‘ನಾವು ಜೀವಂತವಾಗಿದ್ದೇವೆ’ ಎಂದವರಿಗೆ ಶಾಕ್: ಯತ್ನಾಳ್ ತೋರಿಸಿದ ಡೆತ್ ಸರ್ಟಿಫಿಕೇಟ್ ಅಸಲಿ ಎಂದ ಅಧಿಕಾರಿಗಳು!

ವಿಜಯಪುರ, ಅಕ್ಟೋಬರ್​​ 08: ಮರಣ ಹೊಂದಿದವರ ಹೆಸರು ಮತದಾರರ ಪಟ್ಟಿ ಪರಿಷ್ಕರಣೆ ಕರಡು ಪಟ್ಟಿಯಲ್ಲಿದೆ ಎಂದು ನಗರ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್​ ಇತ್ತೀಚೆಗೆ ಆರೋಪ ಮಾಡಿದ್ದರು. ಪ್ರತಿಯಾಗಿ ನಾವು ಜೀವಂತವಾಗಿದ್ದೇವೆ ಎಂದು ಕೆಲ ಮತದಾರರು ಡಿಸಿ ಕಚೇರಿಗೆ ತೆರಳಿ ಪ್ರತಿಭಟನೆ ಕೂಡ ಮಾಡಿದ್ದರು. ಸದ್ಯ ವಿವಾದಕ್ಕೆ ಹೊಸ ತಿರುವು ಪಡೆದುಕೊಂಡಿದೆ. ಶಾಸಕ ಯತ್ನಾಳ್​ ಬಹಿರಂಗ ಪಡಿಸಿದ್ದ ಮರಣ ಪ್ರಮಾಣ ಪತ್ರಗಳು ಅಸಲಿ ಎಂದು ಮತದಾರರ ನೋಂದಣಾಧಿಕಾರಿಗಳೇ ದಾಖಲೆ ನೀಡಿದ್ದಾರೆ.

ಮತದಾರರ ಪಟ್ಟಿ ಪರಿಷ್ಕರಣೆ ವಿಚಾರದಲ್ಲಿ ವಿಜಯಪುರ ಜಿಲ್ಲೆಯಲ್ಲಿ ನಡೆಯುತ್ತಿರುವ ಬೆಳವಣಿಗೆಗೆಳು, ಆರೋಪ-ಪ್ರತ್ಯಾರೋಪಗಳು ರಾಜ್ಯ ಮಟ್ಟದಲ್ಲಿ ಚರ್ಚೆಗೆ ಗ್ರಾಸವಾಗಿವೆ. ಕಳೆದ ಸೆಪ್ಟೆಂಬರ್ 30ರಂದು ಶಾಸಕ ಯತ್ನಾಳ್​, ‘8 ಜನ ಮತದಾರರ ಮರಣ ಪ್ರಮಾಣ ಪತ್ರ ಪ್ರದರ್ಶನ ಮಾಡಿ, ಮೃತಪಟ್ಟವರ ಹೆಸರು ಕರಡು ಪಟ್ಟಿಯಲ್ಲಿದೆ. ಜನ್ನತ್​ನಲ್ಲಿದ್ದವರ ಹೆಸರು ಹೇಗೆ ಮತದಾರರ ಕರಡು ಪಟ್ಟಿಯಲ್ಲಿ ಬಂದಿದೆ. ಈ ಕುರಿತು ಸಂಬಂಧಿಸಿದ ಅಧಿಕಾರಿಗಳು ಪರಿಶೀಲನೆ ಮಾಡಬೇಕು’ ಎಂದು ಹೇಳಿದ್ದರು.

ಇದನ್ನೂ ಓದಿ: ನಾವು ಮೃತಪಟ್ಟಿಲ್ಲ, ಜೀವಂತವಾಗಿದ್ದೇವೆ: ಜೀವಂತ ವ್ಯಕ್ತಿಗಳ ಮರಣ ಪತ್ರ ಪ್ರದರ್ಶಿಸಿದ್ದ ಯತ್ನಾಳ್ ವಿರುದ್ಧ ಕ್ರಮಕ್ಕೆ ಆಗ್ರಹ

ಇನ್ನು ಶಾಸಕ ಯತ್ನಾಳ್​ ಆರೋಪಕ್ಕೆ ಮರಣ ಪ್ರಮಾಣ ಪತ್ರದಲ್ಲಿರುವ 8 ಜನರು, ‘ನಾವು ಮೃತಪಟ್ಟಿಲ್ಲ ಜೀವಂತ ಇದ್ದೇವೆ’ ಎಂದು ಅಕ್ಟೋಬರ್ 3ರಂದು ಜಿಲ್ಲಾಧಿಕಾರಿಗಳ ಕಚೇರಿಗೆ ತೆರಳಿ ಪ್ರತಿಭಟಿಸಿದ್ದರು. ‘ನಾವು ಮೃತಪಟ್ಟಿಲ್ಲ, ನಮ್ಮ ಪ್ರಮಾಣ ಪತ್ರವನ್ನು ಶಾಸಕರು ಹೇಗೆ ಪ್ರದರ್ಶನ ಮಾಡಿದರು’ ಎಂದು ಪ್ರಶ್ನೆ ಮಾಡಿದ್ದರು.

ಮೃತಪಟ್ಟವರೇ ಬೇರೆ; ನಾವು ಜೀವಂತವಾಗಿದ್ದೇವೆಂದು ಬಂದವರೇ ಬೇರೆ

ಇದಕ್ಕೆ ಕಾಂಗ್ರೆಸ್ ಮುಖಂಡರು ಕೂಡ ಸಾಥ್ ನೀಡಿದ್ದರು. ಇದೇ ವಿಚಾರ ಪ್ರಶ್ನಿಸಿ ಕಾಂಗ್ರೆಸ್ ಮುಖಂಡ ಅಬ್ದುಲ್ ಹಮೀದ್ ಮುಶ್ರೀಫ್ ಮಹಾನಗರ ಪಾಲಿಕೆ ಆಯುಕ್ತರಿಗೆ ಸತ್ಯಾಸತ್ಯಗೆ ಕಂಡು ಹಿಡಿಯಬೇಕೆಂದು ದೂರು ನೀಡಿದ್ದರು. ಪಾಲಿಕೆ ಆಯುಕ್ತ ವಿಜಯಕುಮಾರ ಮೆಕ್ಕಳಕಿ ಯತ್ನಾಳ್​ ಪ್ರದರ್ಶಿಸಿದ್ದ 8 ಜನರ ಮರಣ ಪ್ರಮಾಣ ಪತ್ರಗಳನ್ನು ಇ ಜನ್ಮ ತಂತ್ರಾಂಶದಲ್ಲಿ ಪರಿಶೀಲನೆ ಮಾಡಿದ್ದು, ಡೆತ್ ಸರ್ಟಿಫಿಕೇಟ್ಗಳು ಅಸಲಿ ಎಂದು ವರದಿ ಬಂದಿದೆ. ಜೊತೆಗೆ ಯತ್ನಾಳ್​ ಪ್ರದರ್ಶನ ಮಾಡಿರುವ 8 ಜನರ ಮರಣ ಪ್ರಮಾಣ ಪತ್ರಗಳು ನೈಜವಾಗಿವೆ. ಮೃತಪಟ್ಟವರೇ ಬೇರೆ, ನಾವು ಜೀವಂತವಾಗಿದ್ದೇವೆ ಎಂದು ಬಂದವರೇ ಬೇರೆ. ಜೀವಂತವಾಗಿದ್ದೇವೆ ಎಂಬುವವರ ಹೆಸರು ಮತದಾರರ ಪಟ್ಟಿಯಲ್ಲಿರುತ್ತವೆ ಎಂದು ಮತದಾರರ ನೋಂದನಾಧಿಕಾರಿಗಳು ವರದಿ ನೀಡಿದ್ದಾರೆ.

ಕಾಂಗ್ರೆಸ್​ ವಿರುದ್ಧ ಯತ್ನಾಳ್​ ಬೆಂಬಲಿಗರು ಆಕ್ರೋಶ

ವಿಜಯಪುರ ನಗರ ಮತಕ್ಷೇತ್ರದ 8 ಜನರ ಮರಣೋತ್ತರ ಪ್ರಮಾಣ ಪತ್ರ ಪ್ರದರ್ಶನ ಮಾಡಿದ್ದ ಯತ್ನಾಳ್​ ಮೇಲೆ ಕಾಂಗ್ರೆಸ್ ಮುಖಂಡರು, ಪದಾಧಿಕಾರಿಗಳು ಗಂಭೀರ ಆರೋಪ ಮಾಡಿದ್ದರು. ಇದೀಗ ಮತದಾರರ ನೋಂದಣಾಧಿಕಾರಿಗಳು ನೀಡಿದ ವರದಿಯಿಂದ ಯತ್ನಾಳ್​ ಪ್ರದರ್ಶನ ಮಾಡಿದ್ದ 8 ಜನರ ಡೆತ್ ಸರ್ಟಿಫಿಕೇಟ್​​ಗಳು ನಿಜವೆಂಬುವುದು ಸಾಬೀತಾಗಿದೆ. ಸುಖಾಸುಮ್ಮನೆ ಆರೋಪ ಮಾಡಿದ್ದಾರೆಂದು ಯತ್ನಾಳ್​ ಬೆಂಬಲಿಗರು ಆಕ್ರೋಶ ಹೊರಹಾಕಿದ್ದಾರೆ.

ಕಾಂಗ್ರೆಸ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿಯ ಮೃತ ತಂದೆ ಹೆಸರು ಎಸ್​ಐಆರ್ ಪಟ್ಟಿಯಲ್ಲಿ ಪತ್ತೆ 

ಅಸಲಿಗೆ ಕಾಂಗ್ರೆಸ್ ಪದಾಧಿಕಾರಿಗಳೇ ಮೃತಪಟ್ಟಿರುವ ತಮ್ಮ ತಂದೆಯ ಹೆಸರನ್ನು ಕರಡು ಪಟ್ಟಿಯಲ್ಲಿರಿಸಿದ್ದಾರೆ. ಕಾಂಗ್ರೆಸ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಇರ್ಫಾನ್ ಶೇಖಟ್ ಅವರ ತಂದೆ ಮುನೀರ್ ಅಹ್ಮದ್ ಶೇಖ್ 2025ರಲ್ಲಿ ಮೃತಪಟ್ಟಿದ್ದಾರೆ. ಮುನೀರ್ ಅಹ್ಮದ್ ಶೇಖ್ ಮರಣ ಹೊಂದಿರುವುದನ್ನು ಇರ್ಫಾನ್ ಶೇಖ್ ಸ್ವತಃ ಸಾಮಾಜಿಕ ಜಾಲತಾಣದಲ್ಲಿ ಫೋಟೋ ಸಮೇತ ಹಾಕಿಕೊಂಡಿದ್ದರು. ಆದರೆ ಎಸ್​ಐಆರ್ ಪಟ್ಟಿಯಲ್ಲಿ ಅವರ ತಂದೆಯ ಹೆಸರು ಹೇಗೆ ಬಂತು ಎಂದು ಮರು ಪ್ರಶ್ನೆ ಮಾಡಿದ್ದಾರೆ. ಕಾಂಗ್ರೆಸ್ ಪಕ್ಷವೇ ಎಸ್​ಐಆರ್​ ಅಕ್ರಮದಲ್ಲಿ ಭಾಗವಹಿಸಿದೆ. ಈ ನಿಟ್ಟಿನಲ್ಲಿ ಚುನಾವಣಾಧಿಕಾರಿಗಳು ತನಿಖೆ ನಡೆಸಿ ಕಾನೂನು ಕ್ರಮ ತೆಗೆದುಕೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ: ಫಾರ್ಮ್-7 ದುರ್ಬಳಕೆ ಆರೋಪ: ಬಿಜೆಪಿ ಶಾಸಕನ ಹೆಸರು ಉಲ್ಲೇಖಿಸಿ ಸೌಮ್ಯಾ ರೆಡ್ಡಿ ದೂರು

ಸದ್ಯ ವಿಜಯಪುರ ಜಿಲ್ಲೆಯಲ್ಲಿ ಮತದಾರರ ಪಟ್ಟಿ ಪರಿಷ್ಕರಣೆ ವಿಚಾರ ವಾದ, ವಿವಾದದ ಕೇಂದ್ರವಾಗಿದೆ. ಮುಂದಿನ ದಿನಗಳಲ್ಲಿ ಈ ಆರೋಪ, ಪ್ರತ್ಯಾರೋಪ ಮತ್ತೆ ಯಾವ ಸ್ವರೂಪ ಪಡೆದುಕೊಳ್ಳುತ್ತದೆ ಕಾಯ್ದು ನೀಡಬೇಕಿದೆ. ರಾಜಕೀಯ ಪಕ್ಷಗಳ ಜಟಾಪಟ್ಟ ಮಧ್ಯೆ ಸಾಮಾನ್ಯ ಮತದಾರರು ಗೊಂದಕ್ಕೀಡಾಗುವಂತಾಗಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 9:56 pm, Thu, 8 October 26