ಮಧುಮೇಹದಿಂದ ಬಳಲ್ತಿದ್ದೀರಾ?-ನಿಮ್ಮ ನಿತ್ಯದ ಡಯಟ್​​ನಲ್ಲಿ ಈ ಐದು ಆಹಾರಗಳನ್ನು ಅಳವಡಿಸಿಕೊಳ್ಳಿ

ಮಧುಮೇಹ (Diabetes)ಎಂಬುದು ಇತ್ತೀಚೆಗೆ ಸರ್ವೇಸಾಮಾನ್ಯವಾದ ಕಾಯಿಲೆ. ಚಿಕ್ಕವರಿಂದ ಹಿಡಿದು, ಹಿರಿಯರವರೆಗೆ ಯಾರಿಗೆ ಬೇಕಾದರೂ ಬರುತ್ತದೆ. ಹೀಗೆ ಒಮ್ಮೆ ಡಯಾಬಿಟಿಸ್​ಗೆ ಒಳಗಾದರೆ, ಮತ್ತೆ ಅದರಿಂದ ಹೊರಬರುವುದು ಅಷ್ಟು ಸುಲಭವಲ್ಲ. ನಿತ್ಯ ಮಾತ್ರೆ ತೆಗೆದುಕೊಳ್ಳಬೇಕಾಗುತ್ತದೆ. ಅದರೊಂದಿಗೆ ಆಹಾರ ಕ್ರಮದಲ್ಲಿ ಬದಲಾವಣೆ ಅನಿವಾರ್ಯ. ಕೆಲವು ಡಯಟ್​ಗಳನ್ನು ರೂಢಿಸಿಕೊಳ್ಳಬೇಕಾಗುತ್ತದೆ. ವ್ಯಾಯಾಮ, ವಾಕಿಂಗ್​​ಗಳೂ ಬದುಕಲ್ಲಿ ಪ್ರಮುಖ ಸ್ಥಾನ ಪಡೆದುಕೊಳ್ಳುತ್ತವೆ.

ಮಧುಮೇಹಿಗಳು ಮದ್ಯಸೇವನೆ ಕಡಿಮೆ ಮಾಡಬೇಕು. ಕೊಬ್ಬಿನ ಅಂಶ ಕಡಿಮೆ ಇರುವ ನೇರ ಮಾಂಸ ಸೇವನೆ ಮಾಡಿದರೆ ಒಳಿತು. ಸೀಫುಡ್​ಗಳು, ನಾರಿನ ಅಂಶ ಹೆಚ್ಚಿರುವ ಆಹಾರಗಳನ್ನು ಸೇವಿಸಬೇಕು. ಸಕ್ಕರೆ ಅಂಶ ಇರುವ ಯಾವುದೇ ಆಹಾರಗಳಿಂದ ದೂರವೇ ಇರಬೇಕು. ಇಷ್ಟೆಲ್ಲ ಆದರೂ ಸಕ್ಕರೆ ಕಾಯಿಲೆ ಇರುವವರು ಯಾವುದನ್ನು ತಿನ್ನಬೇಕು? ಏನನ್ನು ತಿನ್ನಬಾರದು? ಡಯಟ್​ ಹೇಗಿರಬೇಕು ಎಂಬಿತ್ಯಾದಿ ಪ್ರಶ್ನೆಗಳು ಸದಾ ಏಳುತ್ತಲೇ ಇರುತ್ತವೆ. ನಾವಿಲ್ಲಿ ಮಧುಮೇಹಿಗಳಿಗೆ ಅನುಕೂಲವಾಗುವ ಐದು ಆಹಾರದ ಬಗ್ಗೆ ತಿಳಿಸಿದ್ದೇವೆ ನೋಡಿ..ಇವು ಶರೀರದಲ್ಲಿ ಸಕ್ಕರೆ ಅಂಶ ನಿಯಂತ್ರಿಸುವ ಜತೆ, ತೂಕವನ್ನೂ ಕಡಿಮೆ ಮಾಡುತ್ತವೆ.

1.ಕ್ಯಾರೆಟ್​: ಕ್ಯಾರೆಟ್​ ಚಳಿಗಾಲದಲ್ಲಿ ಯಥೇಚ್ಛವಾಗಿ ಸಿಗುವ ತರಕಾರಿ. ನಿಮ್ಮ ಡಯಟ್​​ನಲ್ಲಿ ನೀವಿದನ್ನು ಅಳವಡಿಸಿಕೊಳ್ಳಬಹುದು. ಯುಎಸ್​ ಕೃಷಿ ಡಿಪಾರ್ಟ್​ಮೆಂಟ್​ ಪ್ರಕಾರ, 100 ಗ್ರಾಂ ಕ್ಯಾರೆಟ್ ಸುಮಾರು 4.7 ಗ್ರಾಂಗಳಷ್ಟು ಸಕ್ಕರೆ ಅಂಶ ಹೊಂದಿರುತ್ತದೆ. ಹೀಗಾಗಿ ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿರುವವರು ಯಾವುದೇ ಭಯವಿಲ್ಲದೆ ಕ್ಯಾರೆಟ್​ನ್ನು ಡಯಟ್​ನಲ್ಲಿ ಅಳವಡಿಸಿಕೊಳ್ಳಬಹುದು. ಕ್ಯಾರೆಟ್​ನ್ನು ಕತ್ತರಿಸಿ ಹಾಗೇ ತಿನ್ನಬಹುದು. ಇದನ್ನು ಜ್ಯೂಸ್ ಮಾಡಿಕೊಂಡು, ಸಕ್ಕರೆ ಹಾಕದೆ ಸೇವಿಸಬಹುದು.

2. ಸೌತೆಕಾಯಿ: ಸೌತೆಕಾಯಿ ದೇಹಕ್ಕೆ ತಾಜಾತನ ನೀಡುವ ತರಕಾರಿ. ಇದು ಆರೋಗ್ಯಕರವೂ ಹೌದು, ರುಚಿಕರವೂ ಹೌದು. ಸೌತೆಕಾಯಿಯಲ್ಲಿ ತುಂಬ ಕಡಿಮೆ ಪ್ರಮಾಣದ ಸಕ್ಕರೆ ಅಂಶ ಇರುತ್ತದೆ. ಅಷ್ಟೇ ಅಲ್ಲ, ಕಾರ್ಬೋಹೈಡ್ರೇಟ್​, ಗ್ಲಿಸೆಮಿಕ್​ ಇಂಡೆಕ್ಸ್​ಗಳೂ ಕಡಿಮೆಯಿದ್ದು, ನಾರು ಮತ್ತು ನೀರಿನ ಅಂಶ ತುಂಬ ಜಾಸ್ತಿ ಇರುತ್ತದೆ. ಹೀಗಾಗಿ ಮಧುಮೇಹ ಇರುವವರು ತಮ್ಮ ನಿತ್ಯದ ಆಹಾರದಲ್ಲಿ ಇದನ್ನು ಬಳಸಬಹುದು. ಸೌತೆಕಾಯಿಯಲ್ಲಿಕಡಿಮೆ ಕೊಬ್ಬಿನ ಅಂಶ ಮತ್ತು ಕ್ಯಾಲೋರಿ ಇರುವುದರಿಂದ ತೂಕ ಇಳಿಕೆಯಲ್ಲೂ ಸಹಕಾರಿ.

3. ಬ್ರೌನ್​ ರೈಸ್​ (ಕಂದು ಅನ್ನ) ಶುಗರ್​ ಬಂದ ತಕ್ಷಣ ನೀವು ನಿತ್ಯ ಊಟ ಮಾಡುವ ಬಿಳಿ ಅನ್ನವನ್ನು ಸಾಧ್ಯವಾದಷ್ಟೂ ಕಡಿಮೆ ಮಾಡುವಂತೆ ವೈದ್ಯರು ಸಲಹೆ ನೀಡುತ್ತಾರೆ. ಅದರ ಬದಲಿಗೆ ಬ್ರೌನ್​ ರೈಸ್​ ತಿನ್ನಬಹುದು ಎಂದೂ ಹೇಳುತ್ತಾರೆ. ಈ ಬ್ರೌನ್​ ರೈಸ್​ನಲ್ಲಿ ಅಂದಾಜು 0.9ರಷ್ಟು ಸಕ್ಕರೆ ಅಂಶ ಇರುತ್ತದೆ ಎಂದು ಯುಎಸ್ ಕೃಷಿ ಡಿಪಾರ್ಟ್​ಮೆಂಟ್​ (USDA)ಹೇಳಿದೆ. ವೈಟ್​ ರೈಸ್​ಗೆ ಹೋಲಿಸಿದರೆ ಇದರಲ್ಲಿ ಅತ್ಯಂತ ಕಡಿಮೆ ಪ್ರಮಾಣದ ಕ್ಯಾಲೋರಿ ಇರುತ್ತದೆ. ಹಾಗಾಗಿ ಇದು ಮಧುಮೇಹಿಗಳಿಗೆ ಮತ್ತು ತೂಕ ಇಳಿಸಿಕೊಳ್ಳುವವರಿಗೆ ತುಂಬ ಅನುಕೂಲಕರ ಆಹಾರ.

4. ಗ್ರೀಕ್​ ಯೋಗರ್ಟ್​ (ಗ್ರೀಕ್​ ಮೊಸರು): ಸಾಮಾನ್ಯವಾಗಿ ನಿತ್ಯ ಬಳಸುವ ಮೊಸರಿನಲ್ಲಿ ಸಕ್ಕರೆ ಅಂಶವೂ ಜಾಸ್ತಿ, ಕೊಬ್ಬಿನ ಅಂಶವೂ ಹೆಚ್ಚು. ಹೀಗಾಗಿ ಸಕ್ಕರೆ ಕಾಯಿಲೆ ಇರುವವರು ಇದನ್ನು ಬಳಸಲು ಸಾಧ್ಯವಿಲ್ಲ. ಆದರೆ ಕೊಬ್ಬಿನ ಅಂಶವನ್ನು ತೆಗೆಯಲಾದ ಗ್ರೀಕ್​ ಯೋಗರ್ಟ್​ ತಿನ್ನಲು ರುಚಿಯಾಗಿರುತ್ತದೆ. ಹಾಗೇ, ಮಧುಮೇಹಿಗಳಿಗೆ ಅನುಕೂಲ. ಸುಮಾರು 100 ಗ್ರಾಂ ಗ್ರೀಕ್​ ಯೋಗರ್ಟ್​​ನಲ್ಲಿ ಕೇವಲ 3.2 ಗ್ರಾಂಗಳಷ್ಟು ಸಕ್ಕರೆ ಅಂಶ ಇರುತ್ತದೆ. ಇದನ್ನು ಡಯಾಬಿಟಿಸ್ ಇರುವವರು ಮತ್ತು ತೂಕ ಕಡಿಮೆ ಮಾಡಿಕೊಳ್ಳುವ ಪ್ರಯತ್ನದಲ್ಲಿದ್ದವರು ಡಯಟ್​ನಲ್ಲಿ ಬಳಸಬಹುದು.

5. ಅಣಬೆಗಳು:  ಮಶ್ರೂಮ್​ಗಳು ಅಥವಾ ಅಣಬೆಗಳಿಗೆ ಅಪಾರ ರುಚಿಯಿದೆ. ಹಾಗೇ ಅತ್ಯಂತ ಆರೋಗ್ಯಕರ ಆಹಾರ. ಅತ್ಯಂತ ಕಡಿಮೆ ಪ್ರಮಾಣದ ಸಕ್ಕರೆ ಅಂಶ ಹೊಂದಿರುವ ಜತೆಗೆ, ಅಧಿಕ ನಾರಿನ ಅಂಶ ಹೊಂದಿರುತ್ತವೆ. 100 ಗ್ರಾಂಗಳಷ್ಟು ಬಿಳಿ ಅಣಬೆಯಲ್ಲಿ 2 ಗ್ರಾಂಗಳಷ್ಟು ಸಕ್ಕರೆ ಅಂಶವಿರುತ್ತದೆ ಎಂದು ಯುಎಸ್​ಡಿಎ ತಿಳಿಸಿದೆ. ತಿನ್ನಬಹುದಾದ ಯಾವುದೇ ಅಣಬೆಯನ್ನೂ ಕೂಡ ಮಧುಮೇಹಿಗಳು ತಮ್ಮ ಡಯಟ್​ನಲ್ಲಿ ಬಳಕೆ ಮಾಡಿಕೊಳ್ಳಬಹುದು.

(ಮಧುಮೇಹ ಎಂಬುದು ನೋಡಲು ಸಾಮಾನ್ಯ ಕಾಯಿಲೆ ಅನ್ನಿಸಿದರೂ, ಅದು ಜೀವಕ್ಕೇ ಅಪಾಯ ತರಬಲ್ಲದು. ಹೀಗಾಗಿ ಪ್ರತಿಯೊಬ್ಬ ಡಯಾಬಿಟಿಕ್​ ರೋಗಿಯೂ ವೈದ್ಯರನ್ನು ಕಂಡು, ಸೂಕ್ತ ಔಷಧ ಪಡೆಯಬೇಕು. ಅದರ ಹೊರತಾಗಿ ಡಯಟ್​ ಮಾಡಬೇಕು)

ಇದನ್ನೂ ಓದಿ: ‘ಗೆಹರಾಯಿಯಾ’ ನೋಡಿ ದೀಪಿಕಾ ಬಗ್ಗೆ ಕೀಳು ಮಟ್ಟದ ಹೇಳಿಕೆ ನೀಡಿದ ನಟ; ಅಭಿಮಾನಿಗಳಿಂದ ತರಾಟೆ

Published On - 7:50 am, Sun, 13 February 22