ಶಿವಣ್ಣನ ಹುಟ್ಟುಹಬ್ಬ ಅಭಿಮಾನಿಗಳಿಗೆ ಆಗಲಿದೆ ಹಬ್ಬ: ಸಾಲು-ಸಾಲು ಅಪ್​ಡೇಟ್

ಸಿನಿಮಾ ನಟ, ನಟಿಯರ ಹುಟ್ಟುಹಬ್ಬಗಳಿಗೆ ಅವರ ಸಿನಿಮಾಗಳ, ಮುಂಬರುವ ಸಿನಿಮಾಗಳ ಅಪ್​ಡೇಟ್ ನೀಡುವುದು ವಾಡಿಕೆ. ಇದೀಗ ಕೆಲವೇ ದಿನಗಳಲ್ಲಿ ನಟ ಶಿವರಾಜ್ ಕುಮಾರ್ ಅವರ ಹುಟ್ಟುಹಬ್ಬ ಬರಲಿದ್ದು ಶಿವಣ್ಣ ನಟಿಸುತ್ತಿರುವ, ನಟಿಸಲಿರುವ ಸಾಲು-ಸಾಲು ಸಿನಿಮಾಗಳ ಅಪ್​ಡೇಟ್​ಗಳನ್ನು ಕೊಡಲು ಚಿತ್ರತಂಡಗಳು ಸಜ್ಜಾಗಿವೆ. ಈ ಸಿನಿಮಾ ಅಪ್​ಡೇಟ್​ಗಳು ಕೆವಲ ಶಿವಣ್ಣನ ಅಭಿಮಾನಿಗಳಿಗೆ ಮಾತ್ರವಲ್ಲ ಸಿನಿಮಾ ಪ್ರೇಮಿಗಳಿಗೂ ಪುಳಕ ನೀಡುವುದು ಖಾತ್ರಿ.

ಜುಲೈ 12 ರಂದು ಶಿವರಾಜ್ ಕುಮಾರ್ ಹುಟ್ಟುಹಬ್ಬ ಇರಲಿದ್ದು, ದರ್ಶನ್ ಜೈಲಿನಲ್ಲಿರುವ ಕಾರಣ ಶಿವರಾಜ್ ಕುಮಾರ್ ಈ ಬಾರಿಯ ಹುಟ್ಟುಹಬ್ಬವನ್ನು ಸರಳವಾಗಿ ಆಚರಿಸಿಕೊಳ್ಳುವ ಸಾಧ್ಯತೆ ಇದೆ. ಆದರೆ ಆ ದಿನ ಅವರು ನಟಿಸುತ್ತಿರುವ ಹಾಗೂ ಮುಂದೆ ನಟಿಸಲಿರುವ ಸಿನಿಮಾಗಳ ಅಪ್​ಡೇಟ್​ಗಳು ಮಾತ್ರ ಒಂದೊಂದಾಗಿ ಹೊರಬೀಳಲಿವೆ. ಅದರ ಪಟ್ಟಿ ಈಗಾಗಲೇ ಬಿಡುಗಡೆ ಆಗಿದೆ.

ಶಿವರಾಜ್ ಕುಮಾರ್ ನಟಿಸುತ್ತಿರುವ ಬಹು ನಿರೀಕ್ಷಿತ ‘ಭೈರತಿ ರಣಗಲ್’ ಸಿನಿಮಾದ ಚಿತ್ರೀಕರಣ ಕೆಲವು ದಿನಗಳ ಹಿಂದಷ್ಟೆ ಮುಗಿದಿದೆ. ಶಿವಣ್ಣನ ಹುಟ್ಟುಹಬ್ಬದಂದು ಸಿನಿಮಾದ ಟೀಸರ್ ಬಿಡುಗಡೆ ಮಾಡಲಿದೆ. ಜೊತೆಗೆ ಸಿನಿಮಾದ ಬಿಡುಗಡೆ ದಿನಾಂಕದ ಘೋಷಣೆಯೂ ಸಹ ಆಗಲಿದೆ. ಶಿವಣ್ಣ ನಟಿಸುತ್ತಿರುವ ‘ಉತ್ತರಕಾಂಡ’ ಸಿನಿಮಾದ ಶಿವಣ್ಣನ ಕ್ಯಾರೆಕ್ಟರ್​ನ ಟೀಸರ್ ಸಹ ಬಿಡುಗಡೆ ಆಗುವ ಸಾಧ್ಯತೆ ದಟ್ಟವಾಗಿದೆ.

ಇದನ್ನೂ ಓದಿ:ನಿರ್ಮಾಪಕಿ ಗೀತಾ ಶಿವರಾಜ್ ಕುಮಾರ್ ಹುಟ್ಟುಹಬ್ಬ ಆಚರಿಸಿದ ಅಭಿಮಾನಿಗಳು

ಶಿವರಾಜ್ ಕುಮಾರ್ ಪುತ್ರಿ ನಿವೇದಿತಾ ನಿರ್ಮಾಣ ಮಾಡಿರುವ ‘ಫೈರ್​ ಫ್ಲೈ’ ಸಿನಿಮಾದಲ್ಲಿ ಶಿವರಾಜ್ ಕುಮಾರ್ ಅತಿಥಿ ಪಾತ್ರದಲ್ಲಿ ನಟಿಸಿದ್ದು, ಆ ಸಿನಿಮಾದಲ್ಲಿನ ಶಿವಣ್ಣನ ಅತಿಥಿ ಪಾತ್ರದ ಲುಕ್ ಬಿಡುಗಡೆ ಸಹ ಆಗಲಿದೆ ಎನ್ನಲಾಗುತ್ತಿದೆ. ಇನ್ನು ಶಿವಣ್ಣ, ರಾಜ್ ಬಿ ಶೆಟ್ಟಿ, ಉಪೇಂದ್ರ ಒಟ್ಟಿಗೆ ನಟಿಸುತ್ತಿರುವ ‘45’ ಸಿನಿಮಾದ ಶಿವಣ್ಣನ ಕ್ಯಾರೆಕ್ಟರ್ ಟೀಸರ್ ಸಹ ಬಿಡುಗಡೆ ಆಗಲಿದೆ ಎಂಬ ಸುದ್ದಿ ಹರಿದಾಡುತ್ತಿದೆ.

ಇತ್ತೀಚೆಗೆ ಶಿವರಾಜ್ ಕುಮಾರ್, ‘ಭೈರವನ ಕೊನೆ ಪಾಠ’ ಸಿನಿಮಾದಲ್ಲಿ ನಟಿಸುತ್ತಿರುವುದು ಖಾತ್ರಿ ಆಗಿದೆ. ಸಿನಿಮಾವನ್ನು ಹೇಮಂತ್ ರಾವ್ ನಿರ್ದೇಶನ ಮಾಡಲಿದ್ದಾರೆ. ಈ ಸಿನಿಮಾದ ಪೋಸ್ಟರ್ ಸಹ ಜುಲೈ 12 ರಂದೇ ಬಿಡುಗಡೆ ಆಗಲಿದೆ. ಅದರ ಜೊತೆಗೆ ಶಿವಣ್ಣನ ಇತ್ತೀಚೆಗೆ ಸೂಪರ್ ಹಿಟ್ ಸಿನಿಮಾ ‘ಘೋಸ್ಟ್’ ಸಿನಿಮಾದ ಎರಡನೇ ಭಾಗದ ಘೋಷಣೆಯೂ ಹುಟ್ಟುಹಬ್ಬದಂದು ಆಗುವ ಸಾಧ್ಯತೆ ಇದೆ. ಇವೆಲ್ಲದರ ಜೊತೆಗೆ ಶಿವಣ್ಣ ನಟಿಸುತ್ತಿರುವ ತೆಲುಗಿನ ಸಿನಿಮಾದಿಂದಲೂ ಲುಕ್ ಬಿಡುಗಡೆ ಆಗುವ ಸಾಧ್ಯತೆ ಇದೆ. ಶಿವಣ್ಣ, ರಾಮ್ ಚರಣ್ ಜೊತೆಗೆ ಹೊಸ ಸಿನಿಮಾದಲ್ಲಿ ನಟಿಸಲು ಎಸ್ ಅಂದಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ