Kangana Ranaut: ಜಯಲಲಿತಾ ಪಾತ್ರಕ್ಕಾಗಿ 20 ಕೆಜಿ ತೂಕ ಹೆಚ್ಚಿಸಿಕೊಂಡ ಕಂಗನಾ! ಬದಲಾವಣೆ ಕಂಡು ಫ್ಯಾನ್ಸ್ ಫಿದಾ
Jayalalithaa Biopic: ಸದಾ ಕಾಲ ಕಿರಿಕ್ಗಳಿಂದಲೇ ಸೌಂಡು ಮಾಡುವ ಕಂಗನಾ ರಣಾವತ್ ಅವರು ಈಗ ‘ತಲೈವಿ’ ಸಿನಿಮಾ ವಿಷಯಕ್ಕೆ ಮತ್ತೆ ಸುದ್ದಿ ಆಗಿದ್ದಾರೆ. ಅವರ ಟ್ರಾನ್ಸ್ಫಾರ್ಮೇಷನ್ ಕಂಡು ಫ್ಯಾನ್ಸ್ ಅಚ್ಚರಿಪಟ್ಟಿದ್ದಾರೆ.
Updated on:Mar 22, 2021 | 11:17 AM
ಬಾಲಿವುಡ್ ನಟಿ ಕಂಗನಾ ರಣಾವತ್ ಅವರು ಸಿನಿಮಾ ಮಾಡುವುದಕ್ಕಿಂತಲೂ ವಿವಾದ ಮಾಡಿಕೊಳ್ಳುವುದೇ ಹೆಚ್ಚು ಎಂಬಂತಹ ವಾತಾವರಣ ನಿರ್ಮಾಣ ಆಗಿದೆ. ಹಾಗಂತ ಅವರು ಸಿನಿಮಾವನ್ನು ನಿರ್ಲಕ್ಷಿಸಿಲ್ಲ. ತಾವು ನಿಭಾಯಿಸುವ ಪಾತ್ರಕ್ಕಾಗಿ ಸೂಕ್ತ ತಯಾರಿ ಮಾಡಿಕೊಳ್ಳುತ್ತಾರೆ. ಅಗತ್ಯವಾದ ಟ್ರಾನ್ಸ್ಫಾರ್ಮೇಷನ್ ಮಾಡಿಕೊಳ್ಳಲು ಕೂಡ ಅವರು ಸಿದ್ಧರಿರುತ್ತಾರೆ. ಈ ಮಾತಿಗೆ ಈಗ ಒಂದು ಲೇಟೆಸ್ಟ್ ಉದಾಹರಣೆ ಸಿಕ್ಕಿದೆ. ‘ತಲೈವಿ’ ಸಿನಿಮಾದಲ್ಲಿನ ಅವರ ಬದಲಾವಣೆ ಕಂಡು ಎಲ್ಲರೂ ಬೆರಗಾಗಿದ್ದಾರೆ.
ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜಯಲಲಿತಾ ಜೀವನಾಧಾರಿತ ‘ತಲೈವಿ’ ಸಿನಿಮಾದಲ್ಲಿ ಕಂಗನಾ ಅವರು ಜಯಲಲಿತಾ ಪಾತ್ರವನ್ನು ಮಾಡುತ್ತಿದ್ದಾರೆ. ಈ ಬಯೋಪಿಕ್ ಮೇಲೆ ಅವರಿಗೆ ಸಿಕ್ಕಾಪಟ್ಟೆ ಭರವಸೆ ಇದೆ. ಈ ಹಿಂದೆ ಬಿಡುಗಡೆಯಾದ ಒಂದು ಪೋಸ್ಟರ್ನಲ್ಲಿ ಕಂಗನಾ ಅವರು ಪಕ್ಕಾ ಜಯಲಲಿತಾ ರೀತಿ ಕಾಣಿಸಿಕೊಂಡಿದ್ದರು. ಇನ್ನೊಂದೆರಡು ಹೊಸ ಪೋಸ್ಟರ್ಗಳನ್ನು ಕಂಗನಾ ಹಂಚಿಕೊಂಡಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.
ರಾಜಕೀಯಕ್ಕೆ ಕಾಲಿಡುವುದಕ್ಕೂ ಮುನ್ನ ಜಯಲಲಿತಾ ಸಿನಿಮಾ ನಟಿಯಾಗಿ ಜನಪ್ರಿಯರಾಗಿದ್ದರು. ಒಬ್ಬ ರಾಜಕಾರಣಿಯಾಗಿ, ಸಿನಿಮಾ ನಟಿಯಾಗಿ ಅವರ ಎರಡೂ ಗೆಟಪ್ಗಳನ್ನು ‘ತಲೈವಿ’ ಚಿತ್ರದಲ್ಲಿ ತೋರಿಸಲಾಗಿದೆ. ಅದಕ್ಕೆ ತಕ್ಕಂತೆ ಕಂಗನಾ ತಮ್ಮ ದೇಹದ ತೂಕದಲ್ಲಿ ಏರಿಳಿತ ಮಾಡಿಕೊಂಡಿದ್ದಾರೆ. ಒಂದು ಗೆಟಪ್ಗಾಗಿ 20 ಕೆಜಿ ದೇಹ ತೂಕ ಹೆಚ್ಚಿಸಿಕೊಂಡಿದ್ದ ಅವರು ನಂತರ ಮತ್ತೆ ಸ್ಲಿಮ್ ಆದರು. ಅದಕ್ಕೆ ಸಾಕ್ಷಿ ಎಂಬಂತೆ ಈ ಫೋಟೋಗಳನ್ನು ಕಂಗನಾ ಶೇರ್ ಮಾಡಿಕೊಂಡಿದ್ದಾರೆ.
‘ತಲೈವಿ ಟ್ರೇಲರ್ ಬಿಡುಗಡೆ ಆಗಲು ಇನ್ನೊಂದು ದಿನವಷ್ಟೇ ಬಾಕಿ. ಕೆಲವೇ ತಿಂಗಳುಗಳಲ್ಲಿ 20 ಕೆಜಿ ಹೆಚ್ಚಿಸಿಕೊಳ್ಳುವುದು ಹಾಗೂ ಮತ್ತೆ ಸ್ಲಿಮ್ ಆಗುವುದು ಸವಾಲಾಗಿತ್ತು. ಇನ್ನು ಕೆಲವೇ ಗಂಟೆಗಳಲ್ಲಿ ಜಯಾ ಪಾತ್ರ ನಿಮ್ಮದಾಗಲಿದೆ’ ಎಂದು ಕಂಗನಾ ರಣಾವತ್ ಟ್ವೀಟ್ ಮಾಡಿದ್ದಾರೆ. ಜಯಲಲಿತಾ ಸಿನಿಮಾ ನಟಿಯಾಗಿದ್ದಾಗ ಹೇಗಿದ್ದರು ಹಾಗೂ ರಾಜಕೀಯಕ್ಕೆ ಕಾಲಿಟ್ಟ ನಂತರ ಯಾವ ರೀತಿ ಬದಲಾದರು ಎಂಬುದನ್ನು ತೋರಿಸುವಂತಹ ಮೂರು ಪೋಸ್ಟರ್ಗಳನ್ನು ಕಂಗನಾ ಹಂಚಿಕೊಂಡಿದ್ದಾರೆ. ಕಾಮೆಂಟ್ ಮೂಲಕ ಅಭಿಮಾನಿಗಳು ಇದಕ್ಕೆ ಮೆಚ್ಚುಗೆ ಸೂಚಿಸುತ್ತಿದ್ದಾರೆ.
ಮಾ.23ರಂದು ತಲೈವಿ ಟ್ರೇಲರ್ ಲಾಂಚ್ ಆಗಲಿದೆ. ಮುಂಬೈ ಮತ್ತು ಚೆನ್ನೈನಲ್ಲಿ ಏಕಕಾಲಕ್ಕೆ ಟ್ರೇಲರ್ ಬಿಡುಗಡೆ ಆಗಲಿದೆ. ಭಾರತದ ರಾಜಕಾರಣದಲ್ಲಿ ಜಯಲಲಿತಾ ಓರ್ವ ಪ್ರಭಾವಿ ಮಹಿಳೆ ಆಗಿದ್ದರು. ತಮಿಳುನಾಡಿನಲ್ಲಿ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿಕೊಂಡಿದ್ದರು. ರಾಜಕೀಯ ಮಾತ್ರವಲ್ಲದೇ ವೈಯಕ್ತಿಕ ಜೀವನದ ಕಾರಣದಿಂದಲೂ ಅವರು ಆಗಾಗ ಸುದ್ದಿ ಆಗುತ್ತಿದ್ದರು. ಅಂಥ ಪ್ರಭಾವಿ ಮಹಿಳೆಯ ಜೀವನದ ಘಟನೆಗಳನ್ನು ಈ ಸಿನಿಮಾದಲ್ಲಿ ಹೇಗೆ ತೋರಿಸಲಾಗಿದೆ ಎಂಬುದನ್ನು ತಿಳಿದುಕೊಳ್ಳುವ ಕೌತುಕ ಎಲ್ಲರ ಮನದಲ್ಲಿ ಮೂಡಿದೆ.
One day to go for the trailer launch of #Thalaivi Gaining 20 kgs and loosing it all back within a span of few months wasn’t the only challenge that I faced while filming this Epic Biopic, wait is getting over just in few hours Jaya will be your forever ❤️ pic.twitter.com/yeLDPfCdFQ
— Kangana Ranaut (@KanganaTeam) March 22, 2021
‘ತಲೈವಿ’ ಪಾತ್ರಕ್ಕಾಗಿ ಕಂಗನಾ ತಮಿಳು ಕಲಿತಿದ್ದಾರೆ. ಭರತನಾಟ್ಯ ಕೂಡ ಅಭ್ಯಾಸ ಮಾಡಿದ್ದಾರೆ. ಈ ಚಿತ್ರಕ್ಕೆ ಎ.ಎಲ್. ವಿಜಯ್ ನಿರ್ದೇಶನ ಮಾಡಿದ್ದು, ಏ.23ರಂದು ಹಿಂದಿ, ತಮಿಳು ಮತ್ತು ತೆಲುಗಿನಲ್ಲಿ ಬಿಡುಗಡೆ ಆಗಲಿದೆ.
ಇದನ್ನೂ ಓದಿ: ಅವಹೇಳನಕಾರಿ ಟ್ವೀಟ್ ಪ್ರಕರಣ: ಕಂಗನಾ ರಣಾವತ್ಗೆ ಕರ್ನಾಟಕ ಹೈಕೋರ್ಟ್ನಲ್ಲಿ ಹಿನ್ನಡೆ!
ಜಯಲಲಿತಾ ಅಂದ್ರೆ ನನಗೆ ತುಂಬಾ ಇಷ್ಟ ಅಂದಿದ್ರು ಮೋಹಕತಾರೆ ಶ್ರೀದೇವಿ
Published On - 10:57 am, Mon, 22 March 21
