ಬೆಳಗಾವಿ ಖಾಸಗಿ ಆಸ್ಪತ್ರೆಯಲ್ಲಿ ಯಡವಟ್ಟು; ಮಾಯಪ್ಪನ ಶವವನ್ನು ಪಾಯಪ್ಪನ ಕುಟುಂಬಸ್ಥರಿಗೆ ಹಸ್ತಾಂತರ

ಬೆಳಗಾವಿ: 2018ರಲ್ಲಿ ಹಿಂದಿಯಲ್ಲಿ ತೆರೆಕಂಡ ಕರ್ವಾನ್ (Karwaan) ಚಿತ್ರದಲ್ಲಿ ನಟನ ತಂದೆಯ ಶವ ಮತ್ತು ನಟಿಯ ಅಜ್ಜಿಯ ಶವ ಎಕ್ಸ್ ಚೇಂಚ್ ಆಗಿರುತ್ತೆ. ಇದನ್ನೂ ಶವದ ವಾರಸುದಾರರಿಗೆ ತಲುಪಿಸಲು ಪಡುವ ಹರಸಾಹಸ, ಕೆಲವು ಹೊಸ ಹೊಸ ಬದಲಾವಣೆಗಳನ್ನು ಚಿತ್ರದಲ್ಲಿ ತೋರಿಸಲಾಗಿದೆ. ಆದ್ರೆ ಇದನ್ನು ಯಾಕೆ ಹೇಳುತ್ತಿದ್ದೇವೆ ಎಂದರೆ ಇಂತಹದೇ ತಪ್ಪನ್ನು ಬೆಳಗಾವಿಯ ಖಾಸಗಿ ಆಸ್ಪತ್ರೆ ಸಿಬ್ಬಂದಿ ಮಾಡಿದ್ದಾರೆ. ಜಿಲ್ಲೆಯ ಆಸ್ಪತ್ರೆ ಸಿಬ್ಬಂದಿಯಿಂದ ಮಹಾ ಎಡವಟ್ಟು ನಡೆದಿದೆ. ಪಾಯಪ್ಪ ಎಂಬ ವ್ಯಕ್ತಿ ಮೃತಪಟ್ಟಿದ್ದಾನೆಂದು ಮಾಯಪ್ಪನ ಶವವನ್ನು ಹಸ್ತಾಂತರಿಸಿ ಬೆಳಗಾವಿ ವೀನಸ್ ಮಲ್ಟಿ ಸ್ಪೆಷಲ್ ಆಸ್ಪತ್ರೆ ಸಿಬ್ಬಂದಿ ಮಹಾ ಎಡವಟ್ಟು ಮಾಡಿದ್ದಾರೆ.

ಪಾಯಪ್ಪ ಮೃತಪಟ್ಟಿದ್ದಾನೆಂದು ಮಾಯಪ್ಪನ ಶವವನ್ನು ಪಾಯಪ್ಪ ಕುಟುಂಬಸ್ಥರಿಗೆ ಹಸ್ತಾಂತರಿಸಿದ್ದಾರೆ. ಇದರಿಂದ ಪಾಯಪ್ಪನೇ ಮೃತಪಟ್ಟಿದ್ದಾನೆಂದು ತಿಳಿದು ಶವ ಪಡೆದ ಕುಟುಂಬಸ್ಥರು ಶವಸಂಸ್ಕಾರ ನೆರವೇರಿಸಿದ್ದಾರೆ. 3 ದಿನದ ಬಳಿಕ ಪಾಯಪ್ಪ ಮೃತಪಟ್ಟಿಲ್ಲವೆಂದು ಮಾಹಿತಿ ಸಿಕ್ಕಿದೆ. ಹೀಗಾಗಿ ಹೂತಿದ್ದ ಶವ ಹೊರತೆಗೆದು ಮಾಯಪ್ಪನ ಶವವನ್ನು ಕುಟುಂಬಸ್ಥರಿಗೆ ಹಸ್ತಾಂತರಿಸಿದ್ದಾರೆ.

ಬೆಳಗಾವಿ ಜಿಲ್ಲೆಯ ಕಾಗವಾಡ ತಾಲೂಕಿನ ಮೋಳೆ ಗ್ರಾಮದಲ್ಲಿ ಇಂತಹ ವಿಚಿತ್ರ ಘಟನೆ ನಡೆದಿದೆ. ಮೇ 1ರಂದು ಬೆಳಗಾವಿಯ ವೆನಸ್ ಆಸ್ಪತ್ರೆಗೆ ಮೋಳೆ ಗ್ರಾಮದ ಪಾಯಪ್ಪ ಹಳ್ಳೊಳ್ಳಿ, ಗೋಕಾಕ್‌ನ ಮಾಯಪ್ಪ ಮಾವುರಕರ್ ರೋಗಿಗಳು ಚಿಕಿತ್ಸೆಗಾಗಿ ದಾಖಲಾಗಿದ್ದರು. ಮೇ 2 ರಂದು ಬೆಳಗ್ಗೆ ಚಿಕಿತ್ಸೆ ಫಲಿಸದೇ ಮಾಯಪ್ಪ ಮಾವುರಕರ್ ಮೃತಪಟ್ಟಿದ್ದರು. ಅದರೆ ಮಾಯಪ್ಪ ಮೃತದೇಹವನ್ನು ಪಾಯಪ್ಪ ಕುಟುಂಬಸ್ಥರಿಗೆ‌ ನೀಡಿ ಆಸ್ಪತ್ರೆ ಸಿಬ್ಬಂದಿ ಎಡವಟ್ಟು ಮಾಡಿದ್ದರು.

ಇದನ್ನೂ ಓದಿ: ಭಾರತದಲ್ಲಿ ಒಂದೇ ದಿನ 3,689 ಜನ ಕೊರೊನಾ ಸಾಂಕ್ರಾಮಿಕ ಕಾಯಿಲೆಗೆ ಬಲಿ

Published On - 9:32 am, Tue, 4 May 21