Shah Rukh Khan: ‘ನೀವು ನಿರುದ್ಯೋಗಿ ಆಗಿಬಿಟ್ರಾ’ ಎಂದು ನೇರವಾಗಿ ಕೇಳಿದ ನೆಟ್ಟಿಗನಿಗೆ ಶಾರುಖ್​ ಖಾನ್​ ಕೊಟ್ಟ ಉತ್ತರ ಏನು?

ನಟ ಶಾರುಖ್​ ಖಾನ್​ ಅವರಿಗೆ ಬಾಲಿವುಡ್​​ನಲ್ಲಿ ದೊಡ್ಡ ಸ್ಟಾರ್​ಗಿರಿ ಇದೆ. ಬಹುಕೋಟಿ ಸಂಭಾವನೆ ಪಡೆಯುವ ಅವರು ಇತ್ತೀಚಿನ ವರ್ಷಗಳಲ್ಲಿ ಗೆಲುವು ಕಂಡಿಲ್ಲ. ಅದನ್ನೇ ಗುರಿಯಾಗಿ ಇಟ್ಟುಕೊಂಡು ಅವರನ್ನು ಅನೇಕರು ಹೀಯಾಳಿಸುತ್ತಿದ್ದಾರೆ. ಹಾಗಂತ ಅದಕ್ಕೆಲ್ಲ ಶಾರುಖ್​ ತುಂಬ ತಲೆ ಕೆಡಿಸಿಕೊಂಡಿಲ್ಲ. ತಮ್ಮ ಮುಂದಿನ ಸಿನಿಮಾ ‘ಪಠಾಣ್​’ ಬಗ್ಗೆ ಅವರು ಗಮನ ಹರಿಸಿದ್ದಾರೆ. ಇನ್ನೊಂದು ಮುಖ್ಯ ವಿಚಾರ ಏನೆಂದರೆ, ಶಾರುಖ್​ ಚಿತ್ರರಂಗಕ್ಕೆ ಕಾಲಿಟ್ಟು ಇಂದಿಗೆ (ಜೂ.25) ಬರೋಬ್ಬರಿ 29 ವರ್ಷ ಕಳೆದಿದೆ. ಈ ಸಲುವಾಗಿ ಅವರು ಅಭಿಮಾನಿಗಳ ಜೊತೆ ಪ್ರಶ್ನೋತ್ತರ ನಡೆಸಿದ್ದಾರೆ.

1992ರಲ್ಲಿ ‘ದೀವಾನ’ ಸಿನಿಮಾ ಮೂಲಕ ಶಾರುಖ್​ ಖಾನ್​ ಬಾಲಿವುಡ್​ಗೆ ಎಂಟ್ರಿ ನೀಡಿದ್ದರು. ಮೊದಲ ಚಿತ್ರಕ್ಕೆ ಅವರಿಗೆ ಫಿಲ್ಮ್​ಫೇರ್​ ಪ್ರಶಸ್ತಿ ಸಿಕ್ಕಿತ್ತು. ನೋಡನೋಡುತ್ತಿದ್ದಂತೆಯೇ 29 ವರ್ಷ ಕಳೆದುಹೋಗಿದೆ. ಈ ಸಂದರ್ಭದಲ್ಲಿ ಅವರು #AskSrk ಹ್ಯಾಶ್​ಟ್ಯಾಗ್​ ಮೂಲಕ ಟ್ವಿಟರ್​ನಲ್ಲಿ ಅಭಿಮಾನಿಗಳಿಂದ ಪ್ರಶ್ನೆ ಸ್ವೀಕರಿಸಿದ್ದಾರೆ. ಈ ವೇಳೆ ಅವರಿಗೆ ಫ್ಯಾನ್ಸ್​ ವಿವಿಧ ವಿಚಾರಗಳ ಬಗ್ಗೆ ಪ್ರಶ್ನೆ ಕೇಳಿದ್ದಾರೆ.

ಒಬ್ಬ ವ್ಯಕ್ತಿಯಂತೂ ನೇರವಾಗಿ, ‘ಸರ್​ ನೀವು ಕೂಡ ನಮ್ಮ ತರಹ ನಿರುದ್ಯೋಗಿ ಆಗಿದ್ದೀರಾ’ ಎಂದು ಕೇಳಿದ್ದಾನೆ. ಆ ಪ್ರಶ್ನೆಯನ್ನು ತುಂಬ ಶಾರುಖ್​ ಕೂಲ್​ ಆಗಿ ಸ್ವೀಕರಿಸಿದ್ದಾರೆ. ‘ಯಾರು ಏನೂ ಕೆಲಸ ಮಾಡುವುದಿಲ್ಲವೋ ಅವರು ನಿರುದ್ಯೋಗಿ’ ಎನ್ನುವ ಮೂಲಕ ಆ ಟೀಕೆಯನ್ನು ಶಾರುಖ್​ ತಳ್ಳಿ ಹಾಕಿದ್ದಾರೆ.

ಶಾರುಖ್​ ಅವರಿಗೆ ಎದುರಾದ ಕೆಲವು ಪ್ರಶ್ನೆಗಳು ಹೀಗಿವೆ:

ಫ್ಯಾನ್ಸ್​ ಪ್ರಶ್ನೆ: ನಿಮ್ಮ ಸಿನಿಮಾ ಬಗ್ಗೆ ಶೀಘ್ರದಲ್ಲೇ ಅನೌನ್ಸ್​ ಮಾಡುತ್ತೀರಾ?

ಶಾರುಖ್​: ಲೌಡ್​ಸ್ಪೀಕರ್​ನಿಂದ ಅನೌನ್ಸ್​ಮೆಂಟ್​ ಮಾಡಬಹುದು. ಆದರೆ ನನ್ನ ಸಿನಿಮಾಗಳು ನಿಮ್ಮ ಹೃದಯವನ್ನು ಸೌಮ್ಯವಾಗಿ ಪ್ರವೇಶಿಸುವಂತೆ ನಾನು ಮಾಡುತ್ತೇನೆ.

ಫ್ಯಾನ್ಸ್​ ಪ್ರಶ್ನೆ: ಬ್ರೇಕಪ್​ನಿಂದ ಹೇಗೆ ಹೊರಬರಬೇಕು? ಈಗ 15 ನಿಮಿಷದ ಹಿಂದೆ ಬ್ರೇಕಪ್​ ಆಯಿತು..

ಶಾರುಖ್​: ಅದರಿಂದ ಎಂದಿಗೂ ಹೊರಬರಲು ಸಾಧ್ಯವಿಲ್ಲ. ಅದನ್ನು ನೆನಪಾಗಿ ಇಟ್ಟುಕೊಳ್ಳಿ. ದುಃಖದಿಂದ ಕಲಿತ ಪಾಠ ನಿಮ್ಮನ್ನು ಗಟ್ಟಿಯಾಗಿಸುತ್ತದೆ.

ಫ್ಯಾನ್ಸ್​ ಪ್ರಶ್ನೆ: ಜೀವನದಲ್ಲಿ ನೀವು ಈಗ ಯಾವ ಘಟ್ಟದಲ್ಲಿ ಇದ್ದೀರಿ?

ಶಾರುಖ್​: ಬದುಕನ್ನು ಪುನಃ ಕಟ್ಟಿಕೊಳ್ಳುವ ಘಟ್ಟದಲ್ಲಿ.

ಫ್ಯಾನ್ಸ್​ ಪ್ರಶ್ನೆ: ಇಂದಿನ ನೆಗೆಟಿವ್​ ಯುಗದಲ್ಲಿ ನಾವು ಪಾಸಿಟಿವ್​ ಆಗಿರುವುದು ಹೇಗೆ?

ಶಾರುಖ್​: ನೆಗೆಟಿವ್​ ವಿಷಯಗಳಿಗೆ ಕಿವಿಗೊಡಬೇಡಿ. ನಿಮ್ಮ ಮೇಲೆ ನಿಮಗೆ ನಂಬಿಕೆ ಇರಲಿ.

ಇದನ್ನೂ ಓದಿ:

100 ಕೋಟಿ ಪಡೆಯುವ ಶಾರುಖ್​ ಖಾನ್​ರನ್ನೂ ಮೀರಿಸಿದ ಅಜಯ್​ ದೇವಗನ್​; ಹಾಗಾದ್ರೆ ಅವರ ಸಂಭಾವನೆ ಎಷ್ಟು?

ಮೊಟ್ಟ ಮೊದಲ ಬಾರಿಗೆ ಪ್ರಿಯಾಮಣಿಗೆ ಶಾರುಖ್​ ನೀಡಿದ್ರು 300 ರೂಪಾಯಿ; ಆ ಹಣದ ಪ್ರಾಮುಖ್ಯತೆ ವಿವರಿಸಿದ ನಟಿ