‘ಬ್ಯಾಡ್ ಮ್ಯಾನರ್ಸ್’ ಸಿನಿಮಾದ ಹಕ್ಕುಗಳು ಜಯಣ್ಣ ಫಿಲ್ಮ್ಸ್ ಪಾಲು
Bad Manners: ಅಭಿಷೇಕ್ ಅಂಬರೀಶ್ ನಟಿಸಿ, ದುನಿಯಾ ಸೂರಿ ನಿರ್ದೇಶನ ಮಾಡಿರುವ 'ಬ್ಯಾಡ್ ಮ್ಯಾನರ್ಸ್' ಸಿನಿಮಾ ಇದೇ ನವೆಂಬರ್ 23ಕ್ಕೆ ಬಿಡುಗಡೆ ಆಗಲಿದ್ದು, ಸಿನಿಮಾದ ಸ್ಯಾಟಲೈಟ್, ಡಿಜಿಟಲ್, ವಿತರಣೆ ಹಾಗೂ ಡಬ್ಬಿಂಗ್ ಹಕ್ಕುಗಳು ಜಯಣ್ಣ ಫಿಲ್ಮ್ಸ್ ಪಾಲಾಗಿವೆ.
!['ಬ್ಯಾಡ್ ಮ್ಯಾನರ್ಸ್' ಸಿನಿಮಾದ ಹಕ್ಕುಗಳು ಜಯಣ್ಣ ಫಿಲ್ಮ್ಸ್ ಪಾಲು](https://images.tv9kannada.com/wp-content/uploads/2023/11/bad-mannerss.jpg?w=1280)
ದುನಿಯಾ ಸೂರಿ (Duniya Suri) ನಿರ್ದೇಶಿಸಿ ಅಭಿಷೇಕ್ ಅಂಬರೀಶ್ (Abhishek Ambareesh) ನಟಿಸಿರುವ ‘ಬ್ಯಾಡ್ ಮ್ಯಾನರ್ಸ್’ ಸಿನಿಮಾ ಕೆಲವೇ ದಿನಗಳಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಲಿದೆ. ಸಿನಿಮಾದ ಸಣ್ಣ ಟೀಸರ್ ಒಂದು ಇತ್ತೀಚೆಗಷ್ಟೆ ಬಿಡುಗಡೆ ಆಗಿದ್ದು, ಸಿನಿಮಾದಲ್ಲಿ ಕಚ್ಚಾತನದ ಹಲವರ ಗಮನ ಸೆಳೆದಿದೆ. ದುನಿಯಾ ಸೂರಿಯವರ ಸುಕ್ಕಾ ಶೈಲಿ ಈ ಸಿನಿಮಾದಲ್ಲಿಯೂ ಇದೆಯೆಂಬುದನ್ನು ಟೀಸರ್ ಖಾತ್ರಿ ಪಡಿಸಿದ್ದು, ಅಭಿಷೇಕ್ ಅಂಬರೀಶ್ ಭಿನ್ನ ಲುಕ್ ನಲ್ಲಿ ಕಾಣಿಸಿಕೊಂಡಿರುವ ಅವರ ಅಭಿಮಾನಿಗಳು ಸಿನಿಮಾಕ್ಕಾಗಿ ಕಾತರದಿಂದ ಕಾಯುವಂತೆ ಮಾಡಿದೆ.
ಸಿನಿಮಾದ ಪ್ರಚಾರವನ್ನು ಚಿತ್ರತಂಡ ಪ್ರಾರಂಭ ಮಾಡಿರುವ ಹೊತ್ತಿನಲ್ಲೇ, ಚಿತ್ರರಂಗದ ಜನಪ್ರಿಯ ನಿರ್ಮಾಣ ಹಾಗೂ ವಿತರಣಾ ಸಂಸ್ಥೆಯಾದ ಜಯಣ್ಣ ಫಿಲ್ಮ್ಸ್ನವರು ‘ಬ್ಯಾಡ್ ಮ್ಯಾನರ್ಸ್’ ಸಿನಿಮಾದ ಹಲವು ಹಕ್ಕುಗಳನ್ನೂ ಖರೀದಿ ಮಾಡಿದ್ದಾರೆ. ಈ ಬಗ್ಗೆ ಸ್ವತಃ ಜಯಣ್ಣ ಫಿಲ್ಮ್ಸ್ನವರು ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.
‘ಬ್ಯಾಡ್ ಮ್ಯಾನರ್ಸ್’ ಸಿನಿಮಾದ ಸ್ಯಾಟಲೈಟ್, ಡಿಜಿಟಲ್, ವಿತರಣೆ, ಡಬ್ಬಿಂಗ್ ಹಕ್ಕನ್ನು ಜಯಣ್ಣ ಫಿಲ್ಮ್ಸ್ ಖರೀದಿ ಮಾಡಿದೆ. ಆಡಿಯೋ ಹಕ್ಕು ಬೇರೊಂದು ಸಂಸ್ಥೆಗೆ ಈ ಹಿಂದೆಯೇ ಮಾರಾಟವಾಗಿದೆ ಎನ್ನಲಾಗುತ್ತಿದೆ. ಸಿನಿಮಾದ ವಿತರಣೆ ಸೇರಿದಂತೆ ಇತರೆ ಪ್ರಮುಖ ಹಕ್ಕುಗಳನ್ನು ಖರೀದಿ ಮಾಡಿರುವ ಜಯಣ್ಣ ಫಿಲ್ಮ್ಸ್ ಸಿನಿಮಾದ ಮೇಲೆ ಅತೀವ ವಿಶ್ವಾಸವನ್ನೇ ಇಟ್ಟಿದೆ. ಸಿನಿಮಾ ಉತ್ತಮವಾಗಿ ಮೂಡಿಬಂದಿರುವ ಕಾರಣದಿಂದ ಜಯಣ್ಣ ಫಿಲ್ಮ್ಸ್ನವರು ಸಿನಿಮಾದ ಪ್ರಮುಖ ಹಕ್ಕುಗಳನ್ನು ಖರೀದಿ ಮಾಡಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: ಬ್ಯಾಡ್ ಮ್ಯಾನರ್ಸ್ ಬಿಡುಗಡೆ ದಿನಾಂಕ ಘೋಷಣೆ: ಬ್ಯಾಕ್ ಲುಕ್ನಲ್ಲಿ ಅಭಿಷೇಕ್ ಅಂಬರೀಶ್
ಸ್ಯಾಟಲೈಟ್, ಡಿಜಿಟಲ್, ವಿತರಣೆ, ಡಬ್ಬಿಂಗ್ ಹಕ್ಕನ್ನು ಜಯಣ್ಣ ಫಿಲ್ಮ್ಸ್ ನವರು 35 ಕೋಟಿ ರೂಪಾಯಿಗಳಿಗೆ ಖರೀದಿ ಮಾಡಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಸಿನಿಮಾವನ್ನು ಪ್ಯಾನ್ ಇಂಡಿಯಾ ಅಲ್ಲದೆ ಕೇವಲ ಕರ್ನಾಟಕದಲ್ಲಿ ಮಾತ್ರವೇ ಸದ್ಯಕ್ಕೆ ಬಿಡುಗಡೆ ಮಾಡಲಾಗುತ್ತಿದೆ. ಆದರೆ ಒಟಿಟಿ ಕಾರಣಕ್ಕೆ ಬೇರೆ ಭಾಷೆಗಳಲ್ಲಿಯೂ ಸಿನಿಮಾವನ್ನು ಡಬ್ ಮಾಡಲಾಗಿದೆ. ಸಿನಿಮಾದ ಡಿಜಿಟಲ್ ಹಾಗೂ ಸ್ಯಾಟಲೈಟ್ ಹಕ್ಕುಗಳು ಸಹ ಜಯಣ್ಣ ಫಿಲ್ಮ್ಸ್ ಬಳಿಯೇ ಇರುವ ಕಾರಣ ಅವರು ಯಾವ ಟಿವಿಗೆ ಹಾಗೂ ಯಾವ ಒಟಿಟಿಗೆ ಸಿನಿಮಾವನ್ನು ಮಾರುತ್ತಾರೆ ಎಂಬುದು ಕುತೂಹಲ ಮೂಡಿಸಿದೆ.
ಇನ್ನು ‘ಬ್ಯಾಡ್ ಮ್ಯಾನರ್ಸ್’ ಸಿನಿಮಾ ಅಭಿಷೇಕ್ ಅಂಬರೀಶ್ ನಟನೆಯ ಎರಡನೇ ಸಿನಿಮಾ. ದುನಿಯಾ ಸೂರಿ ನಿರ್ದೇಶನದ 11ನೇ ಸಿನಿಮಾ. ಸಿನಿಮಾದಲ್ಲಿ ರಚಿತಾ ರಾಮ್, ತಾರಾ, ಶರತ್ ಲೋಹಿತಾಶ್ವ, ದತ್ತಣ್ಣ ಇನ್ನೂ ಕೆಲವು ಉತ್ತಮ ನಟರಿದ್ದಾರೆ. ಚರಣ್ ರಾಜ್ ಸಂಗೀತ ನಿರ್ದೇಶನ ಮಾಡಿರುವ ಈ ಸಿನಿಮಾ ನವೆಂಬರ್ 23ಕ್ಕೆ ತೆರೆಗೆ ಬರಲಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:39 pm, Fri, 10 November 23