ಬಿಡದಿ ಟೌನ್ಶಿಪ್ ಯೋಜನೆ: ರೈತರ ವಿರೋಧದ ನಡುವೆ 7,351 ಎಕರೆಗೆ ಅಂತಿಮ ಅಧಿಸೂಚನೆ ಪ್ರಕಟ
ಬಿಡದಿ ಟೌನ್ಶಿಪ್ ಯೋಜನೆಗೆ ಸಂಬಂಧಿಸಿದಂತೆ ರೈತರ ತೀವ್ರ ವಿರೋಧದ ನಡುವೆಯೂ ಒಟ್ಟು 7,351 ಎಕರೆ ಭೂಮಿಗೆ ಅಂತಿಮ ಅಧಿಸೂಚನೆ ಪ್ರಕಟಿಸಲಾಗಿದೆ. ಇದು ಮೂರನೇ ಹಂತದ ಅಧಿಸೂಚನೆಯಾಗಿದ್ದು, ರಾಮನಗರ ತಾಲೂಕಿನ ಕಂಚಗಾರನಹಳ್ಳಿ ಮತ್ತು ಬೈರಮಂಗಲ ಗ್ರಾಮಗಳ 1,895 ಎಕರೆ ಭೂಮಿ ಸೇರಿದೆ. ಈಗಾಗಲೇ ಎರಡು ಹಂತಗಳಲ್ಲಿ ಭೂಮಿ ಸ್ವಾಧೀನಕ್ಕೆ ಪ್ರಕಟಣೆ ಹೊರಡಿಸಲಾಗಿತ್ತು.
ರಾಮನಗರ, ಅಕ್ಟೋಬರ್ 30: ರಾಜ್ಯ ಕಾಂಗ್ರೆಸ್ ಸರ್ಕಾರದ ಮಹತ್ವಾಕಾಂಕ್ಷಿಯ ಬಿಡದಿ ಟೌನ್ಶಿಪ್ ಯೋಜನೆಗೆ ರೈತರ ವಿರೋಧದ ಮಧ್ಯೆಯೂ ಇದೀಗ ರಾಜ್ಯ ಸರ್ಕಾರ ಮೂರನೇ ಹಂತದ ಅಂತಿಮ ಅಧಿಸೂಚನೆ ಪ್ರಕಟಿಸಿದೆ. ರಾಮನಗರ ತಾಲೂಕಿನ ಕಂಚಗಾರನಹಳ್ಳಿ ಹಾಗೂ ಬೈರಮಂಗಲ ಗ್ರಾಮಗಳ ಒಟ್ಟು 1,895 ಎಕರೆ ಭೂಮಿಗೆ ಅಂತಿಮ ಅಧಿಸೂಚನೆ ಹೊರಡಿಸಲಾಗಿದೆ. ಈ ಪೈಕಿ ಕಂಚಗಾರನಹಳ್ಳಿ ಗ್ರಾಮದ 753 ಎಕರೆ ಹಾಗೂ ಬೈರಮಂಗಲ ಗ್ರಾಮದ 1,142 ಎಕರೆ ಭೂಮಿ ಸೇರಿದೆ.
ಈಗಾಗಲೇ ಸರ್ಕಾರದಿಂದ ಎರಡು ಹಂತದಲ್ಲಿ ಅಧಿಸೂಚನೆ
ಈಗಾಗಲೇ ಸರ್ಕಾರ ಎರಡು ಹಂತಗಳಲ್ಲಿ ಅಂತಿಮ ಅಧಿಸೂಚನೆ ಪ್ರಕಟಿಸಿದೆ. ಜೂನ್ 11 ರಂದು ಮೊದಲ ಹಂತದಲ್ಲಿ ಮೂರು ಕಂದಾಯ ಗ್ರಾಮಗಳಾದ ಕೆಂಪಯ್ಯನಪಾಳ್ಯ, ವಡೇರಹಳ್ಳಿ ಹಾಗೂ ಮಂಡಲಹಳ್ಳಿಯ ಒಟ್ಟು 516 ಎಕರೆಗೆ ಅಧಿಸೂಚನೆ ಹೊರಡಿಸಲಾಗಿತ್ತು.
816 ರೈತರಿಗೆ ಸಾವಿರಾರು ಕೋಟಿ ರೂ ಹಣ
ಎರಡನೇ ಹಂತದಲ್ಲಿ ಕೆ.ಜಿ. ಗೊಲ್ಲರಪಾಳ್ಯ, ಬನ್ನಿಗಿರಿ, ಅರಳಾಳುಸಂದ್ರ ಹಾಗೂ ಹೊಸೂರು ಗ್ರಾಮಗಳ ಒಟ್ಟು 4,940 ಎಕರೆಗೆ ಅಂತಿಮ ಅಧಿಸೂಚನೆ ಪ್ರಕಟಿಸಲಾಗಿತ್ತು. ಇದರಲ್ಲಿ ಈಗಾಗಲೇ 1,280 ರೈತರು ಸ್ವಯಂಪ್ರೇರಿತರಾಗಿ ಪರಿಹಾರಕ್ಕೆ ಅರ್ಜಿ ಸಲ್ಲಿಕೆ ಮಾಡಿದ್ದು, 816 ರೈತರಿಗೆ ಸಾವಿರಾರು ಕೋಟಿ ರೂ ಹಣ ಹಾಗೂ ನಿವೇಶನಗಳನ್ನು ನೀಡಲಾಗಿದೆ.
ಇದನ್ನೂ ಓದಿ: Bidadi Township: ವಿವಾದದ ನಡುವೆಯೂ ಬಿಡದಿ ಟೌನ್ ಶಿಪ್ಗೆ ಅಂತಿಮ ಅಧಿಸೂಚನೆ ಪ್ರಕಟ, ರೈತರ ಮುಂದೆ 2 ಆಯ್ಕೆ
ಇನ್ನು ಇದೀಗ ಮೂರನೇ ಹಂತದಲ್ಲಿ ಕಂಚಗಾರನಹಳ್ಳಿ ಹಾಗೂ ಬೈರಮಂಗಲ ಗ್ರಾಮಗಳ 1895 ಎಕರೆಗೆ ಅಂತಿಮ ಅಧಿಸೂಚನೆ ಹೊರಡಿಸುವ ಮೂಲಕ ಬಿಡದಿ ಟೌನ್ಶಿಪ್ ಯೋಜನೆಗೆ ಸಂಬಂಧಿಸಿದಂತೆ ಒಟ್ಟು 7351 ಎಕರೆ ಭೂಮಿಗೆ ಅಂತಿಮ ಅಧಿಸೂಚನೆ ಪ್ರಕಟಿಸಲಾಗಿದೆ. ರೈತರ ವಿರೋಧದ ನಡುವೆಯೇ ಸರ್ಕಾರ ಈ ಕ್ರಮ ಕೈಗೊಂಡಿದೆ.
1,800 ಕೋಟಿ ರೂ ಪರಿಹಾರ ವಿತರಣೆ
ಅಂದಹಾಗೆ ಜಿಬಿಡಿಎಯಿಂದ 1,800 ಕೋಟಿ ರೂ ಒಟ್ಟು ಪರಿಹಾರ ವಿತರಣೆ ಮಾಡಲಾಗಿದೆ. ಅದರಲ್ಲಿ 816 ರೈತರ ಖಾತೆಗೆ ನಗದು ರೂಪದಲ್ಲಿ 1,236 ಕೋಟಿ ರೂ ವಿತರಣೆ ಮಾಡಲಾಗಿದೆ. ಇನ್ನೂ 250 ಎಕರೆಗೆ ನಿವೇಶನಗಳ ರೂಪದಲ್ಲಿ 564 ಕೋಟಿ ರೂ ನೀಡಲಾಗಿದೆ.
ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.