Karnataka Budget 2021: ಕರ್ನಾಟಕದಲ್ಲಿ ಸರ್ಕಾರಿ ನೌಕರರು ಮರೆಯಲಾಗದಂಥ ಹೆಲ್ತ್ ಸ್ಕೀಮ್ ತರಲು ಬಿಎಸ್​ವೈ ಸಿದ್ಧತೆ?

ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರಿಗೆ ಅನುಕೂಲ ಆಗುವಂತೆ, ಸಿಜಿಎಚ್​ಎಸ್ (Central Government Health Scheme – CGHS) ಮಾದರಿಯಲ್ಲಿ ಹೆಲ್ತ್ ಸ್ಕೀಮ್ (ಆರೋಗ್ಯ ಯೋಜನೆ) ತರುವುದಕ್ಕೆ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ನೇತೃತ್ವದ ಸರ್ಕಾರ ಆಲೋಚನೆ ಮಾಡಿದೆ ಎಂದು ಉನ್ನತ ಮೂಲಗಳಿಂದ ಟಿವಿ9 ಕನ್ನಡ ಡಿಜಿಟಲ್​ಗೆ ತಿಳಿದುಬಂದಿದೆ. ಈ ಯೋಜನೆಯನ್ನು ದೇಶಕ್ಕೇ ಮಾದರಿ ಆಗುವಂತೆ ರೂಪಿಸುವ ನಿಟ್ಟಿನಲ್ಲಿ ಎಲ್ಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ. ಈಗಾಗಲೇ ಹೆಸರನ್ನೂ ಅಂತಿಮಗೊಳಿಸಲಾಗಿದ್ದು, ಅಂದುಕೊಂಡ ಸ್ವರೂಪದಲ್ಲೇ ಜಾರಿಗೆ ಬಂದಲ್ಲಿ ಯಡಿಯೂರಪ್ಪ ಅವರ ಹೆಸರು ಕರ್ನಾಟಕದಲ್ಲಿ ಚಿರಸ್ಥಾಯಿಯಾಗಿ ಉಳಿಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಲಾಗಿದೆ.

ಕೇಂದ್ರ ಸರ್ಕಾರಿ ನೌಕರರಿಗಾಗಿ ಸಿಜಿಎಚ್​ಎಸ್ ಇದ್ದು, ರಾಜ್ಯ ಸರ್ಕಾರಿ ನೌಕರರಿಗೆ ಈ ರೀತಿಯ ಅನುಕೂಲಗಳಿಲ್ಲ. ಆದ್ದರಿಂದ ಖಾಸಗಿ ಆಸ್ಪತ್ರೆಗಳಲ್ಲಿ ದಾಖಲಾದರೂ ರಾಜ್ಯ ಸರ್ಕಾರಿ ನೌಕರರು ಮತ್ತು ಅವರ ಕುಟುಂಬದವರಿಗೆ ಉತ್ತಮ ಚಿಕಿತ್ಸೆ ಸೌಲಭ್ಯ ದೊರಕಬೇಕು ಎಂಬ ದೂರಾಲೋಚನೆಯನ್ನು ಇರಿಸಿಕೊಂಡು ಈಗ ಯೋಜನೆಯನ್ನು ಸಿದ್ಧಪಡಿಸಲಾಗಿದೆ. ಸಿಜಿಎಚ್​ಎಸ್​ನಲ್ಲಿ ಇರುವ ಲೋಪ- ದೋಷಗಳನ್ನು ಗುರುತಿಸಿ, ಅದನ್ನು ರಾಜ್ಯ ಸರ್ಕಾರದ ಆರೋಗ್ಯ ಯೋಜನೆಯಲ್ಲಿ ಸರಿಪಡಿಸಲಾಗಿದೆ ಎಂದು ಮಾಹಿತಿ ದೊರೆತಿದೆ.

ಇನ್ನೊಂದು ಮೂಲದ ಪ್ರಕಾರ, ಯೋಜನೆಗೆ ‘ಭಾಗ್ಯ ಸಂಜೀವಿನಿ ಯೋಜನಾ’ (ಬಿಎಸ್​ವೈ) ಎಂದು ಹೆಸರನ್ನಿಡಲು ಆಲೋಚಿಸಲಾಗಿದೆ. ರಾಜ್ಯ ಸರ್ಕಾರಿ ನೌಕರರಿಗೆ ಮತ್ತು ಅವರ ಕುಟುಂಬದವರಿಗೆ ವೈದ್ಯಕೀಯ ವೆಚ್ಚವನ್ನು ಭರಿಸುವಂತಹ ಯೋಜನೆ ಇದಾಗಿರುತ್ತದೆ. ಸದ್ಯಕ್ಕೆ ವಿವಿಧ ಇಲಾಖೆಗಳಲ್ಲಿ ಒಂದೊಂದು ರೀತಿಯ ಸ್ಕೀಮ್ ಇದೆ. ಆದರೆ ಭಾಗ್ಯ ಸಂಜೀವಿನಿ ಜಾರಿಗೆ ಬಂದಲ್ಲಿ ರಾಜ್ಯ ಸರ್ಕಾರಿ ನೌಕರರಿಗೆ ಕ್ಯಾಶ್​​ಲೆಸ್ (ನಗದುರಹಿತ) ಚಿಕಿತ್ಸೆ ಪಡೆದುಕೊಳ್ಳುವುದು ಸಮಸ್ಯೆ ಆಗುವುದಿಲ್ಲ ಎನ್ನಲಾಗುತ್ತಿದೆ.

ಒಂದು ವೇಳೆ ರೀಎಂಬರ್ಸ್​ಮೆಂಟ್ ಅಂತಾದರೂ ಹೆಚ್ಚಿನ ಶ್ರಮವಿಲ್ಲದೆ ಅದನ್ನು ಪಡೆಯುವಂತಾಗಬೇಕು. ಆದರೆ ಬಹುತೇಕ ಕ್ಯಾಶ್​ಲೆಸ್ ಚಿಕಿತ್ಸೆಯೇ ಸಿಗಬೇಕು. ಆ ಮೊತ್ತ ಹದಿನೈದು ಲಕ್ಷದ ತನಕ ಇದ್ದರೂ ಯಾವುದೇ ಅಡೆತಡೆ ಆಗದೆ ಚಿಕಿತ್ಸೆ ಸಿಗುವಂತಾಗಬೇಕು ಎಂದು ದೂರದೃಷ್ಟಿ ಇರಿಸಿಕೊಳ್ಳಲಾಗಿದೆ. ಈ ಮೊತ್ತ ಕಡಿಮೆಯೂ ಆಗಬಹದು. ಆದರೆ ಪರಿಣಾಮಕಾರಿಯಾದ ಅನುಷ್ಠಾನ ಖಾತ್ರಿಯಾಗಿ, ಇಡೀ ದೇಶದಲ್ಲೇ ಮಾದರಿಯಾಗುವಂಥ ಯೋಜನೆ ತರಬೇಕು ಎಂಬ ಉದ್ದೇಶವಂತೂ ಇದೆ. ಕರ್ನಾಟಕ ಬಜೆಟ್ 2021ರಲ್ಲಿ ಅದು ಘೋಷಣೆ ಆಗಬಹುದು ಎನ್ನಲಾಗುತ್ತಿದೆ.

ಇದನ್ನೂ ಓದಿ: ಕರ್ನಾಟಕ ಬಜೆಟ್ 2021: ಗ್ರಾಹಕರು ಖರೀದಿಸುವ ಮೊತ್ತದ ಶೇ 90ರಷ್ಟು ಹಣ ರೈತರ ಕೈ ಸೇರಲಿ- RS ದೇಶಪಾಂಡೆ