Pentagon Trailer: ‘ಪೆಂಟಗನ್​’ ಚಿತ್ರದ ಟ್ರೇಲರ್​ ಮೆಚ್ಚಿದ ಸೆಲೆಬ್ರಿಟಿಗಳು; ಟ್ರೆಂಡಿಂಗ್​ನಲ್ಲಿದೆ ಕನ್ನಡದ 5 ಕಥೆಗಳ ಸಿನಿಮಾ

ಪ್ರತಿದಿನ ಹೊಸ ಹೊಸ ಸಿನಿಮಾಗಳ ಟ್ರೇಲರ್​, ಪೋಸ್ಟರ್​, ಟೀಸರ್​ ಬಿಡುಗಡೆ ಆಗುತ್ತಲೇ ಇರುತ್ತವೆ. ಅವುಗಳಲ್ಲಿ ಕೆಲವು ಮಾತ್ರ ಟ್ರೆಂಡ್​ ಆಗುತ್ತವೆ. ಕಾಂಟೆಂಟ್​ ಚೆನ್ನಾಗಿದ್ದರೆ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗುತ್ತದೆ. ಈಗ ‘ಪೆಂಟಗನ್​’ (Pentagon Movie) ಸಿನಿಮಾದ ಟ್ರೇಲರ್​ ಕೂಡ ಟ್ರೆಂಡ್​ ಆಗಿದೆ. ಯೂಟ್ಯೂಬ್​ನಲ್ಲಿ ಎಲ್ಲರ ಗಮನ ಸೆಳೆಯುತ್ತಿದೆ. ಸಾಮಾನ್ಯ ಪ್ರೇಕ್ಷಕರು ಮಾತ್ರವಲ್ಲದೇ ಸೆಲೆಬ್ರಿಟಿಗಳು ಕೂಡ ಈ ಬಗ್ಗೆ ಟ್ವೀಟ್​ ಮಾಡುತ್ತಿದ್ದಾರೆ. ತೆಲುಗಿನ ನಿರ್ದೇಶಕ ಅನಿಲ್ ರವಿಪುಡಿ, ನಟ-ನಿರ್ದೇಶಕ ರಿಷಬ್​ ಶೆಟ್ಟಿ (Rishab Shetty) ಮುಂತಾದವರು ‘ಪೆಂಟಗನ್​’ ಸಿನಿಮಾದ ಟ್ರೇಲರ್ (Pentagon Trailer)​ ನೋಡಿ ಮೆಚ್ಚಿಕೊಂಡಿದ್ದಾರೆ. ಆ ಮೂಲಕ ಈ ಚಿತ್ರದ ಹೈಪ್​ ಹೆಚ್ಚಾಗಿದೆ.

ಮಾರ್ಚ್​ 23ರಂದು ‘ಪೆಂಟಗನ್​’ ಚಿತ್ರದ ಟ್ರೇಲರ್​ ಬಿಡುಗಡೆ ಆಯಿತು. ಈ ಸಿನಿಮಾದಲ್ಲಿ 5 ಬೇರೆ ಬೇರೆ ಕಥೆಗಳು ಇವೆ. ಒಂದು ಕಥಾಸಂಕಲನದ ರೀತಿ ಮೂಡಿಬಂದಿರುವ ಈ ಸಿನಿಮಾದ ಟ್ರೇಲರ್​ ಗಮನ ಸೆಳೆಯುತ್ತಿದೆ. ಎಲ್ಲ ಕಥೆಗಳ ಝಲಕ್​ ತೋರಿಸುವಲ್ಲಿ ಟ್ರೇಲರ್​ ಯಶಸ್ವಿ ಆಗಿದೆ. ಸೋಶಿಯಲ್​ ಮೀಡಿಯಾದಲ್ಲಿ ಅನೇಕ ಸೆಲೆಬ್ರಿಟಿಗಳು ‘ಪೆಂಟಗನ್​’ ಬಗ್ಗೆ ಪೋಸ್ಟ್​ ಮಾಡುತ್ತಿದ್ದಾರೆ.

Pentagon: 5 ಪವರ್​ಫುಲ್​ ಕಥೆಗಳ ಝಲಕ್​ ತೋರಿಸಿದ ‘ಪೆಂಟಗನ್​’ ಟ್ರೇಲರ್​; ಡಬಲ್​ ಆಯ್ತು ನಿರೀಕ್ಷೆ

‘ಕನ್ನಡದ ಪೆಂಟಗನ್​ ಸಿನಿಮಾದ ಟ್ರೇಲರ್​ ಹಂಚಿಕೊಳ್ಳಲು ನನಗೆ ಖುಷಿ ಆಗುತ್ತಿದೆ. ಇದೊಂದು ಅದ್ಭುತ ಟ್ರೇಲರ್​. ಇಡೀ ತಂಡಕ್ಕೆ ಶುಭವಾಗಲಿ’ ಎಂದು ಅನಿಲ್​ ರವಿಪುಡಿ ಅವರು ಟ್ವೀಟ್​ ಮಾಡಿದ್ದಾರೆ. ಆ ಮೂಲಕ ತೆಲುಗು ಪ್ರೇಕ್ಷಕರು ಕೂಡ ಈ ಟ್ರೇಲರ್​ ಬಗ್ಗೆ ಗಮನ ಹರಿಸುವಂತೆ ಅವರು ಮಾಡಿದ್ದಾರೆ.

‘ಇದು ಕನ್ನಡದ ಮತ್ತೊಂದು ಕಥಾಸಂಗಮ. ಪುಟ್ಟಣ ಕಣಗಾಲ್​ ಅವರ ಲೆಗೆಸಿ ಮುಂದುವರಿಯುತ್ತಿರುವುದನ್ನು ನೋಡಲು ಖುಷಿ ಆಗುತ್ತದೆ. ಟ್ರೇಲರ್ ತುಂಬ ಆಕರ್ಷಕವಾಗಿದೆ. ಪೆಂಟಗನ್​ ತಂಡಕ್ಕೆ ಆಲ್​ ದಿ ಬೆಸ್ಟ್​’ ಎಂದು ರಿಷಬ್​ ಶೆಟ್ಟಿ ಟ್ವೀಟ್​ ಮಾಡಿದ್ದಾರೆ. ‘777 ಚಾರ್ಲಿ’ ಸಿನಿಮಾದ ನಿರ್ದೇಶಕ ಕಿರಣ್​ ರಾಜ್​, ‘ಬಹದ್ದೂರ್​’ ಚೇತನ್​ ಕುಮಾರ್​ ಸೇರಿದಂತೆ ಅನೇಕ ಸೆಲೆಬ್ರಿಟಿಗಳು ಟ್ರೇಲರ್ ಹಂಚಿಕೊಂಡಿದ್ದಾರೆ.

ಏಪ್ರಿಲ್​ 7ರಂದು ‘ಪೆಂಟಗನ್’​ ಸಿನಿಮಾ ಬಿಡುಗಡೆ ಆಗಲಿದೆ. ಐವರು ನಿರ್ದೇಶಕರು ‘ಪೆಂಟಗನ್​’ ಚಿತ್ರಕ್ಕೆ ಕೆಲಸ ಮಾಡಿದ್ದಾರೆ. ಗುರು ದೇಶಪಾಂಡೆ, ‘ಶಿವಾಜಿ ಸುರತ್ಕಲ್​’ ಸಿನಿಮಾ ಖ್ಯಾತಿಯ ಆಕಾಶ್​ ಶ್ರೀವತ್ಸ, ‘ಚೂರಿಕಟ್ಟೆ’ ಖ್ಯಾತಿಯ ರಾಘು ಶಿವಮೊಗ್ಗ, ‘ಬ್ರಹ್ಮಚಾರಿ’ ಚಿತ್ರದ ಚಂದ್ರಮೋಹನ್ ಹಾಗೂ ಹೊಸ ನಿರ್ದೇಶಕ ಕಿರಣ್ ಕುಮಾರ್​ ಅವರು ತಲಾ ಒಂದು ಕಥೆಗೆ ನಿರ್ದೇಶನ ಮಾಡಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.