ಬಚನ್, ಅಮೀರ್​​​ ಖಾನ್​​​​​ರಿಂದ ಖರೀದಿಸಿದ್ದ ಕಾರುಗಳಿಗೆ ಕೊನೆಗೂ ಟ್ಯಾಕ್ಸ್ ಕಟ್ಟಿದ ಕೆಜಿಎಫ್ ಬಾಬು

ಬೆಂಗಳೂರು, ಜುಲೈ 23: ಬಾಲಿವುಡ್​ ನಟರಾದ ಆಮಿರ್ ಖಾನ್ ಹಾಗೂ ಅಮಿತಾಭ್ ಬಚ್ಚನ್​​ರಿಂದ ಖರೀದಿಸಿದ್ದ ಐಷಾರಾಮಿ ಕಾರುಗಳಿಗೆ ಕೆಜಿಎಫ್​​ ಬಾಬು (KGF Babu) ಕೊನೆಗೂ ತೆರಿಗೆ (tax) ಕಟ್ಟಿದ್ದಾರೆ. ಬಚನ್ ಬಳಿ ಖರೀದಿಸಿದ ಕಾರಿಗೆ 18 ಲಕ್ಷದ 53 ಸಾವಿರ ರೂ ಮತ್ತು ಆಮೀರ್​ ಖಾನ್ ಬಳಿ ಖರೀದಿಸಿದ ಕಾರಿಗೆ 19.73 ಲಕ್ಷ ರೂ. ಹಣವನ್ನು ಆರ್​ಟಿಒ ಅಧಿಕಾರಿಗಳಿಗೆ ಡಿಡಿ ಮೂಲಕ ಟ್ಯಾಕ್ಸ್ ಪಾವತಿಸಿದ್ದಾರೆ.

ಐಷಾರಾಮಿ ಕಾರುಗಳಿಗೆ ತೆರಿಗೆ ಕಟ್ಟದ ಹಿನ್ನಲೆ ಬುಧವಾರ ಬೆಳಿಗ್ಗೆ ವಸಂತನಗರದಲ್ಲಿರುವ ಕೆಜಿಎಫ್​​ ಬಾಬು ರುಕ್ಸಾನಾ ಪ್ಯಾಲೇಸ್ ನಿವಾಸದ​​ ಮೇಲೆ ಆರ್​ಟಿಒ ಜಂಟಿ ಆಯುಕ್ತೆ ಶೋಭಾ ನೇತೃತ್ವದ ಅಧಿಕಾರಿಗಳಿಂದ ದಾಳಿ ಮಾಡಲಾಗಿದೆ. ನಟರು ಬಳಸಿದ್ದ ರೋಲ್ಸ್​​ ರಾಯ್ಸ್​​​ ಸೇರಿ ಹಲವು ಐಷಾರಾಮಿ ಕಾರುಗಳನ್ನು ಬಾಬು ಹೊಂದಿದ್ದರು.

ಒಂದೊಂದು ಕಾರಿನ ಹಿಂದಿದೆ ಒಂದೊಂದು ಕತೆ

ಸೆಲೆಬ್ರಿಟಿಗಳು ಬಳಸುವ ಕಾರುಗಳ ಬಗ್ಗೆ ಕ್ರೇಜ್ ಹೊಂದಿದ್ದ ಕೆಜಿಎಫ್ ಬಾಬು, ಅಮಿತಾಭ್ ಬಚ್ಚನ್​ರಿಂದ MH 11 AX 1 ರೋಲ್ಸ್ ರಾಯ್ ಮತ್ತು ಆಮಿರ್ ಖಾನ್​​ ಒಂದು ವರ್ಷ ಬಳಸಿದ್ದ MH 02 BB 2 ರೋಲ್ಸ್ ರಾಯ್ ಕಾರು ಕೂಡ ಖರೀದಿಸಿದ್ದರು. ಅಷ್ಟೇ ಅಲ್ಲದೆ ಮಗಳ ಮಗುವಿಗಾಗಿ ಅಂದರೆ ಮೊಮ್ಮಗಳಿಗಾಗಿ ವೇಲ್ಫೇರ್ ಕಾರ್ ಖರೀದಿ ಮಾಡಿದ್ದರು. ಹೀಗೆ ಒಂದೊಂದು ಕಾರಿನ ಹಿಂದಿದೆ ಒಂದೊಂದು ಕತೆ ಇದೆ.

ಗೊತ್ತಿಲ್ಲದೆ ನಾನು ತಪ್ಪು ಮಾಡಿದ್ದೇನೆ ಎಂದ ಕೆಜಿಎಫ್ ಬಾಬು

ಈ ಬಗ್ಗೆ ಕೆಜಿಎಫ್ ಬಾಬು ಹೇಳಿಕೆ ನೀಡಿದ್ದು, ಮಹಾರಾಷ್ಟ್ರ ರಿಜಿಸ್ಟ್ರೇಷನ್​​ನ ಎರಡು ರೋಲ್ಸ್ ರಾಯ್ ಕಾರುಗಳಿದ್ದವು. ಆಮಿರ್ ಖಾನ್ ಹಾಗೂ ಅಮಿತಾಭ್ ಬಚ್ಚನ್​​ ಅವರ ಎರಡು ಕಾರು ಖರೀದಿ‌ ಮಾಡಿದ್ದೆ. ಮಹಾರಾಷ್ಟ್ರದಲ್ಲಿ ಲೈಫ್ ಟೈಕ್ಸ್ ಕಟ್ಟಿದ್ದೆ. ಆದರೆ ಕರ್ನಾಟಕದಲ್ಲೂ ಟ್ಯಾಕ್ಸ್ ಕಟ್ಟಬೇಕು ಅಂದರು. ನನಗೆ ಈ ಟ್ಯಾಕ್ಸ್ ವಿಚಾರ ಗೊತ್ತಿರಲಿಲ್ಲ. ಗೊತ್ತಿಲ್ಲದೆ ನಾನು ತಪ್ಪು ಮಾಡಿದ್ದೇನೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಕೆಜಿಎಫ್ ಬಾಬುಗೆ ಮುಳುವಾಯ್ತು ಅಮಿತಾಭ್, ಆಮಿರ್​ ಬಳಿ ಖರೀದಿಸಿದ ಐಷಾರಾಮಿ ಕಾರುಗಳು

ಆರ್​ಟಿಓ ಅಧಿಕಾರಿಗಳು ನನಗೆ ಮನವರಿಕೆ ಮಾಡಿದರು. ಹಾಗಾಗಿ ಆಮೀರ್ ಖಾನ್ ಅವರಿಂದ ಖರೀದಿಸಿದ ಕಾರಿಗೆ 19 ಲಕ್ಷದ 73 ರೂ. ಟ್ಯಾಕ್ಸ್ ಕಟ್ಟಲಾಗಿದೆ. ಅಮಿತಾಭ್ ಬಚ್ಚನ್​​ರಿಂದ ಖರೀದಿಸಿದ ಕಾರಿಗೆ 18 ಲಕ್ಷ 53 ಸಾವಿರ ರೂ ಟ್ಯಾಕ್ಸ್ ಕಟ್ಟಲಾಗಿದೆ. ಒಬ್ಬ ಜವಾಬ್ದಾರಿಯುತ ವ್ಯಕ್ತಿಯಾಗಿ ಟ್ಯಾಕ್ಸ್ ಕಟ್ಟದೇ ಇರಲ್ಲ ಎಂದಿದ್ದಾರೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.