ಚುನಾವಣೆ ಮಧ್ಯೆ ಬಿಜೆಪಿಯಲ್ಲಿ ಅಸಮಾಧಾನ ಸ್ಫೋಟ: ಟಿಕೆಟ್‌ ವಂಚಿತರಿಂದ ಬಂಡಾಯದ ಬಿಸಿ..!

ವಿಜಯಪುರ:  ಕಳೆದ 2019 ರಲ್ಲೇ ನಡೆಯಬೇಕಿದ್ದ 35 ಸದಸ್ಯ ಬಲದ ವಿಜಯಪುರ ಮಹಾನಗರ ಪಾಲಿಕೆಯ ಚುನಾವಣೆ ಹಲವಾರು ಕಸರತ್ತಿನ ಬಳಿಕ ಮೂರುವರೆ ವರ್ಷದ ಬಳಿಕ ನಡೆಯುತ್ತಿದೆ. ನಗರದ ಸಭೆಯಿಂದ ಮಹಾನಗರ ಪಾಲಿಕೆಯಾದ ಬಳಿಕ ಇದೇ ಮೊದಲ ಬಾರಿಗೆ ಚುನಾವಣೆ ನಡೆಯುತ್ತಿದೆ. ಸದ್ಯ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಮುಕ್ತಾಯವಾಗಿದ್ದು ಕೇಸರಿ ಪಡೆಯಲ್ಲಿ ಭಿನ್ನಮತ ಸ್ಪೋಟಗೊಂಡಿದೆ. ಕಾಂಗ್ರೆಸ್ ಹಾಗೂ ಇತರೆ ಪಕ್ಷಗಳಿಗಿಂತ ಬಿಜೆಪಿಯಲ್ಲಿ ಆಂತರಿಕ ಅಸಮಾಧಾನ ಬಂಡಾಯ ಹಾಗೂ ಪಕ್ಷ ಬಿಟ್ಟು ಬೇರೆ ಪಕ್ಷದಿಂದ ಕೇಸರಿ ಕಲಿಗಳು ನಾಮಪತ್ರ ಸಲ್ಲಿಸುವಂತೆ ಮಾಡಿದೆ. ಜೊತೆಗೆ 35 ವಾರ್ಡ್ ಗಳ ಪೈಕಿ ಎರಡು ವಾರ್ಡ್ ಗಳಲ್ಲಿ ಬಿಜೆಪಿ ತನ್ನ ಕ್ಯಾಂಡಿಡಿಯೇಟ್ ಹಾಕದೇ ಇರೋದು ಸಹ ರಾಜಕೀಯ ಪಡಸಾಲೆಯಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಈ ಕುರಿತ ಒಂದು ವರದಿ ಇಲ್ಲಿದೆ ನೋಡಿ.

ವಿಜಯಪುರ ಮಹಾನಗರ ಪಾಲಿಕೆ ಚುನಾವಣೆ ನಡೆಯುತ್ತಿದೆ. ನಿನ್ನೆ(ಅ.18) ನಾಮಪತ್ರ ಸಲ್ಲಿಕೆ ಮುಕ್ತಾಯವಾಗಿದೆ.  ನಾಮಪತ್ರ ಸಲ್ಲಿಕೆಗೂ ಮುನ್ನ ಬಿಜೆಪಿಯಲ್ಲಿ ಆಂತರಿಕ ಸ್ಪೋಟವಾಗಿದೆ. ಕಾರಣ ಎರಡು ಬಾರಿ ಪಾಲಿಕೆಯ ಮೇಯರ್ ಆಗಿದ್ದವರಿಗೆ, ಉಪ ಮೇಯರ್ ಆಗಿದ್ದವರಿಗೆ ಹಾಗೂ ಕೆಲ ಕಾರ್ಪೊರೇಟರ್ ಗಳಿಗೆ ಹಾಗೂ ಪಕ್ಷದ ಪದಾಧಿಕಾರಿಯಾಗಿದ್ದವರಿಗೆ ಟಿಕೆಟ್ ನೀಡಿಲ್ಲ.ಈ ಹಿನ್ನೆಲೆಯಲ್ಲಿ ಟಿಕೆಟ್ ನಿರೀಕ್ಷೆಯಲ್ಲಿದ್ದವರಿಗೆ ಶಾಕ್ ಕೊಟ್ಟಿದೆ.

ಬಿಜೆಪಿ ಸಂಕಲ್ಪ ಯಾತ್ರೆ ಮೊಟಕುಗೊಳಿಸಿ ದಿಢೀರ್ ದಿಲ್ಲಿಗೆ ಹೋಗಿದ್ಯಾಕೆ? ಸ್ಪಷ್ಟನೆ ಕೊಟ್ಟ ಬಿಎಸ್​ವೈ

ನಮಗೆ ಟಿಕೆಟ್ ನೀಡುವ ಭರವಸೆ ನೀಡಿ ಕೊನೆಯಲ್ಲಿ ಕೈ ಕೊಟ್ಟಿದ್ದಾರೆ. ಆದ್ದರಿಂದ ನಾವು ಬಂಡಾಯ ಹಾಗೂ ಇತರೆ ಪಕ್ಷಗಳಿಂದ ನಾಮಪತ್ರ ಸಲ್ಲಿಕೆ ಮಾಡಿದ್ದೇವೆ ಎಂದು ಅಸಮಾಧಿನಿತರು ಟಿವಿ9ಗೆ ಮಾಹಿತಿ ನೀಡಿದ್ದಾರೆ. ಅದರಲ್ಲೂ ಮುಖ್ಯವಾಗಿ ಎರಡು ಬಾರಿ ಪಾಲಿಕೆಯ ಮೇಯರ್ ಆಗಿದ್ದ ಸಂಗೀತಾ ಪೋಳ, ಉಪ ಮೇಯರ್ ಆಗಿದ್ದ ಆನಂದ ಧುಮಾಳೆ, ಲಕ್ಷ್ಮೀ ಕನ್ನೋಳ್ಳಿ ಅವರಿಗೆ ಟಿಕೆಟ್ ನೀಡಿಲ್ಲಾ. ಜೊತೆಗೆ ಕಳೆದ ಬಾರಿ ಕಾರ್ಪೋರೇಟರ್ ಗಳಾಗಿದ್ದ ಪ್ರಕಾಶ ಮಿರ್ಜಿ, ಗೋಪಾಲ ಘಟಕಾಂಬಳೆ, ಶಂಕರ ಕುಂಬಾರ, ಅಪ್ಪು ಸಜ್ಜನ್ ಗೆ ಈ ಬಾರಿ ಬಿಜೆಪಿ ಕೋಕ್ ನೀಡಿದೆ. ಕಾರಣ ಬಿಜೆಪಿಯಲ್ಲಿ ತೀವ್ರ ಅಸಮಾಧಾನ ಸ್ಪೋಟಗೊಂಡಿದೆ.

30 ವರ್ಷಗಳಿಂದ ಪಕ್ಷದ ವಿವಿಧ ಹುದ್ದೆಗಳಲ್ಲಿ ಕೆಲಸ ಮಾಡಿದ ರವಿಕಾಂತ ಬಗಲಿ ಬಂಡಾಯ ಅಭ್ಯರ್ಥಿಯಾಗಿ, ಎರಡು ಬಾರಿ ಮೇಯರ್ ಆಗಿದ್ದ ಸಂಗೀತಾ ಪೋಳಪರಿಶಿಷ್ಠ ಜಾತಿಯ ಮಹಿಳೆಗೆ ಮೀಸಲಾಗಿರುವ ವಾರ್ಡ್ ಸಂಖ್ಯೆ 33 ರಿಂದ, ಉಪ ಮೇಯರ್ ಆಗಿದ್ದ ಆನಂದ ಧುಮಾಳೆ ಹಿಂದುಳಿದ ಬ ವರ್ಗಕ್ಕೆ ಮೀಸಲಾಗಿರುವ 30ನೇ ವಾರ್ಡಿನಿಂದ ಜೆಡಿಎಸ್ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದಾರೆ.

ರವಿಕಾಂತ ಬಗಲಿ ಟಿಕೆಟ್ ಸಿಗದ ಕಾರಣ ಬಂಡಾ ಬಿಜೆಪಿ ಅಭ್ಯರ್ಥಿಯಾಗಿ ವಾರ್ಡ್ ನಂಬರ್ 22 ರಿಂದ ನಾಂಮಪತ್ರ ಸಲ್ಲಿಕೆ ಮಾಡಿದ್ದಾರೆ. ಟಿಕೆಟ್ ಸಿಗದ ಕಾರಣ ತೀವ್ರ ಬೇಸರವನ್ನು ವ್ಯಕ್ತಪಡಿಸಿದ್ದಾರೆ. ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ ಹಾಗೂ ಮಾಜಿ ಶಾಸಕ ಅಪ್ಪು ಪಟ್ಟಣಶೆಟ್ಟಿ ಜಗಳದಲ್ಲಿ ನಾವು ಬಲಿಯಾಗಿದ್ದೇವೆ. ಕೆಲವರ ಮೋಸಕ್ಕೆ ಗುರಿಯಾವೆಂದು ಆರೋಪ ಮಾಡಿದ್ದಾರೆ.

ಎರಡು ವಾರ್ಡ್​ಗಳಲ್ಲಿ ಸೋಲೋಪ್ಪಿಕೊಂಡ ಬಿಜೆಪಿ

ಇದರಾಚೆ ಕೇಂದ್ರ ಮತ್ತು ರಾಜ್ಯದಲ್ಲಿ ಬಿಜೆಪಿ ಸರಕಾರ, ಎಂಪಿ ಮತ್ತು ಎಂಎಲ್‌ಎ ಬಿಜೆಪಿಯವರೇ ಆಗಿರುವುದರಿಂದ ಟಿಕೆಟ್ ಆಕಾಂಕ್ಷಿಗಳ ಸಂಖ್ಯೆ ಹೆಚ್ಚಾಗಿತ್ತು. ತೀವ್ರ ಪೈಪೋಟಿಯಿಂದ ಕೂಡಿದ್ದ ಟಿಕೆಟ್ ಹಂಚಿಕೆ ವಿಚಾರದಲ್ಲಿ ಬಿಜೆಪಿಯಲ್ಲಿ ಕೊನೆ ಕ್ಷಣದವರೆಗೂ ತೀವ್ರ ಕಸರತ್ತು ನಡೆಯಿತು. ಆದರೆ, ಸಾಕಷ್ಟು ಆಕಾಂಕ್ಷಿಗಳ ಸಂಖ್ಯೆ ಹೆಚ್ಚಳದ ಮಧ್ಯೆಯೂ ಎರಡು ವಾರ್ಡುಗಳಿಗೆ ಅಭ್ಯರ್ಥಿಗಳನ್ನು ಕಣಕ್ಕಿಳಿಸದೇ ಬಿಜೆಪಿ ಮತದಾನಕ್ಕೂ ಮುಂಚೆಯೇ ಸೋಲೊಪ್ಪಿಕೊಂಡಂತಾಗಿದೆ. ವಾರ್ಡ್ ಸಂಖ್ಯೆ 20 ಮತ್ತು 27ರಲ್ಲಿ ಬಿಜೆಪಿಯಿಂದ ಯಾರೊಬ್ಬರೂ ಕಣಕ್ಕಿಳಿದಿಲ್ಲ. ಇದರಿಂದಾಗಿ ಬಿಜೆಪಿಯಲ್ಲಿ ಎಲ್ಲವೂ ಸರಿಯಿದ್ದರೂ, ಪಕ್ಷ ಸಂಘಟನೆಯಲ್ಲಿ ಇನ್ನೂ ಹಲವಾರು ಲೋಪದೋಷಗಳಿರುವುದು ಬಹಿರಂಗವಾಗಿದೆ.

ಎರಡು ವಾರ್ಡ್​ಗಳಲ್ಲಿ ಸ್ಪರ್ಧೆಗೆ ಹಿಂಜರಿದ ಮುಖಂಡರು

ಹಿಜಾಬ್ ವಿವಾದದ ವಿಚಾರ, ಹಲಾಲ್ ಕಟ್ ಜಟ್ಕಾ ಕಟ್ ವಿಚಾರಗಳು ಬಿಜೆಪಿ ಮೇಲೆ ತೀವ್ರ ಪರಿಣಾಮವನ್ನು ಬೀರಿದವಾ. ಬಿಜೆಪಿ ಮುಸ್ಲೀಂ ವಿರೋಧಿ ಲೇಬಲ್ ನನ್ನು ಇಲ್ಲಿ ತನಗೆ ತಾನೇ ಅಂಟಿಸಿಕೊಂಡಿತಾ ಎಂಬ ಪ್ರಶ್ನೆಯೂ ಎದ್ದಿದೆ. ಕಾರಣ ಮುಸ್ಲೀಂ ಮತದಾರರ ಬಾಹುಳ್ಯವಿರೋ ವಾರ್ಡ್ 20 ಹಾಗೂ 27 ರಲ್ಲಿ ಬಿಜೆಪಿ ತನ್ನ ಉಮ್ಮೀದುವಾರರನ್ನು ನಿಲ್ಲಿಸಿಲ್ಲ. ಅಲ್ಲಿ ಪಕ್ಷದಿಂದ ಮುಸ್ಲಿಂ ಸಮುದಾಯದ ಅಭ್ಯರ್ಥಿಗಳನ್ನಾದರೂ ಹಾಕಬೇಕಿತ್ತು. ಆದರೆ ಬಿಜೆಪಿಯಿಂದ ಸ್ಪರ್ಧೆ ಮಾಡಲು ಯಾರೋಬ್ಬ ಮಸ್ಲಿಂ ಅಭ್ಯರ್ಥಿಗಳು ಟಿಕೆಟ್ ಗಾಗಿ ಮುಂದೆ ಬಂದಿಲ್ಲ. ಹಿಂದೂ ಸಮುದಾಯದ ಯಾರೋಬ್ಬರನ್ನು ನಿಲ್ಲಿಸಿದರೂ ಅಲ್ಲಿ ಬಿಜೆಪಿ ಗೆಲ್ಲೋದು ಕಷ್ಟ ಎಂದು ಎರಡು ವಾರ್ಡ್ ಗಳಿಗೆ ಬಿಜೆಪಿ ಅಭ್ಯರ್ಥಿಗಳನ್ನೇ ಹಾಕಿಲ್ಲ. ಕಾರಣ ಅಸಮಾಧಾನಿತರು ಹಾಗೂ ಮುಂಖಡರು ಬಿಜೆಪಿಯಲ್ಲಿ ಶಿಸ್ತು ಇಲ್ಲ. ಎಲ್ಲವೂ ಸರಿಯಲ್ಲ ಎಂದು ಆರೋಪವನ್ನು ಮಾಡಿದ್ದಾರೆ.

ಒಟ್ಟಾರೆ ನಗರದಲ್ಲೀಗಾ ಮಹಾನಗರ ಪಾಲಿಕೆಯ ಚುನಾವಣೆಯ ರಂಗು ಏರುತ್ತಿದೆ. ಕಾಂಗ್ರೆಸ್ ಜೆಡಿಎಸ್ ಹಾಗೂ ಇತರೆ ಪಕ್ಷಗಳಿಗಿಂತ ಬಿಜೆಪಿ ಪಕ್ಷದಲ್ಲಿ ಹೆಚ್ಚು ಅಸಮಾಧಾನದ ಹೊಗೆ ಎದ್ದಿದೆ. ಈ ಅಸಮಾಧಾನದ ಹೊಗೆಯನ್ನು ಜಿಲ್ಲಾ ಬಿಜೆಪಿ ಮುಖಂಡರು ಶಾಸಕರು ಸಂಸದರು ಹೇಗೆ ಶಮನ ಮಾಡುತ್ತಾರೆ ಎಂಬುದು ಕಾದುನೋಡಬೇಕಿದೆ.

ವರದಿ: ಅಶೋಕ ಯಡಳ್ಳಿ, ಟಿವಿ9 ವಿಜಯಪುರ.

Published On - 9:11 pm, Tue, 18 October 22