ಚಿತ್ರನಗರಿಗೆ ಚಾಲನೆ, ಮೈಸೂರಿನಲ್ಲಿ ಸ್ಥಳ ವೀಕ್ಷಿಸಿದ ಹಿರಿಯ ನಿರ್ದೇಶಕರು

ರಾಜ್ಯದಲ್ಲಿ ಒಂದು ಸುಸಜ್ಜಿತ ಚಿತ್ರನಗರಿ (Film City) ನಿರ್ಮಾಣ ಆಗಬೇಕು ಎಂಬುದು ಕನ್ನಡ ಚಿತ್ರರಂಗದ ದಶಕಗಳ ಬೇಡಿಕೆ. ದಕ್ಷಿಣ ಭಾರತದಲ್ಲಿ ಸಿನಿಮಾ ಉದ್ಯಮ ಆರಂಭವಾದಾಗಿನಿಂದಲೂ ಸಿನಿಮಾ ಕಾರ್ಯಗಳೆಲ್ಲ ಮದ್ರಾಸು ಮತ್ತು ಈಗ ಹೈದರಾಬಾದ್​​ನಲ್ಲೇ ಸ್ಥಿತಗೊಂಡಿವೆ. ಈಗಲೂ ಸಹ ರಾಜ್ಯದಲ್ಲಿ ನಿರ್ಮಾಣವಾಗುವ ಹಲವಾರು ಸಿನಿಮಾಗಳು ಚಿತ್ರೀಕರಣದಿಂದ ಹಿಡಿದು ವಿಎಫ್​ಎಕ್ಸ್ ಇನ್ನಿತರೆ ಕಾರ್ಯಗಳಿಗೆ ಹೈದರಾಬಾದ್ ಅಥವಾ ಚೆನ್ನೈ ಅನ್ನೇ ಅವಲಂಬಿಸಿವೆ. ಕರ್ನಾಟಕಕ್ಕೆ ತನ್ನದೇ ಆದ ಫಿಲಂ ಸಿಟಿಯ ಅಗತ್ಯ ಬಹಳ ಇದೆ. ಇದೀಗ ಕನ್ನಡ ಚಿತ್ರರಂಗದ ದಶಕಗಳ ಬೇಡಿಕೆ ಈಡೇರುತ್ತಿದೆ.

ಮೈಸೂರಿನಲ್ಲಿ ಚಿತ್ರನಗರಿ ನಿರ್ಮಾಣದ ಭರವಸೆಯನ್ನು ಸರ್ಕಾರ ಈಗಾಗಲೇ ನೀಡಿದೆ. ಇದೀಗ ಮೈಸೂರಿನಲ್ಲಿ ಚಿತ್ರನಗರಿಯ ಕೆಲಸಗಳು ಸಹ ಆರಂಭವಾಗಿದೆ ಎನ್ನಲಾಗುತ್ತಿದೆ. ಚಿತ್ರರಂಗದ ಹಿರಿಯ ನಿರ್ದೇಶಕರುಗಳಾದ ರಾಜೇಂದ್ರಸಿಂಗ್ ಬಾಬು, ನಾಗತಿಹಳ್ಳಿ ಚಂದ್ರಶೇಖರ್ ಇನ್ನೂ ಕೆಲವರು ಇತ್ತೀಚೆಗಷ್ಟೆ ಚಿತ್ರನಗರಿ ನಿರ್ಮಾಣವಾಗುತ್ತಿರುವ ಮೈಸೂರಿನ ಸ್ಥಳಕ್ಕೆ ಹೋಗಿ ವೀಕ್ಷಣೆ ನಡೆಸಿದ್ದಾರೆ.

ಈ ಬಗ್ಗೆ ಫೇಸ್​​ಬುಕ್​​ನಲ್ಲಿ ನಾಗತಿಹಳ್ಳಿ ಚಂದ್ರಶೇಖರ್ ಬರೆದುಕೊಂಡಿದ್ದು, ‘ಸರ್ಕಾರಕ್ಕೆ ಕೃತಜ್ಞತೆಗಳು.ಬಹುದಿನಗಳ ಕನಸು ನನಸಾಗಿದೆ. ಮೈಸೂರು ಬಳಿ ಚಿತ್ರನಗರಿಯ ಕಾಮಗಾರಿ ಆರಂಭವಾಗಿದೆ.ಮೊನ್ನೆ ನಾವೆಲ್ಲ ಹೋಗಿ ನೋಡಿ ಖುಷಿಪಟ್ಟೆವು. ಸಂಕಷ್ಟದಲ್ಲಿರುವ ಉದ್ಯಮ ಇದನ್ನು ಸದ್ಬಳಕೆ ಮಾಡಿಕೊಂಡು ಹಿರಿತೆರೆ, ಕಿರುತೆರೆಯ ಎಲ್ಲ ತರುಣರು ಹೊಸ ದೃಷ್ಟಿಯಿಂದ ಇಲ್ಲಿ ಹೊಸ ಬೆಳೆ ಬೆಳೆಯಬೇಕು. ಕುಶಲಿಗಳು, ಕಾರ್ಮಿಕರು ಮತ್ತು ತಂತ್ರಜ್ಞರಿಗೆ ಚಿತ್ರನಗರಿಯ ಆಸುಪಾಸಿನಲ್ಲಿ ಕಾನೂನು ವ್ಯಾಪ್ತಿಯಲ್ಲಿ ನಿವೇಶನ ಒದಗಿಸಿದರೆ ಉದ್ಯಮವನ್ನು ಮೈಸೂರಿಗೆ ಸ್ಥಳಾಂತರಿಸಬಹುದು. ಇದು ಚಿತ್ರನಗರಿಯ ಶೀಘ್ರ ಬೆಳವಣಿಗೆಗೆ ಅನುಕೂಲ’ ಎಂದಿದ್ದಾರೆ.

ಇದನ್ನೂ ಓದಿ:ಚಿತ್ರನಗರಿ ನಿರ್ಮಾಣ: ಅಧಿಕಾರಿಗಳ ಸಭೆ ನಡೆಸಿ ಸೂಚನೆ ನೀಡಿದ ಸಿಎಂ

ಕೆಲವೇ ದಿನಗಳ ಹಿಂದೆ ಮೈಸೂರಿನಲ್ಲಿ ಸುದ್ದಿಗೋಷ್ಠಿ ನಡೆಸಿದ್ದ ಸಚಿವ ಎಚ್​ಸಿ ಮಹದೇವಪ್ಪ, ‘ಚಿತ್ರನಗರಿ ನಿರ್ಮಾಣಕ್ಕೆ ಸ್ಥಳ ಗುರುತಿಸಲಾಗಿರುವ ಕೋಚನಹಳ್ಳಿ ಕೈಗಾರಿಕ ಪ್ರದೇಶದಲ್ಲಿ ತುಸು ಸಮಸ್ಯೆ ಇದೆ. ಇಲ್ಲಿ ಅನಧಿಕೃತವಾಗಿ ಉಳುಮೆ ಮಾಡುತ್ತಿದ್ದವರು ಪರಿಹಾರಕ್ಕೆ ಒತ್ತಾಯಿಸುತ್ತಿದ್ದಾರೆ. ಕೆಲವರಿಗೆ ಮಾನವೀಯತೆ ಆಧಾರದಲ್ಲಿ ಉದ್ಯೋಗ, ಹಣಕಾಸು ಇನ್ನಿತರೆಗಳನ್ನು ನೀಡುವ ಆಲೋಚನೆ ಇದೆ’ ಎಂದಿದ್ದರು.

500 ಕೋಟಿ ವೆಚ್ಚದಲ್ಲಿ ಅತ್ಯಾಧುನಿಕ ಚಿತ್ರನಗರಿಯನ್ನು ಸ್ಥಾಪಿಸಲು ಸರ್ಕಾರ ಮುಂದಾಗಿದೆ. ಈ ಯೋಜನೆ ಸರ್ಕಾರ ಮತ್ತು ಖಾಸಗಿ ಸಹಭಾಗಿತ್ವದಲ್ಲಿ ನಡೆಯಲಿದೆ. ಈಗಾಗಲೇ 150 ಎಕರೆ ಸ್ಥಳವನ್ನು ಚಿತ್ರನಗರಿಗೆಂದು ಮೀಸಲಿಡಲಾಗಿದ್ದು, ಇನ್ನೂ ನೂರು ಎಕರೆ ಹೆಚ್ಚುವರಿಯಾಗಿ ಬಳಸಿಕೊಳ್ಳುವ ಆಲೋಚನೆಯೂ ಇದೆ. ಚಿತ್ರನಗರಿಯು ಸಿನಿಮಾ ನಿರ್ಮಾಣಕ್ಕೆ ಸಹಕಾರಿ ಆಗುವ ಜೊತೆಗೆ ಪ್ರವಾಸೋದ್ಯಮದ ಉತ್ತೇಜನಕ್ಕೂ ಸಹಕಾರಿ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ