ಧನುಶ್, ಮಾಧವನ್ ಬಳಿಕ ವಿಜಯ್​ಗೆ ಸಿಗುತ್ತಿದೆ ಮಹತ್ವದ ಗೌರವ

ಭಾರತದಲ್ಲೇ ಅತಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ನಟರಲ್ಲಿ ತಮಿಳಿನ ಸ್ಟಾರ್ ನಟ ವಿಜಯ್ (Vijay) ಸಹ ಒಬ್ಬರು. ಅವರ ಅಭಿಮಾನಿಗಳು ಭಾರತದಲ್ಲಿ ಮಾತ್ರವಲ್ಲ ವಿದೇಶದಲ್ಲಿಯೂ ದೊಡ್ಡ ಸಂಖ್ಯೆಯಲ್ಲಿದ್ದಾರೆ. ತಮಿಳುನಾಡಿನಲ್ಲಿ ಅವರ ಸಿನಿಮಾ ಬಿಡುಗಡೆ ದಿನ ಚಿತ್ರಮಂದಿರ ತುಂಬುವಂತೆ ಸಿಂಗಪುರ, ಮಲೇಷ್ಯಾ, ನ್ಯೂಯಾರ್ಕ್​ಗಳಲ್ಲಿಯೂ ತುಂಬುತ್ತದೆ. ಇದೀಗ ವಿಜಯ್​ರ ಹುಟ್ಟುಹಬ್ಬ (Birthday) ಬಂದಿದ್ದು ಅಭಿಮಾನಿಗಳು (Fan) ನೆಚ್ಚಿನ ನಟನ ಹುಟ್ಟುಹಬ್ಬವನ್ನು ದೊಡ್ಡದಾಗಿ ಆಚರಿಸುತ್ತಿದ್ದಾರೆ.

ವಿಜಯ್​ರ ಅಭಿಮಾನಿಗಳು ನ್ಯೂಯಾರ್ಕ್​ನ ಪ್ರತಿಷ್ಠಿತ ಟೈಮ್ಸ್ ಸ್ಕೇರ್​ ವೃತ್ತದ ಬಿಲ್​ಬೋರ್ಡ್​ ಮೇಲೆ ವಿಜಯ್ ವಿಡಿಯೋ ಪ್ರದರ್ಶಿಸಿ ವಿಜಯ್​ಗೆ ಹುಟ್ಟುಹಬ್ಬದ ಶುಭಾಷಯ ಕೋರಿದ್ದಾರೆ. ಈ ವರೆಗೆ ತಮಿಳಿನ ಇಬ್ಬರು ಸ್ಟಾರ್ ನಟರ ಚಿತ್ರ ಅಥವಾ ವಿಡಿಯೋ ಮಾತ್ರವೇ ಪ್ರತಿಷ್ಠಿತ ಟೈಮ್ಸ್ ಸ್ಕೇರ್​ನಲ್ಲಿ ಪ್ರದರ್ಶಿತಗೊಂಡಿವೆ. ಇದೀಗ ಈ ಗೌರವಕ್ಕೆ ಪಾತ್ರರಾಗುತ್ತಿರುವ ಮೂರನೇ ತಮಿಳಿನ ಸ್ಟಾರ್ ನಟ ಎಂಬ ಖ್ಯಾತಿಗೆ ವಿಜಯ್ ಪಾತ್ರರಾಗುತ್ತಿದ್ದಾರೆ.

ಈ ಹಿಂದೆ ತಮಿಳಿನ ನಟರಾದ ನಟ ಧನುಶ್ ಹಾಗೂ ಆರ್ ಮಾಧವನ್ ಅವರ ಚಿತ್ರಗಳು ಪ್ರತಿಷ್ಠಿತ ಟೈಮ್ಸ್ ಸ್ಕೇರ್​ನಲ್ಲಿ ಪ್ರದರ್ಶನಗೊಂಡಿವೆ. ಇದರ ಹೊರತಾಗಿ ತಮಿಳಿನ ಜನಪ್ರಿಯ ಸಂಗೀತ ನಿರ್ದೇಶಕ ಇಳಯರಾಜ ಅವರ ಚಿತ್ರವೂ ಸಹ ಇದೇ ಜಾಗದಲ್ಲಿ ಪ್ರದರ್ಶನಗೊಂಡಿದೆ. ಟೈಮ್ಸ್ ಸ್ಕೇರ್​ನಲ್ಲಿ ಯಾವುದೇ ಸಂಸ್ಥೆಯ ಜಾಹೀರಾತು ಪ್ರದರ್ಶಿಸುವುದಾಗಲಿ, ಯಾರದ್ದೇ ಹುಟ್ಟುಹಬ್ಬಕ್ಕೆ ಶುಭಾಷಯ ಕೋರುವುದಾಗಲಿ ಪ್ರತಿಷ್ಠೆಯ ವಿಷಯವಾಗಿ ಪರಿಗಣಿತವಾಗುತ್ತದೆ. ಇಲ್ಲಿ ಜಾಹೀರಾತು ವಿಡಿಯೋ ಪ್ರದರ್ಶಿಸಲು ಭಾರಿ ಮೊತ್ತದ ಹಣ ತೆರಬೇಕಾಗುತ್ತದೆ.

ಇದನ್ನೂ ಓದಿ:ಮಕ್ಕಳೊಟ್ಟಿಗೆ ಕುಳಿತು ಭಾವುಕರಾದ ವಿಜಯ್, ಅಂಬೇಡ್ಕರ್, ಪೆರಿಯಾರ್ ಅವರ ಓದುವಂತೆ ಸಲಹೆ

ಇದೀಗ ವಿಜಯ್ ಅಭಿಮಾನಿಗಳು ಕೆಲವರು ಭಾರಿ ಮೊತ್ತದ ಹಣ ತೆತ್ತು ವಿಜಯ್​ರ ವಿಡಿಯೋವನ್ನು ಪ್ರದರ್ಶಿಸಿ ಮೆಚ್ಚಿನ ನಟನಿಗೆ ಹುಟ್ಟುಹಬ್ಬದ ಶುಭಾಷಯಗಳನ್ನು ಕೋರಿದ್ದಾರೆ. ವಿಜಯ್​ರ ವಿವಿಧ ಸಿನಿಮಾಗಳ ತುಣುಕುಗಳನ್ನು, ಮಾಸ್ ಎಂಟ್ರಿ ವಿಡಿಯೋಗಳನ್ನು ಒಟ್ಟು ಸೇರಿಸಿ ಒಳ್ಳೆಯ ಬ್ಯಾಕ್​ಗ್ರೌಂಡ್ ಸಂಗೀತ ಕೊಟ್ಟು ಟೈಮ್ಸ್ ಸ್ಕೇರ್​ನಲ್ಲಿ ಪ್ರದರ್ಶಿಸಲಾಗಿದೆ. ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ಟ್ರೆಂಡ್ ಆಗುತ್ತಿದೆ. ವಿಜಯ್ ಅಭಿಮಾನಿಗಳು ಈ ವಿಡಿಯೋ ಹಂಚಿಕೊಂಡು ಖುಷಿ ಪಡುತ್ತಿದ್ದಾರೆ.

ವಿಜಯ್​ರ ಹುಟ್ಟುಹಬ್ಬ ಜೂನ್ 22 ರಂದಿದೆ. ಈ ದಿನ ವಿಜಯ್​ರ ಅಭಿಮಾನಿಗಳು ಬಹು ಅದ್ಧೂರಿಯಾಗಿ ಹುಟ್ಟುಹಬ್ಬವನ್ನು ಆಚರಿಸಲು ಅಣಿಯಾಗಿದ್ದಾರೆ. ವಿಜಯ್​ರ ಹೊಸ ಸಿನಿಮಾ ಲಿಯೋನ ಟೀಸರ್ ಸಹ ಇದೇ ದಿನ ಬಿಡುಗಡೆ ಆಗುವ ಸಾಧ್ಯತೆ ಇದೆ. ಜೊತೆಗೆ ವಿಜಯ್​ರ ಮುಂದಿನ ಸಿನಿಮಾ ಸಹ ಘೋಷಣೆ ಆಗಲಿದೆ.

ವಿಜಯ್ ಪ್ರಸ್ತುತ ಲೋಕೇಶ್ ಕನಗರಾಜ್ ನಿರ್ದೇಶನದ ಲಿಯೋ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾದಲ್ಲಿ ವಿಜಯ್ ಎದುರು ಸಂಜಯ್ ದತ್ ಸಹ ನಟಿಸುತ್ತಿದ್ದಾರೆ. ಸಿನಿಮಾದಲ್ಲಿ ನಟಿ ತ್ರಿಷಾ ನಾಯಕಿ. ಅನಿರುದ್ಧ್ ರವಿಚಂದ್ರನ್ ಸಂಗೀತ ನೀಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ