ಆ.14ರಿಂದ ಶುರುವಾಗಲಿದೆ ‘ಕೌನ್ ಬನೇಗಾ ಕರೋಡ್ಪತಿ’ ಹೊಸ ಸೀಸನ್; ಈ ಬಾರಿಯೂ ಅಮಿತಾಭ್ ಬಚ್ಚನ್ ಸಾರಥ್ಯ
Kaun Banega Crorepati 15: ಸೋನಿ ಟಿವಿಯಲ್ಲಿ ‘ಕೌನ್ ಬನೇಗಾ ಕರೋಡ್ಪತಿ 15’ ಪ್ರಸಾರ ಆಗಲಿದೆ. ಹೊಸ ಸೀಸನ್ನ ಪ್ರೋಮೋ ಬಿಡುಗಡೆ ಮಾಡಲಾಗಿದೆ. ಇದರಲ್ಲಿ ಅಮಿತಾಭ್ ಬಚ್ಚನ್ ಕಾಣಿಸಿಕೊಂಡಿದ್ದಾರೆ.
ನಟ ಅಮಿತಾಭ್ ಬಚ್ಚನ್ (Amitabh Bachchan) ಅವರು ದಣಿವರಿಯದ ಯುವಕನಂತೆ ಕೆಲಸ ಮಾಡುತ್ತಾರೆ. ಸಿನಿಮಾದಲ್ಲಿ ನಟಿಸುವುದು ಮಾತ್ರವಲ್ಲದೇ ಕಿರುತೆರೆ ಕಾರ್ಯಕ್ರಮಗಳನ್ನು ನಿರೂಪಣೆ ಮಾಡುವ ಮೂಲಕ ಅವರು ಜನಮೆಚ್ಚುಗೆ ಪಡೆದಿದ್ದಾರೆ. ಅವರ ನಿರೂಪಣೆಯಲ್ಲಿ ಮೂಡಿಬರುವ ‘ಕೌನ್ ಬನೇಗಾ ಕರೋಡ್ಪತಿ’ (Kaun Banega Crorepati) ಕಾರ್ಯಕ್ರಮಕ್ಕೆ ಪ್ರತ್ಯೇಕವಾದ ಅಭಿಮಾನಿ ಬಳಗ ಇದೆ. ಈ ಕ್ವಿಜ್ ಶೋ ನೋಡಿದರೆ ಪ್ರೇಕ್ಷಕರ ಸಾಮಾನ್ಯಜ್ಞಾನ ವೃದ್ಧಿಸುತ್ತದೆ. ಆಟ ಆಡಿದವರಿಗೆ ಕೋಟಿಗಟ್ಟಲೆ ಹಣ ಸಿಗುತ್ತದೆ. ಈವರೆಗೂ 14 ಆವೃತ್ತಿಗಳು ಯಶಸ್ವಿಯಾಗಿ ನಡೆದುಕೊಂಡು ಬಂದಿವೆ. ಈಗ ‘ಕೌನ್ ಬನೇಗಾ ಕರೋಡ್ಪತಿ’ 15ನೇ (KBC 15) ಆವೃತ್ತಿಗೆ ಚಾಲನೆ ನೀಡಲು ಸಕಲ ಸಿದ್ಧತೆ ನಡೆದಿದೆ. ಈ ಬಾರಿ ಕೂಡ ಅಮಿತಾಭ್ ಬಚ್ಚನ್ ಅವರೇ ನಿರೂಪಣೆಯ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.
ಸೋನಿ ಟಿವಿಯಲ್ಲಿ ‘ಕೌನ್ ಬನೇಗಾ ಕರೋಡ್ಪತಿ 15’ ಪ್ರಸಾರ ಆಗಲಿದೆ. ಹೊಸ ಸೀಸನ್ ಬಗ್ಗೆ ಮಾಹಿತಿ ತಿಳಿಸಲು ಪ್ರೋಮೋ ಬಿಡುಗಡೆ ಮಾಡಲಾಗಿದೆ. ಇದರಲ್ಲಿ ಅಮಿತಾಭ್ ಬಚ್ಚನ್ ಕಾಣಿಸಿಕೊಂಡಿದ್ದಾರೆ. ಇದನ್ನು ‘ಹೊಸ ಆರಂಭ’ ಎಂದು ಅವರು ಕರೆದಿದ್ದಾರೆ. ಆಗಸ್ಟ್ 14ರಂದು ಈ ಶೋ ಪ್ರಸಾರ ಆರಂಭ ಆಗಲಿದೆ. ಪ್ರತಿ ಸೋಮವಾರದಿಂದ ಶುಕ್ರವಾರದವರೆಗೆ ರಾತ್ರಿ 9 ಗಂಟೆಗೆ ಇದರ ಸಂಚಿಕೆಗಳು ಬಿತ್ತರ ಆಗಲಿದೆ. ಹೊಸ ಸೀಸನ್ ನಡೆಸಿಕೊಡಲು ಬಹಳ ಉತ್ಸಾಹದಿಂದ ಅಮಿತಾಭ್ ಬಚ್ಚನ್ ಅವರು ವೇದಿಕೆ ಏರಿದ್ದಾರೆ.
‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದ ಪ್ರತಿ ಎಪಿಸೋಡ್ನಲ್ಲೂ ವಿಶೇಷತೆ ಇರುತ್ತದೆ. ಬೇರೆ ಬೇರೆ ಕ್ಷೇತ್ರದ ವ್ಯಕ್ತಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸುತ್ತಾರೆ. ಪ್ರತಿ ಪ್ರಶ್ನೆಗೆ ಉತ್ತರ ನೀಡಿದಾಗಲೂ ಸ್ಪರ್ಧಿಗಳಿಗೆ ನಗದು ಬಹುಮಾನ ಸಿಗುತ್ತದೆ. ಸಾವಿರದಿಂದ ಬಹುಕೋಟಿ ರೂಪಾಯಿವರೆಗೆ ಹಣ ಗೆಲ್ಲುವ ಅವಕಾಶ ಈ ಶೋನಲ್ಲಿ ಸಿಗುತ್ತದೆ. ‘ಕೌನ್ ಬನೇಗಾ ಕರೋಡ್ಪತಿ’ ಕಾರ್ಯಕ್ರಮದಿಂದ ಅನೇಕರ ಬದುಕು ಬದಲಾಗಿದೆ. ಈ ಶೋ ಬಗ್ಗೆ ಅಮಿತಾಭ್ ಬಚ್ಚನ್ ಅವರು ವಿಶೇಷವಾದ ಒಲವು ಇಟ್ಟುಕೊಂಡಿದ್ದಾರೆ.
ಇದನ್ನೂ ಓದಿ: Amitabh Bachchan: ಅಭಿಮಾನಿಗಳನ್ನು ಭೇಟಿ ಮಾಡುವಾಗ ಚಪ್ಪಲಿ ಹಾಕಿಕೊಳ್ಳಲ್ಲ ಅಮಿತಾಭ್ ಬಚ್ಚನ್; ಕಾರಣ ತಿಳಿಸಿದ ಸ್ಟಾರ್ ನಟ
ಎಂದಿನಂತೆ ಝಗಮಗಿಸುವ ವೇದಿಕೆಯಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ. ಮೊದಲ ಎಪಿಸೋಡ್ನಲ್ಲಿ ಸ್ಪರ್ಧಿಸುವ ಸ್ಪರ್ಧಿಗಳನ್ನು ಹೊಸ ಪ್ರೋಮೋನಲ್ಲಿ ತೋರಿಸಲಾಗಿದೆ. ‘5ಜಿ ವೇಗಕ್ಕೆ ಅಪ್ಗ್ರೇಡ್ ಆಗಿ, ಹೊಸ ಮಾದರಿಯಲ್ಲಿ ಕೌನ್ ಬನೇಗಾ ಕರೋಡ್ಪತಿ ಕಾರ್ಯಕ್ರಮ ಬರುತ್ತಿದೆ’ ಎಂದು ಅಮಿತಾಭ್ ಬಚ್ಚನ್ ಹೇಳಿದ್ದಾರೆ. ಸಿನಿಮಾಗಳಲ್ಲೂ ಬಿಗ್-ಬಿ ಸಕ್ರಿಯರಾಗಿದ್ದಾರೆ. ಪ್ರಭಾಸ್ ನಟನೆಯ ‘ಕಲ್ಕಿ 2898 ಎಡಿ’ ಸೇರಿದಂತೆ ಹಲವು ಸಿನಿಮಾಗಳು ಅವರ ಕೈಯಲ್ಲಿ ಇವೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.