ಗುರುವಾರ ಬಂಪರ್ ಲಾಟರಿ ಹೊಡೆದ ‘ಪ್ರೇಮದ ಊರಲಿ’ ಚಿತ್ರ; ಕಲೆಕ್ಷನ್ ನೋಡಿ ಎಲ್ಲರೂ ದಂಗು

ಸ್ಯಾಂಡಲ್‌ವುಡ್‌ನಲ್ಲಿ ಯಾರೂ ಊಹಿಸದ ರೀತಿಯಲ್ಲಿ ಸಣ್ಣ ಬಜೆಟ್ ಸಿನಿಮಾ ಒಂದು ಕಮಾಲ್ ಮಾಡುತ್ತಿದೆ. ಅದೇ ‘ಪ್ರೇಮದ ಊರಲಿ’ ಚಿತ್ರ.ಈ ಸಿನಿಮಾ ಥಿಯೇಟರ್‌ಗಳಲ್ಲಿ ಧೂಳೆಬ್ಬಿಸುತ್ತಿದೆ. ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರಿಂದ ಸಿಗುತ್ತಿರುವ ಸಕಾರಾತ್ಮಕ ಪ್ರತಿಕ್ರಿಯೆಯಿಂದಾಗಿ ಪ್ರದರ್ಶನಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಬಾಕ್ಸ್ ಆಫೀಸ್‌ನಲ್ಲಿ ಸಿನಿಮಾದ ಗಳಿಕೆ ದಿನ ಕಳೆದಂತೆ ಹೆಚ್ಚುತ್ತಲೇ ಇದೆ. ಬಿಡುಗಡೆಯಾದ ಮೊದಲ ವಾರದಲ್ಲೇ ಚಿತ್ರವು ಭರ್ಜರಿ ಕಲೆಕ್ಷನ್ ಮಾಡುವ ಮೂಲಕ ಬಾಕ್ಸ್ ಆಫೀಸ್‌ನಲ್ಲಿ ಸಕ್ಸಸ್ ಹಾದಿಯಲ್ಲಿ ಮುನ್ನುಗ್ಗುತ್ತಿದೆ.

ಚಿತ್ರವು ಮೊದಲ ವಾರದ ಅಂತ್ಯಕ್ಕೆ ಒಟ್ಟು 7.92 ಕೋಟಿ ರೂಪಾಯಿ ಗ್ರಾಸ್ ಹಾಗೂ 7.07 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡುವ ಮೂಲಕ ಹೊಸ ದಾಖಲೆ ಬರೆದಿದೆ. ಮೊದಲ ದಿನ ಕೇವಲ 60 ಪ್ರದರ್ಶನಗಳಿಂದ ಪ್ರಾರಂಭವಾದ ಈ ಪಯಣ, 7ನೇ ದಿನದ ವೇಳೆಗೆ 486 ಪ್ರದರ್ಶನಗಳಿಗೆ ತಲುಪಿರುವುದು ಚಿತ್ರಕ್ಕಿರುವ ಜನಪ್ರಿಯತೆಯನ್ನು ಎತ್ತಿಹಿಡಿದಿದೆ. ಒಟ್ಟಾರೆಯಾಗಿ ಮೊದಲ ವಾರದಲ್ಲಿ 1,703 ಶೋಗಳ ಮೂಲಕ ಈ ಬೃಹತ್ ಮೊತ್ತವನ್ನು ಚಿತ್ರ ಗಳಿಸಿದೆ.

ವಿಶೇಷವೆಂದರೆ, ವಾರದ ದಿನಗಳಲ್ಲೂ ‘ಪ್ರೇಮದ ಊರಲಿ’ ಚಿತ್ರಕ್ಕೆ ಪ್ರೇಕ್ಷಕರ ಹರಿವು ಕಡಿಮೆಯಾಗಿಲ್ಲ, ಬದಲಿಗೆ ದಿನದಿಂದ ದಿನಕ್ಕೆ ಏರಿಕೆ ಕಂಡಿದೆ. ಮೊದಲ ಶುಕ್ರವಾರ 0.13 ಕೋಟಿ ರೂಪಾಯಿಯಿಂದ ಶುರುವಾದ ಗಳಿಕೆ, ವಾರದ ಕೊನೆಯ ದಿನ ಅಂದರೆ ಗುರುವಾರ ಒಂದೇ ದಿನದಲ್ಲೇ 2.55 ಕೋಟಿ ರೂಪಾಯಿ ಗಳಿಸುವ ಮೂಲಕ ಎಲ್ಲರನ್ನೂ ಹುಬ್ಬೇರಿಸುವಂತೆ ಮಾಡಿದೆ.

ಸಿನಿಮಾದ ಈ ಅಚ್ಚರಿಯ ಗಳಿಕೆಗೆ ಪ್ರೇಕ್ಷಕರ ಅತ್ಯುತ್ತಮ ಚಿತ್ರಮಂದಿರ ಭರ್ತಿ ಪ್ರಮಾಣವೇ ಸಾಕ್ಷಿ. ವಾರದ ಆರಂಭದಲ್ಲಿ ಶೇ. 28ರಷ್ಟಿದ್ದ ಅಕ್ಯುಪೆನ್ಸಿ, ವಾರದ ದಿನಗಳಲ್ಲಿ ಬರೋಬ್ಬರಿ ಶೇ. 58ಕ್ಕೆ ಜಿಗಿದಿದೆ. ಕುಟುಂಬ ಸಮೇತರಾಗಿ ಜನರು ಥಿಯೇಟರ್‌ಗೆ ಹರಿದುಬರುತ್ತಿರುವುದು ಈ ಕಲೆಕ್ಷನ್ ಹಠಾತ್ ಏರಿಕೆಯಾಗಲು ಪ್ರಮುಖ ಕಾರಣವಾಗಿದೆ.

ಇದನ್ನೂ ಓದಿ: ‘ಪ್ರೇಮದ ಊರಲಿ’ ಸಿನಿಮಾ ಗೆಲುವಿನ ಬಗ್ಗೆ ನಟ ಶ್ರೀ ರಾಮ್ ಮಾತು

ಮೊದಲ ವಾರದಲ್ಲೇ ಬರೋಬ್ಬರಿ 7.92 ಕೋಟಿ ರೂಪಾಯಿ ಬಾಚಿರುವ ‘ಪ್ರೇಮದ ಊರಲಿ’ ಚಿತ್ರಕ್ಕೆ ಮುಂಬರುವ ಎರಡನೇ ವೀಕೆಂಡ್ ಅತ್ಯಂತ ನಿರ್ಣಾಯಕ ಹಾಗೂ ವರದಾನವಾಗಲಿದೆ. ವಾರದ ದಿನದಲ್ಲೇ ಎರಡೂವರೆ ಕೋಟಿ ರೂಪಾಯಿ ಗಳಿಸಿರುವ ಈ ಸಿನಿಮಾ, ಇಂದು (ಅಕ್ಟೋಬರ್ 2). ಶನಿವಾರ ಮತ್ತು ಭಾನುವಾರಗಳ ರಜಾ ದಿನಗಳಲ್ಲಿ ಬಾಕ್ಸ್ ಆಫೀಸ್‌ನಲ್ಲಿ ಮತ್ತಷ್ಟು ದೊಡ್ಡ ಮಟ್ಟದ ಗಳಿಕೆ ಮಾಡಿ ಹೊಸ ಮೈಲಿಗಲ್ಲು ತಲುಪುವ ಎಲ್ಲಾ ಸಾಧ್ಯತೆಗಳು ದಟ್ಟವಾಗಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.