ಆದಿತ್ಯನ ಅಡ್ಡೆ House of Life ಟ್ರೇಡ್ ಪರವಾನಗಿ ಅವಧಿ ಮುಗಿದು ಯಾವುದೋ ಕಾಲವಾಗಿದೆ!

ತಲಾ 6 ಲಕ್ಷ ರೂಪಾಯಿ ಕೊಟ್ಟು ಫಾರ್ಮ್​ ಹೌಸ್​ ಮಾಡಲು ಅಂದಿನ ವರ್ಚಸ್ವೀ ರಾಜಕಾರಣಿ ಜೀವರಾಜ್​ ಆಳ್ವಾ ಖರೀಸಿದ್ದ ಜಾಗವನ್ನು ಅವರ ನಿಧನಾನಂತರ ಅವರ ಸುಪುತ್ರ ಆದಿತ್ಯ ತನ್ನ ಸುಪರ್ದಿಗೆ ತೆಗೆದುಕೊಂಡಿದ್ದಾನೆ. ಆದ್ರೆ ಅದನ್ನು ಅಡ್ಡೆಯನ್ನಾಗಿ ಮಾಡಿಕೊಂಡಿರುವ ಡ್ರಗ್ಸ್ ಕೇಸ್ ಆರೋಪಿ-ಆರು ಆದಿತ್ಯ ಆಳ್ವಾ ಸದ್ಯಕ್ಕೆ ಪೊಲೀಸರ ಕಣ್ತಪ್ಪಿಸಿ, ವಿದೇಶಕ್ಕೆ ಪರಾರಿಯಾಗಿದ್ದಾನೆ ಎಂದು ಸ್ವತಃ ಸಿಸಿಬಿ ಮೂಲಗಳೇ ಹೇಳುತ್ತಿವೆ.

ಈ ಮಧ್ಯೆ, ಇಂದು ಬೆಳಗ್ಗೆ ಮೂವರು ಹಿರಿಯ ಅಧಿಕಾರಿಗಳ ನೇತೃತ್ವದ ಸಿಸಿಬಿ ತಂಡ ಅದೇ House of Life ಹೆಸರಿನ ರೆಸಾರ್ಟ್​ ಮೇಲೆ ಈ ಕ್ಷಣದ ವರೆಗೂ ದಾಳಿ ಮುಂದುವರಿಸಿದ್ದಾರೆ. ಈ ಮಧ್ಯೆ, ಸದರಿ ರೆಸಾರ್ಟ್ ಬಿಬಿಎಂಪಿ ವ್ಯಾಪ್ತಿಗೆ ಬರುವುದರಿಂದ ಸ್ಥಳೀಯ ಬಿಬಿಎಂಪಿ ಅಧಿಕಾರಿಗಳು ಸಿಸಿಬಿ ದಾಳಿ ವಿಚಾರ ಕೇಳಿಸಿಕೊಂಡು ದಡಬಡಾ ಅಂತಾ ಆ ರೆಸಾರ್ಟ್​ನತ್ತ ಎದ್ದುಹೋಗಿದ್ದಾರೆ.

ಬಿಬಿಎಂಪಿ ಅಧಿಕಾರಿಗಳ ವಿಚಾರಣೆ ವೇಳೆ ಬಿಬಿಎಂಪಿಗೆ ಆಘಾತಕಾರಿ ವಿವಾರವೊಂದು ತಿಳಿದುಬಂದಿದೆ. ಅದೇನೆಂದ್ರೆ ಹೌಸ್ ಆಫ್ ಲೈಫ್‌ನ ಟ್ರೇಡ್ ಪರವಾನಗಿ ಅವಧಿ ಮುಗಿದಿರುವುದು! 2018ರ ಬಳಿಕ ಟ್ರೇಡ್​ ಲೈಸೆನ್ಸ್​ ರಿನಿವಲ್​ ಮಾಡಿಲ್ಲ. ಕಿರಣ್​ ಕಾರ್ತಿಕ್​ ಎಂಬವರ ಹೆಸರಿನಲ್ಲಿ ಟ್ರೇಡ್​ ಲೈಸೆನ್ಸ್ ಇದೆ. ರೆಸಾರ್ಟ್​, ಹೊಟೇಲ್ ಮತ್ತು ರೆಸ್ಟೋರೆಂಟ್​ಗೆ ಲೈಸೆನ್ಸ್​ ಪಡೆಯಲಾಗಿತ್ತು. ಆದ್ರೆ 2018 ರ ಬಳಿಕ ಲೈಸೆನ್ಸ್​ ರಿನಿವಲ್​ ಮಾಡಿರಲಿಲ್ಲ. ಆದ್ರೂ ನಿನ್ನೆ ರಾತ್ರಿ ತನಕವೂ ಅಲ್ಲಿ ನಿರಾತಂಕವಾಗಿ ಪಾರ್ಟಿಗಳನ್ನ ಆಯೋಜಿಸಲಾಗಿತ್ತು ಎಂಬ ಆಘಾತಕಾರಿ ಸಂಗತಿ ಕೇಳಿಬಂದಿದೆ.