ಬಿಡುಗಡೆ ಆಯ್ತು ಶಿವಣ್ಣನ ‘ಬೇಲ್’ ಸಿನಿಮಾ ಟ್ರೈಲರ್

ಶಿವರಾಜ್ ಕುಮಾರ್ ನಟಿಸಿರುವ ಹೊಸ ಸಿನಿಮಾ ‘ಬೇಲ್’ನ ಪೋಸ್ಟರ್ ಕೆಲ ವಾರಗಳ ಹಿಂದೆ ಬಿಡುಗಡೆ ಆದಾಗ ಸಖತ್ ಗಮನ ಸೆಳೆದಿತ್ತು. ಇದೀಗ ಸಿನಿಮಾದ ಟ್ರೈಲರ್ ರಿಲೀಸ್ ಆಗಿದೆ. ‘ಬೇಲ್’ ಸಿನಿಮಾ ಹೆಸರೇ ಹೇಳುವಂತೆ ಕಾನೂನು, ನ್ಯಾಯಗಳಿಗೆ ಸಂಬಂಧಿಸಿದ ಸಿನಿಮಾ ಆಗಿದ್ದು, ಈಗ ಬಿಡುಗಡೆ ಆಗಿರುವ ಟ್ರೈಲರ್ ಇದನ್ನು ಒತ್ತಿ ಹೇಳುತ್ತಿದೆ. ಹಾಗೆಂದು ಇದು ಕೇವಲ ಕೋರ್ಟ್ ರೂಂ ಡ್ರಾಮಾ ಅಲ್ಲ ಬದಲಿಗೆ ಒಳ್ಳೆಯ ಆಕ್ಷನ್ ಜೊತೆಗೆ ಎಮೋಷನಲ್​​ ಅಂಶಗಳು ಸಹ ಇರುವ ಕತೆ ಎಂಬುದನ್ನು ಟ್ರೈಲರ್ ಹೇಳುತ್ತಿದೆ.

ಈಗ ಬಿಡುಗಡೆ ಆಗಿರುವ ಟ್ರೈಲರ್​​ನಲ್ಲಿ ಶಿವಣ್ಣನ ಲುಕ್ ಸಖತ್ ಗಮನ ಸೆಳೆಯುತ್ತಿದೆ. ಶಿವಣ್ಣನನ್ನು ಸಾಮಾನ್ಯವಾಗಿ ಯಂಗ್ ಲುಕ್​​ನಲ್ಲಿಯೇ ನಿರ್ದೇಶಕರು ತೋರಿಸುತ್ತಾರೆ ಆದರೆ ಈ ಸಿನಿಮಾನಲ್ಲಿ ಶಿವಣ್ಣನನ್ನು ವಯಸ್ಸಾದ ವ್ಯಕ್ತಿಯ ರೀತಿ ತೋರಿಸಲಾಗಿದೆ. ಶಿವಣ್ಣ ‘ಬೇಲ್’ ಸಿನಿಮಾನಲ್ಲಿ ನಿವೃತ್ತಿ ಅಧಿಕಾರಿ ಪಾತ್ರದಲ್ಲಿ ನಟಿಸುತ್ತಿರುವ ಸುಳಿವನ್ನು ಟ್ರೈಲರ್ ನೀಡುತ್ತಿದೆ.

ಸಿನಿಮಾನಲ್ಲಿ ಶಿವಣ್ಣನ ಜೊತೆಗೆ ಮಲಯಾಳಂ ನಟ ಜಯರಾಂ ಮತ್ತು ಸಾಯಿ ಕುಮಾರ್ ಅವರುಗಳು ಸಹ ನಟಿಸಿದ್ದು, ಮೂವರೂ ಗೆಳೆಯರು ಒಟ್ಟಿಗೆ ಸೇರಿ ಅನ್ಯಾಯದ ವಿರುದ್ಧ ಹೋರಾಡುವ ಕತೆಯನ್ನು ‘ಬೇಲ್’ ಸಿನಿಮಾ ಒಳಗೊಂಡಿರುವುದು ಟ್ರೈಲರ್​​ನಿಂದ ತಿಳಿದು ಬರುತ್ತಿದೆ. ಸಿನಿಮಾನಲ್ಲಿ ಸಖತ್ ಆಕ್ಷನ್ ಇರುವುದು ಟ್ರೈಲರ್​ನಿಂದಲೇ ತಿಳಿದು ಬರುತ್ತಿದೆ. ಲೂಸ್ ಮಾದ ಯೋಗಿ ವಿಲನ್ ಪಾತ್ರದಲ್ಲಿ ನಟಿಸಿದ್ದು, ಅವರ ಪಾತ್ರವನ್ನು ಬಲು ಖಡಕ್ ಆಗಿ ಟ್ರೈಲರ್​​ನಲ್ಲಿ ತೋರಿಸಲಾಗಿದೆ. ಸಿನಿಮಾನಲ್ಲಿ ದೀಕ್ಷಿತ್ ಶೆಟ್ಟಿ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ ನಟಿಸಿದ್ದಾರೆ. ಟ್ರೈಲರ್​​ನಲ್ಲಿ ಅವರ ಪಾತ್ರವೂ ಗಮನ ಸೆಳೆಯುತ್ತದೆ.

‘ಬೇಲ್’ ಸಿನಿಮಾವನ್ನು ಪವನ್ ಒಡೆಯರ್ ನಿರ್ದೇಶನ ಮಾಡಿದ್ದಾರೆ. ಸಿನಿಮಾಕ್ಕೆ ಕೆವಿಎನ್ ಪ್ರೊಡಕ್ಷನ್ಸ್ ಬಂಡವಾಳ ಹೂಡಿದೆ. ಸಿನಿಮಾನಲ್ಲಿ ಶಿವರಾಜ್ ಕುಮಾರ್ ಜೊತೆಗೆ ಲೂಸ್ ಮಾದ ಯೋಗಿ, ಜಯರಾಂ, ಸಾಯಿಕುಮಾರ್, ದೀಕ್ಷಿತ್ ಶೆಟ್ಟಿ ಇನ್ನೂ ಕೆಲವು ಪ್ರತಿಭಾವಂತ ಕಲಾವಿದರು ನಟಿಸಿದ್ದಾರೆ. ಅಕ್ಟೋಬರ್ 2ಕ್ಕೆ ಸಿನಿಮಾ ರಿಲೀಸ್ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ