Electric Vehicles: ಎಲೆಕ್ಟ್ರಿಕ್ ವಾಹನ ಬ್ಯಾಟರಿ ವಿನಿಮಯ ಪ್ರೋತ್ಸಾಹಕ ಇನ್ನೆರಡು ತಿಂಗಳಲ್ಲಿ ಅಂತಿಮಗೊಳ್ಳುವ ನಿರೀಕ್ಷೆ
ಎಲೆಕ್ಟ್ರಿಕ್ ವಾಹನಗಳ ಬ್ಯಾಟರಿ ವಿನಿಮಯ ಯೋಜನೆ ಅಡಿಯಲ್ಲಿ ಪ್ರೋತ್ಸಾಹಕವನ್ನು ಇನ್ನೆರಡು ತಿಂಗಳಲ್ಲಿ ಅಂತಿಮಗೊಳಿಸಲಾಗುವುದು ಎಂದು ಸರ್ಕಾರಿ ಮೂಲಗಳು ತಿಳಿಸಿರುವುದಾಗಿ ವರದಿ ಆಗಿದೆ.
ಹೊಸ ಎಲೆಕ್ಟ್ರಿಕ್ ವಾಹನಗಳ (Electric Vehicles) ಬ್ಯಾಟರಿ ವಿನಿಮಯ (ಸ್ವ್ಯಾಪ್) ಯೋಜನೆ ಅಡಿಯಲ್ಲಿ ಮುಂದಿನ ಎರಡು ತಿಂಗಳೊಳಗಾಗಿ ಭಾರತೀಯ ಸರ್ಕಾರವು ಪ್ರೋತ್ಸಾಹಕ ಅಂತಿಮಗೊಳಿಸುವ ನಿರೀಕ್ಷೆ ಇದೆ, ಎಂದು ಅಧಿಕಾರಿಗಳು ತಿಳಿಸಿರುವುದಾಗಿ ರಾಯಿಟರ್ಸ್ ಸುದ್ದಿ ಸಂಸ್ಥೆ ತಿಳಿಸಿದೆ. ಕಾರ್ಬನ್ ಪ್ರಮಾಣ ಕಡಿಮೆ ಮಾಡುವ ಗುರಿಯೊಂದಿಗೆ ಸ್ವಚ್ಛ ಸಂಚಾರ ವ್ಯವಸ್ಥೆ ಉತ್ತೇಜಿಸುವ ಗುರಿ ಹೊಂದಿದೆ. ಇದರ ಮಧ್ಯೆ ಪ್ರೋತ್ಸಾಹಕ ಘೋಷಣೆ ಮಾಡುವ ಯೋಜನೆ ಇದೆ. ಈ ನೀತಿಯು ಆರಂಭದಲ್ಲಿ ಎಲೆಕ್ಟ್ರಿಕ್ ಸ್ಕೂಟರ್ಗಳು, ಮೋಟಾರ್ಸೈಕಲ್ಗಳು ಮತ್ತು ತ್ರಿಚಕ್ರ ವಾಹನ ಆಟೋರಿಕ್ಷಾಗಳ ಬ್ಯಾಟರಿ ವಿನಿಮಯ ಸೇವೆಗಳ ಮೇಲೆ ಗಮನ ಕೇಂದ್ರೀಕರಿಸಲಿದೆ.
ಭಾರತ ಸರ್ಕಾರ ಈಚೆಗೆ ತಿಳಿಸಿರುವಂತೆ, ಸ್ವ್ಯಾಪಿಂಗ್ ಉತ್ತೇಜಿಸುವುದಕ್ಕಾಗಿ ಹೊಸ ನೀತಿಯನ್ನು ಪರಿಚಯಿಸಲಾಗುತ್ತದೆ. ವಿನಿಮಯ ಸ್ಟೇಷನ್ಗಳಲ್ಲಿ ಹಳೆಯ- ಉಪಯೋಗಕ್ಕೆ ಬಾರದ ಬ್ಯಾಟರಿಗಳನ್ನು ಹೊಸದಾಗಿ ಚಾರ್ಜ್ ಆದಂಥದ್ದಕ್ಕೆ ಬದಲಿಸಿಕೊಳ್ಳಲು ಈ ಸೇವೆಯು ಅವಕಾಶ ನೀಡುತ್ತದೆ. ಇದು ವಾಹನ ಚಾರ್ಜಿಂಗ್ಗಿಂತ ವೇಗವಾದದ್ದು ಮತ್ತು ಚಾಲಕರಿಗೆ ಎಷ್ಟು ದೂರಕ್ಕೆ ಬರಬಹುದೋ ಏನೋ ಎಂಬ ಆತಂಕ ಇರುತ್ತದಲ್ಲಾ ಅದನ್ನು ಕಡಿಮೆ ಮಾಡುತ್ತದೆ.
ಎಲೆಕ್ಟ್ರಿಕ್ ವಾಹನದಲ್ಲಿ ಬ್ಯಾಟರಿ ಎಂಬುದು ಬಹಳ ದುಬಾರಿ ಭಾಗ ಮತ್ತು ಸ್ವ್ಯಾಪಿಂಗ್ ಎಂಬುದು ಕಂಪೆನಿಗಳು ಲೀಸ್ ಅಥವಾ ಸಬ್ಸ್ಕ್ರಿಪ್ಷನ್ ಮಾಡೆಲ್ಗಳ ಮೂಲಕ ಸೇವೆ ಒದಗಿಸಲು ಅವಕಾಶ ಮಾಡಿಕೊಡುತ್ತವೆ. ಜತೆಗೆ ವಾಹನವನ್ನು ಸ್ವಂತವಾಗಿಸಿಕೊಳ್ಳುವ ಮತ್ತು ಕಾರ್ಯ ನಿರ್ವಹಣೆ ವೆಚ್ಚವನ್ನು ಕಡಿಮೆ ಮಾಡುತ್ತದೆ, ಎಂದು ಈ ವಲಯದಲ್ಲಿನ ಅಧಿಕಾರಿಗಳು ಹೇಳಿದ್ದಾರೆ. ಅಂದ ಹಾಗೆ ಸರ್ಕಾರವು ಎಲೆಕ್ಟ್ರಿಕ್ ವಾಹನಗಳ ಮಾಲೀಕರಿಗೆ ಎಷ್ಟು ಪ್ರೋತ್ಸಾಹಕ ನೀಡಬಹುದು ಎಂಬ ಪ್ರಶ್ನೆ ಇದ್ದಲ್ಲಿ ಅದು ಕೂಡ ಗೊತ್ತಾಗಿದೆ. ಬ್ಯಾಟರಿಯ ಲೀಸ್ ಅಥವಾ ಸಬ್ಸ್ಕ್ರಿಪ್ಷನ್ನ ಒಟ್ಟಾರೆ ಮೊತ್ತದ ಶೇ 20ರ ತನಕ ಪ್ರೋತ್ಸಾಹಕ ನೀಡಬಹುದಾಗಿದೆ. ಈಗಾಗಲೇ ಇಂಥ ವಾಹನಗಳ ಖರೀದಿಗೆ ನೀಡುತ್ತಿರುವ ಪ್ರೋತ್ಸಾಹಕದ ಜತೆಗೆ ಹೆಚ್ಚುವರಿಯಾಗಿ ಸಿಗುತ್ತದೆ.
2019ರಲ್ಲಿ ಭಾರತವು 10,000 ಕೋಟಿ ರೂಪಾಯಿಯನ್ನು ಎಲೆಕ್ಟ್ರಿಕಲ್ ವಾಹನಗಳನ್ನು ಉತ್ತೇಜಿಸುವ ಉದ್ದೇಶಕ್ಕೆ ನೇರವಾಗಿ ಖರೀದಿದಾರರಿಗೆ ಪ್ರೋತ್ಸಾಹಕವಾಗಿ ನೀಡುವುದಕ್ಕಾಗಿ ಮೀಸಲಿರಿಸಿತ್ತು. ಅದರಲ್ಲಿ ಶೇ 10ರಷ್ಟು ಮಾತ್ರ ಬಳಕೆ ಆಗಿದೆ. ಈಗ ಬ್ಯಾಟರಿ ಸ್ವ್ಯಾಪಿಂಗ್ಗೆ ಅದೇ ನಿಧಿಯಿಂದಲೇ ಹಣವನ್ನು ನೀಡುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ಹೇಳುತ್ತಾರೆ. ದೇಶದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಸಂಖ್ಯೆ ಹೆಚ್ಚಾಗಬೇಕು ಎಂಬ ಕಾರಣಕ್ಕೆ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ತಮ್ಮ ಬಜೆಟ್ ಭಾಷಣದಲ್ಲಿ ಸ್ವ್ಯಾಪಿಂಗ್ ನೀತಿ ಘೋಷಣೆ ಮಾಡಿದ್ದಾರೆ. ಇಂಟರ್ಆಪರೇಟರಬಿಲಿಟಿ ಗುಣಮಟ್ಟವನ್ನು ಸಹ ರೂಪಿಸಲಾಗಿದೆ.
ಇದನ್ನೂ ಓದಿ: ಹೊಸ ವರ್ಷದ ಉಡುಗೊರೆ: ಈ ಕಂಪನಿಯು ಎಲೆಕ್ಟ್ರಿಕ್ ವಾಹನ ಖರೀದಿಗೆ ಉಚಿತವಾಗಿ 3 ಲಕ್ಷ ರೂ. ನೀಡುತ್ತಿದೆ..!