ಸ್ಮಾರ್ಟ್​ಫೋನ್ ಮೂಲಕ ಕ್ಯಾನ್ಸರ್ ಪತ್ತೆ; ಹೈದರಾಬಾದ್ ಸಂಶೋಧಕರ ಹೊಸ ಆವಿಷ್ಕಾರ

ಹೈದರಾಬಾದ್: ಮೊದಲೆಲ್ಲ ಕ್ಯಾನ್ಸರ್ ಎಂದರೆ ಜನರು ಯಮನನ್ನು ಕಂಡಂತೆ ಹೆದರುತ್ತಿದ್ದರು. ಆದರೆ, ಈಗ ನಾನಾ ಬಗೆಯ ಕ್ಯಾನ್ಸರ್​​ ರೋಗಗಳು ಸಾಮಾನ್ಯವಾಗಿಬಿಟ್ಟಿವೆ. ಈ ಕ್ಯಾನ್ಸರ್​ ರೋಗದಲ್ಲಿ ಕೆಲವು ರೀತಿಯ ರೋಗವನ್ನು ಗುಣಪಡಿಸಬಹುದು. ಆದರೆ, ಇನ್ನು ಕೆಲವು ಮಾರಣಾಂತಿಕವಾಗಿರುತ್ತದೆ. ಕ್ಯಾನ್ಸರ್ ರೋಗವನ್ನು ಸರಿಯಾದ ಸಮಯಕ್ಕೆ ಪತ್ತೆಹಚ್ಚುವುದರಿಂದ ಸೂಕ್ತ ಸಮಯದಲ್ಲಿ ಚಿಕಿತ್ಸೆ ನೀಡಬಹುದಾಗಿದೆ. ಕ್ಯಾನ್ಸರ್​ ರೋಗಗಳ ವಿಧದಲ್ಲಿ ಪ್ರಮುಖವಾಗಿರುವ ಬಾಯಿ ಕ್ಯಾನ್ಸರ್​ನ ಆರಂಭಿಕ ಪತ್ತೆಗಾಗಿ ಹೈದರಾಬಾದ್​ನ ಇಂಟರ್​ನ್ಯಾಷನಲ್ ಇನ್​ಸ್ಟಿಟ್ಯೂಟ್ ಆಫ್ ಇನ್ಫರ್ಮೇಷನ್ ಟೆಕ್ನಾಲಜಿ (IIIT) ಸಂಶೋಧಕರು ಡೇಟಾ ಮತ್ತು INAI ಸ್ಮಾರ್ಟ್​ಫೋನ್ ಆಧಾರಿತ ಕೃತಕ ಬುದ್ಧಿಮತ್ತೆ (AI) ಮತ್ತು ಮೆಷಿನ್ ಲರ್ನಿಂಗ್ (ML) ತಂತ್ರಜ್ಞಾನವನ್ನು ಕಂಡುಹಿಡಿದಿದ್ದಾರೆ.

ಸಂಶೋಧಕರ ಪ್ರಕಾರ, ಕೃತಕ ಬುದ್ಧಿಮತ್ತೆ ಮತ್ತು ಮಷಿನ್ ಲರ್ನಿಂಗ್ ಪರಿಹಾರವು ಈಗ ಬಾಯಿಯ ಕ್ಯಾನ್ಸರ್‌ಗೆ ಕಾರಣವಾಗಬಹುದಾದ ಅಸಹಜ ಗಾಯಗಳ ಆರಂಭಿಕ ಪತ್ತೆಯ ಮೂಲಕ ಚಿಕಿತ್ಸೆ ನೀಡಲು ಸಹಾಯ ಮಾಡುತ್ತದೆ.

ವಿವೇಕ್ ತಲ್ವಾರ್ ಮತ್ತು ಡಾ. ಪ್ರಜ್ಞಾ ಸಿಂಗ್ ನೇತೃತ್ವದ ಸಂಶೋಧನೆ ವಿವೇಕ್ ತಲ್ವಾರ್ ಮತ್ತು ಡಾ. ಪ್ರಜ್ಞಾ ಸಿಂಗ್ ಅವರ ಕ್ಯುರೇಟೆಡ್ ಡೇಟಾಬೇಸ್‌ನಿಂದ ಸ್ಮಾರ್ಟ್‌ಫೋನ್ ಆಧಾರಿತ ಚಿತ್ರಗಳನ್ನು ಪಡೆದುಕೊಂಡಿದೆ. ಇದರಲ್ಲಿ ಶೇ. 70ರಷ್ಟು ನಿಖರವಾಗಿ ಕ್ಯಾನ್ಸರ್​ನ ರೋಗ ಲಕ್ಷಣಗಳನ್ನು ಪತ್ತೆಹಚ್ಚಬಹುದಾಗಿದೆ. ಅಲ್ಲದೆ, ಸ್ಮಾರ್ಟ್​ಫೋನ್​ಗಳಲ್ಲಿ ಫೋಟೋ ಕ್ಲಿಕ್ ಮಾಡುವ ಮೂಲಕ ಬಾಯಿಯ ಒಳಗಿನ ಕ್ಯಾನ್ಸರ್ ಲಕ್ಷಣದ ಚಿತ್ರವನ್ನು ಸೆರೆಹಿಡಿಯುತ್ತದೆ.

ಇದನ್ನೂ ಓದಿ: ವಿಟಮಿನ್ ಡಿ ಕೊರತೆಯಿಂದ ಸ್ತನ ಕ್ಯಾನ್ಸರ್​ ಬರುತ್ತಾ?

ಈ ಮೂಲಕ ಹೈದರಾಬಾದ್​ನ ಸಂಶೋಧಕರು ಅದ್ಭುತ ಆವಿಷ್ಕಾರವನ್ನು ಮಾಡಿದ್ದಾರೆ. ಬಾಯಿಯ ಕ್ಯಾನ್ಸರ್ ಪತ್ತೆ ಮಾಡುವ ಸ್ಮಾರ್ಟ್ ಫೋನ್ ಅನ್ನು ವಿನ್ಯಾಸಗೊಳಿಸಲಾಗಿದೆ. ಸ್ಮಾರ್ಟ್‌ಫೋನ್‌ನೊಂದಿಗೆ ಬಾಯಿಯ ಹುಣ್ಣಿನ ಚಿತ್ರಗಳನ್ನು ತೆಗೆದುಕೊಂಡರೆ ಫೋನ್‌ನಲ್ಲಿ ಸ್ಥಾಪಿಸದ AI ಸಾಫ್ಟ್‌ವೇರ್ ಕ್ಯಾನ್ಸರ್ ಅನ್ನು ಪತ್ತೆ ಮಾಡುತ್ತದೆ. ಕ್ಯಾನ್ಸರ್ ಇದೆಯೇ? ಅಥವಾ ಇಲ್ಲವೇ? ಎಂಬುದನ್ನು ಕೆಲವೇ ನಿಮಿಷಗಳಲ್ಲಿ ಪತ್ತೆ ಮಾಡುತ್ತದೆ.

ಈ ಸಾಫ್ಟ್​ವೇರ್ ಕ್ಯಾನ್ಸರ್ ಮೊದಲ ಹಂತದಲ್ಲಿದೆಯೇ? ಕ್ಯಾನ್ಸರ್ ಲಕ್ಷಣಗಳು ಗಂಭೀರವಾಗಿದೆಯೇ? ಎಂಬುದನ್ನು ಕೂಡ ತಿಳಿಸುತ್ತದೆ. ಈ ಬಗ್ಗೆ ಡೇಟಾ ನೀಡುತ್ತದೆ. ದೇಶಾದ್ಯಂತ ಅನೇಕ ಜನರು ಬಾಯಿಯ ಕ್ಯಾನ್ಸರ್​ನಿಂದ ಬಳಲುತ್ತಿದ್ದಾರೆ. ಅದರಲ್ಲೂ ಗ್ರಾಮೀಣ ಪ್ರದೇಶದಲ್ಲಿ ಬಾಯಿ ಕ್ಯಾನ್ಸರ್ ಬಗ್ಗೆ ಜಾಗೃತಿಯೇ ಇಲ್ಲ. ಹೀಗಾಗಿ, ಈ ಸಾಧನವು ಹೆಚ್ಚು ಸಹಾಯ ಮಾಡುತ್ತದೆ ಎಂದು ಸಂಶೋಧಕರು ಹೇಳುತ್ತಾರೆ. ಈ ಸ್ಮಾರ್ಟ್ ಫೋನ್ ಮೂಲಕ ಬಾಯಿಯ ಕ್ಯಾನ್ಸರ್ ಅನ್ನು ಆರಂಭಿಕ ಹಂತದಲ್ಲೇ ಪತ್ತೆ ಹಚ್ಚಿ ಅಗತ್ಯ ಚಿಕಿತ್ಸೆ ಪಡೆಯಬಹುದಾಗಿದೆ.

AI ತಂತ್ರಜ್ಞಾನವು ಬಾಯಿಯ ಕ್ಯಾನ್ಸರ್ ಅನ್ನು ಪತ್ತೆಹಚ್ಚಲು ಬಯಾಪ್ಸಿ ಅಗತ್ಯವಿಲ್ಲದೇ ಬಾಯಿಯ ಹುಣ್ಣಿನ ಗಾಯಗಳು, ಸಣ್ಣ ಗೆಡ್ಡೆಗಳಲ್ಲಿ ರಕ್ತಸ್ರಾವ ಇತ್ಯಾದಿಗಳ ಫೋಟೋಗಳನ್ನು ತೆಗೆದುಕೊಳ್ಳುವ ಮೂಲಕ ಡೇಟಾವನ್ನು ವಿಶ್ಲೇಷಿಸುತ್ತದೆ. ಕ್ಯಾನ್ಸರ್ ಇದೆಯೇ? ಇದ್ದರೆ ಯಾವ ಹಂತದಲ್ಲಿದೆ? ಎಂಬಿತ್ಯಾದಿ ವಿವರಗಳನ್ನು ಸ್ಪಷ್ಟವಾಗಿ ಹೇಳುತ್ತದೆ ಎಂದು ಸಂಶೋಧಕರು ಹೇಳುತ್ತಾರೆ. ಈ ಸಾಧನವನ್ನು ವಿನ್ಯಾಸಗೊಳಿಸುವಲ್ಲಿ ತೆಲಂಗಾಣ ಸರ್ಕಾರವು ಸಂಶೋಧಕರಿಗೆ ಪ್ರೋತ್ಸಾಹ ನೀಡಿದೆ. ಇದರ ಸಿದ್ಧತೆಗೆ ರಾಜ್ಯ ಸರ್ಕಾರ ಅಗತ್ಯ ನೆರವು ನೀಡಿದೆ. ಶೀಘ್ರದಲ್ಲೇ ಈ ಸ್ಮಾರ್ಟ್ ಫೋನ್ ಅನ್ನು ತೆಲಂಗಾಣ ಸರ್ಕಾರದ ವೈದ್ಯಕೀಯ ಮತ್ತು ಆರೋಗ್ಯ ಇಲಾಖೆಗೆ ತಲುಪಿಸಲಾಗುವುದು.

ಇದನ್ನೂ ಓದಿ: ಈ ಥಾಯ್ ತಿನಿಸನ್ನು ಒಂದೇ ಒಂದು ತುತ್ತು ತಿಂದರೂ ಕ್ಯಾನ್ಸರ್ ಬರುವುದು ಗ್ಯಾರಂಟಿ!

ಬಾಯಿಯ ಕ್ಯಾನ್ಸರ್ ಅನ್ನು ಪತ್ತೆಹಚ್ಚಲು ಬಯಾಪ್ಸಿ ಮಾಡಲಾಗುತ್ತದೆ. ಬಾಯಿಯ ಹುಣ್ಣಿನ ಗೆಡ್ಡೆಗಳನ್ನು ಬಯಾಪ್ಸಿ ಮೂಲಕ ಪರೀಕ್ಷಿಸಲಾಗುತ್ತದೆ. ಇದರ ಆಧಾರದ ಮೇಲೆ ಸಂಶೋಧಕರು ಹೊಸ ಕಲ್ಪನೆಯನ್ನು ಪ್ರಾರಂಭಿಸಿದರು. ಫೋಟೋ ಮೂಲಕ ಕ್ಯಾನ್ಸರ್ ರೋಗಲಕ್ಷಣಗಳನ್ನು ಗುರುತಿಸುವ ಪ್ರಯೋಗವನ್ನು ಮಾಡಲು ಅವರು ಯೋಚಿಸಿದರು. ಬಯೋಕಾನ್ ಫೌಂಡೇಶನ್ ಮತ್ತು ಗ್ರೇಸ್ ಕ್ಯಾನ್ಸರ್ ಫೌಂಡೇಶನ್‌ನ ಪ್ರತಿನಿಧಿಗಳು ಸಮುದಾಯದ ವ್ಯಾಪ್ತಿಯ ಕಾರ್ಯಕ್ರಮದ ಭಾಗವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ ಕ್ಯಾನ್ಸರ್ ಕುರಿತು ಸಂಶೋಧನೆ ನಡೆಸಿದರು. ಆ ಪ್ರದೇಶಗಳಲ್ಲಿ ಕ್ಯಾನ್ಸರ್ ರೋಗಲಕ್ಷಣಗಳನ್ನು ಹೊಂದಿರುವ ಮತ್ತು ಇಲ್ಲದವರ ಬಾಯಿಯ ಒಳಗಿನ ಫೋಟೋಗಳನ್ನು ಸಂಗ್ರಹಿಸಲಾಗಿದೆ.

ಪ್ರಮುಖ ವೈದ್ಯಕೀಯ ತಜ್ಞರಾದ ಪ್ರಜ್ಞಾ ಸಿಂಗ್ ಮತ್ತು ವಿವೇಕ್ ತಲ್ವಾರ್ ಅವರ ಸಲಹೆಗಳು ಮತ್ತು ಸಲಹೆಗಳೊಂದಿಗೆ ಸಂಗ್ರಹಿಸಿದ ಫೋಟೋಗಳಿಗೆ ಬದಲಾವಣೆ ಮತ್ತು ಸೇರ್ಪಡೆಗಳನ್ನು ಮಾಡಲಾಯಿತು. ಇದನ್ನು ದೊಡ್ಡ ಡೇಟಾಬೇಸ್ ಮಾಡಿದರು. ಸಂಶೋಧಕರು 2 ಸಾವಿರಕ್ಕೂ ಹೆಚ್ಚು ಫೋಟೋಗಳನ್ನು ಸಂಗ್ರಹಿಸಿ ಎಐ ತಂತ್ರಜ್ಞಾನಕ್ಕೆ ಜೋಡಿಸಿದ್ದಾರೆ. ಇದರ ಆಧಾರದ ಮೇಲೆ, ಸಾಫ್ಟ್‌ವೇರ್ ಬಾಯಿಯ ಒಳಗೆ ಹೊಸದಾಗಿ ತೆಗೆದ ಫೋಟೋಗಳನ್ನು ವಿಶ್ಲೇಷಿಸುತ್ತದೆ ಮತ್ತು ಕ್ಯಾನ್ಸರ್ ರೋಗನಿರ್ಣಯ ಮಾಡುತ್ತದೆ. ಅಷ್ಟೇ ಅಲ್ಲ, ಇದು ಕ್ಯಾನ್ಸರ್ ಹಂತವನ್ನು ನಿರ್ಧರಿಸುತ್ತದೆ.

ಇನ್ನಷ್ಟು ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ