ಕ್ಯಾಬ್ ಡ್ರೈವರ್ಗಳ ಕಥೆ ಹೇಳುವ ‘ಯೆಲ್ಲೋ ಬೋರ್ಡ್’; ಕಿಚ್ಚ ಶುಭಕೋರಿದ ಈ ಸಿನಿಮಾದಲ್ಲಿ ಏನಿದೆ ವಿಶೇಷ?
ನಟ ಪ್ರದೀಪ್ ಅವರು ಈ ಚಿತ್ರದ ಬಗ್ಗೆ ಹೆಚ್ಚು ಭರವಸೆ ಇಟ್ಟುಕೊಂಡಿದ್ದಾರೆ. ‘ಟೈಗರ್’ ಸಿನಿಮಾ ಬಳಿಕ ಹೊಸದೇನಾದರೂ ಮಾಡಬೇಕು ಎಂದುಕೊಂಡಾಗ ಅವರಿಗೆ ಸಿಕ್ಕಿದ್ದೇ ‘ಯೆಲ್ಲೋ ಬೋರ್ಡ್’ ಪ್ರಾಜೆಕ್ಟ್.
‘ಯೆಲ್ಲೋ ಬೋರ್ಡ್’ ಸಿನಿಮಾದ ಒಂದು ಟೀಸರ್ ಮತ್ತು ಹಾಡು ಇತ್ತೀಚೆಗೆ ಬಿಡುಗಡೆ ಆಗಿದೆ. ಕಿಚ್ಚ ಸುದೀಪ್ ಅವರು ಇಡೀ ತಂಡಕ್ಕೆ ಶುಭಕೋರಿದ್ದಾರೆ. ಶೀರ್ಷಿಕೆಯೇ ಹೇಳುವಂತೆ ಈ ಸಿನಿಮಾದಲ್ಲಿ ಕ್ಯಾಬ್ ಡ್ರೈವರ್ಗಳ ಕುರಿತಾಗಿ ಕಥೆ ಇರಲಿದೆ. ಕ್ಯಾಬ್ ಡ್ರೈವರ್ ಪಾತ್ರದಲ್ಲಿ ನಟ ಪ್ರದೀಪ್ ಕಾಣಿಸಿಕೊಂಡಿದ್ದಾರೆ. ತ್ರಿಲೋಕ್ ರೆಡ್ಡಿ ನಿರ್ದೇಶನ ಮಾಡಿದ್ದು, ವಿಂಟೇಜ್ ಫಿಲ್ಮ್ಸ್ ಬ್ಯಾನರ್ ಮೂಲಕ ಈ ಚಿತ್ರ ನಿರ್ಮಾಣ ಆಗಿದೆ. ಅದ್ವಿಕ್ ಅವರು ಸಂಗೀತ ನಿರ್ದೇಶನ ಮಾಡಿದ್ದಾರೆ. ಈಗ ಬಿಡುಗಡೆ ಆಗಿರುವ ‘ಪ್ರೀತಿಯೇ..’ ಗೀತೆಗೆ ಜನಮೆಚ್ಚುಗೆ ಸಿಗುತ್ತಿದೆ. ಯೂಟ್ಯೂಬ್ನಲ್ಲಿ 13 ಲಕ್ಷಕ್ಕಿಂತಲೂ ಹೆಚ್ಚು ಬಾರಿ ವೀಕ್ಷಣೆ ಕಂಡಿದೆ. ಇತ್ತೀಚೆಗೆ ಸುದ್ದಿಗೋಷ್ಠಿ ನಡೆಸಿದ ‘ಯೆಲ್ಲೋ ಬೋರ್ಡ್’ ಚಿತ್ರತಂಡ ಅನೇಕ ವಿಚಾರಗಳನ್ನು ಹಂಚಿಕೊಂಡಿತು.
ಅಹಲ್ಯಾ ಸುರೇಶ್, ಸ್ನೇಹಾ, ಚಂದನಾ, ಭವಾನಿ ಪ್ರಕಾಶ್ ಅವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ‘ಮೊದಲು ನಾನು ಐಟಿ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿದ್ದೆ. ಆಗ ಅನೇಕ ಕ್ಯಾಬ್ ಡ್ರೈವರ್ಗಳ ಜೊತೆ ಮಾತನಾಡಿದ್ದೆ. ಆ ಸಂದರ್ಭದಲ್ಲಿ ಆದ ಅನುಭವಗಳನ್ನು ಇಟ್ಟುಕೊಂಡು ಈ ಕಥೆ ಸಿದ್ಧವಾಯ್ತು. ಒಬ್ಬ ಕ್ಯಾಬ್ ಚಾಲಕನ ಪ್ರೇಮಕಥೆ ನನಗೆ ಇಷ್ಟವಾಗಿ, ಅದು ಕೂಡ ಸ್ಫೂರ್ತಿ ಆಯಿತು. ಒಟ್ಟಾರೆ ಕ್ಯಾಬ್ ಡ್ರೈವರ್ಗಳ ಜೀವನ ಹೇಗಿರುತ್ತದೆ? ಅವರ ಹೋರಾಟಗಳೇನು? ಅವರ ಮೇಲೆ ಆಗುತ್ತಿರುವ ದಬ್ಬಾಳಿಕೆಗಳೇನು ಎಂಬುದನ್ನೆಲ್ಲ ವಿಚಾರಿಸಿದಾಗ ಅವರಲ್ಲಿ ನನಗೆ ಒಬ್ಬ ಹೀರೋ ಕಾಣಿಸಿದ’ ಎನ್ನುವ ಮೂಲಕ ಕಥೆ ಬಗ್ಗೆ ವಿವರಣೆ ನೀಡಿದ್ದಾರೆ ನಿರ್ದೇಶಕ ತ್ರಿಲೋಕ್ ರೆಡ್ಡಿ.
ನಟ ಪ್ರದೀಪ್ ಅವರು ಈ ಚಿತ್ರದ ಬಗ್ಗೆ ಹೆಚ್ಚು ಭರವಸೆ ಇಟ್ಟುಕೊಂಡಿದ್ದಾರೆ. ‘ಟೈಗರ್’ ಸಿನಿಮಾ ಬಳಿಕ ಹೊಸದೇನಾದರೂ ಮಾಡಬೇಕು ಎಂದುಕೊಂಡಾಗ ಅವರಿಗೆ ಸಿಕ್ಕಿದ್ದೇ ‘ಯೆಲ್ಲೋ ಬೋರ್ಡ್’ ಪ್ರಾಜೆಕ್ಟ್. ‘ಈ ಸಿನಿಮಾದಲ್ಲಿ ಅನಗತ್ಯವಾಗಿ ಕಮರ್ಷಿಯಲ್ ಅಂಶಗಳನ್ನು ತುರುಕಿಲ್ಲ. ಹೀರೋಯಿಸಂ, ಡೈಲಾಗ್ಗಳೆಲ್ಲ ಕಥೆಗೆ ಪೂರಕವಾಗಿವೆ. ನಾನು ಪಕ್ಕಾ ಡ್ರೈವರ್ ರೀತಿ ಕಾಣಿಸಿಕೊಳ್ಳಬೇಕು ಎಂಬ ಉದ್ದೇಶದಿಂದ ಅವರ ಹಾವ-ಭಾವವನ್ನು ಅರ್ಥಮಾಡಿಕೊಂಡು ನಟಿಸಿದ್ದೇನೆ. ಅದಕ್ಕಾಗಿ ತುಂಬ ದಿನಗಳ ಕಾಲ ಬೇಕಂತಲೇ ಕ್ಯಾಬ್ನಲ್ಲಿ ಓಡಾಡಿ, ಡ್ರೈವರ್ಗಳನ್ನು ಹತ್ತಿರದಿಂದ ಗಮನಿಸಿದೆ’ ಎಂದು ಪಾತ್ರಕ್ಕಾಗಿ ತಾವು ಮಾಡಿಕೊಂಡ ತಯಾರಿ ಬಗ್ಗೆ ಹೇಳಿಕೊಳ್ಳುತ್ತಾರೆ ಪ್ರದೀಪ್. ಒಬ್ಬ ಡ್ರೈವರ್ ಮನಸ್ಸು ಮಾಡಿದರೆ ಈ ಸಮಾಜವನ್ನು ಹೇಗೆ ಬದಲಾಯಿಸಬಹುದು ಎಂಬ ಕಾನ್ಸೆಪ್ಟ್ ಈ ಚಿತ್ರದಲ್ಲಿದೆ ಎನ್ನುವ ಮೂಲಕ ಪ್ರದೀಪ್ ಅವರು ಕಥೆಯ ಬಗ್ಗೆ ಕೌತುಕ ಮೂಡಿಸಿದ್ದಾರೆ.
‘ನಿನ್ನ ಗುಂಗಲ್ಲಿ..’ ಹಾಡು ಮಾಡಿ ಫೇಮಸ್ ಆಗಿರುವ ಅದ್ವಿಕ್ ಅವರು ‘ಯೆಲ್ಲೋ ಬೋರ್ಡ್’ ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡಿದ್ದಾರೆ. ಈಗ ಬಿಡುಗಡೆ ಆಗಿರುವ ‘ಪ್ರೀತಿಯೇ..’ ಗೀತೆ ಸೇರಿ ಒಟ್ಟು 7 ಹಾಡುಗಳು ಈ ಸಿನಿಮಾದಲ್ಲಿವೆ.
ಇದನ್ನೂ ಓದಿ:
ಕಿಚ್ಚ ಸುದೀಪ್ ಕುಟುಂಬದಲ್ಲಿ ಮದುವೆ ಸಂಭ್ರಮ; ಇಲ್ಲಿವೆ ಕಲರ್ಫುಲ್ ಫ್ಯಾಮಿಲಿ ಫೋಟೋಗಳು
ಸುದೀಪ್ ಮುಂದಿನ ಸಿನಿಮಾ ಯಾವುದು? ಫೋಟೋ ಮೂಲಕ ಸುಳಿವು ನೀಡಿದ ಕಾಲಿವುಡ್ ನಿರ್ದೇಶಕ