Chamarajanagar News: ಪತ್ನಿಯ ವಿರೋಧ ಲೆಕ್ಕಿಸದೇ 25 ದಿನಗಳ ಮಗುವನ್ನು 50 ಸಾವಿರಕ್ಕೆ ಮಾರಿದ ಅಪ್ಪ

ಚಾಮರಾಜನಗರ: ಮದ್ಯವ್ಯಸನಿ ತಂದೆಯು ತನ್ನ 25 ದಿನಗಳ ಮಗುವನ್ನೇ ₹ 50 ಸಾವಿರಕ್ಕೆ ಮಾರಾಟ ಮಾಡಿರುವ ಆಘಾತಕಾರಿ ಪ್ರಕರಣ ಚಾಮನಗರದ ನ್ಯಾಯಾಲಯ ರಸ್ತೆಯಲ್ಲಿ ನಡೆದಿದೆ. ಬಸವ ಮತ್ತು ನಾಗವೇಣಿ ದಂಪತಿಯ ಒಂದು ತಿಂಗಳು ತುಂಬದ ಕೂಸು ಮಾರಾಟವಾಗಿದೆ. ತಂದೆಯೇ ಹಣ ಪಡೆದು ಮಗುವನ್ನು ಬೇರೆಯವರಿಗೆ ಮಾರಾಟ ಮಾಡಿದ್ದ ಎನ್ನುವುದನ್ನು ತಿಳಿದ ಜನರು ಬೇಸರ ವ್ಯಕ್ತಪಡಿಸಿದ್ದಾರೆ. ವಿಷಯ ಬಹಿರಂಗಗೊಂಡ ನಂತರ ‘ಪತ್ನಿಯ ಚಿಕಿತ್ಸೆಗೆ ಹಣ ಬೇಕಿತ್ತು. ಸಾಕಷ್ಟು ಸಾಲಗಳು ಇದ್ದವು. ಹೀಗಾಗಿ ಮಗುವನ್ನು ಬೇರೆಯವರಿಗೆ ಕೊಟ್ಟು ಹಣ ಹೊಂದಿಸಲು ಪ್ರಯತ್ನಪಟ್ಟೆ’ ಎಂದು ಬಸವ ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದ್ದಾರೆ.

ಮಗುವಿನ ಮಾರಾಟದ ವಿಷಯ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಧಾವಿಸಿದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಅಧಿಕಾರಿಗಳು ಬಸವ ಮತ್ತು ನಾಗವೇಣಿ ದಂಪತಿಯನ್ನು ವಿಚಾರಣೆಗೆ ಒಳಪಡಿಸಿದರು. ನಂತರ ದಂಪತಿಯನ್ನು ಜಿಲ್ಲಾ ಮಕ್ಕಳ ಕಲ್ಯಾಣ ಸಮಿತಿ ಮುಂದೆ ಹಾಜರುಪಡಿಸಲಾಯಿತು. ಇದೀಗ ಮಗು ಮಾರಾಟದ ಆರೋಪದ ಮೇಲೆ ಬಸವ ವಿರುದ್ಧ ಚಾಮರಾಜನಗರದ ಪಟ್ಟಣ ಠಾಣೆಯಲ್ಲಿ ದೂರು ದಾಖಲಾಗಿದೆ. ಬೆಂಗಳೂರಿನ ವ್ಯಕ್ತಿಗೆ ಮಗುವನ್ನು ನೀಡಿರುವುದಾಗಿ ಬಸವ ಹೇಳುತ್ತಿದ್ದಾರೆ. ಮಗುವನ್ನು ಪಡೆದಿರುವ ವ್ಯಕ್ತಿಯನ್ನು ಪತ್ತೆ ಮಾಡಲು ಬೆಂಗಳೂರು ಪೊಲೀಸರ ಸಹಕಾರ ಕೋರಲಾಗಿದೆ.

ಚಾಮರಾಜನಗರದ ಹೊಟೆಲ್​ನಲ್ಲಿ ಕೆಲಸ ಮಾಡುತ್ತಿರುವ ಬಸವ ಅವರಿಗೆ ಈಗಾಗಲೇ 7 ವರ್ಷದ ಗಂಡುಮಗು ಇದೆ. ಅವರ ಪತ್ನಿ ನಾಗವೇಣಿ ಅವರು ಮೈಸೂರಿನಲ್ಲಿ ಆಗಸ್ಟ್‌ 22ರಂದು ಮತ್ತೊಂದು ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಮಗುವನ್ನು ಮಾರಬೇಕೆನ್ನುವ ಗಂಡನ ಯೋಚನೆಯನ್ನು ಪತ್ನಿ ವಿರೋಧಿಸಿದ್ದರು. ಹಣಕ್ಕಾಗಿ ಮಗು ಮಾರಲು ಒಪ್ಪದ ಹೆಂಡತಿಯ ಮೇಲೆ ಬಸವ ಹಲ್ಲೆ ಮಾಡಿದ್ದ ಎಂದು ಮೂಲಗಳು ಹೇಳಿವೆ.

ನಾಗವೇಣಿ ಅವರ ತಂಗಿ ಲಿಂಗತ್ವ ಅಲ್ಪಸಂಖ್ಯಾತರಾಗಿದ್ದಾರೆ. ಅವರು ತಮ್ಮ ಬಾವನೇ ಮಗು ಮಾರಾಟ ಮಾಡಿರುವ ವಿಷಯವನ್ನು ಲಿಂಗತ್ವ ಅಲ್ಪಸಂಖ್ಯಾತರ ಬಗ್ಗೆ ಕೆಲಸ ಮಾಡುವ ಸಮತಾ ಸೊಸೈಟಿಯ ಜಿಲ್ಲಾ ಘಟಕದ ಅಧ್ಯಕ್ಷೆ ದೀಪಾ ಬುದ್ಧೆ ಅವರ ಗಮನಕ್ಕೆ ತಂದಿದ್ದರು. ನಾಗವೇಣಿ ಮಗುವನ್ನು ವಾಪಸ್‌ ಕರೆತನ್ನಿ ಎಂದು ದೀಪಾ ಅವರಿಗೆ ಮನವಿ ಮಾಡಿದ್ದರು. ಮಗುವನ್ನು ವಾಪಸ್ ಕರೆತರಲು ಬಸವ ಒಪ್ಪದ ಕಾರಣ ಮಕ್ಕಳ ರಕ್ಷಣಾ ಘಟಕದ ಅಧಿಕಾರಿಗಳ ಗಮನಕ್ಕೆ ತರಲಾಯಿತು ಎಂದು ದೀಪಾ ಹೇಳಿದರು.

‘ಮಗು ಮಾರಾಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೋಷಕರ ವಿಚಾರಣೆ ನಡೆಸಲಾಗಿದ್ದು, ಪೊಲೀಸರಿಗೆ ದೂರು ಕೊಟ್ಟಿದ್ದೇವೆ. ನಾಗವೇಣಿ ಇನ್ನೂ ತಿಂಗಳ ಬಾಣಂತಿ. ಹೀಗಾಗಿ ಸ್ವಾಧಾರ ಕೇಂದ್ರದಲ್ಲಿ ಅವರಿಗೆ ಆಶ್ರಯ ನೀಡಲು ಅವಕಾಶ ಮಾಡಿಕೊಟ್ಟಿದ್ದೇವೆ. ಮಗುವನ್ನು ಪಡೆದಿರುವ ಬೆಂಗಳೂರಿನ ವ್ಯಕ್ತಿಯನ್ನು ಪತ್ತೆ ಹಚ್ಚಲು ಕ್ರಮ ಕೈಗೊಂಡಿದ್ದೇವೆ’ ಎಂದು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಉಪನಿರ್ದೇಶಕಿ ಗೀತಾಲಕ್ಷ್ಮೀ ಪ್ರತಿಕ್ರಿಯಿಸಿದರು.