ಹಲವು ಅನುಮಾನಗಳ ಬಳಿಕ ಶುರುವಾಗುತ್ತಿದೆ ಸೂರ್ಯ-ಲೋಕೇಶ್ ಸಿನಿಮಾ

ತಮಿಳಿನ ಸ್ಟಾರ್ ನಟ ಸೂರ್ಯ ಸತತವಾಗಿ ಎರಡು ಸೂಪರ್ ಹಿಟ್ ಸಿನಿಮಾಗಳನ್ನು ನೀಡಿದ್ದಾರೆ. ಭಾರಿ ನಿರೀಕ್ಷೆ ಇರಿಸಿದ್ದ ‘ಕಂಗುವ’, ‘ರೆಟ್ರೊ’ ಸಿನಿಮಾಗಳ ಹೀನಾಯ ಸೋಲಿನಿಂದ ತಮ್ಮ ಸ್ಟಾರ್ ಪಟ್ಟವನ್ನೇ ಕಳೆದುಕೊಳ್ಳುವ ಭೀತಿ ಎದುರಿಸಿದ್ದ ಸೂರ್ಯ ಆ ಬಳಿಕ ‘ಕರುಪ್ಪು’ ಮತ್ತು ಇತ್ತೀಚೆಗೆ ಬಿಡುಗಡೆ ಆದ ‘ವಿಶ್ವನಾಥ್ ಆಂಡ್ ಸನ್ಸ್’ ಎರಡೂ ಸಿನಿಮಾಗಳು ಸೂಪರ್ ಹಿಟ್ ಆಗಿವೆ. ಸೂರ್ಯ ಮತ್ತೆ ಸ್ಟಾರ್ ಎನಿಸಿಕೊಂಡ ಬೆನ್ನಲ್ಲೆ ಸ್ಟಾರ್ ನಿರ್ದೇಶಕ ಲೋಕೇಶ್ ಕನಗರಾಜ್ ನಿರ್ದೇಶನ ಮಾಡಬೇಕಿದ್ದ ಸೂರ್ಯ ಅವರ ಹಳೆಯ ಸಿನಿಮಾಕ್ಕೆ ಚಾಲನೆ ದೊರೆಯುವ ಕುರಿತು ಚರ್ಚೆ ಶುರುವಾಗಿದೆ.

ಲೋಕೇಶ್ ಕನಗರಾಜ್ ಅವರು ಬಹಳ ಹಿಂದೆ ‘ಇರುಂಬು ಕೈ ಮಾಯಾವಿ’ ಹೆಸರಿನ ಸಿನಿಮಾ ಅನ್ನು ಸೂರ್ಯ ಅವರಿಗಾಗಿ ನಿರ್ದೇಶನ ಮಾಡಲಿದ್ದಾರೆ ಎಂಬ ಸುದ್ದಿ ಹರಿದಾಡಿತ್ತು. ಇದೊಂದು ಸೂಪರ್ ಹೀರೋ ಕತೆಯುಳ್ಳ ಸಿನಿಮಾ ಆಗಿತ್ತು. ಆ ಸಿನಿಮಾವನ್ನು ಘೋಷಣೆ ಸಹ ಮಾಡಲಾಗಿತ್ತು. ಆದರೆ ಲೋಕೇಶ್ ಕನಗರಾಜ್ ಬೇರೆ ನಾಯಕರುಗಳ ಜೊತೆಗೆ ಬ್ಯುಸಿ ಆದರು. ಅದಾದ ಬಳಿಕ 2022 ರಲ್ಲಿ ಬಿಡುಗಡೆ ಆದ ಕಮಲ್ ಹಾಸನ್ ನಟನೆಯ ‘ವಿಕ್ರಂ’ ಸಿನಿಮಾನಲ್ಲಿ ಸೂರ್ಯ ಅತಿಥಿ ಪಾತ್ರದಲ್ಲಿ ನಟಿಸಿದರು. ಅವರು ನಟಿಸಿದ್ದ ‘ರೋಲೆಕ್ಸ್’ ಪಾತ್ರ ಸಖತ್ ಹಿಟ್ ಆಯ್ತು. ಬಳಿಕ ರೋಲೆಕ್ಸ್ ಪಾತ್ರವನ್ನೇ ಮುಖ್ಯವಾಗಿರಿಸಿಕೊಂಡು ಅದನ್ನೇ ಪ್ರಯತ್ಯೇಕ ಸಿನಿಮಾ ಮಾಡುವುದಾಗಿಯೂ ಲೋಕೇಶ್ ಘೋಷಣೆ ಮಾಡಿದರು. ಆದರೆ ಆ ಸಿನಿಮಾ ಸಹ ಸೆಟ್ಟೇರಲಿಲ್ಲ.

ಸೂರ್ಯ ಜೊತೆ ಮಾಡಬೇಕಿದ್ದ ‘ಇರುಂಬು ಕೈ ಮಾಯಾವಿ’ ಸಿನಿಮಾದ ಕತೆಯನ್ನು ಆಮಿರ್ ಖಾನ್​​ಗೆ ಹೇಳಿ ಅವರ ಜೊತೆ ಅದೇ ಕತೆ ಆಧರಿಸಿ ಸಿನಿಮಾ ಮಾಡುವುದಕ್ಕೆ ಮುಂದಾದರು. ಅಲ್ಲಿಗೆ ಲೋಕೇಶ್ ಮತ್ತು ಸೂರ್ಯ ಒಟ್ಟಿಗೆ ಸಿನಿಮಾ ಅನ್ನೇ ಮಾಡುವುದಿಲ್ಲವೇನೋ ಎನಿಸಿತ್ತು. ಆದರೆ ಇದೀಗ ಸೂರ್ಯ ಅವರ ಸಿನಿಮಾಗಳು ಒಂದರ ಹಿಂದೊಂದರಂತೆ ಸೂಪರ್ ಹಿಟ್ ಆದ ಬೆನ್ನಲ್ಲೆ ಲೋಕೇಶ್ ಇದೀಗ ಸೂರ್ಯ ಜೊತೆ ಸಿನಿಮಾ ಮಾಡಲು ಮುಂದಾಗಿದ್ದಾರೆ.

ಇದನ್ನೂ ಓದಿ:3 ತಿಂಗಳಲ್ಲಿ 2 ಬ್ಲಾಕ್‌ಬಸ್ಟರ್: ನಟ ಸೂರ್ಯನ ದೊಡ್ಡ ಕಂಬ್ಯಾಕ್ 

ಸೂರ್ಯ ಜೊತೆಗೆ ‘ರೋಲೆಕ್ಸ್’ ಸಿನಿಮಾ ಮಾಡಲು ಲೋಕೇಶ್ ಕನಗರಾಜ್ ಮುಂದಾಗಿದ್ದಾರೆ. ‘ವಿಕ್ರಂ’ ಸಿನಿಮಾದ ಕ್ಲೈಮ್ಯಾಕ್ಸ್ ನಲ್ಲಿ ಬರುವ ‘ರೋಲೆಕ್ಸ್’ ಪಾತ್ರ ಸಖತ್ ಹಿಟ್ ಆಗಿತ್ತು. ಡ್ರಗ್ಸ್ ಲೋಕದ ಫೈನಲ್ ಬಾಸ್ ಆಗಿರುವ ರೋಲೆಕ್ಸ್ನ ಹಿಂದಿನ ಕತೆ, ಅವನು ಬೆಳೆದ ರೀತಿ, ಅವನು ಎದುರಿಸಿದ ವಿಲನ್​​ಗಳು ಇನ್ನಿತರೆ ಕತೆಗಳನ್ನು ಆಧರಿಸಿ ಸಿನಿಮಾ ಮಾಡುವುದಾಗಿ ಲೋಕೇಶ್ ಹೇಳಿದ್ದರು. ಅದೀಗ ನಿಜವಾಗುವ ಕಾಲ ಬಂದಂತಿದೆ.

ರೋಲೆಕ್ಸ್ ಸಿನಿಮಾ ಬಗ್ಗೆ ಸೂರ್ಯ ಮತ್ತು ಲೋಕೇಶ್ ಕನಗರಾಜ್ ಪರಸ್ಪರ ಚರ್ಚೆ ಮಾಡಿದ್ದಾರೆ ಎಂದು ಕೆಲ ಮಾಧ್ಯಮಗಳು ವರದಿ ಮಾಡಿವೆ. ಚಿತ್ರಕತೆಯ ಫೈನ್ ಟ್ಯೂನಿಂಗ್ ನಡೆಯುತ್ತಿದ್ದು, ಮುಂದಿನ ವರ್ಷದ ಮಧ್ಯ ಭಾಗದ ವೇಳೆಗೆ ಸಿನಿಮಾದ ಚಿತ್ರೀಕರಣ ಶುರುವಾಗುವ ಸಾಧ್ಯತೆ ಇದೆ. ಲೋಕೇಶ್ ಕನಗರಾಜ್ ಪ್ರಸ್ತುತ ಅಲ್ಲು ಅರ್ಜುನ್ ಜೊತೆಗೆ ಹೊಸದೊಂದು ಸಿನಿಮಾ ಘೋಷಿಸಿದ್ದು, ಆ ಸಿನಿಮಾ ಮುಗಿದ ಬಳಿಕವಷ್ಟೆ ಸೂರ್ಯ ಜೊತೆಗಿನ ಸಿನಿಮಾ ಕೈಗೆತ್ತಿಕೊಳ್ಳಲಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ