KBC 13: ₹ 50 ಲಕ್ಷ ಮೊತ್ತದ ಪ್ರಶ್ನೆಗೆ ಉತ್ತರ ತಿಳಿಯದೇ ಕ್ವಿಟ್ ಮಾಡಿದ ಸ್ಪರ್ಧಿ; ನೀವು ಉತ್ತರಿಸಬಲ್ಲಿರಾ?

ಕೆಬಿಸಿ 13: ಅಮಿತಾಭ್ ಬಚ್ಚನ್ ನಡೆಸಿಕೊಡುವ ಕೌನ್ ಬನೇಗಾ ಕರೋಡ್​ಪತಿಯ 13ನೇ ಸೀಸನ್ ಚೆನ್ನಾಗಿ ಮೂಡಿಬರುತ್ತಿದ್ದು, ಇದುವರೆಗೆ ಇಬ್ಬರು ಕೋಟ್ಯಧಿಪತಿಗಳು ಹೊರಹೊಮ್ಮಿದ್ದಾರೆ. ಇದರೊಂದಿಗೆ ಹಲವು ಸ್ಪರ್ಧಿಗಳು ಉತ್ತಮ ಆಟವಾಡಿ, ಒಳ್ಳೆಯ ಮೊತ್ತವನ್ನು ಗಳಿಸುತ್ತಿದ್ದಾರೆ. ಇತ್ತೀಚೆಗೆ ಗುಜರಾತ್​ ರಾಜ್ಯದ ಸಿಹೋರ್​​ನ ಸ್ಪರ್ಧಿಯೋರ್ವರು ಭಾಗವಹಿಸಿದ್ದರು. 39 ವರ್ಷದ ಅಮಿತ್​ಭಾಯ್ ದೀಪಕ್​ಭಾಯ್ ಜಾಧವ್ ಹಾಟ್​​ಸೀಟ್​ನಲ್ಲಿ ಕುಳಿತು ₹ 25 ಲಕ್ಷದ ಒಡೆಯರಾದರು. ಅಚ್ಚರಿಯ ಸಂಗತಿಯೆಂದರೆ ₹ 6.4 ಲಕ್ಷದ ಪ್ರಶ್ನೆಗೆ ಉತ್ತರಿಸುವ ವೇಳೆಗಾಗಲೇ ಅಮಿತ್​ಭಾಯ್ ತಮ್ಮೆಲ್ಲಾ ಲೈಫ್​ಲೈನ್​ಗಳನ್ನು ಕಳೆದುಕೊಂಡಿದ್ದರು. ಆದ್ದರಿಂದಲೇ ಅವರಿಗೆ ₹ 50 ಲಕ್ಷದ ಪ್ರಶ್ನೆಗೆ ಉತ್ತರ ತಿಳಿಯದೇ ₹ 25 ಲಕ್ಷಕ್ಕೆ ತೃಪ್ತಿಪಡಬೇಕಾಯಿತು.

ಅಮಿತ್​ಭಾಯ್ ₹ 20,000ದ ಪ್ರಶ್ನೆಯ ಮೂಲಕ ತಮ್ಮ ಗೆಲುವಿನ ಓಟವನ್ನುಆರಂಭಿಸಿದರು. ಆದರೆ ಅವರ ಹಾದಿ ಸುಲಭದ್ದೇನೂ ಆಗಿರಲಿಲ್ಲ. ಕೆಲವು ಪ್ರಶ್ನೆಗಳಿಗೆ ಸುಲಭದಲ್ಲಿ ಉತ್ತರಿಱಉತ್ತಿದ್ದ ಅವರು, ಮಹಾತ್ಮಾ ಗಾಂಧಿ ಕುರಿತಾದ ಪ್ರಶ್ನೆಗೆ ಲೈಫ್ ಲೈನ್ ಬಳಸಿದರು. ಆದರೆ ಅವರಿಗೆ ₹ 50 ಲಕ್ಷದ ಪ್ರಶ್ನೆ ಸಮೀಪಿಸುವ ವೇಳೆ ಯಾವುದೇ ಲೈಫ್ ಲೈನ್ ಉಳಿದಿರಲಿಲ್ಲ. ಅದಕ್ಕೆ ಸರಿಯಾದ ಉತ್ತರ ತಿಳಿಯದ ಕಾರಣ, ಸ್ಪರ್ಧೆಯನ್ನು ಕ್ವಿಟ್ ಮಾಡುವ ನಿರ್ಧಾರಕ್ಕೆ ಬಂದರು.

ಅಮಿತ್​ಭಾಯ್ ಅವರಿಗೆ ₹ 50 ಲಕ್ಷ ಮೊತ್ತದ ಪ್ರಶ್ನೆ ಹೀಗಿತ್ತು. ‘ಗಿನ್ನೆಸ್ ದಾಖಲೆಯ ಪ್ರಕಾರ, ಯಾವ ದೇಶಗಳು ಅತ್ಯಧಿಕ ಅಧಿಕೃತ ರಾಷ್ಟ್ರೀಯ ಭಾಷೆಗಳನ್ನು ಹೊಂದಿವೆ?’ ಈ ಪ್ರಶ್ನೆಗೆ ಜಿಂಬಾಬ್ವೆ, ಇಥಿಯೋಪಿಯಾ, ಮಡಗಾಸ್ಕರ್ ಹಾಗೂ ಎರಿಟ್ರಿಯಾ ಎಂಬ ನಾಲ್ಕು ಆಯ್ಕೆಗಳಿದ್ದವು. ಆದರೆ ಇದಕ್ಕೆ ಖಚಿತ ಉತ್ತರ ತಿಳಿಯದ ಕಾರಣ ಹಾಗೂ ಯಾವುದೇ ಲೈಫ್ ಲೈನ್ ಇರದ ಕಾರಣ, ಅಮಿತ್​​ಭಾಯ್ ಕ್ವಿಟ್ ಮಾಡುವ ನಿರ್ಧಾರ ಕೈಗೊಂಡರು. ಈ ಪ್ರಶ್ನೆಗೆ ಸರಿಯಾದ ಉತ್ತರ ಜಿಂಬಾಬ್ವೆಯಾಗಿತ್ತು.

ಅಮಿತ್​ಭಾಯ್ ತಾವು ಗೆದ್ದ ₹ 25 ಲಕ್ಷ ಹಣವನ್ನು ಹೇಗೆ ವಿನಿಯೋಗಿಸುತ್ತೇನೆ ಎಂಬುದನ್ನೂ ವೇದಿಕೆಯಲ್ಲಿ ತಿಳಿಸಿದ್ದಾರೆ. ಬ್ಯುಸಿನೆಸ್​​ಗೆಂದು ತೆಗೆದುಕೊಂಡಿದ್ದ ಲೋನ್ ತೀರಿಸುತ್ತಾರಂತೆ. ಜೊತೆಗೆ ಅವರ ಪತ್ನಿಗೆ ಬಂಗಾರದ ಮಂಗಳ ಸೂತ್ರವನ್ನು ಕೊಡಿಸುತ್ತಾರಂತೆ. ಇದರೊಂದಿಗೆ ಲೇಹ್ ಹಾಗೂ ಲಡಾಖ್​ಗೆ ಬೈಕ್​ನಲ್ಲಿ ಪ್ರಯಾಣಿಸಬೇಕು ಎಂಬ ಕನಸೂ ಅವರಿಗಿದೆಯಂತೆ. ಉಳಿದ ಹಣವನ್ನು ಮತ್ತೆ ಉದ್ಯಮದಲ್ಲಿ ತೊಡಗಿಸುತ್ತಾರಂತೆ.

ಇದನ್ನೂ ಓದಿ:

ಸ್ಪರ್ಧಿ ತನ್ನೊಂದಿಗೆ ಫ್ಲರ್ಟ್ ಮಾಡಿದಾಗ ಕೆಬಿಸಿ ನಿರ್ಮಾಪಕರಿಗೆ ಶೋ ನಿಲ್ಲಿಸಲು ಹೇಳಿದ ಅಮಿತಾಭ್!; ಕಾರಣವೇನು?

ಕೆಬಿಸಿಯಲ್ಲಿ 1 ಕೋಟಿ ಮೊತ್ತದ ಈ ಪ್ರಶ್ನೆಗೆ ಉತ್ತರ ತಿಳಿಯದೇ ಕ್ವಿಟ್ ಮಾಡಿದ ಸ್ಪರ್ಧಿ; ನೀವು ಉತ್ತರಿಸಬಲ್ಲಿರಾ?