ಕರ್ನಾಟಕದಲ್ಲಿ ಡ್ರಗ್ಸ್ ಮುಕ್ತ ರಾಜ್ಯದ ಕನಸು: ಅಸ್ತಿತ್ವಕ್ಕೆ ಬಂದು 1 ವರ್ಷ ಕಳೆದರೂ ಕಾರ್ಯಾಚರಣೆ ಆರಂಭಿಸಲು ಹೆಣಗಾಡುತ್ತಿದೆ ಎಎನ್‌ಟಿಎಫ್
ಕನ್ನಡದಲ್ಲಿ ಮಾದಕ ವಸ್ತು ಜಾಲವನ್ನು ಬೇರುಸಹಿತ ಕಿತ್ತುಹಾಕುವ ಉದ್ದೇಶದಿಂದ ಸ್ಥಾಪಿಸಲಾದ ಕರ್ನಾಟಕ ANTF, ಒಂದು ವರ್ಷ ಕಳೆದರೂ ಸಿಬ್ಬಂದಿ ಕೊರತೆ ಹಾಗೂ ಸ್ವತಂತ್ರ ಪೊಲೀಸ್ ಠಾಣೆಯ ಅಧಿಕಾರವಿಲ್ಲದೆ ಕಾಗದದಲ್ಲೇ ಉಳಿದಿದೆ. ಎಫ್‌ಐಆರ್ ದಾಖಲಿಸಲು ಸಾಧ್ಯವಾಗದ ಕಾರಣ ಡ್ರಗ್ಸ್ ಪ್ರಕರಣಗಳ ವಿರುದ್ಧ ಪರಿಣಾಮಕಾರಿ ಹೋರಾಟಕ್ಕೆ ಹಿನ್ನಡೆಯಾಗಿದ್ದು, 2029ರ 'ಡ್ರಗ್ಸ್ ಮುಕ್ತ ಕರ್ನಾಟಕ' ಗುರಿಗೆ ಸವಾಲಾಗಿದೆ.
ಬೆಂಗಳೂರು, ಅ.12: ರಾಜ್ಯದಲ್ಲಿ ಡ್ರಗ್ ಪ್ರಕರಣಗಳು ಹೆಚ್ಚಾಗುತ್ತಿದೆ. ಬೆಂಗಳೂರು, ಮಂಗಳೂರು ಸೇರಿದಂತೆ ರಾಜ್ಯದ ಹಲವು ಕಡೆ ಈಗಾಗಲೇ ಡ್ರಗ್ ಪ್ರಕರಣಗಳನ್ನು ಪತ್ತೆ ಮಾಡಲಾಗಿದೆ. ಆದರೆ ಇದನ್ನು ಪತ್ತೆ ಮಾಡಬೇಕಾದ ಅಧಿಕಾರಿಗಳಿಗೆ ಒಂದು ಹೊಸ ತಲೆನೋವು ಶುರುವಾಗಿದೆ. ರಾಜ್ಯದಲ್ಲಿ ಸಂಘಟಿತ ಮಾದಕ ವಸ್ತು ಜಾಲವನ್ನು ಬುಡಸಹಿತ ಕಿತ್ತುಹಾಕುವ ಉದ್ದೇಶದಿಂದ ಅತಿ ದೊಡ್ಡ ನಿರೀಕ್ಷೆಯೊಂದಿಗೆ ರಚಿಸಲಾದ ಕರ್ನಾಟಕ ರಾಜ್ಯ ಮಾದಕ ವಸ್ತು ನಿಗ್ರಹ ದಳ (ANTF – Anti-Narcotics Task Force), ತನ್ನ ಸ್ಥಾಪನೆಗೊಂಡು ಒಂದು ವರ್ಷ ಕಳೆದರೂ ಕಾಗದದಲ್ಲೇ ಉಳಿಯುವಂತಾಗಿದೆ. ಸರ್ಕಾರದ ಗಗನಮುಖಿ ಗುರಿಗಳ ನಡುವೆಯೂ ಸಿಬ್ಬಂದಿ ಕೊರತೆ ಹಾಗೂ ಸ್ವತಂತ್ರ ಪೊಲೀಸ್ ಠಾಣೆಯಿಲ್ಲದೆ ಈ ವಿಶೇಷ ಪಡೆಯ ಕಾರ್ಯಾಚರಣೆಗೆ ತೀವ್ರ ಹಿನ್ನಡೆಯಾಗಿದೆ.
ಎಎನ್‌ಟಿಎಫ್ ಘಟಕಕ್ಕೆ ಒಟ್ಟು 55 ಸಿಬ್ಬಂದಿಗಳ ಬಲವನ್ನು ಮಂಜೂರು ಮಾಡಲಾಗಿದೆ. ಆದರೆ ಪ್ರಸ್ತುತ ಕೇವಲ 10 ಸಿಬ್ಬಂದಿಗಳು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದು, ತೀವ್ರ ಮಾನವ ಸಂಪನ್ಮೂಲ ಕೊರತೆಯನ್ನು ಎದುರಿಸುತ್ತಿದೆ. ಎನ್‌ಸಿಬಿ ಮಾದರಿಯಲ್ಲೇ ಪ್ರತ್ಯೇಕ ಹಾಗೂ ವಿಶೇಷ ಪಡೆಯಾಗಿ 2025ರ ಆಗಸ್ಟ್‌ನಲ್ಲಿ ANTF ಅನ್ನು ಸ್ಥಾಪಿಸಲಾಗಿತ್ತು. ಆದರೆ ಇದಕ್ಕೆ ಇದುವರೆಗೆ ಸ್ವತಂತ್ರ ಪೊಲೀಸ್ ಠಾಣೆಯ ಅಧಿಕಾರ ಸಿಕ್ಕಿಲ್ಲ. ಪರಿಣಾಮವಾಗಿ, ಮಾದಕ ವಸ್ತು ಕಾಯ್ದೆಯಡಿ ಸ್ವಂತವಾಗಿ ಎಫ್‌ಐಆರ್ ದಾಖಲಿಸಲು ಮತ್ತು ತನಿಖೆ ನಡೆಸಲು ಸಾಧ್ಯವಾಗದ ಅಸಹಾಯಕ ಸ್ಥಿತಿಯಲ್ಲಿದೆ. ಗೃಹ ಇಲಾಖೆಯು ಮುಂದಿನ ಎರಡು ತಿಂಗಳ ಒಳಗೆ ANTF ಗೆ ಅಧಿಕೃತ ಪೊಲೀಸ್ ಠಾಣೆ ಅಧಿಕಾರಗಳನ್ನು ನೀಡುವ ನಿರೀಕ್ಷೆಯಿದೆ.
ಸರ್ಕಾರದ ಗುರಿ ಮತ್ತು ವಾಸ್ತವದ ಚಿತ್ರಣ:
2029ರೊಳಗೆ ಕರ್ನಾಟಕವನ್ನು ಸಂಪೂರ್ಣ ‘ಡ್ರಗ್ಸ್ ಮುಕ್ತ ರಾಜ್ಯ’ವನ್ನಾಗಿ ಮಾಡುವ ಮಹತ್ವಾಕಾಂಕ್ಷೆಯನ್ನು ರಾಜ್ಯ ಸರ್ಕಾರ ಘೋಷಿಸಿದೆ. ಇದಕ್ಕಾಗಿ ಇತ್ತೀಚೆಗೆ ‘ಬೇಡ ಬ್ರೋ’ (Beda Bro) ಮತ್ತು ‘ರೈಸ್’ (RISE) ನಂತಹ ಜನಜಾಗೃತಿ ಅಭಿಯಾನಗಳನ್ನು ಸಹ ಆರಂಭಿಸಲಾಗಿದೆ. ರಾಜ್ಯದ ವಿವಿಧ ಜಿಲ್ಲೆಗಳು, ಇತರೆ ರಾಜ್ಯಗಳು ಹಾಗೂ ಕೇಂದ್ರ ತನಿಖಾ ಸಂಸ್ಥೆಗಳ ನಡುವೆ ಸಮನ್ವಯ ಸಾಧಿಸಿ ಡ್ರಗ್ಸ್ ದಂಧೆಯನ್ನು ಮಟ್ಟಹಾಕುವುದು ANTF ನ ಮುಖ್ಯ ಉದ್ದೇಶವಾಗಿತ್ತು. ಆದರೆ, ಕೇವಲ ಜಾಗೃತಿ ಅಭಿಯಾನಗಳಿಂದ ಮಾತ್ರ ಡ್ರಗ್ಸ್ ಪೂರೈಕೆಯನ್ನು ತಡೆಯಲು ಸಾಧ್ಯವಿಲ್ಲ ಎಂದು ನಿವೃತ್ತ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಆತಂಕ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ಪೆದ್ದು ಹುಡುಗರೇ ಡಿಜಿಟಲ್ ಸುಂದರಿಯರ ಹಾಟ್ ಟಾರ್ಗೆಟ್: ಡೇಟಿಂಗ್ ಆಪ್ ಹುಚ್ಚಿನಲ್ಲಿ ಲಕ್ಷ ಲಕ್ಷ ಕಳೆದುಕೊಂಡ ಬೆಂಗಳೂರಿನ ಯುವಕ
“ಸರ್ಕಾರ ಮತ್ತು ಪೊಲೀಸ್ ಇಲಾಖೆಯಿಂದ ಎಷ್ಟೇ ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡರೂ, ಕಳ್ಳಸಾಗಾಣಿಕೆ ಮತ್ತು ಡ್ರಗ್ಸ್ ಪೂರೈಕೆ ಜಾಲ ಅವ್ಯಾಹತವಾಗಿ ಮುಂದುವರಿದಿದೆ. ANTF ಪಡೆಗೆ ಕೇವಲ ಕಾಗದದ ಘೋಷಣೆಗಳಲ್ಲದೆ, ಗುಪ್ತಚರ ವಿಶ್ಲೇಷಣೆ , ತಾಂತ್ರಿಕ ಕಾರ್ಯಾಚರಣೆಯಲ್ಲಿ ನುರಿತ ಸಿಬ್ಬಂದಿ ಹಾಗೂ ಅತ್ಯುತ್ತಮ ಲೊಜಿಸ್ಟಿಕ್ಸ್ ಬೆಂಬಲ ನೀಡಿದಾಗ ಮಾತ್ರ ಇದು ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಡ್ರಗ್ಸ್ ಜಾಲವನ್ನು ಬೇರುಸಹಿತ ಕಿತ್ತುಹಾಕಲು ಹೊರಟ ವಿಶೇಷ ಪಡೆಗೆ ಸ್ವತಃ ಆಡಳಿತಾತ್ಮಕ ತೊಡಕುಗಳೇ ಮುಳುವಾಗಿರುವುದು ಈಗ ಗಂಭೀರ ಚರ್ಚೆಗೆ ಗ್ರಾಸವಾಗಿದೆ.
ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ