ಅಂಜಲಿ ಹತ್ಯೆ ಮುನ್ನ ಅಪ್ರಾಪ್ತ ಬಾಲಕಿಗೆ ವಂಚಿಸಿದ್ದ ವಿಶ್ವ: ದೂರು ತೆಗೆದುಕೊಳ್ಳಲು ಹಿಂದೇಟು ಹಾಕಿದ್ದ ಹುಬ್ಬಳ್ಳಿ ಪೊಲೀಸರು; ಪೋಷಕರ ಆರೋಪ

ಹುಬ್ಬಳ್ಳಿ, ಮೇ 18: ಅಂಜಲಿ ಅಂಬಿಗೇರ (20) (Anjali Ambiher) ಅವರನ್ನು ಕೊಲೆ ಮಾಡಿದ ಆರೋಪಿ ವಿಶ್ವ ಅಲಿಯಾಸ್​ ಗಿರೀಶ್​ ವಿರುದ್ಧ ಬೆಂಡಿಗೇರಿ ಪೊಲೀಸ್ (Police) ಠಾಣೆಯಲ್ಲಿ ಮತ್ತೊಂದು ಎಫ್​ಐಆರ್​ ದಾಖಲಾಗಿದೆ. ಅಪ್ರಾಪ್ತೆಗೆ ವಂಚನೆ ಮತ್ತು ಚಿನ್ನಾಭರಣ ದೋಚಿದ್ದ ಆರೋಪದಡಿ ಪ್ರಕರಣ ದಾಖಲಾಗಿದೆ. ಆರೋಪಿ ವಿಶ್ವ ನಮ್ಮ ಮಗಳ ಜೊತೆ ಪ್ರೀತಿಸುವ ನಾಟಕವಾಡಿ, ಚಿನ್ನಾಭರಣ ದೋಚಿದ್ದ ಮತ್ತು ಆಕೆಗೆ ಜೀವ ಬೆದರಿಕೆ ಹಾಕಿದ್ದ ಬಗ್ಗೆ ದೂರು ನೀಡಲು ಹೋದಾಗ ಪೊಲೀಸರು “ನಿಮ್ಮ ಮಗಳು ಸಣ್ಣವಳು ಅಂತ ದೂರು ತೆಗೆದುಕೊಳ್ಳಲಿಲ್ಲ” ಎಂದು ವಂಚನೆ ಒಳಗಾದ ಬಾಲಕಿ ಪೋಷಕರು ಆರೋಪಿಸಿದ್ದಾರೆ.

6 ತಿಂಗಳ ಹಿಂದೆ ವಿಶ್ವ ಎಂಬುವನು ನಮ್ಮ ಮಗಳ ಜತೆ ಮಾತಾಡುತ್ತಿದ್ದನು. ತೊಂದರೆ ಇದೆ ಎಂದು ಮಗಳ ಬಳಿ 8 ಸಾವಿರ ಹಣ ಪಡೆದಿದ್ದನು. ಜೊತೆಗೆ ಮನೆಯಲ್ಲಿದ್ದ ಚಿನ್ನಾಭರಣ ಕೂಡ ನಮ್ಮ ಮಗಳು ಅವನಿಗೆ ನೀಡಿದ್ದಾಳೆ. ಮತ್ತೆ ಬೆದರಿಕೆ ಹಾಕಿ ಚಿನ್ನಾಭರಣ, ಹಣ ತರಲು ಹೇಳಿದ್ದಾನೆ. ಇದಕ್ಕೆ ಹೆದರಿ ನಮ್ಮ ಮಗಳು ಆರೋಪಿಗೆ ಚಿನ್ನಾಭರಣ, ಹಣ ನೀಡಿದ್ದಾಳೆ.  ಮಗಳು ಹೀಗೆ ಮಾಡಿರುವುದು ನಮಗೆ ಗೊತ್ತಿರಲಿಲ್ಲ. ಚಿನ್ನಾಭರಣ ವಾಪಸ್ ಕೇಳಿದರೆ ನಿಮ್ಮ ತಂದೆ, ತಾಯಿಯನ್ನ ಕೊಲೆ ಮಾಡುತ್ತೇನೆ ಅಂತ ನಮ್ಮ ಮಗಳಿಗೆ ಬೆದರಿಕೆ ಹಾಕಿದ್ದನು.

ಇದನ್ನೂ ಓದಿ: ನಿತ್ಯ ನಡೆಯುವ ಕೆಲಸಗಳು ನಮಗೆ ಗೊತ್ತಾಗುವುದಿಲ್ಲ; ಸಂತೋಷ ಲಾಡ್​ ಬೇಜವಾಬ್ದಾರಿ ಹೇಳಿಕೆ

ನಂತರ ಮಗಳು ಯಾತಕ್ಕಾಗಿ ಭಯಪಟ್ಟಿದ್ದಾಳೆ ಎಂಬ ವಿಚಾರ ಗೊತ್ತಾಗಿ ಠಾಣೆಗೆ ಹತ್ತು ಸಲ ದೂರು ನೀಡಲು ಹೋಗಿದ್ವಿ, ಆದರೆ ನಮ್ಮ ಮಗಳು ಸಣ್ಣವಳು ಅಂತ ದೂರು ತೆಗೆದುಕೊಳ್ಳಲಿಲ್ಲ. ನಮಗೆ ವಿಶ್ವ ಪರಿಚಯ ಇರಲಿಲ್ಲ, ಮಗಳಿಗೆ ಮೋಸ ಮಾಡಿದ್ದಾನೆ. ನಾವು ದುಡಿದು ತಿಂದು ಬದಕೋರು. ನಮಗೆ ಮೋಸ ಮಾಡಿ ಹೋಗಿದ್ದಾನೆ. ನಮಗೆ ಆದ ಹಾಗೆ ಬೇರೆಯವರಿಗೆ ಆಗಬಾರದು ಎಂದು ಹುಬ್ಬಳ್ಳಿಯಲ್ಲಿ ಅಪ್ರಾಪ್ತೆ ತಂದೆ ಪರಶುರಾಮ್​ ಅಳಲು ತೋಡಿಕೊಂಡಿದ್ದಾರೆ.

ಎಫ್​ಐಆರ್ ದಾಖಲು

ಆರೋಪಿ ವಿಶ್ವ 6 ತಿಂಗಳ ಹಿಂದೆ ಯಲ್ಲಾಪುರ ಓಣಿಯ ಅಪ್ರಾಪ್ತೆಯನ್ನು ಪ್ರೀತಿಸುವ ನಾಟಕವಾಡಿ ಆಕೆಯಿಂದ ಐದುವರೆ ತೊಲೆ ಚಿನ್ನಾಭರಣ ದೋಚಿ, ಬಂಗಾರ ವಾಪಸ್​ ಕೇಳಿದರೆ ಸಾಯಿಸುತ್ತೇನೆ ಅಂತ ಧಮ್ಕಿ ಹಾಕಿ ಪರಾರಿಯಾಗಿದ್ದನು. ಇದೀಗ, ಅಪ್ರಾಪ್ತೆ ಪೋಷಕರು ಆರೋಪಿ ವಿಶ್ವ ವಿರುದ್ಧ ದೂರು ದಾಖಲಸಿದ್ದು, ಐಪಿಸಿ ಸೆಕ್ಷನ್ 420, 504, 506ರಡಿ ಪ್ರಕರಣ ದಾಖಲಾಗಿದೆ.

ಅಂಜಲಿ ಹತ್ಯೆ ಖಂಡಿಸಿ ಪ್ರತಿಭಟನೆ

ಅಂಜಲಿ ಅಂಬಿಗೇರ ಹತ್ಯೆ ಖಂಡಿಸಿ ಅಂಬಿಗರ ಚೌಡಯ್ಯ ಪೀಠದ ಶ್ರೀ ಶಾಂತಭೀಷ್ಮ ಸ್ವಾಮೀಜಿ, ದಿಂಗಾಲೇಶ್ವರ ಶ್ರೀ, ಮನಸೂರಿನ ಬಸವರಾಜ ದೇವರು ಶ್ರೀ ಸೇರಿದಂತೆ ವಿವಿಧ ಮಠಾಧೀಶರು ಮತ್ತು ಸಾರ್ವಜನಿಕರು ಹುಬ್ಬಳ್ಳಿಯ ಚೆನ್ನಮ್ಮ ವೃತ್ತದಲ್ಲಿ ಮಾನವ ಸರಪಳಿ ನಿರ್ಮಿಸಿ, ಪ್ರತಿಭಟನೆ ನಡೆಸಿದರು. ವೃತ್ತದಲ್ಲಿ ಟೈರ್‌ಗೆ ಬೆಂಕಿ ಹಚ್ಚಿ ಸರಕಾರದ ವಿರುದ್ಧ ಘೋಷಣೆ ಕೂಗಿದರು.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ

Published On - 1:44 pm, Sat, 18 May 24