MSIL: ಅನಧಿಕೃತ ಚಿಟ್ ಕಂಪನಿಗಳಿಂದ ವಂಚನೆ ತಪ್ಪಿಸಲು ಎಂಎಸ್‌ಐಎಲ್‌ ಹೊಸ ಯೋಜನೆ -ಹರತಾಳು ಹಾಲಪ್ಪ ಘೋಷಣೆ

ಬೆಂಗಳೂರು: ಎಂಎಸ್ ಐಎಲ್ ಯಶಸ್ವಿಯಾಗಿ 56 ವರ್ಷಗಳನ್ನು ಪೂರೈಸಿದೆ. ರಾಜ್ಯ ಸರ್ಕಾರ ಸಾರಾಯಿ ನಿಷೇಧಿಸಿದ ನಂತರ ಅಕ್ರಮ ಮಧ್ಯ ಮಾರಾಟ ಹೆಚ್ಚಾದ ಸಂದರ್ಭದಲ್ಲಿ ಎಂಎಸ್‌ಐಎಲ್ ಸಂಸ್ಥೆಗೆ (MSIL) ಚಿಲ್ಲರೆ ಮದ್ಯ ಮಳಿಗೆಗಳನ್ನು ತೆರಯಲು ಅನುಮತಿ ನೀಡಲಾಗಿದೆ. ಪ್ರಸ್ತುತ 979 ಎಂಎಸ್‌ಐಎಲ್‌ ಸಿಎಲ್ (11ಸಿ) ಮದ್ಯ ಮಾರಾಟ ಮಳಿಗೆಗಳು ಕಾರ್ಯನಿರ್ವಹಿಸುತ್ತಿವೆ. ಪಾನೀಯ ವಿಭಾಗದಿಂದ 2021-22 ನೇ ಸಾಲಿಗೆ 2399 ಕೋಟಿ ರೂ. ವಹಿವಾಟು ನಡೆಸಲಾಗಿದೆ ಎಂದು ಸಾಗರ ಕ್ಷೇತ್ರದ ಬಿಜೆಪಿ ಶಾಸಕರೂ ಆದ MSIL (Mysore Sales International Ltd) ಅಧ್ಯಕ್ಷ ಹರತಾಳು ಹಾಲಪ್ಪ (Harathalu Halappa) ಸಂತಸ ವ್ಯಕ್ತಪಡಿಸಿದ್ದಾರೆ.

ಅನಧಿಕೃತ ಚಿಟ್ ಕಂಪನಿಗಳಿಂದ (Chit Fund) ಸಾರ್ವಜನಿಕರು ಮೋಸ ಹೋಗುವುದನ್ನು ತಪ್ಪಿಸಲು ಎಂಎಸ್‌ಐಎಲ್‌ ಸಂಸ್ಥೆಯು ಚಿಟ್ ಫಂಡ್ ವ್ಯವಹಾರವನ್ನು ನಡೆಸುತ್ತಿದೆ. ಪ್ರಸ್ತುತ 26 ಶಾಖೆಗಳನ್ನು ಹೊಂದಿದ್ದು 2 ಲಕ್ಷಕ್ಕೂ ಅಧಿಕ ಚಂದಾದಾರರು ಈವರೆಗೂ ಚಿಟ್ ಫಂಡ್ ಅನುಕೂಲ ಪಡೆದಿದ್ದಾರೆ. ರಾಜ್ಯದ ಎಲ್ಲ ಜಿಲ್ಲಾ ಹಾಗೂ ತಾಲ್ಲೂಕು ಕೇಂದ್ರಗಳಲ್ಲಿಯೂ ಕೂಡ ಚಿಟ್ ಫಂಡ್ ಶಾಖೆಗಳನ್ನು ತೆರೆಯಲು ಉದ್ದೇಶಿಸಲಾಗಿದೆ. ಅನಧಿಕೃತ ಚಿಟ್ ಕಂಪನಿಗಳಿಂದ ವಂಚನೆ ತಪ್ಪಿಸಲು ಹೊಸ ಯೋಜನೆ ತರಲಾಗುವುದು ಎಂದು ಹರತಾಳು ಹಾಲಪ್ಪ ತಿಳಿಸಿದ್ದಾರೆ.

ಎಂಎಸ್ ಐಎಲ್ ಕಾಗದ ವಿಭಾಗದಿಂದ 2021-22 ನೇ ಸಾಲಿನಲ್ಲಿ 80 ಕೋಟಿ ರೂ. ವಹಿವಾಟು ನಡೆಸಲಾಗಿದೆ. ಎಂಎಸ್‌ಐಎಲ್‌ ಸಂಸ್ಥೆಯು ಸೋಲಾ‌ರ್ ಉತ್ಪನ್ನಗಳನ್ನು ಕೂಡಾ ಮಾರಾಟ ಮಾಡುತ್ತಿದ್ದು, 2021-22ನೇ ಸಾಲಿನಲ್ಲಿ 92 ಕೋಟಿ ರೂ. ವಹಿವಾಟು ನಡೆಸಲಾಗಿದೆ. 87 ಜನೌಷಧಿ ಮಳಿಗೆಗಳನ್ನು ವಿವಿಧ ಸರ್ಕಾರಿ ಆಸ್ಪತ್ರೆಗಳ ಆವರಣಗಳಲ್ಲಿ ಪ್ರಾರಂಭಿಸಿ ಕಾರ್ಯನಿರ್ವಹಿಸುತ್ತಿದೆ, ಫಾರ್ಮಾ ವಿಭಾಗದಲ್ಲಿ 2021-22 ನೇ ಸಾಲಿಗೆ 10.81 ಕೋಟಿ ರೂ. ವಹಿವಾಟು ನಡೆಸಲಾಗಿದೆ. ಫಾರ್ಮಾ ವಿಭಾಗ ಪ್ರಾರಂಭವಾದಾಗಿನಿಂದ ಪ್ರಥಮ ಬಾರಿಗೆ 1.47 ಕೋಟಿ ರೂ. ಲಾಭ ಗಳಿಸಲಾಗಿದೆ. ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಪ್ರವಾಸ ಪ್ಯಾಕೇಜ್‌ಗಳನ್ನು ಎಲ್ಲಾ ವರ್ಗದ ಜನರಿಗೆ ಕೈಗೆಟುಕುವ ದರಗಳಲ್ಲಿ ನಡೆಸುತ್ತಿದೆ ಎಂದು ಹರತಾಳು ಹಾಲಪ್ಪ ಮಾಹಿತಿ ನೀಡಿದರು.

ಇದನ್ನೂ ಓದಿ:

ದೇವೇಗೌಡ ಫ್ಯಾಮಿಲಿ ಟಾರ್ಗೆಟ್ ಮಾಡಬೇಡಿ, ಅದರಿಂದ ಕಾಂಗ್ರೆಸ್ಸಿಗೆ ಆಗುವ ಲಾಭ ಏನೂ ಇಲ್ಲ: ರಾಹುಲ್ ಗಾಂಧಿ ಕಿವಿಮಾತು

ಇದನ್ನೂ ಓದಿ: ಪಾದ ಸಾಮುದ್ರಿಕ ಶಾಸ್ತ್ರ: ಪಾದದಲ್ಲಿ ಯಾವ ಸ್ವರೂಪದ ರೇಖೆಗಳಿದ್ದರೆ ನಿಮಗೆ ಎಂತಹ ಅದೃಷ್ಟ ಲಭಿಸುತ್ತದೆ ಎಂಬುದನ್ನು ತಿಳಿಯಿರಿ

Published On - 3:28 pm, Sat, 2 July 22