್ರಯೋಗಗಳನ್ನು ಮಾಡಿದ್ದಾರೆ. ಎರಡು ಹೃದಯಗಳ ನಡುವೆ ಆ್ಯಕ್ಸಿಡೆಂಟ್​ ಆಗಿದೆ ಎಂಬರ್ಥದಲ್ಲಿ ಅವರು ಬರೆದ ‘ಸುಮ್​ ಸುಮ್ನೇ ನಗ್ತಾಳೆ..’ ಹಾಡು ಅಷ್ಟೇ ಡಿಫರೆಂಟ್​ ಆಗಿದೆ. ಇದಕ್ಕೆ ಹೇಳೋದು ಉಪೇಂದ್ರಗೆ ಉಪೇಂದ್ರನೇ ಸಾಟಿ ಅಂತ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.