Gadag: ಮೊಬೈಲ್ ಕಳ್ಳತನ ಮುಕ್ತ ನಗರವಾಗಿಸಲು ಪೊಲೀಸರಿಂದ ಮೊಬಿಫೈ ತಂತ್ರಜ್ಞಾನ ಜಾರಿ; ಏನಿದರ ವೈಶಿಷ್ಟ್ಯ, ಇಲ್ಲಿದೆ ಮಾಹಿತಿ
ಗದಗವನ್ನು ಮೊಬೈಲ್ ಕಳ್ಳತನ ಮುಕ್ತ ನಗರವಾಗಿಸಲು ಗದಗ ಪೊಲೀಸ್ ಇಲಾಖೆ ಹೊಸ ಮಾರ್ಗವೊಂದನ್ನು ಕಂಡುಕೊಂಡಿದೆ. ಗದಗ ನಗರದ ಯಾವುದೇ ಭಾಗದಲ್ಲಿ ಮೊಬೈಲ್ ಕಳ್ಳತನವಾದರೂ ಸುಲಭವಾಗಿ ಪತ್ತೆಹಚ್ಚಲು "ಮೊಬಿಫೈ" ತಂತ್ರಜ್ಞಾನವೊಂದನ್ನು ಪ್ರಾರಂಭಿಸಿದೆ.
Updated on:Feb 21, 2023 | 1:47 PM
ಗದಗ: ಗದಗ (Gadag) ಅನ್ನು ಮೊಬೈಲ್ ಕಳ್ಳತನ ಮುಕ್ತ ನಗರವಾಗಿಸಲು ಗದಗ ಪೊಲೀಸ್ ಇಲಾಖೆ (Gadag Police Department) ಹೊಸ ಮಾರ್ಗವೊಂದನ್ನು ಕಂಡುಕೊಂಡಿದೆ. ಗದಗ ನಗರದ ಯಾವುದೇ ಭಾಗದಲ್ಲಿ ಮೊಬೈಲ್ ಕಳ್ಳತನವಾದರೂ ಸುಲಭವಾಗಿ ಪತ್ತೆಹಚ್ಚಲು “ಮೊಬಿಫೈ” (Mobify technology) ತಂತ್ರಜ್ಞಾನವೊಂದನ್ನು ಪ್ರಾರಂಭಿಸಿದೆ. ಈ ಮೂಲಕ ಗದಗ ನಗರವನ್ನು ಮೊಬೈಲ್ ಕಳ್ಳತನ ಮುಕ್ತವನ್ನಾಗಿಸಲು ಪೊಲೀಸ್ ಇಲಾಖೆ ಮುಂದಾಗಿದೆ. ಈ ಮೊಬಿಫೈ ನಾಲ್ಕು ದಿನಗಳ ಹಿಂದೆ ಪ್ರಾರಂಭಿಸಲಾಗಿದ್ದು, ಶನಿವಾರ (ಫೆ.18) ರವರೆಗೆ ಈಗಾಗಲೇ 200 ಪ್ರಕರಣಗಳು ದಾಖಲಾಗಿವೆ.
ಸದ್ಯ ಪೊಲೀಸ್ ಇಲಾಖೆ ಈ ಪ್ರಕರಣಗಳನ್ನು ಒಂದೊಂದಾಗಿ ತನಿಖೆ ನಡೆಸುತ್ತಿದೆ. ಈ ತಂತ್ರಜ್ಞಾನವನ್ನು ಮೊದಲ ಬಾರಿಗೆ ಜಾರಿಗೆ ತಂದ ಕೀರ್ತಿ ಗದಗ ಪೊಲೀಸ್ ಇಲಾಖೆಗೆ ಸಲ್ಲುತ್ತದೆ. ಇನ್ಮುಂದೆ ಜನರು ಮೊಬೈಲ್ ಕಳ್ಳತನವಾದ ಬಳಿಕ ಪೊಲೀಸ್ ಠಾಣೆಗೆ ಹೋಗುವ ಅವಶ್ಯಕತೆ ಇಲ್ಲ. ಮೊಬೈಲ್ ಕಳೆದುಕೊಂಡಿರುವ ವ್ಯಕ್ತಿ ತಾನು ಇದ್ದ ಜಾಗದಿಂದಲೇ ವೇಗವಾಗಿ ಮೊಬಿಫೈ ಮೂಲಕ ದೂರು ನೀಡಬಹುದಾಗಿದೆ.
ದೂರುದಾರ, ಮೊಬಿಫೈ ತಂತ್ರಜ್ಞಾನದ ಮೂಲಕ, ಪೊಲೀಸ್ ಇಲಾಖೆ ನೀಡಿದ ನಂಬರ್ಗೆ ಸಂದೇಶ ರವಾನೆ ಮಾಡಬೇಕು. ಇದರಿಂದ ದೂರುದಾರನ ಬೊಬೈಲ್ನನ್ನು ಬ್ಲಾಕ್ ಮಾಡಲಾಗುತ್ತದೆ. ಇದರಿಂದ ಕಳ್ಳನಿಗೆ ಕದ್ದ ಮೊಬೈಲ್ನ್ನು ಉಪಯೋಗಿಸಲು ಸಾಧ್ಯವಾಗುವುದಿಲ್ಲ. ಆಗ ಕದ್ದ ಮೊಬೈಲ್ ಡಮ್ಮಿಯಾಗುತ್ತದೆ. ಇದರಿಂದ ಕಳ್ಳರು ಮೊಬೈಲ್ ಕಳ್ಳತನಕ್ಕೆ ಕೈ ಹಾಕುವುದಿಲ್ಲ. ಈ ಮೂಲಕ ಮೊಬೈಲ್ ಕಳ್ಳತನ ಮುಕ್ತ ನಗರವಾಗಲಿದೆ. ಈ ಹೊಸ ತಂತ್ರಜ್ಞಾನಕ್ಕೆ ಸಾರ್ವಜನಿಕ ವಲಯದಿಂದ ಉತ್ತಮ ಪ್ರತಿಕ್ರಿಯೆ ದೊರೆಯುತ್ತಿದೆ. ಪ್ರತಿ ನಿಮಿಷಕ್ಕೊಂದು ಪ್ರಕರಣ ದಾಖಲಾಗುತ್ತಿದೆ ಎಂದು ಪೊಲೀಸ್ ಇಲಾಖೆ ತಿಳಿಸಿದೆ.
ಈ ಬಗ್ಗೆ ಗದಗ ಎಸ್ಪಿ ಬಿಎಸ್ ನೇಮಗೌಡ ಮಾತನಾಡಿ ನಾವು ಮೊದಲು ಪ್ರಾಯೋಗಿಕವಾಗಿ ಜಾರಿಗೆ ಮಾಡಿದ್ದೇವೆ. ಇನ್ನು ಮುಂದಿನ ದಿನಗಳಲ್ಲಿ ಇನ್ನೂ ಹೆಚ್ಚಿನ ತಂತ್ರಜ್ಞಾನವನ್ನು ಉಪಯೋಗಿಸಿಕೊಂಡು ಇದನ್ನು ಉತ್ತಮಗೊಳಿಸಿ ಜಾರಿಮಾಡಲಾಗುತ್ತದೆ. ಇದಕ್ಕೆ ಜನರಿಂದ ಉತ್ತಮ ಪ್ರತಿಕ್ರಿಯೆ ಬರುತ್ತಿದೆ. ಈ ತಂತ್ರಜ್ಞಾನದಿಂದ ಕದ್ದ ಮೊಬೈಲ್ ಟ್ರ್ಯಾಕಿಂಗ್, ಬ್ಲಾಕ್, ಮೊಬೈಲ್ ಲೊಕೇಶನ್ ಪತ್ತೆ ಹಚ್ಚಲು ಸುಲಭವಾಗುತ್ತಿದೆ. ಮತ್ತು ಕರ್ನಾಟಕದಲ್ಲಿ ಮೊಟ್ಟ ಮೊದಲ ಬಾರಿಗೆ ಈ ಪ್ರಯೋಗ ಮಾಡುತ್ತಿರುವುದು ಗದಗ ನಗರ ಎಂದು ಹೆಮ್ಮೆ ವ್ಯಕ್ತಪಡಿಸಿದರು.
ಏನಿದು ಮೊಬಿಫೈ ತಂತ್ರಜ್ಞಾನ
ಯಾರು ಮೊಬೈಲ್ನ್ನು ಕಳೆದುಕೊಂಡಿರುತ್ತಾರೋ ಅವರು ಬೇರೊಂದು ಮೊಬೈಲ್ನಿಂದ ಹಾಯ್ ಎಂದು 8277969900 ನಂಬರ್ ಅಥವಾ ಈಗಾಗಲೇ ಎಲ್ಲ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾದ ಕ್ಯೂ ಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಬೇಕು. ಇದರಿಂದ ಇಲಾಖೆಯ Whatsapp ಸಂಖ್ಯಗೆ ಸಂದೇಶ ಹೋಗುತ್ತದೆ.
ಕೂಡಲೇ ಇಲಾಖೆ ನಿಮಗೆ ಲಿಂಕ್ವೊಂದನ್ನು ಕಳುಹಿಸುತ್ತದೆ. ಆಗ ಲಿಂಕ್ ಒತ್ತಿ ನೀವು ಕಳೆದುಕೊಂಡ ಮೊಬೈಲ್ನ ಮಾಹಿತಿ ದಾಖಲಿಸಬೇಕು. ಇದರ ಮೂಲಕ ಮೊಬೈಲ್ ಲೊಕೇಶನ್ ಪತ್ತೆಹಚ್ಚಲಾಗುತ್ತದೆ. ಒಂದು ವೇಳೆ ಇದು ಸಾಧ್ಯವಾಗದೇ ಇದ್ದರೇ ಮೊಬೈಲ್ನಲ್ಲಿದ್ದ ನಿಮ್ಮ ಖಾಸಗಿ ಮಾಹಿತಿಗಳನ್ನು ರಕ್ಷಣೆ ಮಾಡಲು ಮೊಬೈಲ್ನ್ನು ಬ್ಲಾಕ್ ಮಾಡಲಾಗುತ್ತದೆ. ಇದೇ ಮಾಹಿತಿಯನ್ನು ಇಲಾಖೆ Central Equipment Identity Register (CEIR) ನೊಂದಿಗೆ ಹಂಚಿಕೊಳ್ಳುತ್ತದೆ.
ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 1:18 pm, Tue, 21 February 23
