ಕೊರೊನಾ ಸೋಂಕಿತನ ನರಳಾಟದ ಸಾವು ಕಂಡು ಹೃದಯಾಘಾತದಿಂದ ಮೃತಪಟ್ಟ ಕಲಬುರ್ಗಿ ಕಾನ್ಸ್ಟೇಬಲ್
ಕಾನ್ಸ್ಟೇಬಲ್ ಮೃತಪಟ್ಟ ನಂತರ ಅವರ ಕೊರೊನಾ ಟೆಸ್ಟ್ ವರದಿ ನೆಗೆಟಿವ್ ಬಂದಿದೆ. ಕೊರೊನಾ ಸೋಂಕು ಅವರಿಗೆ ತಗುಲಿರಲಿಲ್ಲ. ಕೊರೊನಾ ಸೋಂಕಿತರ ಮರಣವನ್ನು ನೋಡಿ ಆಘಾತವಾಗಿಯೇ ಅವರು ಜೀವ ಕಳೆದುಕೊಂಡರು.
Updated on: Apr 14, 2021 | 4:45 PM
ಕಲಬುರ್ಗಿ: ಕೊರೊನಾ ಸೋಂಕು ನಮ್ಮನ್ನು ಹೇಗೆಲ್ಲ ಆವರಿಸಬಹುದು ಎಂಬುದು ದಿನೇ ದಿನೇ ಪ್ರಕಟವಾಗುತ್ತಿದೆ. ನೇರವಾಗಿ ಸೋಂಕು ತಗುಲುವುದು ಒಂದೆಡೆಯಾದರೆ ಇನ್ನೊಂದೆಡೆ ಪರೋಕ್ಷವಾಗಿಯೂ ಕೊರೊನಾ ತೊಂದರೆ ಕೊಡುತ್ತಿದೆ. ಆರ್ಥಿಕವಾಗಿ, ಮಾನಸಿಕವಾಗಿಯೂ ಹಲವರನ್ನು ಕುಗ್ಗಿಸುತ್ತಿದೆ. ಕೊರೊನಾದಿಂದ ಕಣ್ಣು ತೇವಗೊಳಿಸುವ ಘಟನೆಯೊಂದು ಕಲಬುರ್ಗಿಯಲ್ಲಿ ನಡೆದಿರುವುದು ವರದಿಯಾಗಿದೆ.
ಕಳೆದ 5 ದಿನಗಳ ಹಿಂದೆ ಕಲಬುರ್ಗಿ ನಗರದ ಪೊಲೀಸ್ ಕಾನ್ಸ್ಟೇಬಲ್ ಓರ್ವರು ನ್ಯುಮೋನಿಯಾ ಮತ್ತು ಕೊರೊನಾ ಸೋಂಕಿಗೆ ಸಂಬಂಧಿಸಿದ ಕೆಲವು ಲಕ್ಷಣಗಳು ಕಂಡುಬಂದ ಕಾರಣ ನಗರದ ಜಿಮ್ಸ್ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರು ದಾಖಲಾಗಿದ್ದ ಪಕ್ಕದ ವಾರ್ಡ್ನಲ್ಲಿಯೇ ಕೊವಿಡ್ ಸೋಂಕಿತರೋರ್ವರು ಚಿಕಿತ್ಸೆ ಪಡೆಯುತ್ತಿದ್ದರು. ಕೊರೊನಾ ಸೋಂಕಿತ ವ್ಯಕ್ತಿಗೆ ವೈದ್ಯರು ಚಿಕಿತ್ಸೆ ನೀಡುತ್ತಿದ್ದರು. ವೈದ್ಯರು ನೀಡುವ ಚಿಕಿತ್ಸೆಯ ಪ್ರಕ್ರಿಯೆಗಳನ್ನು ಪೊಲೀಸ್ ಕಾನ್ಸ್ಟೇಬಲ್ ಸ್ವತಃ ತಮ್ಮ ಕಣ್ಣಾರೆ ಗಮನಿಸುತ್ತಿದ್ದರು.
ಆದರೆ, ಮೂರು ದಿನಗಳ ಹಿಂದೆ ಪಕ್ಕದ ವಾರ್ಡ್ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಕೊವಿಡ್ ಸೋಂಕಿತ ವ್ಯಕ್ತಿ ಪ್ರಾಣಬಿಟ್ಟರು. ಅವರ ಸಾವು ಸಹಜವಾಗಿರಲಿಲ್ಲ. ಅವರು ತೀವ್ರ ಅನಾರೋಗ್ಯಕ್ಕೀಡಾಗಿ ನರಳಿ ಸಾವನ್ನಪ್ಪಿದ್ದರು. ಈ ಹೃದಯ ಹಿಂಡುವ ಘಟನೆಯನ್ನು ಪೊಲೀಸ್ ಕಾನ್ಸ್ಟೇಬಲ್ ಅತ್ಯಂತ ಹತ್ತಿರದಿಂದಲೇ ವೀಕ್ಷಿಸಿದ್ದರು. ಆ ಸಾವು ಮತ್ತು ಸಾವಿನ ರೀತಿಯನ್ನು ಕಂಡು ಪೊಲೀಸ್ ಕಾನ್ಸ್ಟೇಬಲ್ ಬಹಳ ಸಂಕಟಪಟ್ಟರು. ಮಾನಸಿಕವಾಗಿ ಕುಗ್ಗಿಹೋದರು. ನನಗೂ ಇಂತಹ ಸಾವು ಬರಬಹುದು ಎಂದು ಯೋಚಿಸಿ ಆಘಾತಕ್ಕೊಳಗಾದರು. ಕುಟುಂಬಸ್ಥರಿಗೆ ಕರೆ ಮಾಡಿ ಆತಂಕ ವ್ಯಕ್ತಪಡಿಸಿದರು.
ಪಕ್ಕದ ವಾರ್ಡ್ನ ಕೊವಿಡ್ ಸೋಂಕಿತ ವ್ಯಕ್ತಿಯ ಸಾವು ಅವರ ಹೃದಯವನ್ನೇ ತಲ್ಲಣಗೊಳಿಸಿತ್ತು. ತನಗೂ ಹೀಗೆಯೇ ಸಾವು ಬಂದರೆ ಎಂದು ಮಾನಸಿಕವಾಗಿ ನೊಂದುಕೊಂಡಿದ್ದರು. ಇದನ್ನೇ ತೀವ್ರವಾಗಿ ಯೋಚಿಸಿ ನಿನ್ನೆ ಪೊಲೀಸ್ ಕಾನ್ಸ್ಟೇಬಲ್ ಹೃದಯಾಘಾತದಿಂದ ಮೃತಪಟ್ಟರು. ಮೃತಪಟ್ಟ ನಂತರ ಅವರ ಕೊರೊನಾ ಟೆಸ್ಟ್ ವರದಿ ನೆಗೆಟಿವ್ ಬಂದಿದೆ. ಕೊರೊನಾ ಸೋಂಕು ಅವರಿಗೆ ತಗುಲಿರಲಿಲ್ಲ. ಕೊರೊನಾ ಸೋಂಕಿತರ ಮರಣವನ್ನು ನೋಡಿ ಆಘಾತವಾಗಿಯೇ ಅವರು ಜೀವ ಕಳೆದುಕೊಂಡರು.
ಹೀಗೆ ಕೊರೊನಾ ಕಲಬುರ್ಗಿಯ ಪೇದೆಯೊಬ್ಬರ ಪ್ರಾಣವನ್ನು ಪರೋಕ್ಷವಾಗಿ ಕಿತ್ತುಕೊಂಡಿದೆ. ಕೊರೊನಾದಿಂದ ಹಿಂದಿನ ವರ್ಷದ ಇದೇ ಹೊತ್ತಲ್ಲಿ ಕಣ್ಣಾಲಿಗಳು ಒದ್ದೆಯಾಗುವ ಘಟನೆಗಳು ನಡೆದಿದ್ದವು. ಈಗ ಮತ್ತೊಮ್ಮೆ ಅಂತಹುದೇ ನಡೆಯಬಾರದಿದ್ದ ಘಟನೆಯೊಂದು ಜರುಗಿಹೋಗಿದೆ.
ಇದನ್ನೂ ಓದಿ: ಮಹಾರಾಷ್ಟ್ರದಲ್ಲಿ ಕೊರೊನಾ ಸೋಂಕು ತೀವ್ರ; ಕಠಿಣ ನಿರ್ಬಂಧ ಘೋಷಿಸಿದ ಸಿಎಂ ಉದ್ಧವ್ ಠಾಕ್ರೆ
Coronavirus India Update: ಕಳೆದ 24 ಗಂಟೆಗಳಲ್ಲಿ 1.61ಲಕ್ಷ ಹೊಸ ಕೊವಿಡ್ ಪ್ರಕರಣ ಪತ್ತೆ, 879 ಮಂದಿ ಸಾವು
(Kalaburagi police constable died by cardiac arrest after he see Covid patient’s groaning death)
