ಏರ್ ಶೋ: ಬೆಂಗಳೂರಿನಲ್ಲಿ ಐದು ದಿನಗಳ ಕಾಲ ರೂಮ್, ಕ್ಯಾಬ್ ಸಿಗೋದು ಕಷ್ಟ!

ಬೆಂಗಳೂರು, ಫೆಬ್ರವರಿ 4: ಯಲಹಂಕ ವಾಯುನೆಲೆಯಲ್ಲಿ ನಡೆಯುವ ಏರ್ ಶೋ ಕಾರಣದಿಂದಾಗಿ ಬೆಂಗಳೂರು ನಗರದಲ್ಲಿ ಮತ್ತು ಏರ್ ನಡೆಯುವ ಸುತ್ತಮುತ್ತಲಿನ ಪ್ರದೇಶದಲ್ಲಿ ರೂಮ್ಸ್ ಬಾಡಿಗೆ ಸಿಗದಂತಾಗಿದೆ. ರೂಮ್ಸ್ ಬೇಕು ಅಂದರೆ ದುಪ್ಪಟ್ಟು ಹಣ ಕೊಡಲೇಬೇಕು. ಏರ್ ಶೋ ಹೆಸರಲ್ಲಿ ಓನ್ ಟು ಡಬಲ್ ಹಣಕ್ಕೆ ಡಿಮ್ಯಾಂಡ್ ಮಾಡಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ.

ಏರ್ ಶೋ ಹಿನ್ನೆಲೆ ಸಿಲಿಕಾನ್ ಸಿಟಿಯಲ್ಲಿ ರೂಮ್ಸ್, ಟ್ಯಾಕ್ಸಿ, ಕ್ಯಾಬ್ಸ್ ಬುಕ್ಕಿಂಗ್ ಜೋರಾಗಿದೆ. ಫೆಬ್ರವರಿ 10 ರಿಂದ 14 ರ ವರೆಗೆ ಏರ್ ಶೋ ನಡೆಯಲಿದ್ದು, ನಗರದ ಹೆಚ್ಚಿನ ಫೈ ಸ್ಟಾರ್, ಥ್ರೀ ಸ್ಟಾರ್ ಸೇರಿದಂತೆ ಬಹುತೇಕ ಹೋಟೆಲ್​ಗಳು, ಲಾಡ್ಜ್​​ಗಳನ್ನು ಈಗಾಗಲೇ ಕಾಯ್ದಿರಿಸಲಾಗಿದೆ.

ಬೇರೆ ರಾಜ್ಯಗಳಿಂದಲೂ ಬರಲಿವೆ ಕ್ಯಾಬ್​ಗಳು!

ಏರ್ ಶೋ ವೀಕ್ಷಣೆಗೆ, ವಿದೇಶಗಳಿಂದ ಜನರು ಆಗಮಿಸಲಿದ್ದು, ಟ್ರಾವೆಲ್ಸ್​ಗಳ ಬಳಿ ಇರುವ ಬಿಎಂಡಬ್ಲೂ, ಆಡಿ, ಬೆನ್ಜ್ ಸೇರಿದಂತೆ ಎಲ್ಲಾ ಮಾದರಿಯ ಕಾರುಗಳನ್ನು ಈಗಾಗಲೇ ಕಾಯ್ದಿರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಏರ್ ಶೋ ನಡೆಯುವ ಐದು ದಿನಗಳ ಕಾಲ ನಗರದಲ್ಲಿ ರೂಮ್ಸ್, ಕ್ಯಾಬ್ ಸಿಗುವುದು ಕಷ್ಟಕರವಾಗಿದೆ. ಈ ಬಗ್ಗೆ ಆರೆಂಜ್ ಟ್ರಾವೆಲ್ಸ್ ಮಾಲೀಕ ಪ್ರಶಾಂತ್ ಪ್ರತಿಕ್ರಿಯಿಸಿದ್ದು, ನಮ್ಮ ಮತ್ತು ನಮ್ಮ ಸ್ನೇಹಿತರ ಎಲ್ಲಾ ಟ್ರಾವೆಲ್ಸ್​​ಗಳಲ್ಲೂ ಕಾರುಗಳು ಬುಕ್ಕಿಂಗ್ ಆಗಿವೆ. ಬೇರೆ ರಾಜ್ಯದಿಂದ ಕ್ಯಾಬ್​ಗಳನ್ನು ಕರೆಸಿಕೊಂಡು ಕ್ಯಾಬ್ ಸೇವೆ ಒದಗಿಸಲು ವ್ಯವಸ್ಥೆ ಮಾಡಿಕೊಂಡಿದ್ದೇವೆ ಎಂದಿದ್ದಾರೆ.

ಏರ್ ಶೋ ನಡೆಯುವ ಸುತ್ತಮುತ್ತಲಿನ ಹುಣಸೇಮಾರನಹಳ್ಳಿ, ಯಲಹಂಕ, ದೇವನಹಳ್ಳಿ, ಹೆಬ್ಬಾಳ ಸುತ್ತಲಿನ ಹೋಟೆಲ್​ಗಳಲ್ಲಿ ಒಂದೇ ಒಂದು ರೂಮ್ ಕೂಡ ಸಿಗದ ಪರಿಸ್ಥಿತಿ ಸೃಷ್ಟಿಯಾಗಿದೆ.

ಇದನ್ನೂ ಓದಿ: ಬೆಂಗಳೂರಲ್ಲಿ ಆರ್‌ಟಿಒ ಅಧಿಕಾರಿಗಳ ಭರ್ಜರಿ ಕಾರ್ಯಾಚರಣೆ: ತೆರಿಗೆ ಪಾವತಿಸದ 30 ಐಷಾರಾಮಿ ಕಾರುಗಳು ಸೀಜ್‌

ಒಟ್ಟಿನಲ್ಲಿ, ನಗರದಲ್ಲಿ ಐದು ದಿನಗಳ ಕಾಲ ನಡೆಯಲಿರುವ ಏರ್ ಶೋ ಹಿನ್ನೆಲೆ ಐದು ದಿನಗಳ ಕಾಲ ರೂಮ್ಸ್, ಹೋಟೆಲ್, ಕ್ಯಾಬ್​ಗಳು ಭರ್ಜರಿಯಾಗಿ ಬುಕ್ಕಿಂಗ್ ಆಗಿವೆ. ಹೀಗಾಗಿ ಏನಾದರೂ ತುರ್ತು ಕೆಲಸ ಇದ್ದರೆ ಮೊದಲೇ ಕ್ಯಾಬ್, ರೂಮ್ಸ್ ಬುಕ್ಕಿಂಗ್ ಮಾಡಿಕೊಳ್ಳುವುದು ಒಳಿತು.

ಮತ್ತೊಂದೆಡೆ, ಏರ್ ಶೋ ನಡೆಯುವ ಸಮಯದಲ್ಲಿ ಬೆಂಗಳೂರು ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಿಮಾನಗಳ ಸಂಚಾರದಲ್ಲಿಯೂ ವ್ಯತ್ಯಯವಾಗಲಿದ್ದು, ವಿಮಾನ ಪ್ರಯಾಣಿಕರ ಮೇಲೂ ಪರಿಣಾಮ ಬೀರಲಿದೆ. ಏರ್ ಶೋ ನಡೆಯುವ ನಿರ್ದಿಷ್ಟ ಸಮಯದಲ್ಲಿ ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಲ್ಯಾಂಡಿಂಗ್ ಹಾಗೂ ಟೇಕಾಫ್​ಗಳು ನಡೆಯುವುದಿಲ್ಲ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:36 am, Tue, 4 February 25