ಕ್ಯಾನ್ಸರ್​ನಿಂದಾಗುವ ಭಾರತದ ಶೇ. 63ರಷ್ಟು ಮಹಿಳೆಯರ ಸಾವನ್ನು ತಡೆಗಟ್ಟಬಹುದು; ಅಧ್ಯಯನದಲ್ಲಿ ಏನಿದೆ?

ಭಾರತೀಯ ಮಹಿಳೆಯರಲ್ಲಿ ಕ್ಯಾನ್ಸರ್‌ನಿಂದಾಗಿ ಸಂಭವಿಸುವ ಸುಮಾರು ಶೇ. 63ರಷ್ಟು ಅಕಾಲಿಕ ಮರಣಗಳನ್ನು ತಡೆಯಲು ಸಾಧ್ಯವಿದೆ ಎಂದು ಲ್ಯಾನ್ಸೆಟ್ ಪ್ರಕಟಿಸಿರುವ ಹೊಸ ಅಧ್ಯಯನ ತಿಳಿಸಿದೆ. ಹಾಗೇ, ಸಮಯಕ್ಕೆ ಸರಿಯಾಗಿ ಕ್ಯಾನ್ಸರ್​ಗೆ ಸೂಕ್ತ ಚಿಕಿತ್ಸೆ ನೀಡುವುದರಿಂದ ಶೇ. 37ರಷ್ಟು ಜೀವಗಳನ್ನು ಉಳಿಸಬಹುದಿತ್ತು ಎಂದು ತಿಳಿಸಿದೆ.

ಲ್ಯಾನ್ಸೆಟ್ ವಿವಿಧ ವಿಭಾಗಗಳ ತಜ್ಞರನ್ನೊಳಗೊಂಡ ಆಯೋಗವೊಂದನ್ನು ರಚಿಸಿದೆ. ‘ಮಹಿಳೆಯರು, ಶಕ್ತಿ ಮತ್ತು ಕ್ಯಾನ್ಸರ್’ ಎಂಬ ಶೀರ್ಷಿಕೆಯಡಿ ಈ ಆಯೋಗ ವರದಿ ಸಲ್ಲಿಸಿದ್ದು, ಈ ವರದಿಯು ಭಾರತದಲ್ಲಿ ಮಹಿಳೆಯರ ಸುಮಾರು 6.9 ಮಿಲಿಯನ್ ಕ್ಯಾನ್ಸರ್ ಸಂಬಂಧಿತ ಸಾವುಗಳನ್ನು ತಡೆಗಟ್ಟಬಹುದಾಗಿದೆ. ಹಾಗೇ 4.03 ಮಿಲಿಯನ್ ಕ್ಯಾನ್ಸರ್ ಪ್ರಕರಣಗಳಿಗೆ ಚಿಕಿತ್ಸೆ ನೀಡಬಹುದಾಗಿದೆ ಎಂದು ಹೇಳಿದೆ.

ಭಾರತದಲ್ಲಿ ಹೆಚ್ಚಿದ ಕ್ಯಾನ್ಸರ್ ತಪಾಸಣೆ ಮತ್ತು ರೋಗನಿರ್ಣಯದ ಮೂಲಕ ಅಪಾಯಕಾರಿ ಅಂಶಗಳನ್ನು ಕಡಿಮೆ ಮಾಡಿ ಮಹಿಳೆಯರಲ್ಲಿ ಶೇ. 63ರಷ್ಟು ಕ್ಯಾನ್ಸರ್ ಸಂಬಂಧಿತ ಸಾವುಗಳನ್ನು ತಡೆಗಟ್ಟಬಹುದೆಂದು ಇತ್ತೀಚಿನ ಸಂಶೋಧನೆಯ ಮೂಲಕ ಬಹಿರಂಗಪಡಿಸಲಾಗಿದೆ.

ಇದನ್ನೂ ಓದಿ: Breastfeeding: ಮಗುವಿಗೆ 6 ತಿಂಗಳ ನಂತರ ಎದೆಹಾಲು ಕುಡಿಸುವುದನ್ನು ನಿಲ್ಲಿಸಬೇಡಿ; ಇಲ್ಲಿದೆ ಕಾರಣ

ಜಾಗತಿಕವಾಗಿ ಕ್ಯಾನ್ಸರ್ ಆರೈಕೆಯಲ್ಲಿ ಕಂಡುಬರುವ ಲಿಂಗ ಅಂತರವನ್ನು ಪರಿಹರಿಸಲು ದಿ ಲ್ಯಾನ್ಸೆಟ್ ಲಿಂಗ ಅಧ್ಯಯನಗಳು, ಮಾನವ ಹಕ್ಕುಗಳು, ಕಾನೂನು, ಅರ್ಥಶಾಸ್ತ್ರ ಮತ್ತು ಕ್ಯಾನ್ಸರ್ ಸಂಶೋಧನೆಯಂತಹ ವಿವಿಧ ಕ್ಷೇತ್ರಗಳಲ್ಲಿ ತಜ್ಞರನ್ನು ಒಳಗೊಂಡ ಆಯೋಗವನ್ನು ರಚಿಸಿದೆ. ಈ ಆಯೋಗದ ಸಹ ಅಧ್ಯಕ್ಷ ಮತ್ತು ಘಾನಾದ ನ್ಯಾಷನಲ್ ಸೆಂಟರ್ ಫಾರ್ ರೇಡಿಯೊಥೆರಪಿ, ಆಂಕೊಲಾಜಿ ಮತ್ತು ನ್ಯೂಕ್ಲಿಯರ್ ಮೆಡಿಸಿನ್‌ನ ಹಿರಿಯ ಸಲಹೆಗಾರ ವೆರ್ನಾ ವಾಂಡರ್‌ಪುಯೆ, 2020ರಲ್ಲಿ 50 ವರ್ಷಕ್ಕಿಂತ ಕಡಿಮೆ ವಯಸ್ಸಿನ 3 ಮಿಲಿಯನ್ ಮಹಿಳೆಯರಲ್ಲಿ ಮೂರನೇ ಎರಡರಷ್ಟು ಕ್ಯಾನ್ಸರ್ ರೋಗನಿರ್ಣಯ ಮಾಡಲಾಗಿದೆ ಎಂದು ಒತ್ತಿ ಹೇಳಿದ್ದಾರೆ. ಇತ್ತೀಚೆಗೆ ಕ್ಯಾನ್ಸರ್ ಮಹಿಳೆಯರ ಸಾವಿನ ಪ್ರಮುಖ ಕಾರಣವಾಗಿ ಹೊರಹೊಮ್ಮಿದೆ.

ದಿ ಲ್ಯಾನ್ಸೆಟ್‌ನಲ್ಲಿ ಪ್ರಕಟವಾದ ಒಂದು ಅಧ್ಯಯನವು 30ರಿಂದ 69 ವರ್ಷ ವಯಸ್ಸಿನ ಮಹಿಳೆಯರ ಆರೋಗ್ಯದ ಮೇಲೆ ಕೇಂದ್ರೀಕರಿಸಿದ 185 ದೇಶಗಳ ಡಾಟಾವನ್ನು ಆಧರಿಸಿದೆ. ಕ್ಯಾನ್ಸರ್ ಚಿಕಿತ್ಸೆಯಲ್ಲಿ ಸ್ತ್ರೀವಾದಿ ವಿಧಾನವನ್ನು ಅಳವಡಿಸಿಕೊಳ್ಳುವುದರಿಂದ ವರ್ಷಕ್ಕೆ ಪ್ರಪಂಚದಾದ್ಯಂತ ಸುಮಾರು 8,00,000 ಮಹಿಳೆಯರ ಜೀವಗಳನ್ನು ಉಳಿಸಬಹುದು ಎಂದು ಅದು ಸೂಚಿಸಿದೆ.

ಇದನ್ನೂ ಓದಿ: Lemon: ದಿನವೂ ನಿಂಬೆ ಹಣ್ಣು ಬಳಸಿದರೆ ಆರೋಗ್ಯಕ್ಕಿದೆ 10 ಲಾಭ

2020ರಲ್ಲಿ ಕ್ಯಾನ್ಸರ್‌ಗೆ ಬಲಿಯಾದ ಸರಿಸುಮಾರು 1.3 ಮಿಲಿಯನ್ ಮಹಿಳೆಯರನ್ನು 4 ಪ್ರಮುಖ ಅಪಾಯಕಾರಿ ಅಂಶಗಳಿಂದ ರಕ್ಷಿಸಬಹುದಿತ್ತು. ತಂಬಾಕು, ಮದ್ಯ ಸೇವನೆ, ಸ್ಥೂಲಕಾಯತೆ ಮತ್ತು ಸೋಂಕುಗಳಿಂದ ಈ ಮಹಿಳೆಯರು ಕ್ಯಾನ್ಸರ್​ಗೆ ಬಲಿಯಾಗಿದ್ದಾರೆ. ಸಾಮಾನ್ಯವಾಗಿ ಮಹಿಳೆಯರಲ್ಲಿ ಕಂಡುಬರುವ ಕ್ಯಾನ್ಸರ್ ಕೇವಲ ಸ್ತನ ಕ್ಯಾನ್ಸರ್ ಮತ್ತು ಗರ್ಭಕಂಠದ ಕ್ಯಾನ್ಸರ್‌ನಂತಹ ಸಮಸ್ಯೆಗಳಿಗೆ ಸೀಮಿತವಾಗಿವೆ. ಈ ಎರಡು ಕ್ಯಾನ್ಸರ್​ಗಳು ಮಹಿಳಾ ಕ್ಯಾನ್ಸರ್ ರೋಗಗಳೆಂದು ಬಿಂಬಿತವಾಗಿವೆ. ಆದರೆ, ಆಘಾತಕಾರಿ ಸಂಗತಿಯೆಂದರೆ, ಪ್ರತಿ ವರ್ಷ 70 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಸುಮಾರು 3,00,000 ಮಹಿಳೆಯರು ಶ್ವಾಸಕೋಶದ ಕ್ಯಾನ್ಸರ್‌ನಿಂದ ಸಾಯುತ್ತಿದ್ದಾರೆ. 1,60,000 ಮಹಿಳೆಯರು ಕೊಲೊರೆಕ್ಟಲ್ ಕ್ಯಾನ್ಸರ್‌ನಿಂದ ಸಾಯುತ್ತಾರೆ.

ಮಹಿಳೆಯರಲ್ಲಿ ಸ್ತನ ಮತ್ತು ಗರ್ಭಕಂಠದ ಕ್ಯಾನ್ಸರ್ ಸಂಬಂಧಿತ ಸಾವುಗಳನ್ನು ಸೂಕ್ತ ಚಿಕಿತ್ಸೆಯ ಮೂಲಕ ತಡೆಗಟ್ಟಲು ಸಾಧ್ಯವಿದೆ ಎಂದು ಕ್ಯಾನ್ಸರ್ ಸಂಶೋಧನೆಯ ಏಜೆನ್ಸಿಯು ವಿವರಿಸಿದೆ. ಇತರ ರೀತಿಯ ಕ್ಯಾನ್ಸರ್‌ಗಳೊಂದಿಗೆ ಹೆಣಗಾಡುತ್ತಿರುವ ಮಹಿಳೆಯರ ಪರಿಸ್ಥಿತಿಯು ಭೀಕರವಾಗಿದೆ ಎಂದು ಅದು ಹೇಳಿದೆ.

ಇನ್ನಷ್ಟು ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ